‏1 أَرِي إِ لْمَالَاكْ ن ثْمسْمُونْثْ ذِي سَارْذِيسْ!

أَمُّو إِ إِقَّارْ ونِّي غَارْ إِدْجْ سبْعَا ن أَرُّوحَاثْ ن أَربِّي ذ سبْعَا ن إِثْرَانْ: نشّْ سّْنغْ ڒخْذَايمْ نّكْ، أَقَا غَاركْ إِسمْ أَقَا ثدَّارذْ، مَاشَا شكْ ثمُّوثذْ. ^▪  

‏2 ”حْضَا، سجْهذْ مِينْ إِقِّيمنْ مِينْ إِڭُّورنْ أَذْ إِتّْوَاهلّكْ، مَاغَارْ ؤُفِيغْ أَقَا ڒخْذَايمْ نّكْ وَارْ كمّْڒنْثْ شَا غَارْ أَربِّي إِنُو. ‏3 عْقڒْ مْلِيحْ، مَامّشْ خَاسْ ثسْڒِيذْ ؤُ مَامّشْ ثطّْفذْ، حْضَا ؤُشَا ثُوبْ! مَاشَا مَاڒَا وَارْ ثتّْفِيقذْ، أَذْ غَاركْ د-أَسغْ أَمْ ؤُشفَّارْ، وَارْ ثسِّينذْ شَا ذِي مَانْ ثَاسَاعّثْ إِ خَاكْ د غَا بدّغْ. ^▪  

‏4 مَاشَا غَارِي شَا ن إِسْمَاونْ ذِي سَارْذِيسْ، إِنِّي وَارْ إِسّْخمْجنْ شَا أَرُّوضْ نْسنْ ؤُشَا نِيثْنِي أَذْ ؤُيُورنْ أَكِيذِي س وَارُّوضْ أَشمْڒَاڒْ، مِينْزِي نِيثْنِي سْذَاهدْجنْ ث.

‏5 ونِّي إِ غَا إِغلّْبنْ أَذْ يَارْضْ أَمُّو أَرُّوضْ أَشمْڒَاڒْ. عمَّارْصْ أَذْ كّْسغْ إِسمْ نّسْ زڭْ وذْلِيسْ ن ثُوذَارْثْ، مَاشَا أَذْ شهْذغْ خْ يِيسمْ نّسْ زَّاثْ إِ بَابَا ذ لْمَالَاكَاثْ نّسْ. ^▪  

‏6 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.“

‏7 أَرِي إِ لْمَالَاكْ ن ثْمسْمُونْثْ ذِي فِيلَاذِيلْفِييَا!

أَمُّو إِ إِقَّارْ ؤُمْقدَّاسْ ونِّي ذ ثِيذتّْ ذ ونِّي غَارْ إِدْجْ ثْسَارُوثْ ن ذَاوُوذْ ذ ونِّي إِ غَا يَارزْمنْ، خنِّي ؤُڒَا ذ إِجّنْ أَذْ إِبلّعْ، ذ ونِّي إِ غَا إِبلّْعنْ، خنِّي ؤُڒَا ذ إِجّنْ أَذْ يَارْزمْ: ^▪  

‏8 ”نشّْ سّْنغْ ڒخْذَايمْ نّكْ. أَقَا ڭِّيغْ زَّاثشْ إِشْثْ ن ثوَّارْثْ ثَارْزمْ، ثنِّي ؤُڒَا ذ إِجّْ وَارْ إِزمَّارْ أَذْ ت إِبلّعْ، مِينْزِي جّهْذْ نّكْ ذ أَمژْيَانْ، قَاعْ أَمنِّي ثحْضِيذْ أَوَاڒْ إِنُو ؤُشَا وَارْ ثنْكَارذْ شَا إِسمْ إِنُو. ‏9 خْزَارْ، أَذْ وْشغْ شَا زِي ثمْزِيذَا ن شِّيطَانْ، إِنِّي إِقَّارنْ أَقَا نِيثْنِي ذ ؤُذَاينْ، مَاشَا نِيثْنِي وَارْ دْجِينْ شَا أَمنِّي، مَاشَا نِيثْنِي سّْخَارِّيقنْ. أَذْ ثنْ أَرّغْ أَذْ أَشْ وْضَانْ غَارْ إِضَارنْ نّكْ. نِيثْنِي ؤُشَا أَذْ نعْمنْ بلِّي نشّْ سّْعِيزّغْ شكْ، ^▪  

‏10 مِينْزِي أَقَا شكْ ثحْضِيذْ أَوَاڒْ إِنُو ن ضّْبَارْ، أَذْ خَاكْ حْضِيغْ عَاوذْ زِي ثْسَاعّثْ ن ؤُجَارّبْ ثنِّي إِ د غَا يَاسنْ خْ ثمُّورْثْ مَارَّا إِ ؤُجَارّبْ ن يِينِّي إِزدّْغنْ خْ ثمُّورْثْ.

