1 Deg uyur wiss tenɛac, wenni d ayur n Adar, deg wass wiss třeṭṭac zeg uyur nni, umi dd-tiweḍ řweqt i di tuɣa ad ggen awař n ujeǧid d uzerf nnes, deg wass i di tuɣa ttrajan řɛedyan n Wudayen ad xasen mmenḍaren, tuɣa řḥař s řɛeks, maɣar Udayen mmenḍaren x yenni ten icarhen. 2 Ssmunen Udayen di tneddam nsen di marra lɛamalat n ujeǧid Aḥacwiruc, maḥend ad wten inni tuɣa ittexsen ad daysen ggen řɣar uca uřa d ijj ma izemmar ad iqqim ibedd zzatsen, minzi marra řegnus tuɣa fecřen s tiggʷudi zeg Wudayen. 3 Marra řḥukkam n lɛamalat d ijeǧiden i iǧan sadu ujeǧid d lwulat d imsexxaren n ujeǧid wcin afus i Wudayen, minzi tiggʷudi n Murdaxay tewḍa xasen, 4 minzi Murdaxay tuɣa ɣares ccan di taddart n ujeǧid uca řexbar nnes iffeɣ ɣar marra lɛamalat, minzi aryaz Murdaxay tuɣa ccan nnes iggur yarenni ɛad. 5 Ɣeřben Wudayen marra řɛedyan nsen am ten ccaten s ssif, s wenɣay d uhellek. Ggin ak-d řɛedyan nsen mammec xsen. 6 Di lqelɛa n Cucan nɣin u hellken Udayen xemsa-mya n yeryazen. 7 Uřa d Farcandata d Dalfun d Acfat 8 d Furata d Adalya d Aridata 9 d Farmacta d Arisay d Ariday d Wayzata,

10 ɛecra n iḥenjiren n Haman, mmis n Hamadat, řeɛdu n Wudayen, nɣin ten, maca war sswiẓẓḍen ca ifassen nsen ɣar tkeccaḍt.

11 Deg wass nni d ijj iwyen-dd qedda n imettan zzat i wudem n ujeǧid di lqelɛa n Cucan.

12 Inna ujeǧid i tjeǧidt Istir: “Di lqelɛa n Cucan Udayen nɣin u hellken xemsa-mya n yeryazen uřa d ɛecra n iḥenjiren n Haman. Min i ɣa yiři ggin ɛad di lɛamalat nneɣni n ujeǧid!!? Min din ɛad ɣarem d asitem? Ad am immewc! Min tessitimed? Ad ɣarem yiři!”

13 Xenni tenna Istir: “Mařa mliḥ i ujeǧid, ejj ad immewc ttesriḥ i Wudayen i iǧan di Cucan uřa d tiwecca maḥend ad ggen ɛlaḥsab azerf n wass-a uca ejj ad ayřen ɛecra n iḥenjiren n Haman ɣar teḥnact.”

14 Xenni inna ujeǧid, ad ggen ammu. Řexdenni ittwassuffeɣ-dd ijj n uzerf di Cucan uca uyřen ɛecra n iḥenjiren n Haman.

15 Udayen nni iǧan di Cucan, munen ɛawed deg wass wiss arbeɛṭac n uyur n Adar uca nɣin teřt-myat n yeryazen, maca war sswiẓẓḍen ca ifassen nsen ɣar tkeccaḍt.

16 Munen ɛawed Wudayen nneɣni di lɛamalat n ujeǧid ḥima ad kkaren di ṭṭweɛ n tudart nsen u ḥima ad ṭṭfen řehna zi ɣar řɛedyan nsen. Nɣin xemsa u-sebɛin-ařef n yeryazen jar inni ten icarrhen, maca war sswiẓẓḍen ca ifassen nsen ɣar tkeccaḍt.

17 Man aya imsar deg wass wiss třeṭṭac n uyur n Adar u deg wass wiss arbeɛṭac zzayes areyyḥen uca ggin t d ijj n wass n zzardet d řefraḥet.

