135
1 Hallilu-Yah, ṣebbḥem Isem n SIDI, ṣebbḥem xas, a imsexxaren n SIDI,
2 inni ibedden di Taddart n SIDI,
di řemraḥat n Taddart n AREBBI nneɣ.
3 Hallilu-Yah, maɣar SIDI iṣbeḥ,
zehhdem i Yisem nnes, maɣar Netta d řeḍrafet.
4 Maɣar SIDi ifarz Yaɛqub i yixef nnes,
Israyil d agřa nnes. ■
5 Maɣar necc ssneɣ aqa SIDI d ameqqran,
Siditneɣ d ameqqran x marra irebbiten.
6 Marra min d as itteɛjiben i SIDI, igga i-t,
deg ijenwan u x temmurt,
di řebḥur u deg waman yuǧɣen marra.
7 Netta issgeɛɛed iseynuten zi ṭṭrufa n temmurt,
Netta ittegg assamen ak-d wenẓar,
ittgewwad asemmiḍ zi řehrit nnes ɣar barra. ■
8 Netta iwta imenza n Miṣra,
zeg iwdan ař řmar. ■
9 Netta issekk řeɛřamat d lmuɛjizat di řwest nnek, a Miṣra,
ɣar Firɛun u ɣar marra imsexxaren nnes. ■
10 Netta iwta aṭṭas n řegnus u inɣa ijeǧiden ijehden. ■
11 Siḥun, ajeǧid n Imuriyyen, u Ɛuj, ajeǧid n Bacan,
u marra tigeldiwin n Kenɛan.
12 Iwca asen tammurt d tasɣart,
d tasɣart i Israil, řgens nnes. ■
13 A SIDI, Isem nnek ittɣima i řebda,
axarreṣ dayek ad yiři zi jjiř ař jjiř. ■
14 Maɣar SIDI ad yarr tasɣart ɣar řgens nnes,
Netta ad iḥinn x imsexxaren nnes. ■
15 Řexyařat n ṣṣanam n řegnus aqa atent s nnuqart d wureɣ,
ttwaggent s ifassen n iwdan.■
16 Nitenti ɣarsent ijj n uqemmum, maca war ssiwiřent,
ɣarsen tiṭṭawin, maca war ttwiřint,
17 Nitenti ɣarsen timezzuɣen, maca war ttesřint,
walu asuḍi n nnefs deg uqemmun nsen.
18 Ad dewřen inni ten iggin am nitenti,
marra wi xasent ittcař.
19 A taddart n Israil, barkem SIDI,
a taddart n Harun, barkem SIDI.
20 A taddart n Lawi, barkem SIDI!
Ejj marra inni itteggʷeden SIDI, ad barken SIDI.
21 Ad ittwabarek SIDI zi Ṣihyun,
Netta d wenni izeddɣen di Urcalim. Hallilu-Yah!