Ɛuzziya, ajeǧid n Yahuda, d řeḥkamet nnes ifeřḥen
26
1 Řami yiwi marra řgens n Yahuda Ɛuzziya, wenni tuɣa ɣar iǧa seṭṭac n iseggʷusa, ggin t d ajeǧid deg wemcan n babas Amaṣya. 2 Netta ibna Ilat u yarra t deg ufus n Yahuda, awarni umi ittwassars ujeǧid deg wenḍeř ak-d řejdud nnes. 3 Ɛuzziya tuɣa ɣares seṭṭac n iseggʷusa umi idweř d ajeǧid. Netta iḥkem tnayen u-xemsin n iseggʷusa di Urcalim. Yemmas qqaren as Yakulya zi Urcalim. 4 Netta igga min iǧan nican di tiṭṭawin n SIDI, igga nican am mammec tuɣa igga babas Amaṣya. 5 Umi tuɣa yarezzu x AREBBI deg wussan n Zakariyya, wenni tuɣa ifehhem tmeẓra n AREBBI, iwa deg wussan i di tuɣa yarezzu x SIDI, imsar aqa AREBBI issehwen abrid nnes. 6 Netta iffeɣ uca imneɣ ak-d Ifilisṭiniyyen uca igga ict n tazzit di řḥiḍ n Jat d řḥiḍ n Yabna d řḥiḍ n Acdud. Netta ibna tineddam ɣar Acdud u di temmurt n Ifilisṭiniyyen. 7 AREBBI ibedd akides ḍidd i Ifilisṭiniyyen u ḍidd i Weɛraben, inni izeddɣen di Jur-Baɛl, u ḍidd i Imaɛuniyyen. 8 Wcin ayt n Ɛammun tirzifin ittxeṣṣan i Ɛuzziya uca idweř yisem nnes ittwassen ař wadaf n Miṣra, maɣar netta tuɣa idweř ijhed aṭṭas. 9 Di Urcalim issbedd Ɛuzziya ṣṣumɛat ɣar Tewwart n Teɣmart u ɣar Tewwart n Teɣzurt u ɣar tɣemmura uca issemten i-tent.
10 Netta ibna ɛawed ṣṣumɛat di řexřa uca iɣza aṭṭas n wanuten, maɣar ɣares řebhayem aṭṭas di Temmurt Iwaṭan u di řwaṭa yuɛřan. Tuɣa ɣares ifeǧaḥen d ayt n tzayart deg idurar uřa deg iyyaren iɛarṣen, maɣar netta tuɣa ittexs tafeǧaḥt.
11 Ɛuzziya tuɣa ɣares ɛawed ijj n řɛeskar n iɛeskariyyen imdarrben, tteffɣen ɣar umenɣi di terbiɛin, ɛlaḥsab lɛadad i tuɣa ittwasedden zzaysen s ufus n umarir Yaɛiyil d uweqqaf Maɛasiya, s řumur n Ḥananya, ijj zi řḥukkam n ujeǧid.
12 Řqedd imun n izeǧifen jar ibabaten n řaǧat, n ayt n bu-teɣruḍt imeḥḍen, tuɣa ařfayen u-setta-mya n yeryazen.
13 Sadu afus nsen tuɣa din ijj n řɛeskar n teřt-mya u-sebɛa-ařaf u-xemsa-mya n yeryazen, iɛeskariyyen imdarrben s jjehd iccuren i umenɣi ḥima ad wcen afus i ujeǧid ḍidd i řeɛdu.
14 Ɛuzziya issewjed asen tiseddariyin n uɛeskari d iḥricen d lkaskat x uzeǧif d warruḍ n wuzzař d řeqwas d iẓra n yiǧiy, i marra řɛeskar.
15 Di Urcalim igga dduzanat ittwassuffɣen zeg imsuffɣen imiɣisen ḥima ad tent ggen x ṣṣumɛat u x tɣemmura ḥima ad zzaysent qarṣent s fřitcat d yeẓra. Ammu i idweř isem nnes icneɛ ɣar řaggʷaj, maɣar i netta umi tᵉttwagg twiza s řeɛjeb, ařami idweř yarni di jjehd.
Řehřac n lbarṣ iřqef Ɛuzziya d mammec immut
16 Maca umi idweř ijhed, issgeɛɛed ixef nnes deg wuř nnes ařami issiweḍ ixef nnes ɣar wareyyeb u iɣdar SIDI, AREBBI nnes, maɣar yudef di Zzawect Tameqqrant n SIDI ḥima ad issbexxar x uɛalṭar n řebxur.
17 Akehhan Ɛazarya yuyur awarni as u akides ikehhanen n SIDI, tmenyin n yeryazen imeḥḍen. □
18 Nitni qaṭɛen i ujeǧid Ɛuzziya, nnan as: “War cek icuwwar, Ɛuzziya, maḥend ad tawyed řebxur i SIDI, mɣir i ikehhanen, iḥenjiren n Harun, inni ittwaqeddsen i tewhibt n řebxur. Ffeɣ zi Zzawect Iqeddsen, maɣar teɣdared u man aya war d ac dd-ittiwi ccan zzat i SIDI, AREBBI nnek.”
19 Xenni isɛar Ɛuzziya am iṭṭef řebxur i tewhibt n řebxur deg ufus nnes. Am isɛar ammu x ikehhanen, iffeɣ as dd-řbarṣ di tenyart nnes, zzat i tiṭṭawin n ikehhanen di Taddart n SIDI, ɣar uɛalṭar n řebxur. □ 20 Umi inneqřeb ukehhan ameqqran Ɛazarya d marra ikehhanen ɣares, aqa da, dayes řbarṣ di tenyart nnes. Nitni ḥsaren t deɣya ad ssenni yaggʷej uřa d netta simant nnes iqeǧeq ad iffeɣ, minzi SIDI tuɣa iwta i-t. 21 Tuɣa ajeǧid Ɛuzziya ihřec s řbarṣ ař ass n řmewt nnes. Netta iqqim izeddeɣ deg ict n taddart tᵉttwaɛzeř, maɣar netta tuɣa ittwaqess zi SIDI. Mmis Yutam tuɣa ittwařeqqem x tzeddiɣt n ujeǧid u iḥekkem x řgens n temmurt.
22 Imezruyen iqqimen n Ɛuzziya, imezwura d ineggura, aqa izemm i-ten unabi Icaɛya, mmis n Amuṣ. 23 Ɛuzziya ittwassars deg wenḍeř jar řejdud nnes. Neḍřen t jar řejdud nnes deg iyyar n wenḍeř n ijeǧiden, maɣar nnan: “Aqa dayes řbarṣ!” Mmis Yutam idweř d ajeǧid deg wemcan nnes.