1 Issiweř SIDI ak-d Musa, inna:

2 “Ntaqem di ṭṭweɛ n ayt n Israil x Imidyaniyyen. Awarni as ad tᵉttwasarsed deg wenḍeř ak-d řejdud nnek.” ^■  

3 Issiweř Musa ak-d řgens, inna: “Swejdem zzaywem iryazen i umenɣi ḍidd i Midyan u nitni ad iřin ḍidd i Midyan maḥend ad ssiwḍen nneqmet n SIDI x Midyan. 4 Ittxeṣṣa awem ad tessekkem ařef n yeryazen zi kuř taqbič ɣar umenɣi, zi kuř ict zi marra tiqebbař n Israil.” 5 Ammu i tuɣa tᵉttwafarzen zi řuřuf n Israil ařef n yeryazen zi kuř taqbič, aqa aten jmiɛ tenɛac-n-řuřuf n yerazen iwejden i umenɣi.

6 Musa issekk i-ten ɣar umenɣi, ařef n yeryazen zi kuř taqbič. Netta issekk i-ten ɣar umenɣi ak-d Finaḥas, mmis n ukehhan Aliɛazar, u netta ɣares řeqcuɛ iqeddsen d řɣayṭat i uṣuḍi s wesruddeḥ i umenɣi deg ufus nnes 7 uca mmenɣen ḍidd i Imidyaniyyen, am mammec t yumur SIDI i Musa uca nɣin marra min iǧan d awtem. 8 Sennej i yenni zzaysen ittwanɣen, nɣin ɛawed ijeǧiden n Midyan: Iwi, Raqim, Ṣur, Ḥur d Rabaɛ, xemsa n ijeǧiden n Midyan, uřa Balɛam, mmis n Baɛur, nɣin t s ssif. ^■  

9 Ayt n Israil ḥebbsen timɣarin n Midyan d tarwa nsent u keccḍen řebhayem nsen d tḥimriwin nsen d marra min ɣarsen.

10 Sscemḍen s tmessi marra tineddam mani tuɣa zeddɣen d marra lqelɛat nsen.

11 Ksin marra min keccḍen, marra takeccaḍt n iwdan d řebhayem ^■  

12 uca iwyen-dd imeḥbas d marra takeccaḍt ɣar Musa u ɣar ukehhan Aliɛazar u ɣar tmesmunt n ayt n Israil, di řmargeḥ n řɛeskar, di řewḍat n Mu’ab, ɣar L'Urdun, arendad n Ariḥa.

13 Uca iffeɣ-dd Musa d ukehhan Aliɛazar d marra imeqqranen n tmesmunt barra i řmargeḥ n řɛeskar maḥend ad ten mmsagaren.

14 Iffugem Musa aṭṭas x řqebṭanat n řɛeskar, x imeqqranen x ařef u x imeqqranen x mya, inni dd-iɛeqben zeg umenɣi.

15 Inna asen Musa: “Ma tejjim marra min iǧan d tawtent iddar?

16 Xzar, s wescan n Balɛam, timɣarin-a tuɣa atent d řesbab řami ayt n Israil ɣdaren SIDI di tmesřact n Faɣur uca tewḍa-dd jjriḥect x tmesmunt n SIDI. ^■  

17 Řexxu xenni, nɣem marra iwetman zi jar iḥenjiren imeẓyanen uca nɣem marra tamɣart nni tuɣa iṭṭṣen ak-d ijj n weryaz am nettat tᵉṭṭeṣ ak-d ijj n weryaz. ^■  

18 Maca marra tiḥenjirin jar temɣarin nni war iṭṭiṣen ak-d ijj n weryaz am akides zzřent, jjem tent i yixef nwem ad ddarent.

19 Ittxeṣṣa awem ad tewtem iqiḍan nwem barra i řmargeḥ n řɛeskar řmijař n sebɛa n wussan. Kuř ijjen wenni inɣin ijj n řeɛmar n bnadem u kuř ijjen wenni iḥadan wenni ittwasnuqqben ad yejj ad kksen ddenb x yixef nnes deg wass wiss třata u deg wass wis sebɛa, ammu kenniw uřa d imeḥbas nwem.

20 Amenni ittxeṣṣa ad tekksem ddenb zi marra arruḍ d marra řeqcuɛ n iřmawen d marra min ittwaggen s thiḍurt n iɣayḍ d marra řeqcuɛ n ukeccuḍ.”

21 Aliɛazar, akehhan, inna i iɛeskariyyen nni dd-iffɣen ɣar umenɣi: “Ta d tawṣeyyet nni yumur SIDI i Musa: 22 Mɣir ureɣ d nnuqart d nnḥas d uzzař d istanyu d řexfif, 23 marra min izemmaren i tmessi, x tmessi ad t tessekkem, xenni ad yiři izdig, maca ittxeṣṣa ad zzayes tekksem ddenb s ‘waman n weɛzař’. Marra min war izemmaren i tmessi, ad t tessekkem x waman. ^■   24 Deg wass wiss sebɛa ad tṣebbnem arruḍ nwem, xenni ad tiřim d imezdigen. Awarni i uya tzemmarem ad tadfem di řmargeḥ n řɛeskar.”

