1 Umi dd-yiweḍ ujeǧid ak-d Haman ḥima ad swen ak-d Istir, 2 inna ujeǧid, ɛawed deg wass wiss tnayen, ak-d tissit n binu i Istir: “Min dayem iǧan d meẓri, a tajeǧidt Istir! Ad am immewc. D min iǧan d tutra nnem? Ad ɣarem tiři waxxa d azyen n tgeldit.” 3 Xenni tarra-dd xas tjeǧidt Istir, tenna: “Mařa xenni ufiɣ arḍa di tiṭṭawin nnek, a ajeǧid, u mařa tusa as-dd i ujeǧid s řxaḍar, ejj ad ayi wcen tudart inu x meẓri inu u řgens inu x tutra inu. 4 Maɣar neccin nemmenz, necc d řgens inu, maḥend ad nettwareddeǧ u ad nettwateḥḥa. Mařa nemmenz am isemɣan d tsemɣin, necc ad ssusmeɣ, minzi x uya řeḥṣaret war tᵉttiři anect ařami icuwwar ad ṣeddɛeɣ ajeǧid.” 5 Xenni issiweř ujeǧid Aḥacwiruc, inna i tjeǧidt Istir: “Min iɛna netta u mani iǧa wenni ɣar iǧa wuř iccur maḥend ad igg ammu?” 6 Tenna as Istir: “Aryaz nni i d aneɣ iḥṣaren d řeɛdu nneɣ, aqa d wa d Haman aɛeffan!” Xenni innexřeɛ Haman zzat i wudem n ujeǧid d tjeǧidt.

7 Ikkar ujeǧid s wesɛar, ijja zzardet n binu uca yuyur ɣar weḥwic n řeqṣar. Haman iqqim ibedd maḥend ad iḥeccem Istir di ṭṭweɛ n tudart nnes, maɣar yuca ak-d ujeǧid aqa iɛewweř ad dayes igg řɣar. 8 Ařami dd-idweř zeg weḥwic n řeqṣar ɣar taddart mani teǧa ṭṭabřa n binu, yufa Haman iwḍa x řemṭarbat i x tuɣa tezzeř tjeǧidt Istir. Xenni inna ujeǧid: “Řexxu aqa ihekkweř uřa d tajeǧidt ɣari di taddart!” Qaɛ war dd-iffiɣ wawař zeg uqemmun n ujeǧid, ařami tuɣa imsexxaren řeḥḥfen as i Haman x uɣembub. 9 Ḥarbuna, ijj zeg imsexxaren icenɛen, inni tuɣa ibedden zzat i wudem n ujeǧid, inna: “Aqa din taḥnact n wayař, tenni i tuɣa igga Haman i Murdaxay wenni tuɣa issiweř mliḥ deg ujeǧid, tbedd ɣar taddart n Haman u řuɛřa nnes xemsin n iɣiřen.” Xenni inna ujeǧid: “Ayřem ɣares Haman!”

10 Uyřen Haman ɣar teḥnact i tuɣa igga netta simant nnes i Murdaxay uca yarsa wesɛar n ujeǧid.