‏1 أَسَارْڭَابْ ن يشُّو لْمَاسِيحْ إِ ذ أَسْ إِوْشَا أَربِّي، حِيمَا أَذْ إِسّْشنْ إِ إِمْسخَّارنْ نّسْ مِينْ إِتّْخصَّا أَذْ إِمْسَارْ ذغْيَا، ؤُشَا إِسَّارْڭبْ إِ-ث، أَمْ ث إِسّكّْ س ؤُفُوسْ ن لْمَالَاكْ نّسْ، إِ ؤُمْسخَّارْ نّسْ يُوحَانَّا. ‏2 وَانِيثَا إِشْهذْ خْ وَاوَاڒْ ن أَربِّي ؤُ زِي شّْهَاذثْ ن يشُّو لْمَاسِيحْ ؤُ زِي مَارَّا مِينْ إِژْرَا، ‏3 سّعْذْ ن ونِّي إِقَّارنْ ذ ينِّي إِتّسْڒَانْ أَوَاڒنْ ن نُوبُّووَا ؤُ قِّيمنْ ثطّْفنْ ذِي مِينْ ذَايسْ إِتّْوَارِينْ. أَقَا ڒْوقْثْ ثِيوضْ-د. ^▪  

‏4 يُوحَانَّا، إِ سبْعَا ن ثْمسْمُونِينْ ذِي أَسِييَا: أَذْ كِيذْومْ يِيڒِي أَرْضَا ذ ڒهْنَا زڭْ ونِّي إِدْجَانْ ذ ونِّي ثُوغَا ذ ونِّي د غَا يَاسنْ، ؤُڒَا زِي سبْعَا ن أَرُّوحَاثْ نِّي إِدْجَانْ زَّاثْ إِ ڒْعَارْشْ نّسْ، ^▪   ‏5 ؤُ زِي يشُّو لْمَاسِيحْ، أَشهَّاذْ أَمْثِيقِّي، أَمنْزُو جَارْ ن إِمتِّيننْ ذ أَمقّْرَانْ ن إِجدْجِيذنْ ن ثمُّورْثْ. إِ ونِّي ذ أَنغْ إِتّخْسنْ ؤُ ذ أَنغْ إِفكّنْ زِي دّْنُوبْ نّغْ س إِذَامّنْ نّسْ، ^▪   ‏6 - أَقَا يَارّْ أَنغْ ذ إِجدْجِيذنْ ذ إِكهَّاننْ غَارْ أَربِّي بَابَاسْ - ، إِ نتَّا أَذْ غَارسْ يِيڒِي ؤُعُودْجِي ذ صُّولْطَا إِ ڒبْذَا قَاعْ. أَمِينْ! ^▪  

‏7 خْزَارْ، نتَّا أَذْ د-يَاسْ أَكْ-ذ إِسيْنُوثنْ، كُوڒْ ثِيطّْ أَذْ ث ثْژَارْ، ؤُڒَا ذ إِنِّي ث إِسّْنُوقّْبنْ. مَارَّا ثِيقبَّاڒْ ن ثمُّورْثْ أَذْ خَاسْ وْثنْثْ أَڭجْذُورْ. وَاهْ، أَمِينْ! ^▪  

‏8 نشّْ ذ أَلِيفْ ذ ثَاوْ، أَمزْوَارُو ذ ؤُنڭَّارُو، إِقَّارْ سِيذِي أَربِّي، ذ ونِّي إِدْجَانْ ذ ونِّي ثُوغَا ذ ونِّي د غَا يَاسنْ، أَمْزمَّارْ خْ كُوڒْشِي. ^▪  

‏9 نشّْ، يُوحَانَّا، ؤُمَاثْومْ ذ ؤُمْعَاشَارْ نْومْ ذِي ڒْمحْنثْ ؤُ ذِي ضّْبَارْ نِّي إِدْجَانْ ذِي يشُّو، ثُوغَا أَيِي ذِي ثڭْزِيرْثْ قَّارنْ أَسْ بَاثْمُوسْ ذِي طّْوعْ ن وَاوَاڒْ ن أَربِّي ذ شّْهَاذثْ ن يشُّو لْمَاسِيحْ.

