Ayub isseqsa Ilifaz x min t icqan i Arebbi inni ittwaḥṣaren
24
1 Mayemmi war ttwaxemmřent řmijařat n uxeǧeṣ zeg wenni iǧan d Amzemmar x kuřci,
u inni t issnen,
mayemmi xenni war ttwiřin ussan nnes n nneqmet?
2 Nitni ssmuṭṭuyen řehdud,
ttacaren taḥimart uca arekkwsen tt. ■
3 Aɣyuř n iyujiřen ssaggʷajen t,
ttḥewwsen afunas n tajjač.
4 Nitni ɛarrnen imezřaḍ zeg webrid.
Inni ittwaḥṣaren di temmurt ttnuffaren jmiɛ. ■
5 Xzar, aqa aten am iɣyař n řexřa.
Tteffɣen ɣar řxedmet nsen, arezzun taneymart.
Řexřa iwca as macca i iḥenjiren nsen.
6 Deg iyyar ḥettcen řeḥtic nnes,
řeqqḍen deg imarjaɛen n uḍiř n iɛeffanen.
7 Ssɛeddun ǧiřet d iɛaryanen, nhřa arruḍ,
war ɣarsen bu dduri di teṣmeḍ.
8 Zeg wenẓar iccaten zeg idurar ttuffen,
ttcebbaren di jjarf maɣar war ɣarsen adurri.
9 Zeg iffan n yemmatsen ttekksen ayujiř,
uca ttᵉṭṭfen aḍman zeg umezřuḍ.
10 Gguren d iɛaryanen, nhřa arruḍ,
am ǧuẓen arebbun icewwafen n imendi. ■
11 Jar řeḥyuḍ ttɛessaren zzect,
ɛeffsen x tsirt n uḍir, waxxa amenni maca ffuden. ■
12 Zi tendint itteffeɣ-dd řḥess n useɣnef n yeryazen,
řeɛmar n yinni issuffɣen buḥbeř isɣuyyu deg ujenna.
Waxxa amenni Arebbi war iḥeṭṭi min war iḥřin.
13 Inneɣni d imɣewwɣen x tfawt,
war ssinen ibriden nnes,
war ttɣimin di tibridin nnes.
14 Qbeř ma dd-tas tfawt, ittekkar umenɣi,
ineqq řmeskin d umezřuḍ,
u di ǧiřet igga am uxewwan. ■
15 Tiṭṭ n uzennay tḥeṭṭa taǧest.
Iqqar: ‘Uřa d ict n tiṭṭ war d ayi tḥeṭṭi!’
Iřeḥḥef i uɣembub nnes. ■
16 Di taǧest ttadfen ɣar tudrin.
S wass ttnuffaren,
war ssinen walu x tfawt. ■
17 Maɣar tuffut tban asen-dd am tiři n řmewt,
maɣar ssnen inexřiɛen n tiři n řmewt.
18 Am ukuffu x wudem n waman i yeǧa.
Tettwanɛeř tesɣart nsen x temmurt.
War itteṭṭef ɛad abrid ɣar imarjaɛen n uḍiř.
19 Řaẓaɣ d řeḥmu qeṭṭan x waman n wedfeř,
ammu i tᵉttekes řaxart uřa d inni ixḍan.
20 Aɛeddis n yemmas ad t ittu,
ikeccawen ad zzayes arren meẓri.
Ɛemmarṣ war t ttidaren ɛad.
Ittwarẓ řɣecc am ict n tfrewt n ukeccuḍ,
21 ammu i ittwarẓ wenni itteggen řɣar di temɣart břa tarwa,
di tenni war ittirwen,
uřa d wenni war itteggen min iṣebḥen ak-d tajjač.
22 S jjehd nnes issbedda inni ɣar teǧa ṣṣulṭa.
Mařa ikkar wanita, war issin nican aqa tudart nnes di řaman,
23 maca Netta iwca as řaman, ařami ɣares dd-tudef ttiqqet,
ɛad tiṭṭawin nnes aqa atent x webrid nsen.
24 Ttwassuɛřan i yijj n řḥař d aquḍaḍ, xenni war ǧin ɛad.
Ad hwan, ad ttwakksen am marra iwdan,
am ixfawen n tidrin ad ttwaqessen.
25 Ma war iǧi amenni?!! Man wen i d ayi ɣa iṭṭfen ixarriqen,
man wen i ɣa issebḍeř řharḍ inu?