15
1 Twarrit ifsusen tessesmaḍ axeyyeq, maca awař itteqqsen issekkara-dd axeyyeq. ■
2 Iřes n imiɣisen ijebbed tussna ɣar zzat,
maca aqemmum n ibuhařiyyen ittazzeř s tubbuheřya. ■
3 Tiṭṭawin n SIDI di kuř amcan,
ttḥekkarent i iṣebḥanen d iɛeffanen. ■
4 Iřes nni issgenfan d tacejjart n tudart,
maca arrhaj nnes ittareẓẓa buḥbeř. □ ■
5 Abuhaři ineṭṭar ttarbiyyet n babas,
maca wenni ittḥekkaran i uwebbex, aqa iften.
6 Di taddart n umseggad din řkenz imɣar,
maca di min dd-ittawi uɛeffan dayes tamara.
7 Iyencicen n imiɣisen ttbezzaɛen tussna,
maca war iǧi amenni uř n ibuhařiyyen.
8 Taɣarṣt n iɛeffanen d nnɛi i SIDI,
maca taẓaǧit n inni igguren nican aqa-tt i Netta d arḍa. ■
9 Abrid n uɛeffan d nnɛi i SIDI,
maca wenni iḍeffaran tasegda, ittexs i-t Netta.
10 Tarbiyyet iqesḥen třeqqef wenni isemḥen deg webrid,
u wenni icarrhen awebbex, ad immet.
11 Řaxart d tesraft aqa din arezmen zzat i SIDI,
mecḥař ɛad wuřawen n tarwa n bnadem? ■
12 Amestehziy war ittexs wenni t i ɣa iwebbxen,
war ittriḥ ca ɣar imiɣisen.
13 Uř ifarḥen ittegg udem icnan,
maca amnus deg wuř isekkef buḥbeř. ■
14 Uř ifehhmen yarezzu tussna,
maca aqemmum n ibuhařiyyen issecca ixef nnes s tubbuheřya.
15 I yenni ittwaḥṣaren marra ussan nsen aqa iɛeffnen,
maca uř ifarḥen am macca war iqeṭṭin.
16 Iḥřa drus ak-d teggʷudi n SIDI,
x ijj n řkenz d ameqqran s řeḥweř. ■
17 Iḥřa ijj n ṭṭebṣi n řxuḍart mani tḥekkem tayri,
x ijj n ufunas imesřen s wecrah. ■
18 Aryaz iseɛɛaren deɣya issekkara imenɣiyyen,
maca wenni ɣar iǧa ttasiɛ n řxaḍar issexsay amenɣi. ■
19 Abrid n umeɛguz am cbarq ak-d isennanen,
maca amesruq n yinni igguren nican aqa ittwassgeɛɛed.
20 Mmis amiɣis issfarreḥ babas,
maca bnadem abuhaři isseḥqara yemmas. ■
21 Tubbuheřya aqa-tt d řefraḥet i wenni war ɣar iǧi bu wuř imten,
maca ijj n weryaz n řefhamet iggur nican. ■
22 Inwayen feccřen mařa war din iǧi ccwar,
maca s waṭṭas n imcawaren ad yiři wenway. □ ■
23 Aryaz ɣares řefraḥet di twarrit iṣebḥen zeg uqemmum nnes,
u mecḥař iṣbeḥ wawař di řweqt nnes.
24 Abrid n tudart ineddeh ɣar sennej i ufehham,
maḥend netta ad iḥeyyed x řaxart swadday.
25 Taddart n bu-nnfaxet ad tt iqřeɛ SIDI,
maca aymir n yeyyar n tajjač issemtan i-t Netta. ■
26 Ixemmimen n uɛeffan d nnɛi i SIDI,
maca awařen icewwaren d imezdagen. ■
27 Wenni yarezzun x arbeḥ iɣeṭṭeř taddart nnes di arrẓiyyet,
maca wenni icarrhen tarzifin, ad iddar. ■
28 Uř n imseggaden ittxarraṣ maḥend ad dd-yarr,
maca aqemmum n iɛeffanen ittfeyyeḍ s ɛřam kuř řɣar.
29 Iggʷej SIDI x iɛeffanen,
maca taẓaǧit n imseggaden ittesřa as. ■
30 Tafawt di tiṭṭawin tessfarreḥ uř,
řexbar aṣebḥan issyuma ixsan. ■
31 Amezzuɣ ittesřan ɣar uwebbex i tudart,
ad issens di řwest n imiɣisen.
32 Wenni ineṭṭaren ttarbiyyet, isseḥqara ixef nnes,
maca wenni ittesřan ɣar uwebbex, issyawan uř nnes.
33 Tiggʷudi n SIDI d ttarbiyyet ɣar tiɣit,
u awaḍeɛ ittizwar i ccan. ■