1 “Řexxu maca, seř, a amsexxar inu Yaɛqub, u Israil nni farzeɣ! ^■   2 Ammu i iqqar SIDI, Wenni cek iggin, Wenni cek iggin zeg uɛeddis n yemmac, Wenni d ac iwcin afus: ‘War tteggʷed ca, a Yaɛqub, amsexxar inu, d Yacurun nni farzeɣ! 3 Maɣar Necc ad seyyḥeɣ aman x min iffuden d tseǧyawin x min yuẓɣen. Necc ad zeǧɛeɣ Arruḥ inu x zzariɛet nnek uřa d lbaraka inu x tarwa nnek. ^■   4 Nitni ad ɣemyen jar arrbiɛ, am iṣefṣafen ɣar tɣezratin n waman. 5 Ijjen ad yini: ‘Necc n SIDI!’ uca ijjen nneɣni ad iřaɣa ixef nnes s yisem n Yaɛqub, u ɛawed ijjen nneɣni ad yari s ufus nnes: ‘Necc n SIDI!’ uca ad ikenna ixef nnes s yisem icenɛen ‘Israyil’.’ ”

6 “Ammu i iqqar SIDI, Ajeǧid n Israil, d Amefdi nnes, SIDI n řɛeskarat: ‘Necc d Amezwaru, Necc d Aneggaru, nhřa Necc war iǧi uřa d ijj n AREBBI nneɣni. ^■   7 Man wen izemmaren ad ibarreḥ am Necc? Ejj i-t ad t yini u ad ayi t isscen! Aqa Necc ẓẓuɣ řgens n wakud n zic. Ejj i-ten ad asen ɛawden timesřayin n tiwecca, min i dd ɣa yasen ɛad. 8 War tnexřiɛem u war tteggʷdem. Ma war d awem t-i-dd-ssiwḍeɣ zeg wakud n zic ɣar imezzuɣen nwem u ma war ḥajiɣ t? Kenniw d řechud inu: Ma aqa din ijj n Arebbi nhřa Necc? War din iǧi uřa d ict n Teṣḍart nneɣni, Necc war ssineɣ uřa d ijjen.’ ” ^■  

9 “Inni itteggen řexyařat ineqcen aqa war neffɛen, u řexyařat nni ttexsen nitni war neffɛent deg walu. Nitni s yixef nsen d řechud nsent aqa war ttwiřint u war ssinent walu, ařami i ɣa dewřen ttseḍḥan nitni.

10 Man wen itteggen ijj n arebbi u man wen ittkebban řexyař n ṣṣanam am war ɣares bu tizi zzayes?

11 Xzar, marra icricen nsen ad dewřen ttseḍḥan, maɣar ayt n bu-ṣṣenɛet d iwdan waha. Ejj i-ten ad munen, ad kkaren, ad nnxeřɛen, nitni ad dewřen ttseḍḥan jmiɛ. ^■  

12 Amziř n wuzzař ɣares imeydi n wemziř, ixeddem ɣar řefḥem itteḥduduqen, ittqarres řexyař s ifḍisen nnes. Ixeddem i-t s uɣiř ijehden. Netta iǧuẓ ařami war ɣares iqqim bu jjhed ɛad. War isess aman ɣares ař ɣa yaḥeř aṭṭas. ^■  

13 Anejjar iɛebbar tafrewt s ufiřu nnes n řeɛbar, yareccem řexyař ineqcen s ukerraj, u inejjar i-t řmus uca yareccem i-t s ddewara u igga i-t di ṣṣifet n bnadem maḥend ad ittwassars deg ict n taddart.

14 Izeddem ticejjura n tengelt i yixef nnes, ikessi ict n tcejjart n ssidri niɣ n řbeǧuḍ, yarezzu i yixef nnes jar tcejjura n wezɣar. Itteẓẓu ict n tayda uca tmeqqar s wenẓar. ^□  

15 Tanita d řefḥem i bnadem. Ikessi zzayes uca iẓɣařa ixef nnes ɣares. Ɛawed issraqqa timessi, issnenna zzayes aɣrum. Ɛawed ittegg zzayes ijj n arebbi uca ittaḍar as, ittegg zzayes řexyař ineqcen uca isejjad as.

