‏1 ضْفَارمْ ثَايْرِي ؤُ نْجبْذمْ غَارْ ثوْهِيبِينْ ن أَرُّوحْ، ذ أَمزْوَارُو حِيمَا أَذْ ثْنبَّامْ. ^▫   ‏2 مِينْزِي ونِّي إِسَّاوَاڒنْ س إِڒْسَاونْ إِنّغْنِي، وَارْ إِسِّيوِيڒْ شَا إِ إِوْذَانْ، مَاشَا إِ أَربِّي، مِينْزِي ؤُڒَا ذ إِجّْ وَارْ ذ أَسْ إِفهّمْ، مَاشَا إِسَّاوَاڒْ ڒسْرَارْ س أَرُّوحْ. ‏3 مَاشَا ونِّي إِتّْنَابّنْ، إِسَّاوَاڒْ غَارْ يوْذَانْ حِيمَا أَذْ ثنْ إِبْنَا، أَذْ ثنْ إِسجّعْ، أَذْ ثنْ إِسّْفوّجْ. ‏4 ونِّي إِسَّاوَاڒنْ س يِيجّْ ن إِڒسْ نّغْنِي، إِبنَّا إِخفْ نّسْ، مَاشَا ونِّي إِتّْنَابّنْ إِبنَّا ثَامسْمُونْثْ. ‏5 إِوَا خْسغْ مَارَّا كنِّيوْ أَذْ ثسِّيوْڒمْ س إِڒْسَاونْ إِنّغْنِي، مَاشَا مْلِيحْ عَاذْ أَذْ ثْنبَّامْ، مِينْزِي أَمنْزُو وِي إِتّْنبَّانْ خْ وِي إِسِّيوْڒنْ س إِڒْسَاونْ إِنّغْنِي، مْغِيرْ مَاڒَا وَانِيثَا أَذْ ث إِفسَّارْ، مِينْزِي مَاڒَا إِفسَّارْ أَذْ ثتّْوَابْنَا ثْمسْمُونْثْ.

‏6 خنِّي ڒخُّو، أَ أَيْثْمَا، مَاڒَا ؤُسِيغْ-د غَارْومْ ؤُشَا أَذْ كِيومْ سِّيوْڒغْ س إِڒْسَاونْ نّغْنِي، مَانْ نّْفعْ إِ غَارْومْ إِ غَا يَاوْيغْ، مَاڒَا وَارْ ذ أَومْ سِّيوْڒغْ شَا س ؤُسَارْڭبْ نِيغْ س ثُوسّْنَا نِيغْ س إِجّْ ن وَاوَاڒْ إِ غَا نَابّغْ نِيغْ س ؤُسڒْمذْ؟ ‏7 ؤُڒَا ذ ڒحْوَايشْ وَارْ إِدَّارنْ أَمشْنَاوْ ثَامْجَا نِيغْ لْڭَامْبْرِي، ڭِّينْ ڒْحسّْ. مَاڒَا وَارْ إِتّْوَافَارْزْ ڒْحسّْ نْسنْ، مَامّشْ إِ غَا إِذْوڒْ إِتّْوَاسّنْ مِينْ تِّيرَارنْ س ثَامْجَا نِيغْ س لْڭَامْبْرِي؟ ‏8 إِوَا، مَاڒَا ڒْپُوقْ إِڭَّا ڒْحسّْ ؤُ إِتّڭّْ ڒْحسّْ وَارْ إِصْفِي، وِي إِ غَا إِسّْوجْذنْ خنِّي إِ ؤُمنْغِي؟ ‏9 أَمُّو عَاوذْ كنِّيوْ، مَاڒَا ثسِّيوِيڒمْ أَوَاڒنْ س إِجّْ ن يِيڒسْ نّغْنِي، مَامّشْ إِ غَا فهْمنْ مِينْ ثقَّارمْ؟ أَذْ ثسِّيوْڒمْ خنِّي أَمْ ونِّي إِسَّاوَاڒنْ ذِي ڒعْوِينْ.

