1 Amaṣya tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem tesɛa u-ɛicrin n iseggʷusa di Urcalim. Yemmas qqaren as Yahuɛaddan, tuɣa-tt zi Urcalim. 2 Netta igga min iǧan nican di tiṭṭawin n SIDI, maca war iǧi s wuř imun qaɛ. 3 Umi issemten tagelda nnes, imsar, aqa inɣa imsexxaren nnes, inni i tuɣa inɣin babas ajeǧid. 4 Maca iḥenjiren n ayt n bu-arrqabet war ten inɣi ca, am mammec t yura deg wedlis ittwannḍen n Ccariɛa n Musa, i zi iweṣṣa SIDI, inna: “Ibabaten war ttwaneqqen di ssibbet n iḥenjiren nsen u iḥenjiren war ttwaneqqen di ssibbet n ibabaten nsen, maɣar kuř ijj ad ittwaneɣ x ddnub n yixef nnes.”

5 Amaṣya issmun ayt n Yahuda uca issbedd i-ten ɛlaḥsab řaǧat, ak-d imeqqranen x wařef u ak-d imeqqranen x mya i Yahuda d Binyamin marra. Netta isedd i-ten, zi ɛicrin iseggʷusa sennej uca yufa jar asen teřt-myat-ařef n yeryazen ttwafarzen ḥima ad ffɣen ak-d řɛeskar, inni ittwadarrben x uḥric d tseddart n uɛeskari tameqqrant. 6 Netta icra-dd myat-ařef n ayt n bu-teɣruḍt imeḥḍen zi Israil s mya n talintat n nnuqart.

7 Xenni yusa-dd ɣares ijj n weryaz n AREBBI, inna: “A, ajeǧid, war ttejji řɛeskar n Israil akidek itteffeɣ, maɣar SIDI war iǧi ak-d Israil, ak-d marra ayt n Ifrayim. 8 Maca mařa waxxa amenni texsed ad traḥed, ffeɣ, egg i-t, iwa iři d aryaz deg umenɣi. AREBBI ad cek issneqřeb zzat i wudem n řeɛdu, maɣar AREBBI ɣares tizemmar maḥend ad iɛawen u ad issneqřeb.” 9 Amaṣya inna i weryaz n AREBBI: “Maca min ɣa imsaren s mya n talintat i wciɣ i terbiɛin n řɛeskar n Israil?” Aryaz n AREBBI inna: “SIDI ɣares ktar zi man aya ḥima ad ac t iwc.”

10 Uca iɛzeř Amaṣya tarbiɛin n řɛeskar i tuɣa ɣares dd-yusin zi Ifrayim, yejj i-tent ad areggʷeḥent ɣar wemcan nsen. Xenni iřqef i-ten uxeyyeq d ameqqran x Yahuda uca ɛeqben s tefqeḥt ɣar wemcan nsen.

11 Amaṣya maca igga taryast, indeh řgens nnes uca iffeɣ ɣar teɣzurt n Tmeǧaḥt, inɣa ɛecra-ařaf n yeryazen zeg ayt n Saɛir.

12 Ɛawed ḥebbsen ayt n Yahuda ɛecra-ařaf n yeryazen am ddaren, uca iwyen ten ɣar tqiccat n jjarf uca ɛarnen ten ssenni ɣar swadday ařami ftuttyen marra.

13 Maca iryazen n terbiɛin n řɛeskar nni tuɣa ijja Amaṣya ad ɛeqben ařami war kidsen dd-tteffɣen ɣar umenɣi, hejmen x tneddam n Yahuda, zi Samarya ař Bayt-Ḥurun, uca nɣin zzaysen teřt-ařaf n yeryazen uca ḥewwsen takeccaḍt tameqqrant aṭṭas.

14 Awarni řami dd-iɛqeb Amaṣya s řeɣřeb x ayt n Idum, imsar, yiwi irebbiten n ayt n Saɛir uca issbedd i-ten zzates uca yuḍar zzat i wudem nsen uca issbexxar asen.

