11
1 Řmizan aɣeccac d nnɛi i SIDI, maca aẓru n řewzen nican ittaf arḍa nnes. ■
2 Mařa tusa-dd nnfaxet, tusa-dd uřa d řefḍiḥet,
maca ɣar imwaḍɛen teǧa tiɣit. ■
3 Řeṣfayet n inni igguren nican tneddeh i-ten,
maca taḥraymect n iɣeddaren taředdeǧ i-ten. ■
4 Agřa war ineffeɛ ɣar wass n uduqqez n ufugem,
maca tasegda tessenjam zi řmewt. ■
5 Tasegda n wenni igguren nican ittarra abrid nnes nican,
maca aɛeffan iweṭṭa s tuɛeffna nnes.
6 Tasegda n inni igguren nican ad ten tessenjem,
maca iɣeddaren ad ttwacarfen deg umeẓri nsen.
7 Mařa immut bnadem aɛeffan, ifna usitem nnes,
uřa d min ttrajan yeryazen ittɣeccan ad ifna.
8 Amsegged ad dd-ittwafekk zi řeḥṣaret,
uca xenni aɛeffan ad dd-yas deg wemcan nnes.■
9 Amnafeq ittareddeǧ amqarreb nnes s uqemmum nnes,
maca imseggaden ad ttwafekken s tussna. □
10 Tandint tᵉttesřiwřiw mařa imseggaden aqa aten mliḥ,
u mařa ttwahellken iɛeffanen, aqa din asřiwřew.
11 Tᵉttwasgeɛɛed tendint s lbaraka n inni igguren nican,
maca s uqemmum n iɛeffanen ad tᵉttwahdem.
12 Wenni war ɣar iǧi ca wuř imten, isseḥqara amqarreb nnes,
maca aryaz wenni ɣar iǧa řefhamet ittesqar.
13 Wenni igguren da d diha s texbarjit, ittɛarra min innuffaren,
maca wenni i di iǧa arruḥ dayes řaman, aqa issnuffara tamesřact.
14 Mařa war din adebbar, iweṭṭa řgens,
maca ad yiři usenjem s řemɣaret n umcawar. ■
15 Wenni iḍemmnen řbarrani, war dd as tᵉtteffeɣ ca mliḥ,
maca wenni icarrhen inni itteggen ticti x ufus i man aya, aqa-t di řaman.
16 Tamɣart tᵉttaf arḍa, tᵉṭṭef di řɛezz nnes,
maca ayt n bu-řexcunet ttᵉṭṭfen deg wagřa.
17 Bnadem s tmexsiwt icewwaren ittegg řxar i řeɛmar nnes,
maca wenni ittɣezzan arrimet n yixef nnes, aqa netta d aqessaḥ.
18 Aɛeffan imejjar řɣiǧet n řɣecc,
maca wenni izarrɛen tasegda, imejjar ict n řmunet imetnen.
19 Tasegda nican tᵉttawi ɣar tudart,
wenni yareddfen řɣar, yarezzu řmewt nnes.
20 Inni ɣarsen uř ifarɣen aqa aten d nnɛi i SIDI,
maca inni igguren nican Netta yareṭṭa daysen.
21 S tidett, aɛeffan war ittɣimi břa řexřaṣ,
maca tarwa n imseggaden ad ttwasnejmen. ■
22 Amecnaw ict n txadent n wureɣ di tinzar n yiřef,
ammu i teǧa ict n temɣart tecna war di iǧa umeyyez.
23 Meẓri n imseggaden mɣir ɣar min iṣebḥen,
maca asitem n iɛeffanen aqa-t nhřa řeɛbar.
24 Aqa din ijjen wenni ibeṭṭan s wecrim, waxxa amenni ittwarni as ɛad ktar,
u aqa din ijjen wenni imennɛen ktar x min icuwwaren,
waxxa amenni aya ineddeh ɣar zzeřḍ.
25 Řeɛmar nni ittbarken ad ittwasjiwen,
u wenni itticen aman, ad as immewc waman i netta simant nnes. ■
26 Wenni ittxemmařen imendi, ineɛɛeř i-t cceɛb,
maca lbaraka ad tiři x uzeǧif n wenni iznuzan imendi.
27 Wenni ittceṭṭaren di ṭṭweɛ n min iṣebḥen, yarezzu min yarḍan,
maca wenni ittḥaman řɣar, ad t iřqef. ■
28 Wenni ittcařen x wagřa nnes, ad iwḍa,
maca imseggaden ttneɛniɛen am ifetwan izizawen.■
29 Wenni ihekkwřen aytbab n taddart nnes, ad iwart asemmiḍ,
u abuhaři ad yiři d amsexxar n wenni di iǧa wuř amiɣis.
30 Řɣiǧet n umseggad d ict n tcejjart n tudart,
wenni yarebbḥen řeɛmur aqa-t d amiɣis. □
31 Xzar, aqa ad ittwaxeǧeṣ umsegged di temmurt,
xenni mahu aɛeffan d umednub. ■