‏10 أَقَا ذِينْ وِي إِسّْننْ مشْحَاڒْ ن إِڒْسَاونْ ذِي دُّونشْثْ ؤُشَا ؤُڒَا ذ إِشْثنْ زَّايْسنْ وَارْ إِدْجِي بْڒَا ڒْحسّْ نّسْ.

‏11 خنِّي مَاڒَا وَارْ سِّينغْ ڒَادْجَاغْ ن ڒْحسّْ، أَذْ إِڒِيغْ نشّْ ذ إِجّْ ن ؤُبَارَّانِي إِ ونِّي إِسَّاوَاڒنْ، ذ ونِّي إِسَّاوَاڒنْ أَذْ يِيڒِي ذ أَبَارَّانِي إِ نشّْ.

‏12 أَمُّو عَاوذْ كنِّيوْ، ؤُمِي ثنْجبْذمْ غَارْ ثوْهِيبِينْ ن أَرُّوحْ، أَرْزُومْ أَذْ ثْفيّْضمْ ذِي طّْوعْ ن ڒبْنِي ن ثْمسْمُونْثْ.

‏13 س ؤُينِّي، ونِّي إِسَّاوَاڒنْ س شَا ن إِڒسْ نّغْنِي، أَذْ إِژَّادْجْ حِيمَا إِزمَّارْ إِ ؤُفسَّارْ نّسْ.

‏14 مِينْزِي مَاڒَا نشّْ ژُّودْجغْ س شَا ن يِيڒسْ، أَرُّوحْ إِنُو أَقَا إِژُّودْجْ، مَاشَا ڒفْهَامثْ إِنُو أَذْ ثقِّيمْ بْڒَا ڒْغِيدْجثْ.

‏15 مَامّشْ إِ غَا ڭّغْ؟ أَذْ ژَّادْجغْ س أَرُّوحْ إِنُو، مَاشَا أَذْ ژَّادْجغْ عَاوذْ س ڒعْقڒْ إِنُو، أَذْ غنّْجغْ س أَرُّوحْ إِنُو، مَاشَا أَذْ غنّْجغْ عَاوذْ س ڒعْقڒْ إِنُو. ^▪  

‏16 مَامّشْ نّغْنِي مَاڒَا ثْبَارْكمْ س أَرُّوحْ، خنِّي مَامّشْ إِ غَا يِينِي حذْ ونِّي ذِينْ إِقِّيمنْ أَمْ وَارْ إِفْهِيمْ ’أَمِينْ!‘ إِ ثْژَادْجِيثْ ن ؤُقَاذِي نّكْ، مِينْزِي نتَّا وَارْ إِسِّينْ مِينْ ثقَّارذْ.

‏17 مِينْزِي وَاخَّا شكْ ثْبَارْكذْ مْلِيحْ، مَاشَا أَمْقَارّبْ نّكْ وَارْ إِتّْوَابنِّي شَا زِي مَانْ أَيَا.

‏18 نشّْ تّْقَاذِيغْ أَربِّي أَقَا سَّاوَاڒغْ س إِڒْسَاونْ كْثَارْ زَّايْومْ مَارَّا،

‏19 مَاشَا ذِي ثْمسْمُونْثْ أَقَا مَاعْلِيكْ ؤُفِيغْ أَذْ إِنِيغْ خمْسَا ن وَاوَاڒنْ س ڒعْقڒْ إِنُو حِيمَا أَذْ سّْڒمْذغْ عَاوذْ إِنّغْنِي، ؤُڒَا عشْرَا-أَڒَافْ ن وَاوَاڒنْ س يِيجّْ ن يِيڒسْ.

‏20 أَ أَيْثْمَا إِنُو، وَارْ تِّيڒِيمْ ذ ثَارْوَا ذڭْ إِخَارِّيصنْ نْومْ، مَاشَا إِڒِيمْ ذ ثَارْوَا ذِي ثُوعفّْنَا، ؤُ إِڒِيمْ ثِيوْضمْ ذِي ڒفْهَامثْ. ^▪   ‏21 أَقَا ثُورَا ذِي شَّارِيعَا:

”أَذْ سِّيوْڒغْ إِ ڒْڭنْسْ-أَ س إِجّْ ن ڒْهَارْذْ ن ڒْبَارَّانِي

ؤُ س إِجّْ ن يِيڒسْ نّغْنِي.

