4
1 أَ أَيْثْبَابْ، وْشمْ إِمْسخَّارنْ نْومْ مِينْ إِدْجَانْ إِسڭّْذنْ، ؤُ سْنمْ، بلِّي عَاوذْ كنِّيوْ غَارْومْ بَابْ ذڭْ إِجنْوَانْ. ▪ 2 صْبَارمْ ذِي ثْژَادْجِيثْ مَاحنْذْ أَذْ ثحْضَامْ ذَايسْ، ؤُ وْشمْ أَقَاذِي إِ أَربِّي. ▪ 3 ژَتدْجمْ عَاوذْ إِ نشِّينْ، حِيمَا أَربِّي أَذْ أَنغْ يَارْزمْ ثَاوَّارْثْ ن وَاوَاڒْ، حِيمَا أَذْ نسِّيوڒْ خْ سِّيرّْ ن لْمَاسِيحْ، ونِّي ؤُمِي دْجِيغْ عَاوذْ ذ أَمحْپُوسْ ذِي سْنَاسڒْ، ▪ 4 حِيمَا أَذْ ث سَّارڭْبغْ أَمْ مَامّشْ إِ خَافِي إِشُووَّارْ أَذْ زَّايسْ سِّيوْڒغْ.
5 ؤُيُورمْ ذِي ثِيغِيثْ أَكْ-ذ ينِّي ن بَارَّا، أَربْحمْ ڒْوقْثْ إِ يدْجَانْ. ▪ 6 أَذْ يِيڒِي وَاوَاڒْ نْومْ ڒبْذَا س ڒْخَاضَارْ، مدْجْحمْ ث س ثْمدْجَاحْثْ، حِيمَا أَذْ ثسّْنمْ مِينْ زِي غَا ثَارّمْ خْ كُوڒْ إِجّنْ. ▪
أَوَاڒْ ذ ؤُسدْجمْ أَنڭَّارُو
7 ثِيشِيكُوسْ، ؤُمَا إِعِيزّنْ ذ ؤُمْسخَّارْ أَمْثِيقِّي ذ ؤُمْسخَّارْ أَكِيذِي ذِي سِيذِي أَذْ كنِّيوْ إِسَّارْڭبْ خْ ؤُمدُّورْ إِنُو. ▪ 8 سّكّغْ ث غَارْومْ، حِيمَا أَذْ إِسّنْ مَامّشْ ثدْجَامْ ؤُ حِيمَا أَذْ ذَايْومْ إِڭّْ ؤُڒْ، 9 جْمِيعْ أَكْ-ذ ؤُنِيسِيمُوسْ، ؤُمَاثْنغْ أَمْثِيقِّي إِعِيزّنْ، ونِّي إِدْجَانْ ذ إِجّنْ زَّايْومْ. نِيثْنِي أَذْ كنِّيوْ سَّارڭْبنْ مَامّشْ ندْجْ نشِّينْ. ▪
10 أَرِيسْثَارْخُوسْ ونِّي ذِي ڒحْبسْ أَكِيذِي، إِسَّاكّْوَاضْ أَومْ-د سْڒَامْ س ڒهْنَا، أَمْ مَامّشْ خَاومْ إِسدْجمْ ؤُڒَا ذ مَارْكُوسْ، أَيَّاوْ ن بَارْنَابَا ونِّي خْ ثكْسِيمْ كنِّيوْ ثِيوصَّا - مَاڒَا يُوسَا-د غَارْومْ، قبْڒمْ ث -، ▪
11 ذ يشُّو، ؤُمِي ذ أَسْ قَّارنْ يُوسْثُوسْ. نِيثْنِي دْجَانْ زڭْ وخْثَانْ. نِيثْنِي وحّذْسنْ عَاوْننْ أَيِي ذِي ثْمسْڒَاشْثْ ن ثْڭلْذِيثْ ن أَربِّي ؤُشَا ڭِّينْ ذَايِي ؤُڒْ.
12 إِتّْسدْجَامْ-د خَاومْ إِبَافْرَاسْ، ونِّي ذ إِجّنْ زَّايْومْ، س ڒهْنَا. أَقَا-ث ذ أَمْسخَّارْ ن لْمَاسِيحْ، إِتّذْعَا أَومْ ڒبْذَا ذِي ثْژَادْجِيثْ نّسْ س جّهْذْ، حِيمَا أَذْ ثْبدّمْ نِيشَانْ، أَذْ ثِيڒِيمْ ثْكمّْڒنْ ذِي مَارَّا مِينْ إِخْسْ أَربِّي. ▪
13 مِينْزِي شهّْذغْ خَاسْ، أَقَا نتَّا أَطَّاسْ إِ خَاومْ إِكْسِي ؤُڒَا خْ ينِّي ذِي لَايُوذِيكِييَا ذ ينِّي ذِي هِيرَاپُولِيسْ.
14 لُوكَا، أَضْبِيبْ إِعِيزّنْ، ذ ذِيمَاسْ تّْسدْجَامنْ-د خَاومْ س ڒهْنَا. ▪
15 سدْجْممْ خْ وَاوْمَاثنْ إِنِّي إِدْجَانْ ذِي لَايُوذِيكِييَا س ڒهْنَا، خْ نِيمْفَاسْ ؤُ خْ ثْمسْمُونْثْ ذِي ثَادَّارْثْ نّسْ.
16 خْمِي إِ غَا ثتّْوَاسْغَارْ ثبْرَاثْ-أَ جَارْ أَومْ، خنِّي حْضَامْ أَذْ ثتّْوَاسْغَارْ عَاوذْ ذِي ثْمسْمُونْثْ ن إِلَايُوذِيكِييّنْ ؤُشَا أَذْ ثْغَارمْ كنِّيوْ عَاوذْ ثنِّي زِي لَايُوذِيكِييَا.
17 إِنِي إِ أَرْخِيبُّوسْ: ”حْضَا أَذْ ثْكمّْڒذْ ڒْخذْمثْ ن ثْسخَّارْثْ إِ ثكْسِيذْ زِي سِيذِيثْنغْ!“
18 سْڒَامْ ؤُرِيغْ ث س ؤُفُوسْ إِنُو، زِي بُولُوسْ. عقْڒمْ خْ سْنَاسڒْ إِنُو. أَذْ كِيومْ يِيڒِي أَرْضَا. أَمِينْ. ▪