25 Issiweř SIDI ak-d Musa, inna:

26 “Ṭṭef řeɛbar n tkeccaḍt nni ittwaḥebbsen zeg iwdan d řebhayem, cek jmiɛ ak-d ukehhan Aliɛazar u ak-d izeǧifen n tudrin n ibabaten n tmesmunt. 27 Bḍa takeccaḍt x tnayen jar inni icarcen deg umenɣi u inni iffɣen ak-d řɛeskar zeg ict n jjihet d marra tamesmunt zi jjihet nneɣnit. ^■   28 Sgeɛɛdem ict n ṣṣedqet i SIDI zeg iɛeskariyyen nni dd-iffɣen ɣar umenɣi ak-d řɛeskar: ijj n řeɛmar zi xemsa mya n iwdan uca amenni zeg ifunasen d tfunasin u zeg iɣyař u zeg wuǧi. 29 Zeg wezyen nsen n tkeccaḍt ad teksid ṣṣedqet-a uca ad tt tewced i ukehhan Aliɛazar am ict n tewhibt n usgeɛɛed i SIDI. 30 Zeg wezyen n tkeccaḍt n ayt n Israil ad teksid ijj zi kuř xemsin: zeg iwdan, zeg ifunasen d tfunasin, zeg iɣyař u zeg wuǧi, wah, zi marra řebhayem. Ad tewced aya i Ilawiyyen nni iṭṭfen acbar x Tzeddiɣt n SIDI.” ^□  

31 Uca igga Musa d ukehhan Aliɛazar am mammec t yumur SIDI i Musa. 32 Awarni as tuɣa řeksibet nni iqqimen n tkeccaḍt nni ikecceḍ řgens n řɛeskar setta-mya u-xemsa u-sebɛin-ařef n wuǧi. ^□   33 tnayen u-sebɛin-ařef n ifunasen d tfunasin, 34 waḥit u-settin-ařef n iɣyař 35 uca zi jjihet n řeɛmar n bnadem, zi temɣarin nni war iṭṭiṣen di qama ak-d ijj n weryaz, aqa atent marra tnayen u-třatin-ařef.

36 Ijj n wezyen, tasɣart n yinni dd-iffɣen ak-d řɛeskar, aqa-t di teřt-mya u-sebɛa u-třatin-ařef n wuǧi. 37 Ṣṣedqet i SIDI n wuǧi tuɣa-tt di setta-mya u-xemsa u-sebɛin. 38 Uca tuɣa din setta u-třatin-ařef n ifunasen d tfunasin uca ṣṣedqet zzaysen i SIDI tuɣa-tt di tnayen u-sebɛin. 39 Uca tuɣa din třatin-ařef u-xemsa-mya n iɣyař uca ṣṣedqen zzaysen i SIDI, waḥit u-settin. 40 Uca zi jjihet n řeɛmur n bnadem tuɣa din seṭṭac-ařef n temɣarin u aṣeddeq zzaysent i SIDI aqa tnayen u-třatin n temɣarin.

41 Iwca Musa ṣṣedqet, tenni d tawhibt n usgeɛɛed i SIDI, i ukehhan Aliɛazar, am mammec t yumur SIDI i Musa. ^■  

42 Zeg wezyen nneɣni n ayt n Israil, wenni iksi Musa zeg yeryazen nni tuɣa immenɣen, 43 - azyen n tesɣart n tmesmunt tuɣa-t di teřt-mya u-sebɛa u-třatin-ařef n wuǧi, 44 setta u-třatin-ařef n ifunasen d tfunasin, 45 třatin-ařef u-xemsa-mya n yeɣyař 46 uca seṭṭac-ařef n řeɛmur n iwdan - ,

47 zeg wezyen nni n ayt n Israil iksi Musa ijj zi kuř xemsin, ammu zeg iwdan am zi řebhayem, uca iwca aya i Ilawiyyen, inni iṭṭfen acbar x Tzeddiɣt n SIDI, am mammec t yumur SIDI i Musa.

48 Xenni usin-dd řqebṭanat x řuřuf n řɛeskar, imeqqranen x wařef d imeqqranen x mya, ɣar Musa 49 uca nnan i Musa: “Imsexxaren nnek aqa ḥesben marra iɛeskariyyen nni sadu ufus nneɣ u war d aneɣ iruḥ uřa d ijj n weryaz. 50 S uya niwi tawhibt n SIDI, kuř ijj min yufa: ict n řqecɛet n wureɣ, ict n txeřxařt, ict n tmeqyast, ict n txatent n ucemmiɛ, ict n texrazt niɣ ict n tseddect s wedmam n wureɣ, ḥima ad zzaysent tᵉttwagg asřaḥ x řeɛmur nneɣ zzat i wudem n SIDI.” 51 Musa d ukehhan Aliɛazar ksin zzaysen ureɣ nsen, marra řeqcuɛ i ggin s lfenn. 52 Marra ureɣ n tewhibt nni ssgeɛɛden i SIDI, tuɣa seṭṭac-ařef u-sebɛa-mya u-xemsin n iciqlen, zeg imeqqranen x wařef u zeg imeqqranen x mya. 53 Minzi iɛeskariyyen aqa keccḍen kuř ijj i yixef nnes. ^■   54 Musa d ukehhan Aliɛazar ksin ureɣ nni n imeqqranen x ařef u x mya uca iwyen t ɣar Uqiḍun n Umsagar, am ict n řidaret i ayt n Israil zzat i wuden n SIDI.