‏1 س ؤُينِّي إِتّْخصَّا أَنغْ أَذْ نوْشْ ثَايْنِيثْ كْثَارْ إِ مِينْ نسْڒَا، حِيمَا وَارْ نتّفِّيغْ زڭْ وبْرِيذْ. ‏2 مِينْزِي، مَاڒَا أَوَاڒْ إِ نَّانْ لْمَالَاكَاثْ ثُوغَا ثْبدّْ، ؤُ مَارَّا وِي ث إِسْڒِينْ، مَاشَا إِعْذُو خَاسْ، أَقَا إِتّْوَاخدْجصْ س ڒْحقّْ، ^▪   ‏3 مَامّشْ إِ غَا نڭّْ أَذْ نَارْوڒْ نشِّينْ، مَاڒَا نسّحْقَارَا ثِيمسْڒَايِينْ إِ إِدْجَانْ ذ ثُوذَارْثْ إِ نشِّينْ، ثِيمسْڒَايِينْ إِ خفْ ثُوغَا إِسَّاوَاڒْ سِيذِيثْنغْ غَارْ ؤُمزْوَارُو، ؤُشَا خنِّي تّْوَاضمْننْثْ أَنغْ عَاوذْ زڭْ ينِّي جَارْ أَنغْ ثنْثْ زَّايسْ إِسْڒِينْ، ^▪   ‏4 ؤُمِي أَربِّي إِشْهذْ أَكِيذْسنْ س ڒعْڒَامَاثْ ذ لْمُوعْجِيزَاثْ ذ ڒعْجَايبْ إِفَارْزنْ ؤُ س ثْموْشِي ن أَرُّوحْ إِقدّْسنْ، ثِينِّي إِمّوْشنْ أَمْ مَامّشْ إِخْسْ نتَّا. ^▪   ‏5 مِينْزِي وَارْ إِسَّارْسْ شَا دُّونشْثْ إِ د غَا يَاسنْ خْ ثنِّي نسِّيوڒْ سَاذُو ڒُومُورْ ن لْمَالَاكَاثْ، ‏6 مَاشَا أَمْ مَامّشْ شهّْذنْثْ ؤُ قَّارنْثْ ثِيرَا إِقدّْسنْ:

”مِينْ إِعْنَا بْنَاذمْ، أَقَا شكْ إِ ذَايسْ إِتّْخَارَّاصنْ،

ؤُ مِينْ إِعْنَا مِّيسْ ن بْنَاذمْ، أَقَا شكْ إِ ذَايسْ إِتّْهِيلَّانْ؟ ^▪  

‏7 شكْ ثڭِّيذْ ث شْوَايْثْ سَاذُو لْمَالَاكَاثْ،

ثڭِّيذْ أَسْ إِجّْ ن تَّاجْ ن ؤُعُودْجِي ذ شَّانْ خْ ؤُخدْجِيفْ نّسْ

ؤُشَا ثوْشِيذْ أَسْ صُّولْطَا خْ ڒخْذَايمْ ن إِفَاسّنْ نّكْ.

‏8 أَقَا مَارَّا ثِيمسْڒَايِينْ ثڭِّيذْ ثنْثْ سَاذُو إِضَارنْ نّسْ.“

ؤُمِي إِڭَّا مَارَّا ثِيمسْڒَايِينْ سَاذُو نتَّا، أَقَا وَارْ إِجِّي وَالُو وَارْ ث إِڭِّي سَاذُو نتَّا. مَاشَا ڒخُّو وَارْ نْژَارْ عَاذْ مَارَّا إِتّْوَاڭّْ سَاذُو نتَّا، ^▪   ‏9 مَاشَا نتّْوَاڒَا بلِّي نتَّا ذ يشُّو، ونِّي ثُوغَا إِتّْوَاڭّنْ شْوَايْثْ سَاذُو لْمَالَاكَاثْ ذِي سِّيبّثْ ن ؤُودّبْ ن ڒْموْثْ نّسْ، نتّْوَاڒَا إِ-ث س تَّاجْ ن ؤُعُودْجِي ذ شَّانْ، مَاغَارْ أَربِّي إِقَّاسْ ڒْموْثْ إِ مَارَّا عْلَاحْسَابْ أَرْضَا نّسْ. ^▪  

