‏1 أَوَارْنِي مَانْ أَيَا، خْزَارْ، إِشْثْ ن ثوَّارْثْ ثنُّورْزمْ ذڭْ ؤُجنَّا. ؤُشَا ثْمِيجَّا ثَامزْوَارُوثْ إِ سْڒِيغْ أَكِيذِي د-إِسَّاوَاڒنْ أَمْ إِجّْ ن ؤُصُوضِي ذڭْ ؤُيِيشّْ ن إِشَارِّي، ثنَّا: ”أَسْ-د ذَا سنّجْ ؤُشَا أَذْ أَشْ سّشْنغْ مِينْ ڭُّورْ أَذْ إِمْسَارْ أَوَارْنِي مَانْ أَيَا.“

‏2 ڒخْذنِّي إِرحّفْ أَيِي-د أَرُّوحْ، ؤُ خْزَارْ، إِجّْ ن ڒْعَارْشْ إِبدّْ ذڭْ ؤُجنَّا، ثُوغَا نتَّا إِقِّيمْ خَاسْ، ‏3 ؤُ ثِيفْرَاسْ ن ونِّي خَاسْ إِقِّيمنْ أَمشْنَاوْ أَژْرُو ن يَاسْبِيسْ ذ سَارْذِييُوسْ، ؤُشَا ثَاسْڒِيثْ ن ونْژَارْ ثنّضْ-د إِ ڒْعَارْشْ، ثتّْبَانْ أَمشْنَاوْ أَژْرُو ن سْمَارَاخْثْ.

‏4 قُووَّارنْ أَسْ إِ ڒْعَارْشْ أَربْعَا ؤُ عِيشْرِينْ ن ڒكْرَاسِي إِڭلّْذنْ ؤُشَا أَربْعَا ؤُ-عِيشْرِينْ ن إِمْغَارنْ ثُوغَا قِّيمنْ خْ ڒكْرَاسِي إِڭلّْذنْ، أَرْضنْ أَرُّوضْ أَشمْڒَاڒْ، غَارْسنْ خْ ؤُزدْجِيفْ تَّاجَاثْ ن وُورغْ.

‏5 ؤُشَا زِي ڒْعَارْشْ نِّي تّفّْغنْ-د زَّايسْ وَاجَّاجنْ ذ أَسَّامنْ ذ ثْمِيجَّاوِينْ. زَّاثْ إِ ڒْعَارْشْ أَرقّنْثْ سبْعَا ن إِصفْضَاونْ، ثِينَا ذ سبْعَا ن أَرُّوحَاثْ ن أَربِّي.

‏6 غَارْ زَّاثْ ن ڒْعَارْشْ ثُوغَا ذِينْ أَمشْنَاوْ ڒبْحَارْ ن زَّاجْ، أَخْمِي ذ أَژْرُو ن ؤُكْرِيسْثَالْ. ذِي ڒْوسْثْ ن ڒْعَارْشْ ذ مِينْ ذ أَسْ د-إِنّْضنْ ثُوغَا ذِينْ أَربْعَا ن إِمدَّارنْ، عمَّارنْ س ثِيطَّاوِينْ مَارَّا غَارْ زَّاثْ ذ ضفَّارْ. ^▪   ‏7 أَمدَّارْ أَمزْوَارُو يَارْوسْ ذڭْ وَايْرَاذْ، أَمدَّارْ وِيسّْ ثْنَاينْ ذڭْ ؤُينْذُوزْ، أَمدَّارْ وِيسّْ ثْڒَاثَا ثُوغَا أَغمْپُوبْ نّسْ أَخْمِي ن بْنَاذمْ ؤُشَا أَمدَّارْ وِيسّْ أَربْعَا يَارْوسْ ذڭْ ؤُڭِيذرْ إِطَّاونْ. ‏8 أَربْعَا ن إِمدَّارنْ، كُوڒْ إِجّنْ وحّْذسْ زَّايْسنْ غَارسْ ستَّا ن وَافْرِيونْ عمَّارنْ س ثِيطَّاوِينْ غَارْ بَارَّا ذ ذَاخڒْ، ؤُ وَارْ أَرسِّينْ أَسّْ ذ دْجِيڒثْ، نَّانْ:

”أَمْقدَّاسْ، أَمْقدَّاسْ، أَمْقدَّاسْ ذ سِيذِي أَربِّي،

أَمْزمَّارْ خْ كُوڒْشِي

ذ ونِّي ثُوغَا ذ ونِّي إِدْجَانْ ذ ونِّي د غَا يَاسنْ.“ ^▪  

‏9 ؤُشَا خْمِي إِ غَا وْشنْ أَربْعَا ن إِمدَّارنْ أَعُودْجِي ذ شَّانْ ذ ؤُقَاذِي إِ ونِّي إِقِّيمنْ خْ ڒْعَارْشْ، ذ ونِّي إِدَّارنْ إِ ڒبْذَا قَاعْ، - أَمِينْ! - ،

‏10 خنِّي أَربْعَا ؤُ عِيشْرِينْ ن إِمْغَارنْ وْضَانْ غَارْ ثمُّورْثْ غَارْ زَّاثْ ن ونِّي إِقِّيمنْ خْ ڒْعَارْشْ، سجْذنْ إِ ونِّي إِدَّارنْ إِ ڒبْذَا قَاعْ، - أَمِينْ! - ، ؤُشَا سَّارْسنْ تَّاجَاثْ نْسنْ غَارْ زَّاثْ إِ ڒْعَارْشْ، نَّانْ:

‏11 ”شكْ، أَ سِيذِيثْنغْ ذ أَربِّي نّغْ، ثسْذَاهدْجذْ أَذْ ثكْسِيذْ

أَعُودْجِي ذ شَّانْ ذ جّهْذْ،

مَاغَارْ شكْ ذ ونِّي إِڭِّينْ مَارَّا ثِيمسْڒَايِينْ-أَ،

ؤُ أَقَا أَثنْثْ ذِينْ ؤُ تّْوَاخڒْقنْثْ س ڒْخَاضَارْ نّكْ!“ ^▪