‏1 أَرِي إِ لْمَالَاكْ ن ثْمسْمُونْثْ ذِي أَفَاسُوسْ!

أَمُّو إِ إِقَّارْ ونِّي غَارْ إِدْجْ سبْعَا ن إِثْرَانْ ذڭْ ؤُفُوسْ نّسْ، ونِّي إِڭُّورنْ ذِي ڒْوسْثْ ن سبْعَا ن ڒقْنَاذڒْ ن وُورغْ:

‏2 ”نشّْ سّْنغْ ڒخْذَايمْ نّكْ ذ وَارْبَارْ نّكْ ذ ضّْبَارْ نّكْ، بلِّي وَارْ ثْزمَّارذْ أَذْ ثْحمْڒذْ إِنِّي إِعفّْننْ ؤُشَا ثْقدْجْبذْ إِنِّي إِتّڭّنْ إِخفْ نْسنْ ذ رُّوسُولْ، مَاشَا وَارْ دْجِينْ شَا، ؤُشَا ثُوفِيذْ ثنْ ذ أَيْثْ ن بُو-إِخَارِّيقنْ. ^▫   ‏3 شكْ ثْصبَّارذْ ؤُ ثكْسِيذْ أَرْمحْ خْ سِّيبّثْ ن يِيسمْ إِنُو ؤُ وَارْ ثُوحِيڒذْ شَا.

‏4 مَاشَا غَارِي خَاكْ شَا، بلِّي ثجِّيذْ ثَايْرِي نّكْ ثَامزْوَارُوثْ. ‏5 عْقڒْ مَانِيسْ-د ثوْضِيذْ ؤُشَا ثُوبْ، خنِّي أڭّْ ڒخْذَايمْ ثِيمزْوُورَا! مَاڒَا وَارْ إِدْجِي أَمنِّي، أَذْ غَاركْ د-أَسغْ ذغْيَا، أَذْ كْسِيغْ ڒْقنْذِيڒْ نّكْ زڭْ ومْشَانْ نّسْ، مَاڒَا وَارْ ثُوبِيذْ شَا.

‏6 مَاشَا مَانْ أَيَا ثِيوْضذْ، أَقَا ثْشَارّْهذْ ڒخْذَايمْ ن أَيْثْ ن إِنِيكُولَايِيثنْ، ثِينِّي شَارّْهغْ ؤُڒَا ذ نشّْ. ^▪  

‏7 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.

ونِّي إِ غَا إِغلّْبنْ أَذْ ث سّشّغْ زِي ثْشجَّارْثْ ن ثُوذَارْثْ إِ يدْجَانْ ذِي جّنّثْ ن أَربِّي.“ ^▫  ▪  

‏8 أَرِي إِ لْمَالَاكْ ن ثْمسْمُونْثْ ذِي سْمِيرْنَا!

أَمُّو إِ إِقَّارْ ونِّي ذ أَمزْوَارُو ذ ؤُنڭَّارُو، ونِّي إِمُّوثنْ ؤُشَا إِذْوڒْ-د إِدَّارْ عَاوذْ: ^▪  

‏9 ”أَقَا سّْنغْ ڒْمحْنثْ ذ وزْڒَاضْ نّكْ - قَاعْ أَمنِّي شكْ ثتّجَّارذْ - ؤُ أَقَا-يِي سّْنغْ ؤُڒَا ذ أَشقّفْ ن يِينِّي إِقَّارنْ أَقَا أَثنْ ذ ؤُذَاينْ س ثِيذتّْ، مَاشَا نِيثْنِي وَارْ دْجِينْ شَا ذ ؤُذَاينْ، مَاشَا ذ ثَامْزِيذَا ن شِّيطَانْ.

‏10 وَارْ تّڭّْوذْ شَا زِي مِينْ غَا ثتّْوَاعدّْبذْ. أَقَا إِبْڒِيسْ أَذْ إِنْضَارْ شَا زَّايْومْ ذِي ڒحْبسْ، حِيمَا أَذْ ثتّْوَاجَارّْبمْ. أَذْ غَارْومْ ثِيڒِي ڒْمحْنثْ ن عشْرَا ن وُوسَّانْ. إِڒِيمْ ذ إِمْثِيقَّانْ أَڒْ ڒْموْثْ، ڒخْذنِّي أَذْ أَشْ وْشغْ تَّاجْ ن ثُوذَارْثْ.

