‏1 مَاڒَا ثتّْوَاسْنكَّارمْ-د أَكْ-ذ لْمَاسِيحْ، خنِّي أَرْزُومْ مِينْ إِدْجَانْ سنّجْ، مَانِي إِقِّيمْ لْمَاسِيحْ خْ ؤُفُوسِي ن أَربِّي. ^▪   ‏2 عقْڒمْ مِينْ إِدْجَانْ سنّجْ، وَارْ إِدْجِي مِينْ إِدْجَانْ ذِي ثمُّورْثْ، ‏3 مِينْزِي كنِّيوْ أَقَا ثمُّوثمْ ؤُشَا ثُوذَارْثْ نْومْ ثنُّوفَّارْ أَكْ-ذ لْمَاسِيحْ ذِي أَربِّي. ^▪   ‏4 خْمِي د غَا إِضْهَارْ لْمَاسِيحْ، ونِّي إِدْجَانْ ذ ثُوذَارْثْ نّغْ، ڒخْذنِّي ؤُڒَا ذ كنِّيوْ أَذْ كِيذسْ د-ثضْهَارمْ ذڭْ ؤُعُودْجِي. ^▪  

‏5 س ؤُينِّي نْغمْ إِغزْذِيسنْ ن أَرِّيمثْ نْومْ إِنِّي خْ ثمُّورْثْ: فَارْقْ-شّْغڒْ، ڒخْمجْ، أَشَاهِي، نّشْوَاثْ ثِيعفَّانِينْ ذ طّْمعْ، ونِّي ذ أَعْبَاذْ إِ لْ-أَصْنَامْ، ^▪   ‏6 س مِينْزِي أَذْ د-يَاسْ وغْضَابْ ن أَربِّي خْ أَيْثْ نّسْ ن ڒْمُوعْصِييّثْ. ^▪   ‏7 ؤُڒَا ذ كنِّيوْ ثُوغَا ثڭُّورمْ أَمُّو زِيشْ، ؤُمِي كنِّيوْ ثُوغَا ثدَّارمْ عَاذْ ذِي ثْمسْڒَايِينْ نِّي. ^▪   ‏8 مَاشَا ڒخُّو، سَارْسمْ مَانْ أَيَا مَارَّا خْ ؤُغزْذِيسْ: أَغْضَابْ ذ ثفْقحْثْ ذ ثُوعفّْنَا ذ ؤُشقّفْ ذ ڒْحَارْضْ إِخْمجْ. ^▪   ‏9 وَارْ سْخَارِّيقمْ شَا خْ وَايَاوْيَا ؤُمِي ثسَّارْسمْ غَارْ ؤُغزْذِيسْ بْنَاذمْ أَقْذِيمْ أَكْ-ذ إِبْرِيذنْ نّسْ، ^▪  

‏10 ؤُ ثْيَارّْضمْ بْنَاذمْ ن جْذِيذْ، ونِّي إِدّكّْوَاڒنْ جْذِيذْ س ثُوسّْنَا، غَارْ صِّيفثْ ن ونِّي إِ-ث-إِ-د-إِخڒْقنْ. ^▪  

‏11 ذَايسْ وَارْ إِدْجِي وُوذَايْ نِيغْ أَرَامِي، ڒَا ذ أَخْثَانْ نِيغْ بْڒَا أَخْثَانْ، ڒَا ذ أَيُونَانِييْ نِيغْ ڒْبَارَّانِي، ؤُڒَا ذ إِسْمغْ نِيغْ حُورّْ، مَاشَا لْمَاسِيحْ ذ كُوڒْشِي ؤُ ذِي كُوڒْ إِجّنْ. ^▪  

‏12 أَمْ كنِّيوْ إِفَارْزْ أَربِّي، أَ إِمْقدَّاسنْ ذ إِمْعِيزّنْ، أَرْضمْ س أَرَّاحْمثْ ذ ڒحْنُونشْثْ ذ ڒضْرَافثْ ذ ؤُوَاضعْ ذ ثمْهِينْثْ ذ تَّاسِيعْ ن ڒْخَاضَارْ. ^▪  

