1 Issekk Yusuf ɣar umsexxar nni tuɣa x taddart nnes, inna as: “Ɛemmar tixuncay n yeryazen nni s macca, marra min zemmaren ad ksin. Egg nnuqart n kuř ijj deg warzam n uqemmum n txancet nnes. 2 Sars řkas inu, řkas n nnuqart, deg warzam n uqemmum n txancet n umeẓyan, ak-d tmenyat n nnuqart n yirden nnes.” Uca igga am mammec d as inna Yusuf. 3 Ɣar ṣṣbeḥ umi dd-yeffu řhař, jjin iryazen ad uyuren, nitni ak-d yeɣyař nsen. 4 Umi ffɣen nitni zi tendint, tuɣa ɛad war ggʷijen ca, inna Yusuf i wenni tuɣa x taddart nnes: “Kkar, ḍfar iryazen nni uca, xmi xasen ɣa teɛdud, ini asen: ‘Maɣar dd-tarram řxar s řɣar? 5 Ma war iǧi d wa d řkas i zi isess sidi inu u ma war iǧi s wa i zi ɣa ikacef min ɣa imsaren tiwecca? Aqa teggim řɣar umi teggim amya.’ ”

6 Am ten iɛdu, inna asen awařen-a simant nsen. 7 Nitni arrin-dd xas: “Mayemmi iqqar sidi nneɣ awařen-a? Ɛemmarṣ ad ggen imsexxaren nnek man aya. 8 Xzar, nnuqart i nufa deg warzam n uqemmum n txuncay nneɣ, aqa narr ac tt-i-dd zi temmurt n Kenɛan. Mammec ɛad i ɣa negg ad nacar nnuqart niɣ ureɣ zi taddart n sidi nnek? 9 Wi ɣar i ɣa ittwaf zeg imsexxaren nnek, ad immet, uca neccin ɛawed ad niři d isemɣan n sidi inu!”

10 Inna netta: “Xenni řexxu ad yiři am mammec tennam kenniw. Wenni ɣar t i ɣa naf, d netta ad yiři d ismeɣ inu, maca kenniw ad tiřim d ifurra.”

11 Uca kuř ijj zzaysen iqeǧeq ad issars taxancet nnes di temmurt uca marra idsen arezmen taxancet.

12 Uca netta ifettec i-tent, ibda zeg umeqqran u ikemmeř zeg umeẓyan uca ufin řkas di txancet n Binyamin.

13 Xenni carrgen arruḍ nsen uca kuř ijj issarbu ɛawed x weɣyuř nnes, uca ɛeqben ɣar tendint.

14 Uca yiweḍ Yahuda ak-d aytmas ɣar taddart n Yusuf, wenni tuɣa din ɛad, uca wḍan as ɣar temmurt zzat i uɣembub nnes.

15 Inna asen Yusuf: “Mana cɣeř-a i teggim? Ma war tefhimem ca belli ijj n weryaz amecnaw necc, iggur ad xas ikacef nican?”

16 Inna Yahuda: “Min i ɣa nini i siditneɣ d min ɣa nini niɣ s min zi ɣa nsegged ixef nneɣ? AREBBI iqeǧeb ddenb n imsexxaren nnek, xzar, neccin d imsexxaren n siditneɣ, neccin d wi ɣar ufin řkas.”

17 Maca netta yarra: “Ɛemmarṣ necc ad ggeɣ aya! Aryaz nni ɣar ufin řkas, netta ad yiři d ismeɣ inu, maca kenniw ruḥem di řehna ɣar babatwem.”

18 Xenni yiweḍ-dd Yahuda ɣares, inna: “A sidi inu, ejj ad issiweř umsexxar nnek ijj n wawař deg umezzuɣ n sidi inu u war yareqq uxeyyeq nnek x umsexxar nnek, minzi aqa cek amecnaw Firɛun.

19 Sidi inu isseqsa imsexxaren nnes, inna: ‘Ma ɣarwem ɛad tababat niɣ tawmat?’ 20 Uca neccin narra x sidi inu: ‘Aqa ɣarneɣ babatneɣ d awessar d yijj n uḥenjir, wenni d as dd-ittwaxeřqen x tewsar nnes, d amaẓuẓ ɛad. Umas immut, netta iqqim weḥḥdes zi yemmas, u babas ittexs i-t.’ 21 Uca cek tennid i imsexxaren nnek: ‘Awyem t-i-dd da ɣari, ḥima ad t ẓareɣ s tiṭṭawin inu.’ ^■   22 Uca neccin nenna i siditneɣ: ‘War izemmar uḥenjir ad yejj babas, minzi mařa ijja i-t, babas ad immet.’ 23 Xenni tennid i imsexxaren nnek: ‘Mařa umatwem amaẓuẓ war dd-yusi akidwem, war tẓarrem ɛad udem inu.’ ^■   24 U řami ngeɛɛed ɣar baba, amsexxar nnek, nesseɛdu as awařen n siditneɣ. 25 Uca babatneɣ inna: ‘Ɛeqbem ɛawed maḥend ad tesɣem cwayt n macca i neccin.’ 26 Neccin narra-dd: ‘War nzemmar ad nraḥ. Maca mařa umatneɣ iruḥ akidneɣ, ad nraḥ, minzi war nzemmar ad nẓar udem n weryaz nni, mɣir mařa aqa akidneɣ umatneɣ ameẓyan.’ 27 Xenni inna aneɣ umsexxar nnek, babatneɣ: ‘Kenniw tessnem belli tnayen n iḥenjiren i d ayi dd-turuw temɣart inu. 28 Iffeɣ ijjen zi ɣari uca nniɣ: Aqa s tidett ittwabetteq! U ař řexxu ɛad war t ẓriɣ. ^■   29 Mařa ɛawed tekksem ayi wa uca imsar ca n řɣar, ad tessehwam ccib inu s wecḍan ɣar řaxart!’ ^■   30 Řexxu xenni, mařa ruḥeɣ necc ɣar umsexxar nnek, baba, uca aḥenjir war kidi iǧi, - řeɛmar nnes iřṣeq ɣar řeɛmar n babas - , 31 aqa iggur ad immet xmi i ɣa iẓar aḥenjir war iǧi, uca imsexxaren nnek ad ssehwan ccib n umsexxar nnek, babatneɣ, s wecḍan ɣar řaxart. 32 Aqa zeɛma amsexxar nnek d aḍman i uḥenjir-a ɣar baba umi inna: ‘Mařa war d ac t-i-dd-arriɣ, řexdenni necc ad iřiɣ d amednub i baba i řebda!’ ^■   33 Iwa řexxu, ejj amsexxar nnek ad iqqim deg wemcan n uḥenjir-a am ismeɣ ɣar sidi inu, uca ejj aḥenjir ad iraḥ ak-d aytmas! 34 Maɣar mammec i ɣa ggeɣ ad geɛɛdeɣ ɣar baba, břa aḥenjir-a akidi? Mammec i ɣa ẓareɣ řemḥayen i dd ɣa iwḍan x baba?”