15 Uca yarɣa weɣḍab n SIDI x Amaṣya, uca issekk ijj n unabi ɣares. Wanita inna as: “Mayemmi tarzud irebbiten n řgens, inni i tuɣa war izemmaren ad fekken řgens nsen zeg ufus nnek?”

16 Umi netta issiweř ammu, imsar, aqa inna as: “Ma ggin cek d amcawar n ujeǧid? Bedd, mayemmi i cek i ɣa wten?” Xenni ibedd unabi, inna: “Řexxu ssneɣ, aqa SIDI iɛzem ḥima ad cek yareddeǧ, minzi teggid aya u war tesřid ɣar ccwar inu.”

17 Amaṣya, ajeǧid n Yahuda, imcawar. Issekk ireqqaṣen ɣar Yuwac, mmis n Yahuyaḥaz, mmis n Yahu, ajeǧid n Israil, inna: “As-dd, ejj aneɣ ad nemmeřqa i umenɣi.”

18 Maca Yuwac, ajeǧid n Israil, issekk ijj n ureqqaṣ ɣar Amaṣya, ajeǧid n Yahuda, inna: “Cbarq ak-d isennanen i iɣemmyen x idurar n Lubnan, issekk ict n tebrat ɣar tengelt x idurar n Lubnan, inna: ‘Ewc yeǧic d tamɣart i mmi!’ Maca ijj n řweḥc i din yuyuren x idurar n Lubnan, ikka uca iɛfes x cbarq ak-d isennanen.”

19 “Teqqared ak-d ixef nnek: ‘Xzar, aqa ɣeřbeɣ x Idum!’, u řexxu tudef nnfaxet ɣar wuř nnek. Weqqar ixef nnek u qqim di taddart nnek, minzi mayemmi i ɣa tegged ixef nnek di řɣar u ad tewḍid, cek d Yahuda akidek?” 20 Maca Amaṣya war ixs ad iseř, maɣar man aya yusa-dd zi AREBBI maḥend ad ten iwc deg ufus nsen, minzi nitni arzun irebbiten n Idum. 21 Xenni igeɛɛed Yuwac, ajeǧid n Israil. Netta d Amaṣya, ajeǧid n Yahuda, mmeřqan i umenɣi ɣar Bayt-Cams, i iǧan di Yahuda. 22 Yahuda ittwaɣřeb zzat i wudem n Israil uca nitni arewřen, kuř ijj ɣar uqiḍun nnes. 23 Yaḥuyaḥaz, ajeǧid n Israil, iṭṭef Amaṣya, ajeǧid n Yahuda, mmis n Yuwac, mmis n Yahuyaḥaz di Bayt-Cams uca yiwyi i-t ɣar Urcalim. Dinni igga ict n tazzit di řḥiḍ n Urcalim, zi Tewwart n Ifrayim ɣares ař Tewwart n Teɣmart, x ijj n webrid n arebɛa mya n iɣaǧen. 24 Yiwi marra ureɣ d nnuqart d marra řeqcuɛ i ittwafen di Taddart n AREBBI u deg ixxamen n txubay n taddart n ujeǧid uřa d imerhanen uca iɛqeb ɣar Samarya.

25 Amaṣya, mmis n Yuwac, ajeǧid n Yahuda, iddar awarni i řmewt n Yuwac, mmis n Yahuyaḥaz, ajeǧid n Israil, ɛad xemmesṭac n iseggʷusa. 26 Min iqqimen n imezruyen n Amaṣya, imezwura d ineggura, ma man aya marra war ittwazemmem ca deg wedlis n ijeǧiden n Yahuda d Israil? 27 Zeg wami iḥeyyed Amaṣya x SIDI, ggin xas ict n tmeɛmuč di Urcalim, maca netta yarweř ɣar Laxic. Xenni ssekken iryazen awarni as uca nɣin t dinni. 28 Iwyen t-i-dd x yeysan uca neḍřen t jar řejdud nnes di tendint n Yahuda.