‏10 مِينْزِي ثُوغَا إِتّْڒِيقْ أَسْ إِ نتَّا س ونِّي ؤُ إِ ونِّي دْجَانْثْ مَارَّا ثْمسْڒَايِينْ، - نتَّا ذ ونِّي إِ د-إِتَّاوْينْ أَطَّاسْ ن إِحنْجِيرنْ غَارْ ؤُعُودْجِي - ، مَاحنْذْ أَذْ إِكمّڒْ ؤُزدْجِيفْ ن ثُوذَارْثْ نْسنْ إِخفْ نّسْ س ؤُودّبْ نّسْ.

‏11 مِينْزِي ذ ونِّي إِسّْقدّْسنْ ؤُ إِنِّي إِتّْوَاقدّْسنْ، نِيثْنِي مَارَّا ذ إِجّنْ. س ؤُينِّي نتَّا وَارْ إِسّضْحِي شَا أَذْ أَسنْ إِڒَاغَا أَوْمَاثنْ نّسْ، ^▪  

‏12 ؤُمِي إِنَّا:

”أَذْ بَارّْحغْ إِ وَاوْمَاثنْ إِنُو س يِيسمْ نّكْ،

ذِي ڒْوسْثْ ن ثْمسْمُونْثْ أَذْ شكْ صبّْحغْ.“ ^▪  

‏13 ؤُشَا عَاوذْ:

”نشّْ أَذْ ذَايسْ تِّيقّغْ!“

ؤُشَا عَاوذْ:

”أَقَا ذَا، نشّْ ذ ثَارْوَا إِنِّي ذ أَيِي إِوْشَا أَربِّي.“ ^▪  

‏14 أَمْ شَارْشنْ ثَارْوَا ذڭْ ويْسُومْ ذ إِذَامّنْ ؤُڒَا ذ نتَّا سِيمَانْثْ نّسْ إِشَارْشْ أَمُّو كِيفْكِيفْ ذِي مَانْ أَيَا، حِيمَا أَذْ إِبطّڒْ س ڒْموْثْ نّسْ ونِّي غَارْ ثدْجْ صُّولْطَا خْ ڒْموْثْ، أَقَا نتَّا ذ شِّيطَانْ، ^▪  

‏15 ؤُ حِيمَا أَذْ إِفكّْ مَارَّا إِنِّي إِسّعْدُّونْ قَاعْ ثُوذَارْثْ نْسنْ أَمْ إِسمْغَانْ زِي ثِيڭّْوُوذِي ن ڒْموْثْ. ^▪  

‏16 مِينْزِي ڒْموْثْ وَارْ غَارسْ ثدْجِي صُّولْطَا خْ لْمَالَاكَاثْ، مَاشَا ڒْموْثْ غَارسْ صُّولْطَا خْ زَّارِيعثْ ن إِبْرَاهِيمْ.

‏17 س ؤُينِّي ثُوغَا إِتّْخصَّا أَسْ أَذْ إِذْوڒْ أَمشْنَاوْ أَوْمَاثنْ نّسْ زِي مَارَّا إِغزْذِيسنْ، حِيمَا أَذْ إِذْوڒْ ذ أَرَّايْسْ ن إِكهَّاننْ أَرْحِيمْ ذ أَمْثِيقِّي ذِي مِينْ إِدْجَانْ إِ أَربِّي، مَاحنْذْ أَذْ إِسّصْڒحْ دّْنُوبْ ن إِوْذَانْ. ^▪  

‏18 مِينْزِي مِينْ ذِي ثُوغَا نتَّا سِيمَانْثْ نّسْ إِودّبْ ؤُ إِتّْوَاجَارّبْ، أَقَا إِزمَّارْ أَذْ إِعَاونْ إِنِّي إِتّْوَاجَارّْبنْ. ^▪