‏11 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.

ونِّي إِ غَا إِغلّْبنْ وَارْ ذ أَسْ د-ثتِّيوِي شَا ثْخسَّارْثْ زِي ڒْموْثْ وِيسّْ ثْنَاينْ.“ ^▪  

‏12 أَرِي إِ لْمَالَاكْ ن ثْمسْمُونْثْ ذِي بِيرْغَامُوسْ!

أَمُّو إِ إِقَّارْ ونِّي غَارْ إِدْجْ سِّيفْ إِقْضعْ خْ ثْنَاينْ ن وُوذْمَاونْ: ^▪  

‏13 ”نشّْ سّْنغْ مَانِي ثْزدّْغذْ، ذِيهَا مَانِي إِتّْبدَّا ڒْعَارْشْ ن شِّيطَانْ. أَقَا ثقِّيمذْ ثطّْفذْ ذڭْ يِيسمْ إِنُو ؤُشَا وَارْ ثنْكَارذْ شَا لْ-إِيمَانْ ذَايِي، مَاغَارْ ذڭْ وُوسَّانْ ؤُمِي ثُوغَا شكْ أَكْ-ذ ؤُشهَّاذْ أَمْثِيقِّي إِنُو ثتّْمنْغذْ ذِي طّْوعْ ن مَارَّا إِشهَّاذنْ إِنُو إِمْثِيقَّانْ، أَقَا إِتّْوَانغْ جَارْ أَومْ.

‏14 مَاشَا غَارِي خَاكْ شَا، مِينْزِي غَاركْ ذِينِّي إِنِّي إِتّطّْفنْ ذڭْ ؤُسڒْمذْ ن بَالْعَامْ، ونِّي ثُوغَا إِسّْڒمْذنْ إِ بَالَاكْ مَامّشْ إِ غَا إِنْضَارْ ثَاعنْكْرِيفْثْ إِ أَيْثْ ن إِسْرَائِيل حِيمَا أَذْ شّنْ زِي مِينْ غَارْصنْ إِ لْ-أَصْنَامْ ؤُشَا أَذْ سفْسَّاذنْ إِخفْ نْسنْ. ^▪  

‏15 غَاركْ ذِينْ عَاوذْ إِنِّي إِتّطّْفنْ ذِي ثْغُورِي ن إِنِيكُولَايِيثنْ.

‏16 س ؤُينِّي ثُوبْ! مَاڒَا وَارْ إِدْجِي أَمنِّي، أَذْ غَارْومْ د-أَسغْ ذغْيَا، أَذْ كِيسنْ منْغغْ س سِّيفْ ن ؤُقمُّومْ إِنُو. ^▪  

‏17 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.

ونِّي إِ غَا إِغلّْبنْ أَذْ أَسْ سّشّغْ ’مَانَّا‘ إِنُّوفَارنْ ؤُشَا أَذْ أَسْ وْشغْ إِجّْ ن ؤُقَايَاسْ ذ أَشمْڒَاڒْ، إِتّْوَارِي خْ ؤُقَايَاسْ نِّي إِجّْ ن إِسمْ ن جْذِيذْ، وَارْ ث إِسِّينْ حذْ مْغِيرْ ونِّي ث إِطّْفنْ.“ ^▪  

‏18 أَرِي إِ لْمَالَاكْ ن ثْمسْمُونْثْ ذِي ثِييَاثِيرَا!

