Ařaɣi n tiɣit
8
1 Ma war tᵉttřiɣi Tiɣit u war tesgiɛɛid Řefhamet tmijja nnes? ■ 2 X tqiccat n řegɛudi x webrid,
mani ttemseřqan imesraq tbedd Nettat d abeddi.
3 Ɣar uɣezdis n tewwura, ɣar wadaf n tendint,
mani i ɣa tadfed x tewwura, tᵉttřaɣa s jjehd:
4 “I kenniw, a iryazen, ttřaɣiɣ,
tmijja inu tᵉtteffeɣ ɣar tarwa n bnadem.
5 Kenniw iḥafiyyen, fehmem xenni min iǧan d aftan,
kenniw ibuhařiyyen, fehmem s wuř nwem.
6 Sřem, minzi ad ssiwřeɣ awařen i dd-ijebbden řeften,
anurzem n iyencicen inu jebbed-dd timesřayin iseggden,
7 maɣar aneɣ inu ad yini tidett s nneyyet,
řhard iɛeffnen aqa-t d nnɛi i iyencicen inu.
8 Marra awařen n uqemmum inu tteffɣen-dd zi tsegda,
war daysen uřa d ict n řḥajjet ixnunnesen niɣ ifarɣen.
9 Aqa aten marra ṣfan i wenni di teǧa řefhamet,
uřa s řeqyas i yenni ixsen ad afen tussna.
10 Ksim ttarbiyyet inu, war iǧi nnuqart,
uřa tussna ktar x wureɣ iqquren,
11 Maɣar Tiɣit ḥsen zi řmarjan,
marra min di izemmar bnadem ad imeẓri,
war izemmar ad dayes yarwes. ■
12 Necc, Tiɣit, zeddɣeɣ ɣar weftan,
ttafeɣ tussna s uḥadur.
13 Tiggʷudi n SIDI d acrah n řɣar d nnfaxet d tcennaɛt d umesruq aɛeffan,
Necc carrheɣ uřa d aqemmum iccur s řexdaɛat.
14 Ɣari acawar d twiza,
Necc d Řefhamet, ɣari jjehd.
15 Zzayi ḥekkmen ijeǧiden,
zzayi ttareysen ayt n jjehd s tsegda.
16 Zzayi ḥekkmen řḥukkam d tarwa n taṣiřet,
marra řquḍat n temmurt.
17 Necc ttexseɣ marra inni d ayi ittexsen,
d yenni xafi yarezzun zic, ad ayi afen.
18 Agřa d ccan aqa aten ɣari,
agřa iqqimen d tsegda. ■
19 Fruta inu tecna x wureɣ ittissiqen u x wureɣ azdad,
řɣiǧet inu teɛdu nnuqart iqquren.■
20 Necc ggureɣ x umesruq n tsegda,
di řwest n imesraq n řḥeqq,
21 ḥima ad arreɣ inni d ayi ittexsen ad ṭṭfen ict n tesɣart d řwart,
Necc ad ccureɣ ixxamen n txubay nsen.
22 SIDI igga ayi am umezwaru n webrid nnes,
ɛad ɣar umezwaru n tmegga nnes deg wecḥař uya.
23 Zi řebda ittwazeǧeɛ xafi jjehd, zeg umezwaru,
zi řweqt nni di ittwagg dsas n temmurt, ■
24 umi war din tuɣi ɛad aman yuǧɣen, necc ttwaxeřqeɣ-dd,
umi war din tuɣi ɛad řɛunṣarat ccurent s waman.
25 Qbeř ma ad ttwaggen idurar,
qbeř ma ad iřint tewririn, tuɣa xeřqeɣ-dd Necc.
26 Netta tuɣa ɛad war dd-ixřiq tammurt d iyyaren,
uřa d tamezwarut n tɛejjajt n ddunect.
27 Umi Netta igga ijenwan, tuɣa ayi din,
umi Netta yarcem ict n tqurarect x wudem n waman yuǧɣen. ■
28 Umi Netta igga iseynuten sennej,
umi ttwajehdent řɛunṣarat n waman yuǧɣen, ■
29 umi Netta igga i řebḥar aymir nnes,
maḥend aman war dd-ɛeddun řumur nnes,
umi Netta iɛbar dsusa n temmurt, ■
30 tuɣa ayi d amudrus iɛizzen ɣar uɣezdis nnes.
Necc tuɣa ayi marra d tarrit n meẓri ass x wass,
ttirareɣ zzat i wudem nnes řebda, ■
31 ttirareɣ di marra tammurt nnes,
am tuɣa tarrit n meẓri inu ak-d tarwa n bnadem.
32 Xenni řexxu, a iḥenjiren inu, sřem-dd ɣari!
Sseɛd n yinni iḥeṭṭan ibriden inu. ■
33 Sřem ɣar ttarbiyyet u dewřem d imiɣisen,
war neṭṭarem tarbiyyet.
34 Sseɛd n bnadem nni ɣari isřan,
wenni iṭṭfen acbar ɣar tewwura inu zeg wass ař wass,
iḥetta x tɣemmar n tewwura inu,
35 maɣar wenni d ayi yufin, yufa tudart,
u ad iṭṭef arḍa n SIDI. ■
36 Wenni i d ayi ixḍan, iyezzem řeɛmar nnes,
marra inni d ayi icarrhen, ttexsen řmewt.