‏10 ؤُسِيغْ-د ذِي أَرُّوحْ ذڭْ وَاسّْ أَمزْوَارُو ن سِيمَانَا ؤُشَا سْڒِيغْ أَوَارْنِي أَيِي إِشْثْ ن ثْمِيجَّا ثجْهذْ أَمشْنَاوْ أَصُوضِي ذڭْ ؤُيِيشّْ ن ؤُشَارِّي، ^▫  ▪  

‏11 ثقَّارْ: ”مِينْ ثتّْوَاڒِيذْ، أَرِي ث ذڭْ إِشْثْ ن ثبْرَاثْ، سّكّْ إِ-ث-إِ-د إِ سبْعَا ن ثْمسْمُونِينْ: غَارْ أَفَاسُوسْ، غَارْ سْمِيرْنَا، غَارْ بِيرْغَامُوسْ، غَارْ ثِييَاثِيرَا، غَارْ سَارْذِيسْ، غَارْ فِيلَاذِيلْفِييَا ؤُشَا غَارْ لَايُوذِيكِييَا.“

‏12 خنِّي نّْقڒْبغْ حِيمَا أَذْ سّْنغْ وِي كِيذِي إِسَّاوَاڒنْ. أَڒَامِي نّْقڒْبغْ، ژْرِيغْ سبْعَا ن ڒقْنَاذڒْ ن وُورغْ

‏13 ؤُشَا ذِي ڒْوسْثْ ن ڒقْنَاذڒْ إِجّنْ أَمشْنَاوْ مِّيسْ ن بْنَاذمْ، ثُوغَا يَارْضْ أَبَالْطُو ن ؤُكهَّانْ ؤُ غَارسْ إِجّْ ن وبْيَاسْ ن وُورغْ خْ إِذْمَارنْ. ^▪  

‏14 أَزدْجِيفْ نّسْ ذ ؤُشُووَّافْ نّسْ ثُوغَا أَثنْ ذ إِشمْڒَاڒنْ أَمْ ثَاضُوفْثْ، أَمْ وذْفڒْ، ؤُشَا ثِيطَّاوِينْ نّسْ أَمْ إِحُوذَاقْ ن ثْمسِّي، ^▪  

‏15 إِضَارنْ نّسْ أَمْ نّْحَاسْ ن لُوبْنَانْ، إِحْمَانْ ذڭْ ؤُفَارَّانْ، ؤُ ڒْحسّْ نّسْ أَمْ ڒْحسّْ ن وَاطَّاسْ ن وَامَانْ. ^▪  

‏16 ثُوغَا غَارسْ ذڭْ ؤُفُوسْ نّسْ أَفُوسِي سبْعَا ن يثْرَانْ ؤُشَا زڭْ ؤُقمُّومْ نّسْ إِتّفّغْ-د زَّايسْ سِّيفْ إِقْضعْ ؤُشَا ثْمُورْغِي نّسْ ثتّشْضِيضِيحْ أَمشْنَاوْ ثَافُوشْثْ س جّهْذْ نّسْ. ^▪  

‏17 أَڒَامِي ث ژْرِيغْ، وْضِيغْ أَسْ غَارْ إِضَارنْ نّسْ أَخْمِي مُّوثغْ ؤُشَا نتَّا إِسَّارْسْ خَافِي أَفُوسْ نّسْ أَفُوسِي، إِنَّا: ”وَارْ تّڭّْوذْ شَا! أَقَا نشّْ ذ أَمزْوَارُو ذ ؤُنڭَّارُو، ^▪  

‏18 نشّْ ذ ونِّي إِدَّارنْ، ؤُ نشّْ ثُوغَا مُّوثغْ، ؤُ خْزَارْ، أَقَا نشّْ ذ ونِّي إِدَّارنْ إِ ڒبْذَا قَاعْ! أَقَا غَارِي ثْسَارُوثْ ن ڒْموْثْ ذ ڒَاخَارْثْ. ^▪  

‏19 س ؤُينِّي أَرِي مِينْ ثژْرِيذْ، ذ مِينْ إِدْجَانْ، ذ مِينْ غَا إِمْسَارنْ أَوَارْنِي مَانْ أَيَا. ‏20 أَقَا سِّيرّْ ن سبْعَا ن إِثْرَانْ إِ ثژْرِيذْ ذڭْ ؤُفُوسْ إِنُو أَفُوسِي ؤُ سِّيرّْ ن سبْعَا ن ڒقْنَاذڒْ ن وُورغْ ذ وَا: سبْعَا ن إِثْرَانْ أَقَا أَثنْ ذ لْمَالَاكَاثْ ن سبْعَا ن ثْمسْمُونِينْ ؤُشَا سبْعَا ن ڒقْنَاذڒْ، أَقَا أَثنْثْ ذ سبْعَا ن ثْمسْمُونِينْ.“