أَمُّو إِ إِقَّارْ مِّيسْ ن أَربِّي ونِّي غَارْ إِدْجْ ثِيطَّاوِينْ أَمْ إِحُوذَاقْ ن ثْمسِّي ذ إِضَارنْ نّسْ أَمْ نّْحَاسْ زِي لُوبْنَانْ: ^▪  

‏19 ”نشّْ سّْنغْ ڒخْذَايمْ نّكْ ؤُڒَا ذ ثَايْرِي نّكْ ذ لْ-إِيمَانْ نّكْ ذ ثْسخَّارْثْ نّكْ ذ ضّْبَارْ نّكْ، أَقَا ڒخْذَايمْ نّكْ ثِينڭُّورَا إِمْغَارنْ خْ ثْمزْوُورَا.

‏20 مَاشَا غَارِي خَاكْ أَطَّاسْ، أَقَا ثجِّيذْ ثَامطُّوثْ نّكْ إِزَابِيلْ، ثنِّي إِقَّارنْ بلِّي نتَّاثْ ذ ثَانَابِيثْ، ثسّڒْمَاذْ ؤُشَا ثسّْغكّْوَا إِمْسخَّارنْ حِيمَا أَذْ سّْفسْذنْ إِخفْ نْسنْ ؤُشَا أَذْ شّنْ مِينْ إِتّْوَاغَارْصنْ إِ لْ-أَصْنَامْ. ^▪   ‏21 أَقَا وْشِيغْ أَسْ شَا ن ڒْوقْثْ حِيمَا أَذْ ثثُوبْ، مَاشَا نتَّاثْ وَارْ ثتّخْسْ شَا أَذْ ثثُوبْ زِي فَارْقْ-شّْغڒْ نّسْ. ‏22 خْزَارْ، أَذْ ت غضْڒغْ ذِي ڒحْمڒْ إِ يِيجّْ ن ؤُمتِّينْ ؤُشَا إِنِّي أَكِيذسْ إِزنَّانْ، أَذْ ثنْ نذْهغْ ذِي ڒْمحْنثْ ثَامقّْرَانْثْ مَاڒَا وَارْ ثُوبنْ شَا زِي مِينْ ڭِّينْ. ‏23 ثَارْوَا نّسْ أَذْ ثنْ وْثغْ س ڒْموْثْ ؤُشَا مَارَّا ثِيمسْمُونِينْ أَذْ فهْمنْثْ أَقَا نشّْ ذ ونِّي إِقدْجْبنْ ثِيژَّاڒْ ذ وُوڒَاونْ ؤُشَا أَذْ أَومْ وْشغْ مَارَّا أَنشْثْ ن ڒخْذَايمْ نْومْ. ^▪  

‏24 مَاشَا إِ كنِّيوْ، إِنِّي إِقِّيمنْ ذِي ثِييَاثِيرَا - مَارَّا إِنِّي وَارْ غَارْ إِدْجِي شَا ثَاغُورِي أَيَا ؤُشَا وَارْ سِّيننْ ؤُمِي قَّارنْ نِيثْنِي ’ڒَادْجَاغْ ن شِّيطَانْ‘ - أَذْ أَومْ إِنِيغْ: نشّْ وَارْ خَاومْ تّْذَارَّاشغْ شَا ثَاغْرَارْثْ نّغْنِيثْ. ‏25 مَاشَا مِينْ غَارْومْ، طّْفمْ ذَايسْ أَڒْ د غَا يَاسغْ. ^▪  

‏26 ونِّي إِ غَا إِغلّْبنْ ؤُ ونِّي إِ غَا إِطّْفنْ ذِي ڒخْذَايمْ إِنُو، أَذْ أَسْ وْشغْ صُّولْطَا خْ ڒڭْنُوسْ، ‏27 مَاحنْذْ أَذْ ثنْ يَارْوسْ س ؤُزدْجَاضْ ن وُوزَّاڒْ، ؤُشَا أَذْ تّْوَارْژنْ نِيثْنِي أَمْ إِغَارَّافنْ ن ثْڒَاخْثْ ن بُو-ثْڒَاخْثْ، أَقَا أَمُّو إِ ثطّْفغْ ؤُڒَا ذ نشّْ زِي بَابَا، ^▪   ‏28 ؤُشَا نشّْ أَذْ أَسْ وْشغْ إِثْرِي ن ڒفْجَارْ.

‏29 ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.“