‏13 قبْڒمْ ؤُ سَامْحمْ إِ وَايَاوْيَا. مَاڒَا شَا ن يِيجّنْ غَارسْ أَشثْشِي خْ ونّغْنِي، غْفَارمْ كنِّيوْ إِجّْ إِ ونّْغْنِي، أَمْ مَامّشْ إِ ذ أَومْ إِغْفَارْ لْمَاسِيحْ. ^▪  

‏14 أَكْ-ذ مَارَّا أَيَا، أَرْضمْ ثَايْرِي ثنِّي ذ ثْخَاذنْثْ ن ڒكْمَاڒثْ. ^▪  

‏15 خنِّي أَذْ إِحْكمْ ڒهْنَا ن لْمَاسِيحْ ذڭْ وُوڒَاونْ نْومْ، ڒهْنَا نِّي غَارْ ثتّْوَاڒَاغَامْ ذڭْ إِشْثْ ن أَرِّيمثْ، ؤُشَا قَاذَامْ إِ لْمَاسِيحْ.

‏16 أجّْ أَوَاڒْ نّسْ أَذْ ذَايْومْ إِزْذغْ س مَارَّا ثِيغِيثْ، سْڒمْذمْ، عڒْممْ إِجّْ ونّغْنِي س ؤُغنّجْ نْ إِزهِّيذنْ ذ ثسْبِيحْ ذ إِزْڒَانْ س أَرُّوحْ، ؤُ غنّْجمْ إِ أَربِّي س أَرْضَا ذڭْ وُوڒَاونْ نْومْ.

‏17 مَارَّا مِينْ ثتّڭّمْ س وَاوَاڒْ نِيغْ س ثْمڭَّا، ڭّمْ ث س يِيسمْ ن سِيذِي يشُّو لْمَاسِيحْ ؤُ شكَّارمْ زَّايسْ أَربِّي، ثَابَابَاثْ. ^▪  

‏18 أَ ثِيمْغَارِينْ، ذوْڒنْثْ سَاذُو إِرْيَازنْ نْكنْثْ أَمْ مَامّشْ د-إِتَّاسْ أَكْ-ذ لْمَاسِيحْ. ^▪  

‏19 أَ إِرْيَازنْ، خْسمْ ثِيمْغَارِينْ نْومْ، وَارْ تّْقسْحمْ ذَايْسنْثْ. ^▪  

‏20 أَ إِحنْجِيرنْ، ڭّمْ أَرَّايْ إِ لْوَالِيذِينْ نْومْ ذِي مَارَّا، مِينْزِي مَانْ أَيَا يَارطَّا إِ سِيذِيثْنغْ. ^▪  

‏21 أَ لْوَالِيذِينْ، وَارْ ذَارَّاشمْ شَا ثَارْوَا نْومْ، حِيمَا وَارْ ذ أَسنْ ثتّْرَاحْ ثرْيَاسْثْ.

‏22 أَ إِمْسخَّارنْ، ڭّمْ أَرَّايْ إِ ينِّي إِدْجَانْ ذ أَيْثْبَابْ نْومْ زِي جِّيهثْ ن أَرِّيمثْ ذِي مَارَّا، وَارْ تّْسخَّارمْ شَا إِ ثِيطَّاوِينْ ن إِوْذَانْ أَمشْنَاوْ إِنِّي إِخْسنْ أَذْ أَرْضَانْ إِوْذَانْ وَاهَا، مَاشَا سخَّارمْ س ڒصْفَايثْ ن وُوڒْ زِي ثِيڭّْوُوذِي ن سِيذِي. ^▪   ‏23 قَاعْ مِينْ غَا ثڭّمْ، ڭّمْ ث س مَارَّا ڒعْمَارْ نْومْ، أَخْمِي إِ سِيذِيثْنغْ، مَاشِي إِ إِوْذَانْ. ‏24 سْنمْ أَقَا أَذْ ثكْسِيمْ ڒخْڒَاصْ زِي سِيذِيثْنغْ ذِي ڒْوَارْثْ، مَاغَارْ ثتّْسخَّارمْ إِ سِيذِي، لْمَاسِيحْ. ‏25 مِينْزِي ونِّي إِتّڭّنْ ڒْغشّْ، أَذْ إِتّْوَاخْڒفْ عْلَاحْسَابْ ڒْغشّْ إِ يڭَّا، بْڒَا مَا أَذْ يِيڒِي ڒْفَارْزْ ن بْنَاذمْ.