ثَايْرِي
13
1 مَاعْلِيكْ نشّْ سَّاوَاڒغْ س إِڒْسَاونْ ن إِوْذَانْ ذ لْمَالَاكَاثْ، مَاشَا وَارْ غَارِي بُو ثَايْرِي،
أَقَا ذوْڒغْ ذ نّْحَاسْ إِتّنْثُوننْ،
نِيغْ ذ أَدْجُونْ إِدّنْذُوننْ.
2 مَاعْلِيكْ غَارِي ثَاوْهِيبْثْ مَاحنْذْ أَذْ نَابّغْ،
فهّْمغْ مَارَّا ڒسْرَارْ
ؤُ غَارِي مَارَّا ثُوسّْنَا ذ مَارَّا لْ-إِيمَانْ
أَڒْ ذ سّْمُوطِّييغْ إِذُورَارْ،
مَاشَا وَارْ ذ أَيِي ثدْجِي ثَايْرِي،
خنِّي نشّْ ذ وَالُو إِ دْجِيغْ. ▪
3 مَاعْلِيكْ بْضِيغْ مَارَّا أَڭْڒَا إِنُو ذ مَاشَّا خْ إِمزْڒَاضْ،
مَاعْلِيكْ وْشِيغْ أَرِّيمثْ إِنُو حِيمَا أَذْ ثشْمضْ،
مَاشَا وَارْ ذَايِي ثدْجِي ثَايْرِي،
وَارْ ذ أَيِي ثْنفّعْ ذِي وَالُو.
4 ثَايْرِي ثدْجْ غَارسْ تَّاسِيعْ ن ڒْخَاضَارْ ذ ڒضْرَافثْ،
ثَايْرِي وَارْ ذَايسْ بُو ثُوسْمِي،
ثَايْرِي وَارْ ثتّْفيّشْ س يِيخفْ نّسْ،
وَارْ ذَايسْ بُو نّْفَاخثْ، ▫ ▪
5 ثَايْرِي وَارْ ثتّڭّْ بُو ڒفْضِييّثْ،
وَارْ ثَارزُّو ثِيزِي نّسْ،
وَارْ ثتّْوَاسَارْزَاڭْ،
ؤُشَا وَارْ ثتّْخمَّامْ ذِي مِينْ إِدْجَانْ ذ أَعفَّانْ. ▪
6 أَقَا وَارْ ثْفَارّحْ شَا زِي ڒْغشّْ،
مَاشَا ثْفَارّحْ زِي ثِيذتّْ. ▪
7 أَقَا ثْڒحّفْ مَارَّا،
ثتَّامنْ ذِي مَارَّا،
ثسَّاثمْ مَارَّا
ؤُشَا ثَاربُّو مَارَّا.
8 ثَايْرِي وَارْ ثْفنِّي عمَّارْصْ،
مَاشَا أَوَاڒنْ ن يِينِّي إِتّْنَابّنْ أَذْ بضْڒنْ،
إِڒْسَاونْ أَذْ ڭْنُونْ،
ؤُ ثُوسّْنَا أَذْ ثبْضڒْ.
9 مِينْزِي أَقَا نسّنْ غَارْ إِجّْ ن ؤُغزْذِيسْ وَاهَا،
ؤُشَا نتّْنَابّْ مْغِيرْ إِجّْ ن وزْينْ،
10 مَاشَا خْمِي د غَا يَاسْ ؤُكمّڒْ،
ڒخْذنِّي مِينْ إِدْجَانْ غَارْ إِجّْ ن وزْينْ أَذْ إِبْضڒْ.
11 ڒَامِي ثُوغَا أَيِي ذ أَسيْمِي،
سِّيوْڒغْ أَمشْنَاوْ أَسيْمِي،
فكَّارغْ أَمشْنَاوْ أَسيْمِي،
خَارْصغْ أَمشْنَاوْ أَسيْمِي،
مَاشَا ڒَامِي ذوْڒغْ ذ أَرْيَازْ،
جِّيغْ أَوَارْنِي أَيِي مِينْ إِدْجَانْ ن ؤُسيْمِي.
12 ڒخُّو نتّْوَاڒَا س إِشْثْ ن ثِيسِيثْ
غَارْ إِجّْ ن وَارْوَاسْ ن مِينْ إِدْجَانْ،
مَاشَا خنِّي أَذْ نْژَارْ ثِيفْرَاسْ غَارْ ثِيفْرَاسْ.
ڒخُّو سّْنغْ غَارْ إِجّْ ن وزْينْ وَاهَا،
مَاشَا خنِّي أَذْ سّْنغْ مَامّشْ ثُوغَا تّْوَاسّْنغْ نشّْ. ▪
13 مَاغَارْ ثْڒَاثَا أَيَا أَذْ قِّيمنْ:
لِيمَانْ، أَسِيثمْ ذ ثَايْرِي،
مَاشَا أَمقّْرَانْ نْسنْ أَقَا-ت ذ ثَايْرِي.