ثِيموْشَا ن أَرُّوحْ
12
1 خْ ثْمسْڒَايِينْ ن أَرُّوحْ، أَ أَيْثْمَا، خْسغْ أَذْ ثسّْنمْ، 2 ثُوغَا كنِّيوْ ذ لْكُوفَّارْ ؤُ ثتّْوَانذْهمْ غَارْ لْ-أَصْنَامْ إِڭْنَاونْ بْڒَا مَا ثُوشِيمْ. 3 س ؤُينِّي سَّارڭْبغْ كنِّيوْ، أَقَا وَارْ ذِينْ ؤُڒَا ذ إِجّنْ ونِّي إِ غَا يِينِينْ س أَرُّوحْ ن أَربِّي أَذْ يِينِي: ’أَقَا إِتّْوَانْعڒْ يشُّو!‘، ؤُ وَارْ ذِينْ ؤُڒَا ذ إِجّنْ ونِّي إِ غَا يِينِينْ: ’يشُّو ذ سِيذِي!‘، مْغِيرْ س أَرُّوحْ إِقدّْسنْ وَاهَا. ▪ 4 أَقَا ذِينْ ثِيوْهِيبِينْ إِفَارْزنْ، مَاشَا أَرُّوحْ أَقَا-ث ذ إِجّْ. ▪ 5 ؤُ أَقَا ذِينْ ڒخْذَايمْ ن ثْسخَّارْثْ إِفَارْزنْ، مَاشَا سِيذِي أَقَا-ث ذ إِجّْ. 6 ؤُشَا أَقَا ذِينْ ڒعْجَايبْ إِفَارْزنْ، مَاشَا أَربِّي أَقَا-ث ذ إِجّْ، ذ ونِّي إِتّڭّنْ مَارَّا ذِي مَارَّا بْنَاذمْ. 7 مَاشَا أَسَارْڭبْ ن أَرُّوحْ أَذْ إِمّوْشْ إِ كُوڒْ إِجّْ أَمْ مَامّشْ إِدْجْ إِ ؤُعَاونْ إِ نتَّا.
8 أَقَا س أَرُّوحْ إِمّوْشْ إِ يِيجّنْ أَوَاڒْ ن ثِيغِيثْ، إِ ونّغْنِي أَوَاڒْ ن ثُوسّْنَا س أَرُّوحْ ذ إِجّنْ، 9 إِ ونّغْنِي لْ-إِيمَانْ س أَرُّوحْ، إِ ونّغْنِي ثَاوْهِيبْثْ إِ ؤُسْڭنْفِي س أَرُّوحْ ذ إِجّنْ،
10 إِ ونّغْنِي مَاحنْذْ أَذْ إِڭّْ ڒعْجَايبْ، إِ ونّغْنِي مَاهنْذْ أَذْ إِتّْنَابّْ، إِ ونّغْنِي ڒْفَارْزْ ن أَرُّوحَاثْ، إِ ونّغْنِي عْڒَامْ كُوڒْ إِڒْسَاونْ ؤُشَا إِ ونّغْنِي أَفسَّارْ ن إِڒْسَاونْ.
11 مَاشَا مَانْ أَيَا مَارَّا إِتّڭّْ إِ-ث أَرُّوحْ ذ إِجّنْ، ونِّي إِبطَّانْ إِ كُوڒْ إِجّْ أَنشْثْ مَامّشْ إِخْسْ نتَّا. ▪
أَرِّيمثْ ن لْمَاسِيحْ ذ إِشْثنْ
12 مِينْزِي أَمْ أَرِّيمثْ أَقَا-ت ذ إِشْثْ ؤُ غَارسْ أَطَّاسْ ن إِغزْذِيسنْ، عَاذْ أَقَا أَثنْ مَارَّا ذ إِغزْذِيسنْ ن إِشْثْ ن أَرِّيمثْ. وَاخَّا نِيثْنِي ذڭْ وَاطَّاسْ، أَقَا تّڭّنْ إِشْثْ ن أَرِّيمثْ وَاهَا. أَمُّو ثدْجْ ثْمسْڒَاشْثْ عَاوذْ أَكْ-ذ لْمَاسِيحْ. ▪
13 مِينْزِي نتّْوَاسغْضصْ مَارَّا س يِيجّْ ن أَرُّوحْ ذڭْ إِشْثْ ن أَرِّيمثْ، نِيغْ ؤُذَاينْ نِيغْ إِرَامِييّنْ نِيغْ إِمْسخَّارنْ نِيغْ إِحُورِّييّنْ، ؤُشَا إِمّوْشْ أَنغْ مَارَّا أَذْ نْسُو زڭْ إِجّْ ن أَرُّوحْ. ▪
14 ؤُڒَا ذ أَرِّيمثْ وَارْ ثدْجِي شَا ذ إِجّْ ن ؤُغزْذِيسْ، مَاشَا س وَاطَّاسْ ن إِغزْذِيسنْ.