‏11 نشّْ أَذْ د-أَسغْ ذغْيَا. طّفْ ذِي مِينْ غَاركْ حِيمَا ؤُڒَا ذ إِجّْ وَارْ ذ أَشْ إِتّكّسْ شَا تَّاجْ نّكْ. ^▪  

‏12 ونِّي إِ غَا إِغلّْبنْ أَذْ ث ڭّغْ ذ أَبِيلَارْ ذِي زَّاوشْثْ ن أَربِّي إِنُو ؤُشَا وَارْ زَّايسْ إِتّْوَامّكْسِي عمَّارْصْ. نشّْ أَذْ خَاسْ أَرِيغْ إِسمْ ن أَربِّي إِنُو ذ يِيسمْ ن ثنْذِينْثْ ن أَربِّي إِنُو، ؤُرْشَالِيمْ ن جْذِيذْ، ثنِّي إِ د غَا إِهْوَانْ زڭْ ؤُجنَّا زِي زَّاثْ إِ أَربِّي إِنُو، ؤُڒَا ذ إِسمْ إِنُو ن جْذِيذْ. ^▪  

‏13 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.“

‏14 أَرِي إِ لْمَالَاكْ ن ثْمسْمُونْثْ ن إِلَايُوذِيكِييّنْ!

أَمُّو إِ إِقَّارْ ونِّي ذ ’أَمِينْ‘، أَشهَّاذْ أَمْثِيقِّي ذ ثِيذتّْ، ونِّي ذ بدُّو ن مَارَّا مِينْ د-إِخْڒقْ أَربِّي: ^▪  

‏15 ”نشّْ سّْنغْ ڒخْذَايمْ نّكْ، أَقَا شكْ وَارْ ثسْمِيضذْ وَارْ ثحْمِيذْ. معْلِيكْ بعْذَا ثْسمْضذْ نِيغْ ثحْمِيذْ!

‏16 س ؤُينِّي، ؤُمِي شكْ ثمْڒُوذذْ، وَارْ ثحْمِيذْ وَارْ ثسْمِيضذْ، أَذْ شكْ عُوقّغْ زڭْ ؤُقمُّومْ إِنُو.

‏17 مِينْزِي شكْ ثقَّارذْ: ’نشّْ غَارِي أَڭْڒَا ؤُشَا إِمَّارْنِي-د غَارِي وَاڭْڒَا، وَارْ ذ أَيِي إِتّْخصِّي وَالُو!‘، ؤُشَا وَارْ ثسِّينذْ شَا بلِّي أَقَا شكْ ثْحڒْشذْ ؤُ ذَايكْ ڒغْبنْ ذ زّڒْضْ ؤُ أَقَا شكْ ذ أَذَارْغَاڒْ ذ أَعَارْيَانْ،

‏18 أَذْ شكْ نصْحغْ مَاحنْذْ أَذْ خَافِي ثسْغذْ وُورغْ إِقُّورنْ إِكِّينْ ثِيمسِّي حِيمَا أَذْ ثْذوْڒذْ ذ بُو-وَاڭْڒَا، ڒَا ذ أَرُّوضْ ذ أَشمْڒَاڒْ حِيمَا أَذْ ث ثْيَارْضذْ ؤُ وَارْ ثضْهَارْ عَاذْ ڒفْضِيحثْ ن ثُوعَارْينْثْ نّكْ، ؤُڒَا ذ دّْهنْ إِ ثِيطَّاوِينْ نّكْ حِيمَا أَذْ ثْمسْحذْ ثِيطَّاوِينْ نّكْ، أَذْ ثْوَاڒِيذْ. ^▪  

‏19 مَارَّا ونِّي سّْعِيزّغْ، تّْوبّْخغْ ث ؤُ أَربِّيغْ ث. شْضَارْ خنِّي، ؤُ ثُوبْ! ^▪  

‏20 أَقَا ذَا، نشّْ بدّغْ غَارْ ثوَّارْثْ، سّْقَارْقُوبغْ-د. مَاڒَا حذْ إِسْڒَا إِ ثْمِيجَّا إِنُو، أَذْ يَارْزمْ ثَاوَّارْثْ، نشّْ أَذْ غَارسْ أَذْفغْ ؤُشَا أَذْ كِيسْ مُّونسْوغْ ذ نتَّا أَكِيذِي.

‏21 ونِّي إِ غَا إِغلّْبنْ أَذْ أَسْ وْشغْ حِيمَا أَذْ إِقِّيمْ أَكِيذِي خْ ڒْعَارْشْ إِنُو، أَمشْنَاوْ نشّْ غلّْبغْ ؤُشَا قِّيمغْ أَكْ-ذ بَابَا خْ ڒْعَارْشْ نّسْ. ^▪  

‏22 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.“