أَذْلِيسْ إِتّْوَانّْضنْ ذ يزْمَارْ
5
1 ؤُشَا ژْرِيغْ ذڭْ ؤُفُوسْ أَفُوسِي ن ونِّي إِقِّيمنْ خْ ڒْعَارْشْ إِجّْ ن وذْلِيسْ إِتّْوَانّْضنْ، ثُوغَا خَاسْ ثِيرَا غَارْ ذَاخڒْ ذ بَارَّا، ؤُشَا أَذْلِيسْ ثُوغَا إِتّْوَاشمّعْ س سبْعَا ن إِشمِّيعنْ. ▪ 2 ؤُشَا ژْرِيغْ إِجّْ ن لْمَالَاكْ إِجْهذْ نّغْنِي، إِتّْڒَاغَا س جّهْذْ: ”مَانْ ونْ إِسْذَاهدْجنْ أَذْ يَارْزمْ أَذْلِيسْ-أَ إِتّْوَانّْضنْ ؤُشَا أَذْ إِكّسْ إِشمِّيعنْ نّسْ؟“ 3 ؤُشَا ؤُڒَا ذ إِجّْ ذڭْ ؤُجنَّا نِيغْ ذِي ثمُّورْثْ نِيغْ سَاذُو ثمُّورْثْ إِزمَّارْ أَذْ يَارْزمْ أَذْلِيسْ-أَ إِتّْوَانّْضنْ ؤُ أَذْ إِكّسْ إِشمِّيعنْ نّسْ، أَذْ ذَايسْ إِخْزَارْ. ▪ 4 نشّْ رُوغْ أَطَّاسْ ؤُمِي وَارْ ؤُفِينْ وِي إِسْذَاهدْجنْ أَذْ يَارْزمْ أَذْلِيسْ-أَ إِتّْوَانّْضنْ ؤُ أَذْ يَارْزمْ إِشمِّيعنْ نّسْ. 5 إِجّنْ زڭْ إِمْغَارنْ إِنَّا أَيِي: ”وَارْ تّْرُو شَا! خْزَارْ أَيْرَاذْ زڭْ أَيْثْ ن يَاهُوذَا، أَژْوَارْ ن ذَاوُوذْ، أَقَا إِغلّبْ حِيمَا أَذْ يَارْزمْ أَذْلِيسْ-أَ إِتّْوَانّْضنْ ؤُ حِيمَا أَذْ يَارْژْ إِشمِّيعنْ نّسْ.“ ▪ 6 ؤُشَا ژْرِيغْ ذِي ڒْوسْثْ ن ڒْعَارْشْ ذ أَربْعَا ن إِمدَّارنْ ؤُشَا ذِي ڒْوسْثْ ن إِمْغَارنْ، إِجّْ ن إِزْمَارْ إِبدّْ، إِڭَّا أَخْمِي ذ ثَاغَارْصْثْ. نتَّا غَارسْ سبْعَا ن وَاشَّاونْ ذ سبْعَا ن ثِيطَّاوِينْ، نِيثْنِي ذ سبْعَا ن أَرُّوحَاثْ ن أَربِّي إِنِّي د-إِتّْوَاسّكّنْ غَارْ دُّونشْثْ ثْمُونْ. ▫ ▪ 7 أَقَا نتَّا يُوسَا-د ؤُشَا إِكْسِي أَذْلِيسْ إِتّْوَانّْضنْ زڭْ ؤُفُوسْ ن ونِّي ثُوغَا إِقِّيمنْ خْ ڒْعَارْشْ.
8 أَڒَامِي إِطّفْ أَذْلِيسْ إِتّْوَانّْضنْ، وْضَانْ-د أَربْعَا ن إِمدَّارنْ ذ أَربْعَا ؤُ-عِيشْرِينْ ن إِمْغَارنْ غَارْ ثمُّورْثْ زَّاثْ إِ يزْمَارْ. نِيثْنِي مَارَّا إِذْسنْ غَارْسنْ إِشْثْ ن لْڭَامْبْرِي ذ طّْبَاصَا ن وُورغْ شُّورنْثْ س ڒبْخُورْ: مَانْ أَيَا ذ ثِيژَادْجِيثِينْ ن إِمْقدَّاسنْ. ▪ 9 ؤُشَا غنّْجنْ إِجّْ ن إِزْڒِي ن جْذِيذْ:
”شكْ ثسْذَاهدْجذْ أَذْ ثكْسِيذْ أَذْلِيسْ إِتّْوَانّْضنْ،
أَذْ ثكّْسذْ إِشمِّيعنْ نّسْ،
مِينْزِي شكْ ثتّْوَاغَارْصذْ
ؤُشَا س إِذَامّنْ نّكْ ثسْغِيذْ أَنغْ إِ أَربِّي،
زِي كُوڒْ ثَاقْبِيتْشْ ذ يِيڒسْ ذ ڒْڭنْسْ ذ شّعْبْ. ▪
10 شكْ ثَارِّيذْ ثنْ ذ ثْڭلْذَا ذ إِكهَّاننْ إِ أَربِّي نّغْ،
ؤُ نِيثْنِي أَذْ حكْمنْ أَمْ إِجدْجِيذنْ خْ ثمُّورْثْ.“ ▪
11 خنِّي ژْرِيغْ، ؤُشَا سْڒِيغْ ثْمِيجَّا ن وَاطَّاسْ ن لْمَالَاكَاثْ نّْضنْثْ إِ ڒْعَارْشْ ؤُ ن إِمدَّارنْ ؤُ ن إِمْغَارنْ، ؤُشَا ثُوغَا أَثنْ عشْرَا-أَڒَافْ ذِي عشْرَا ن ڒُوڒُوفْ ؤُ أَڒَافْ ذِي ڒُوڒُوفْ، ▪
12 قَّارنْ س ثْمِيجَّا إِجهْذنْ:
”إِزْمَارْ ونِّي إِتّْوَاغَارْصنْ إِسْذَاهدْجْ أَذْ إِطّفْ
صُّولْطَا ذ وَاڭْڒَا ذ ثِيغِيثْ،
ذ جّهْذْ ذ شَّانْ ذ ؤُعُودْجِي،
ذ لْبَارَاكَا!“ ▪
13 ؤُشَا مَارَّا وِي إِدْجَانْ ذڭْ ؤُجنَّا ؤُ خْ ثمُّورْثْ ذ سَاذُو ثمُّورْثْ ؤُ خْ ڒبْحَارْ، وَاهْ قَاعْ مِينْ إِدْجَانْ ذَايْسنْ، سْڒِيغْ أَسنْ، قَّارنْ:
”أَقَاذِي ذ شَّانْ ذ ؤُعُودْجِي ذ صُّولْطَا
أَذْ إِڒِينْ إِ ونِّي إِقِّيمنْ خْ ڒْعَارْشْ ؤُ إِ يزْمَارْ،
إِ ڒبْذَا قَاعْ!“
14 ؤُشَا ؤُمِي أَربْعَا ن إِمدَّارنْ نَّانْ: ”أَمِينْ!“، وْضَانْ إِمْغَارنْ غَارْ ثمُّورْثْ، سجْذنْ.