16 Ijj n wezyen n ukeccuḍ zzayes issecmaḍ i-t s tmessi, ak-d wezyen iqqimen ittett aysum. Icennef aysum uca ittyawan. Iẓɣařa ixef nnes, iqqar: ‘Ah, mammec ḥemmiɣ, necc ttaciɣ ak-d tmessi!’

17 Zi min iqqimen n ukeccuḍ ittegg ijj n arebbi, ijj n řexyař ineqcen. Isejjad as uca ittaḍar, ittẓaǧa ɣares, iqqar: ‘Senjem ayi, minzi cek d arebbi inu!’ ”

18 “War ssinen, war ttḥikin, maɣar tiṭṭawin nsen mesḥent umi war ttwiřin walu, uca uřawen nsen war tteftinen.

19 Uřa d ijj ittegg i-tt ɣar wuř nnes uca war din bu tussna uřa d řefhamet ḥima ad inin: ‘Ijj n wezyen zzayes sscemḍeɣ t di tmessi. Ssnenneɣ aɣrum x řefḥem nnes itteḥduduqen u cenfeɣ aysum u cciɣ t. Zi min iqqimen n ukeccuḍ ma ad zzayes ggeɣ jjɛifect n ṣṣanam, ma ad sejdeɣ zzat i ukeccuḍ n tcejjart?’ ^□   20 Netta ihedda iɣɣeḍ, uř nnes ittwaɣarren iɣekkwa i-t. War izemmar ad issenjem řeɛmar nnes, ad yini: ‘Ma xenni war din iǧi řɣecc deg ufus afusi inu?’ ”

21 “Ɛqeř x man aya, a Yaɛqub, a cek Israil! Maɣar aqa cek d amsexxar inu, Necc kewwneɣ cek, cek d amsexxar inu, a Israil, war cek ttᵉttuɣ ca. 22 Necc messḥeɣ iɛeddiyen nnek am tayyut uřa d ddnub nnek am useynu. Dweř-dd ɣari, maɣar Necc fekkeɣ cek.”

23 “Ɣennjem s řefraḥet, a ijenwan, maɣar SIDI igga i-t. Sřiwřewet, a řaǧaɣ n temmurt, ksim deg iɣuyyan s řefraḥet, a idurar, sřiwřiwem, a izeɣran d marra ticejjura i dayes iǧan! Maɣar SIDI ifekk i Yaɛqub u issɛuǧa ixef nnes di Israil.” ^□  

24 “Ammu i iqqar SIDI, Amefdi nnek, Wenni cek iggin zeg uɛeddis n yemmac: ‘Necc d SIDI wenni iggin marra, wenni ittbezzaɛen ajenna, Necc waha, Necc d wenni issarsen tammurt. Man wen tuɣa xenni akidi? ^■   25 Necc d wenni ibeṭṭřen řeɛřamat n ayt n bu-ixarriqen uca ssbuhřiɣ igezzanen, d wenni isswexxaren imiɣisen u yarra tussna nsen d taɣyuři, 26 wenni issmetnen awař n umsexxar nnes u isseqfeř ccwar n ireqqasen nnes, wenni iqqaren i Urcalim: ‘Ad dayem iřin imezdaɣ ɛad!’ uca i kuř ict zi tneddam n Yahuda: ‘Cem ad tᵉttwasbedded ɛawed!’ uca ‘Necc ad ssbeddeɣ řxirbat nnes ɛawed!’, 27 wenni iqqaren i waman yuǧɣen: ‘Aẓɣem, Necc ad ssiẓɣeɣ iɣezran nwem!’, 28 wenni iqqaren i Kurac: ‘Netta d ameksaw inu, netta ad isseqfeř řxaḍar inu, umi ɣa inin i Urcalim: ‘Ad cem ɛedřen!’, u i Zzawect Tameqqrant: ‘Ad am ggen dsas!’ ”