18 Udayen nni iǧan di Cucan, munen deg wass wiss třeṭṭac n uyur uřa deg wass wiss arbeɛṭac uca nitni areyyḥen deg wass wiss xemmesṭac uca ggin t d ijj n wass n zzardet d řefraḥet.

19 S uyenni Udayen, inni iǧan di řkampu, inni izeddɣen di tneddam di řkampu, ggin ass wiss arbeɛṭac n uyur n Adar d ijj n řɛid n řefraḥet d zzardet u d ijj n wass d aṣebḥan, ass i di ssekkan arriɣalut ijj i wenneɣni. 20 Izemm Murdaxay imezruyen-a uca issekk tibratin i marra Udayen nni iǧan di marra lɛamalat n ujeǧid Aḥacwiruc, i yenni iǧan yudsen d inni iǧan iggʷejen, 21 maḥend ad ten arren ad ḥḍan ass wiss arbeɛṭac n uyur n Adar uřa d wass wiss xemmesṭac zzayes zeg useggʷas ař aseggʷas nneɣni, 22 - ɛlaḥsab ussan i di ṭṭfen Udayen arraḥet zi řɛedyan nsen, u ɛlaḥsab ayur nni tuɣa i d asen ibeddřen zi řeḥzen ɣar refraḥet u zeg wecḍan ɣar wass aṣebḥan - , ḥima ad ten arren d ussan n zzardet d řefraḥet u ḥima kuř ijj ad issekk aɣiralut i wenneɣni u ḥima ad wcen i imezřaḍ. 23 Qebřen Wudayen min bdan ad ḍfaren ɛad u min d asen yuran s ufus n Murdaxay, 24 minzi Haman, mmis n Hamadata, Ajaji, řeɛdu n marra Udayen, tuɣa ittxarreṣ ict n texceft ḍidd i Wudayen maḥend ad ten ihellek, u netta tuɣa inḍar Pur, aqa-t d taqedduḥt, ḥima ad ten yareddeǧ u ad ten ihellek, 25 maca umi dd-tusa Istir zzat i wudem n ujeǧid, yumur netta s tira maḥend ad yarr x uzeǧif nnes taxceft-a taɛeffant, tenni tuɣa ixarreṣ ḍidd i Wudayen, uca uyřen t d iḥenjiren nnes ɣar teḥnact. ^■   26 X uya řaɣan ussan-a ‘Purim’, zeg isem n ‘Pur’. S uya, zi ssibbet n wawařen n tebrat-a u zi ssibbet n min ẓrin s yixef nsen zi man aya u zi ssibbet n min d as imsaren, 27 kkaren ad ḥḍan ussan-a uca qebřen Wudayen i yixef nsen u i zzariɛet nsen u i marra inni ɣarsen dd-iqqnen, maḥend war ssɛeddun ca ad ḥḍan tnayen n wussan-a am mammec xasen ittwari u ɛlaḥsab řweqt i ɣarsen ittwaggen i kuř aseggʷas ^□   28 uca ad idaren u ad ḥḍan ussan-a di kuř jjiř, di kuř řaǧ, di kuř lɛamala u di kuř tandint u war ssɛeddun ca ussan-a n Purim jar Wudayen u war ittᵉttwagg uneggar ɣar řidaret nsen s zzariɛet nsen. 29 Tura tjeǧidt Istir, yeǧis n Abiḥayil, jmiɛ ak-d Wuday Murdaxay, s marra tizemmar, ḥima ad tesscen i twařa nneɣnit tabrat-a x tmesřact n Purim. 30 Issekk tibratin i marra Udayen di mya u-sebɛa u-ɛicrin n lɛamalat n tgeldit n Aḥacwiruc, jmiɛ ak-d wawařen n řehna d řaman, 31 ḥima ad neyycen ussan-a n Purim di řweqt nsen ittwaggen, am mammec i d asen yumur Wuday Murdaxay, jmiɛ ak-d tjeǧidt Istir, u am mammec ggin x yixef nsen u x zzariɛet nsen timesřayin am uẓummi d uweṭṭu nsen n ugejdur. 32 Min ittwannan zi Istir igga ad bedden wawařen-a x Řɛid n Purim uca ttwarin deg ijj n wedlis.