16
1 Bnadem ɣares ixarriṣen deg wuř nnes, maca tamwarrit n yiřes tᵉttas-dd zi SIDI. ■
2 Marra ibriden n weryaz ṣfan di tiṭṭawin nnes,
maca SIDI ittqeǧab buḥbeřat. ■
3 Sars řexdayem nnek i SIDI,
uca xenni ad ttwasmettnen inwayen nnek. ■
4 SIDI ixřeq-dd marra i lɣaraḍ nnes,
ɛad uřa d aɛeffan igga i-t i wass n řɣar.■
5 Kuř amɛeffar d nnɛi i SIDI,
afus xas, netta war ittᵉttwabarri ɛemmarṣ. ■
6 S tmexsiwt icewwaren d řaman ad ittwaṣřeḥ řɣecc,
u s tiggʷudi n SIDI ittḥeyyad weryaz x řɣar.
7 Mařa usin-dd ibriden n ijj n weryaz x řxaḍar n SIDI,
ad yarr Netta uřa d řɛedyan nnes ad kides ggen řehna.
8 Iḥra drus ak-d tsegda
x waṭṭas n řɣiǧet břa řḥeqq. ■
9 Uř n bnadem ittxarreṣ abrid nnes,
maca SIDI ineddeh iṣuraf nnes. □
10 Řḥukm břa adwař x iyencicen n ujeǧid,
aqemmum nnes war ixeṭṭi deg weḥkam.
11 Řmizan nican d ṭṭawyat n řmizan nican aqa aten n SIDI,
marra iẓra n řewzen di tecyart d řxedmet nnes. ■
12 D nnɛi i ijeǧiden xmi i ɣa ggen řɣar,
maɣar řɛarc ittwassemten zi tsegda.
13 Iyencicen i iccuren s tsegda tteɛjiben i ujeǧid,
u wenni issawařen nican, ittexs i-t netta.
14 Asɛar n ujeǧid am lmalakat n řmewt,
maca aryaz amiɣis izemmar ad ɣares tt i-dd yarr. ■
15 Di tfawt n wudem ittissiqen n ujeǧid teǧa tudart,
arḍa nnes am useynu n wenẓar di tefsut. ■
16 Aqa teḥřa tarezzut n tiɣit x wureɣ ittissiqen,
u mecḥař ktar ad tiři twafit n řefhamet sennej x twafit n nnuqart. ■
17 Ittwassgeɛɛed webrid n yinni igguren nican maḥend ad iḥeyyed x řɣar.
Wenni iḥeṭṭan abrid nnes, iḥeṭṭa řeɛmar nnes.
18 Tanefsect tᵉttizwar-dd i arẓẓiyyet,
u nnfaxet tᵉttas-dd qbeř i uweṭṭu. ■
19 Iḥřa aqnaɛ n buḥbeř ak-d inni ittwaḥṣaren,
x ubeṭṭu n tkeccaḍt ak-d ayt-nnfaxet.
20 Wenni ittxarraṣen mliḥ di ca n tmesřact, ad yaf řxar,
sseɛd n wenni ittcařan x SIDI.■
21 Wenni ɣar iǧa wuř d amiɣis, ad t semman bu-weftan,
u taẓyudi n řhard n iyencicen tarenni di řefhamet.
22 Řeɛqeř d řɛunṣar n tudart i bab nnes,
maca ttarbiyyet i ibuhařiyyen d tubbuheřya waha.■
23 Uř n umiɣis ittarra aqemmum nnes ifehhem,
zeg iyencicen nnes ad fehmen ktar.
24 Awařen icewwaren ggin am tamment n teɣrast,
aqa-ten d imiẓiden i řeɛmar d ugenfu i yexsan.
25 Ad taɣ ittɣiř as i ca n yijjen aqa abrid nnes nican,
maca aneggar nnes mɣir ibriden ittawyen ɣar řmewt. ■
26 Řaẓ n ucewwar ixeddem as i netta,
maɣar aqemmum nnes ineddeh i-t.
27 Aryaz i war isekkwin iɣezza řɣar,
x iyencicen nnes amecnaw ict n tmessi ittceɛɛařen. ■
28 Aryaz iccuren s řexdaɛat issekkara amenɣi,
u axbarji ittawi-dd ɛad abeṭṭu ak-d umeddukkeř iṣebḥen aṭṭas. ■
29 Aryaz bu-řexcunet ittɣarra amqarreb nnes,
ineddeh i-t ɣar ijj n webrid war iǧin mliḥ.
30 Netta itteqqen tiṭṭawin nnes maḥend ad ixarreṣ marra ddarbat n řexdaɛet,
ittkemmec iyencicen nnes, aqa da igga řɣar. ■
31 Acewwaf icaben d ict n temrist izewwqen,
tzemmared ad tt tafed x webrid n tsegda.
32 Iḥřa bu-ttasiɛ n řxaḍar x ijj n weryaz ijehden
u wenni ittebbaten buḥbeř nnes iḥřa x wenni iḥewwsen ict n tendint.
33 Taqedduḥt temmenḍar deg weḥsin,
maca mkuř array ittas-dd zi SIDI.