1 “Hwa, qqim di tɛejjajt, a cem taɛzarect, yeǧis n Babil! Qqim x temmurt, war iǧi ɛad ijj n řɛarc, a yeǧis n Ikaldaniyyen! Maɣar war d am qqaren ɛad ‘Tamudrust’ niɣ ‘Llif’. ^■   2 Ksi tasirt, uca ḥriy awren! Kkes ařeḥḥaf nnem, sgeɛɛed abeḥrur nnem, ɛarra ifadden uca tcuqqed deg iɣezran! 3 Řeḥya nnem ad ittwaɛarra, ad tᵉttwaẓar ɛad řefḍiḥet nnem. Ad xeřfeɣ u war ssɛizziɣ x uřa d ijj n bnadem. ^■   4 Amefdi nneɣ, SIDI n řɛeskarat d Isem nnes, aqa-t d Amqeddas n Israil.”

5 “Qqim din uca sseɣd, ffeɣ ɣar barra di taǧest, a yeǧis n Ikaldaniyyen, maɣar war d am qqaren ɛad ‘Llalas n tgeldiwin’. 6 Necc ggiɣ aɣḍab inu ad idduqqez x řgens inu, ssɛiǧteɣ tasɣart inu uca ggiɣ ten deg ifassen nnem, maca cem war d asen tessecned arreḥmet. Ɛad i uwessar teqqned as taɣnact tedqeř. 7 Tennid: ‘Necc ad iřiɣ d llalas n tgeldiwin i řebda!’, mintra war teksid aya marra deg wuř, ɛemmarṣ war tidared qeṭṭu n uya marra.” ^■  

8 “Xenni řexxu, seř i uya, a cem tamɣart n meẓri, tenni i din iqqimen di řaman, tenni iqqaren deg wuř nnes: ‘D necc, war din teǧi uřa d ict nneɣnit! Ɛemmarṣ ad da qqimeɣ d tajjač, nhřa iḥenjiren war t ssineɣ!’ 9 Maca tnayen-a ad xam wḍan deg ict n tecti, deg ijj n wass: nhřa iḥenjiren d tajjač ad tiřid! Tnayen-a ad xam wḍan zi ssibbet n waṭṭas n tgezzant nnem d ubarru n tseḥḥart nnem. ^■  

10 Maɣar tᵉttecřed x tuɛeffna nnem, tennid: ‘War d ayi ittwiři uřa d ijjen!’ Tiɣit nnem d tussna nnem arrint cem ad tarred s weɛrur ɣari. Deg wuř nnem tennid: ‘D necc, war din iǧi uřa d ijj n nneɣni!’

11 S uya ad xam dd-yas řɣar d ameqqran. Mammec ad dd-inqar, war tessined qbeř. Aweddar ad xam iwḍa ařami war tzemmared ad as tessḥeyded. Deɣya ad xam dd-tas tecti, břa ma ad xas targbed qbeř.”

12 “Iwa arzu ad teqqimed tbedded din ak-d tgezzant nnem u ak-d ubarru nnem n tseḥḥart nni zi tessiḥřed ixef nnem zi temẓi nnem. Balak tzemmared ad ɣarem tiři tizi zi man aya, niɣ balak tzemmared ad tessiggʷeded s uya!

13 Tessiḥřed ixef nnem ak-d waṭṭas n ixarriṣen nnem. Iwa ad kkaren inni ittfekkan ajenna u ḥeṭṭan itran, inni ittkacafen min i dd ɣa yasen ɣar ubeddi n uyur, ejj i-ten ad cem ssnejmen zi min xam ɣa ikken ɣar zzat.

14 Xzar, nitni ad dewřen am uřum: ad ten tessecmeḍ tmessi, war zemmaren ad fekken řeɛmar nsen zeg ifassen n iceɛɛařen n tmessi. War ittiři řefḥem itteḥduduqen nni ɣar zɣařen, war iǧi uḥaduq nni ɣar zemmaren ad qqimen.

15 Ammu i ɣa iřin i cem inni umi tuɣa tessaḥařed ixef nnem, isebbaben nnem zi temẓi nnem. Kuř ijj ad yuyur deg webrid nnes, uřa d ijj war cem issenjim.”