15 مَاڒَا أَضَارْ أَذْ إِنِي مِينْزِي وَارْ دْجِيغْ ذ أَفُوسْ، وَارْ دْجِيغْ زِي أَرِّيمثْ، مَا خنِّي وَارْ إِتِّيڒِي زِي أَرِّيمثْ؟
16 ؤُشَا مَاڒَا أَمزُّوغْ إِنَّا، مِينْزِي وَارْ دْجِيغْ ذ ثِيطّْ، وَارْ دْجِيغْ زِي أَرِّيمثْ، مَا خنِّي وَارْ إِتِّيڒِي زِي أَرِّيمثْ؟
17 مَاڒَا مَارَّا أَرِّيمثْ ثُوغَا-ت ذ ثِيطّْ، مَانِيسْ ذ إِكَّا ؤُسدْجِي؟ مَاڒَا مَارَّا أَرِّيمثْ ثُوغَا-ت ذ أَسدْجِي، مَانِيسْ ذ إِكَّا ؤُشمِّي؟
18 مَاشَا ڒخُّو أَربِّي إِڭَّا إِغزْذِيسنْ ذِي أَرِّيمثْ، كُوڒْ إِجّْ زَّايْسنْ أَمْ مَامّشْ إِخْسْ نتَّا.
19 مِينْزِي مَاڒَا مَارَّا ثُوغَا ذ إِجّْ ن ؤُغزْذِيسْ، مَانِي ثدْجْ أَرِّيمثْ خنِّي؟ 20 مَاشَا ڒخُّو أَقَا ذِينْ أَطَّاسْ ن إِغزْذِيسنْ، مَاشَا ذ إِشْثْ ن أَرِّيمثْ وَاهَا. 21 ثِيطّْ وَارْ ثْزمَّارْ أَذْ ثِينِي إِ ؤُفُوسْ: ”وَارْ شكْ حْوِيجغْ شَا!“، نِيغْ عَاوذْ أَزدْجِيفْ إِ إِضَارنْ: ”وَارْ كنِّيوْ حْوِيجغْ شَا!“ 22 مَاشَا س ڒْعكْسْ إِغزْذِيسنْ ن أَرِّيمثْ إِنِّي نْحسّبْ ضعْفنْ، أَقَا نِيثْنِي تّْوَاحْذَاجنْ أَطَّاسْ. 23 إِغزْذِيسنْ نِّي ن أَرِّيمثْ إِ ذ أَنغْ إِتّْغِيڒنْ ذ إِمُوقْڒِيڒنْ، نتّڭّْ أَسنْ شَّانْ كْثَارْ، ؤُشَا إِغزْذِيسنْ إِنِّي وَارْ إِتّْبِيننْ إِشْنَانْ، أَذْ أَسنْ نسّْحِينّبْ س وَاطَّاسْ ن ڒهْزُوطْ. 24 مِينْزِي إِغزْذِيسنْ نّغْ نِّي غَارْ إِدْجْ ڒهْزُوطْ، وَارْ حْذَاجنْ مَانْ أَيَا، مَاغَارْ أَربِّي إِڭَّا أَرِّيمثْ، ؤُشَا إِ إِغزْذِيسنْ إِ إِدْجَانْ ذ قلّْ، إِوْشَا أَسنْ شَّانْ كْثَارْ، 25 حِيمَا وَارْ إِتِّيڒِي ؤُبطُّو ذِي أَرِّيمثْ، مَاشَا إِغزْذِيسنْ أَذْ وْشنْ ثَايْنِيثْ إِجّنْ إِ ونّغْنِي ذڭْ ؤُقَارنْ ذ إِجّنْ. 26 مَاڒَا إِجّْ ن ؤُغزْذِيسْ ثتّكّْ خَاسْ ثَامَارَا، مَارَّا إِغزْذِيسنْ أَذْ كْسِينْ ثَامَارَا أَكِيذسْ، ؤُ مَاڒَا إِجّْ ن ؤُغزْذِيسْ إِفَارْحْ، أَذْ فَارْحنْ مَارَّا إِغزْذِيسنْ أَكِيذسْ. 27 خنِّي كنِّيوْ ذ أَرِّيمثْ ن لْمَاسِيحْ ذ إِغزْذِيسنْ كُوڒْ إِجّنْ ذڭْ ومْشَانْ نّسْ. ▪
28 زعْمَا أَربِّي أَقَا إِڭَّا ذِي ثْمسْمُونْثْ ذ أَمزْوَارُو رُّوسُولْ، أَوَارْنِي أَسنْ إِنَابِييّنْ، أَوَارْنِي أَسنْ إِمسْغَارنْ، أَوَارْنِي أَسنْ إِنِّي إِتّڭّنْ ڒعْجَايبْ، أَوَارْنِي أَسنْ ثِيوْهِيبِينْ ن ؤُسْڭنْفِي، ن ثْوِيزَا، ن ؤُضبَّارْ ؤُشَا عْڒَامْ كُوڒْ إِڒْسَاونْ. ▫ ▪ 29 مَا زعْمَا مَارَّا نِيثْنِي ذ رُّوسُولْ؟ مَا مَارَّا ذ إِنَابِييّنْ؟ مَا مَارَّا ذ إِمسْغَارنْ؟ مَا مَارَّا نِيثْنِي تّڭّنْ ڒعْجَايبْ؟ 30 مَا مَارَّا غَارْسنْ ثِيوْهِيبِينْ ن ؤُسْڭنْفِي؟ مَا سَّاوَاڒنْ مَارَّا س إِڒْسَاونْ؟ مَا تّْفسَّارنْ مَارَّا إِڒْسَاونْ؟ 31 مَاشَا مَاڒَا ثَارْزُومْ خنِّي ذِي ثوْهِيبِينْ ثِيمقّْرَانِينْ، أَقَا نشّْ أَذْ أَومْ سّشْنغْ أَبْرِيذْ يُوعْڒَانْ.