10
1 Awařen iweznen n Suliman Ijj n mmis d amiɣis issfarraḥ baba as,
maca ijj n ubuhaři n mmis d wenni d amnus ameqqran n yemmas. ■
2 Tixubay n tuɛeffna war nneffɛent,
maca tasegda tᵉttfekka zi řmewt. ■
3 SIDI war ittejji řeɛmar n imseggaden ad iḥeyyef,
maca meẓri n iɛeffanen iɛarren i-t ɣar řaggʷaj.
4 Wi ixeddmen s ufus yarxun, ittawi-dd zzeřḍ,
maca afus n yinni ittceṭṭaren ittawi-dd agřa. ■
5 Wenni iyarrwen deg unebdu, d ijj n mmis ifehhmen,
maca wenni itteṭṭṣen di tmeyra, d ijj n mmis n řefḍiḥet.
6 Lbarakat aressant x uzeǧif n imseggaden,
maca lɛunf issduřuy aqemmum n iɛeffanen.
7 Řidaret i umsegged ad dd-yawi lbaraka,
maca isem n iɛeffanen ggur ad yarṣuḍ.
8 Wenni d amiɣis deg wuř, ad iqbeř tiweṣṣa,
maca wenni issawařen tubbuheřya s iyencicen nnes, ad iwḍa. ■
9 Wenni igguren di řeṣfayet, iggur di řaman,
maca wenni igguren ibriden ifarɣen, ad ittwassen.
10 Wenni ittɣemmazen s tiṭṭawin, itteggen řeḥriq,
wenni issawařen tubbuheřya s iyencicen nnes, ad iwḍa.
11 Aqemmum n umsegged d tařa n tudart,
maca lɛunf issduřuy aqemmum n iɛeffanen. ■
12 Acrah tessekkara-dd imcubbecen,
maca tayri tessdurruy marra ixeṭṭan. ■
13 X iyencicen n wenni ɣar iǧa řefhamet tᵉttwaf tiɣit,
maca aɛmud i wenni war ɣar iǧi bu wuř imten. ■
14 Imiɣisen ttxemmaren tussna,
maca aqemmum n ubuhaři ittades ɣar uhellek.
15 I bu-wagřa min iǧan nnes d tandint ijehden nnes,
lebla n imezřaḍ d ahellek nsen.
16 Řɣiǧet n umsegged aqa-tt i tudart,
řmunet n uɛeffan i ddenb.
17 Wenni iḥeṭṭan ttarbiyyet, aqa-t x webrid n tudart,
maca wenni isemmḥen deg uwebbex, ggur ad iweddar.
18 Wi itteffaren acrahi ɣares iyencicen ssxarriqen,
wi ittceqqafen aqa-t d abuhaři.
19 Ɣar waṭṭas n wawařen war iqqim uxeṭṭu ineqqes,
maca wenni imennɛen iyencicen nnes, aqa ittegg s řeɛqeř.
20 Nnuqart iqquren d iřes n umsegged,
uř n iɛeffanen war isekkwin.
21 Iyencicen n imseggaden sseccan aṭṭas,
maca ibuhařiyyen mmuten umi war ɣarsen bu wuř imten.
22 Lbaraka n SIDI tᵉttawi-dd agřa,
arber n bnadem war dayes yarenni walu.
23 I ubuhaři tameggit n řefḍihet am ict n řuraret,
maca i weryaz n řefhamet adebbar s tiɣit am man aya. ■
24 Min zi itteggʷed uɛeffan ad t iřqef,
maca asitem n imseggaden ad yiři.
25 Mařa teɛdu-dd tḥaryaḍt, aɛeffan war ittɣimi,
maca amsegged ad iqqim imten i řebda.
26 Am binu asemmam i teɣmas d ddexxan i tiṭṭawin,
ammu i igga umeɛguz i yenni t issekken.
27 Tiggʷudi n SIDI tarenni deg ussan i tudart,
maca iseggʷusa n iɛeffanen ttwasquḍḍen. ■
28 Tarajit n imseggaden d řefraḥet,
maca asitem n iɛeffanen ggur ad ifna. ■
29 Abrid n SIDI d lburj ijehden i wenni igguren nican,
maca d ahellek i yenni itteggen řɣecc. ■
30 Amsegged ɛemmarṣ ad inhezz i řebda,
maca iɛeffanen war ggur ad qqimen zeddɣen di temmurt.
31 Aqemmum n umsegged ittawi-dd tiɣit s waṭṭas,
maca ijj n yiřes iɛemmar s řexdaɛat ad ittwaqess.
32 Iyencicen n umsegged ssnen min yarḍan,
maca aqemmum n uɛeffan issen řexdaɛat waha.