‏1 مِينْزِي كُوڒْ أَرَّايْسْ ن إِكهَّاننْ إِتّْوَاكّسْ-د زڭْ إِوْذَانْ، إِتّْوَاسْڭعّذْ ذِي طّْوعْ ن إِوْذَانْ خْ مِينْ إِدْجَانْ ن أَربِّي، مَاحنْذْ أَذْ إِقدّمْ ثِيوْهِيبِينْ ذ ثْغَارْصِينْ خْ دّْنُوبْ. ‏2 إِزمَّارْ أَذْ إِسّْوَاضعْ إِخفْ نّسْ، أَذْ إِحِينّْ خْ إِقُوبَّانِييّنْ ذ إِمْودَّارنْ، مِينْزِي ؤُڒَا ذ نتَّا سِيمَانْثْ نّسْ إِيَارْضْ ثُوضْعفْثْ. ‏3 مَاغَارْ س مَانْ أَيَا ذ إِشْثنْ إِتّْخصَّا أَسْ أَذْ إِسّْڭعّذْ ثِيغَارْصِينْ خْ دّْنُوبْ ن ڒْڭنْسْ ؤُشَا عَاوذْ خْ دّْنُوبْ ن يِيخفْ نّسْ. ^▪  

‏4 ؤُڒَا ذ إِجّنْ مَا أَذْ إِكْسِي إِ يِيخفْ نّسْ شَّانْ-أَ، مْغِيرْ ونِّي إِتّْوَاڒَاغَانْ زِي أَربِّي أَمْ مَامّشْ إِتّْوَاڒَاغَا هَارُونْ. ^▪   ‏5 أَمُّو عَاوذْ لْمَاسِيحْ وَارْ إِسّْعُودْجِي شَا إِخفْ نّسْ ؤُمِي إِذْوڒْ ذ أَرَّايْسْ ن إِكهَّاننْ، مَاشَا إِسّْعُودْجِي ونِّي د غَارسْ إِسِّيوْڒنْ:

”شكْ ذ مِّي،

نشّْ جِّيغْ-د شكْ أَسّْ-أَ!“ ^▪  

‏6 أَمْ مَامّشْ إِنَّا عَاوذْ ذِي مَانِي نّغْنِي:

”شكْ ذ أَكهَّانْ إِ ڒبْذَا،

ذِي صِّيفثْ ن مَالْكِيصَاذِيقْ.“ ^▪  

‏7 ڒَامِي ثُوغَا يَارّضْ أَرِّيمثْ، إِقدّمْ ثِيژَادْجِيثِينْ ذ ثُوثْرَا س إِغُويَّانْ أَطَّاسْ ؤُ س إِمطَّاونْ إِ ونِّي ثُوغَا إِزمَّارنْ أَذْ ث-إِ-د-إِسّْنكَّارْ زِي ڒْموْثْ إِ ثُوذَارْثْ، ؤُشَا إِسْڒَا أَسْ. ^▪   ‏8 نتَّا، وَاخَّا ثُوغَا-ث ذ ثَاممِّيثْ، أَقَا إِڒْمذْ طَّاعثْ زِي مِينْ خَاسْ إِكِّينْ ذ ثِيڭّْوُوذِي ؤُ زڭْ ؤُودّبْ إِ إِكْسِي. ^▪   ‏9 أَمُّو إِ إِذْوڒْ نتَّا إِكمّڒْ، إِذْوڒْ ذ ڒْعُونْصَارْ ن ثُوذَارْثْ إِتّْذُومَانْ إِ مَارَّا إِنِّي ذ أَسْ إِ غَا إِطَاعنْ،

‏10 ؤُشَا إِڭَّا إِ-ث أَربِّي ذ أَرَّايْسْ ن إِكهَّاننْ ذِي صِّيفثْ ن مَالْكِيصَاذِيقْ.

‏11 أَقَا غَارْنغْ أَطَّاسْ مِينْ غَا نِينِي خْ مَالْكِيصَاذِيقْ وَانِيثَا، إِوْعَارْ أَذْ ث نْفسَّارْ، مِينْزِي ثْذوْڒمْ ثوْعَارمْ أَذْ ثسْڒمْ.

‏12 مَاغَارْ ثُوغَا إِتّْخصَّا أَذْ ثِيڒِيمْ ذ إِمسْغَارنْ زِي جِّيهثْ ن ڒْمِيجَاڒْ ن ڒْوقْثْ إِ ثْضفَّارمْ ثْغُورِي أَيَا. مَاشَا ڒخُّو إِتّْخصَّا أَومْ عَاذْ أَذْ أَومْ ثْڒمْذمْ لْحُورُوفْ إِمزْوُورَا ن بدُّو ن وَاوَاڒنْ ن أَربِّي، كنِّيوْ ثحْذَاجمْ عَاذْ أَغِي، مَاشِي مَاشَّا إِجهْذنْ. ^▪  

‏13 مِينْزِي كُوڒْ إِجّنْ ونِّي إِشَارْشنْ ذڭْ ؤُغِي، وَارْ إِقدّْ خْ وَاوَاڒْ ن ثْسڭْذَا، مِينْزِي نتَّا ذ أَسيْمِي عَاذْ.

‏14 مَاشَا مَاشَّا إِجهْذنْ إِفّغْ-د إِ ينِّي إِمْغَارنْ، إِنِّي أَقَا نُّومنْ أَذْ ذَارّْبنْ ثَاشِيثْ نْسنْ حِيمَا أَذْ فَارْزنْ ڒْخَارْ خْ ڒْغَارْ.