1 “Maca řexxu, ammu i iqqar SIDI, wenni cek dd-ixeřqen, a Yaɛqub, d wenni d Amkewwan nnek, a Israil, war tteggʷed ca, maɣar Necc fekkeɣ cek, řaɣiɣ ac s yisem nnek, cek inu. 2 Mařa tcuqqed deg waman, ad iřiɣ akidek, mařa deg iɣezran, war cek ttiwyen. Mařa teẓwid x tmessi, war tcemmḍed, uca aceɛɛař war cek issruɣa. ^■   3 Maɣar Necc d SIDI, AREBBI nnek, Amqeddas n Israil, Amsenjem nnek. Necc wciɣ Miṣra d ttaman n weṣřaḥ i cek, Kuc d Saba deg wemcan nnek. 4 Minzi tsekkwid aṭṭas di tiṭṭawin inu, aqa tᵉttwasɛuǧed u Necc ttexseɣ cek. S uya wciɣ iwdan deg wemcan nnek d ccuɛub deg wemcan n řeɛmar nnek. 5 War tteggʷed ca, maɣar Necc akidek. Ad awyeɣ iḥenjiren nnek zi mani dd-tneqqar tfuct, ad cek ssmuneɣ zi mani dd-tɣeǧi tfuct. ^■   6 Necc ad iniɣ i ccamal: ‘Ewc!’ u i ljanub: ‘War ttᵉṭṭef!’, arekkʷeḥ iḥenjiren inu zi řaggʷaj, yessi zi tma n temmurt, 7 kuř ijjen wenni umi ttřaɣan s Yisem inu, wenni dd-xeřqeɣ i ccan inu, wenni kewwneɣ d wenni ggiɣ ɛawed.”

8 “Ejj ad iffeɣ řgens adarɣař, waxxa ɣarsen tiṭṭawin, uřa d iduhcaren, waxxa ɣarsen imezzuɣen.

9 Ejj ad ttwasmunen marra řegnus uca ejj ccuɛub ad nnjarwen! Man wen zzaysen izemmar ad ibarreḥ ta d man wen izemmar ad aneɣ yini min tuɣa iǧan zic? Ejj i-ten ad awyen řechud nsen maḥend ad ttwaseggden, uca ejj řechud ad sřen, ad inin: ‘D tidett!’

10 Kenniw d řechud inu uřa d amsexxar inu nni farzeɣ, ḥima ad tessnem, ad dayi tamnem, ad tfehmem aqa Necc d Netta. Qbeř Necc war ittwagg uřa d ijj n arebbi uca awarni ayi war ittiři uřa d ijjen!, iqqar SIDI. ^■  

11 Necc, Necc d SIDI, u war iǧi umsenjem mɣir Necc.

12 Necc barrḥeɣ u ssnejmeɣ u Necc iwyeɣ awem t-i-dd ɣar umejjun. Uřa d ijj n arebbi řbarrani war tuɣi jar awem. Kenniw d řechud aqa Necc d Arebbi, ammu i iqqar SIDI.

13 Uřa zeg wass-a, aqa Necc d Netta uca uřa d ijj war izemmar ad issfekk zeg ufus inu! Mařa Necc xedmeɣ, man wen izemmaren ad t yarr?” ^■  

14 “Ammu i iqqar SIDI, Amefdi nwem, Amqeddas n Israil: ‘Di ṭṭweɛ nwem ssekkeɣ ijjen ɣar Babil uca ad ten arreɣ ad arewřen, uca ad hwan marra Ikaldaniyyen deg iɣurraba nni zi tuɣa farrḥen ammu qbeř.

15 Necc d SIDI, Amqeddas nwem, wenni dd-ixeřqen Israil, Ajeǧid nwem.’ ”

16 “Ammu i iqqar SIDI nni iggin abrid di řebḥar d tebridt deg waman ijehden,

17 wenni ijjin ikarruten d yeysan, řɛeskar d jjehd ad ffɣen - aqa da, zzřen munen, war ttnekkaren ɛemmarṣ, xesyen, qḍan am teftič n tiffest! -

18 ammu i iqqar SIDI: ‘War ttɛeqřem ɛad x min tuɣa iǧan zic, war ttidarem ɛad min iɛdun.

19 Xzar, ad ggeɣ min iǧan n jdid, řexxu ad dd-iffeɣ. Ma war d as tḥekkarem ca? Wah, Necc ad ssarseɣ abrid di řexřa, iɣzaren di tnezruft. ^■   20 Řmař n řexřa ad ayi ssɛuǧan, uccanen n řexřa d yessis n nnɛamet, maɣar Necc ad ggeɣ aman ad azzřen di řexřa uřa d iɣezran di tnezruft, ḥima ad ssesweɣ řgens inu, inni farzeɣ. 21 Řgens-a ggiɣ t i Necc, nitni ad barrḥen ccan inu.’ ” ^■  

22 “Maca cek war d ayi dd-třaɣid, a Yaɛqub, war tessiḥřed ixef nnek akidi, a Israil! 23 Cek war d ayi dd-tiwyed ijjen zeg wuǧi n tɣarṣa nnek n wecmaḍ, uca s tɣarṣi nnek war d ayi tcenɛed. Ɛemmarṣ war cek ḥṣareɣ ɣar tewhibin n řɣiǧet u war cek ssiḥřeɣ ɛemmarṣ s jjawi. 24 Cek war d ayi tesɣid aɣanim n uḥemmum ittfuḥen s ttmenyat n nnuqart uca war d ayi tessjiwned s tadunt n tɣarṣa nnek, maca s ddnub nnek tarnid ayi-dd řxedmet, s řmuɛṣiyyat nnek tessiḥřed ayi.”

25 “Necc, d Necc, wenni i ɣa imesḥen iɛeddiyen nnek di ṭṭweɛ inu, Necc war ttidareɣ ɛad ddnub nnek. ^■   26 Arr i-ten ɣar řbař inu, ejj aneɣ ad nemcarreɛ, wwet x yixef nnek maḥend ad dd-tawyed tasɣart nnek. ^■   27 Babac amezwaru ixḍa u uřa d imseṣřaḥen nnek ɛdun xafi. ^□   28 S uya ssɛiǧteɣ imeqqranen n Zzawect Iqeddsen, u arriɣ Yaɛqub i uteḥḥi uca jjiɣ Israil maḥend ad t ɛeyyben.”