وَاخَّا أَمُّو وَارْ ذ أَيِي تّسْڒِينْ شَا،

إِقَّارْ سِيذِي.“ ^▪  

‏22 أَمُّو خنِّي إِڒْسَاونْ ذ ڒعْڒَامثْ، وَارْ إِدْجِي إِ ينِّي يُومْننْ، مَاشَا إِ ينِّي وَارْ يُومِيننْ شَا، مَاشَا أَوَاڒْ إِ إِتّْوَانَابّنْ زَّايسْ وَارْ إِدْجِي إِ ينِّي وَارْ يُومِيننْ، مَاشَا إِ ينِّي يُومْننْ.

‏23 خنِّي مَاڒَا مَارَّا ثَامسْمُونْثْ ثُوغَا ثسّْمُونْ ؤُشَا مَارَّا ثُوغَا سَّاوَاڒنْ س إِڒْسَاونْ، ؤُشَا ؤُذْفنْ إِنِّي إِجهْڒنْ نِيغْ إِنِّي وَارْ يُومِيننْ، مَا نِيثْنِي وَارْ قَّارنْ بلِّي أَقَا إِوْذَانْ-أَ تّْخڒْفنْ؟ ‏24 مَاشَا مَاڒَا مَارَّا ثْنبَّامْ ؤُشَا يُوذفْ-د حذْ وَارْ يُومِينْ نِيغْ حذْ إِجْهڒْ، خنِّي وَانِيثَا أَذْ إِتّْوَاسّقْنعْ زِي مَارَّا كنِّيوْ ؤُشَا أَذْ إِتّْوَاوبّخْ زَّايْومْ مَارَّا، ‏25 ؤُشَا مِينْ إِنُّوفَارنْ ذڭْ وُوڒْ نّسْ أَذْ إِتّْوَاعَارَّا. نتَّا أَذْ يَاضَارْ س وُوذمْ نّسْ، أَذْ إِسْجذْ إِ أَربِّي، أَذْ يِينِي: ”أَقَا س ثِيذتّْ أَربِّي أَقَا-ث جَارْ أَومْ!“

‏26 س ؤُينِّي، أَ أَيْثْمَا إِنُو، مَاڒَا ثْمُونمْ، أجّْ كُوڒْ إِجّنْ زَّايْومْ ونِّي غَارْ إِدْجْ إِجّْ ن ؤُزهِّيذْ نِيغْ إِشْثْ ن ثْغُورِي نِيغْ إِجّْ ن ؤُسَارْڭبْ نِيغْ إِجّْ ن يِيڒسْ نِيغْ إِجّْ ن ؤُفسَّارْ أَذْ زَّايسْ د-إِنْطقْ. أجّْ أَذْ يِيڒِي مَارَّا إِ ڒبْنِي. ‏27 مَاڒَا ذِينْ حذْ إِسِّيوڒْ س يِيجّْ ن إِڒسْ نّغْنِي، أجّْ إِ-ثنْ أَذْ سِّيوْڒنْ س ثْنَاينْ نِيغْ س وَاطَّاسْ س ثْڒَاثَا يِيذْسنْ، ؤُشَا كُوڒْ إِجّنْ زَّايْسنْ س نُّوبثْ نّسْ، ؤُ أجّْ إِجّْ أَذْ ث إِفسَّارْ. ‏28 ؤُشَا مَاڒَا وَارْ ذِينْ إِدْجِي وِي إِزمَّارنْ أَذْ إِفسَّارْ، أَذْ إِسْقَارْ نتَّا ذِي ثْمسْمُونْثْ، أَذْ إِسِّيوڒْ إِ يِيخفْ نّسْ ؤُ إِ أَربِّي.

‏29 أجّْ أَذْ سِّيوْڒنْ ثْنَاينْ نِيغْ ثْڒَاثَا ن إِنَابِييّنْ، ؤُشَا إِنّغْنِي أَذْ حكْمنْ. ‏30 مَاشَا مَاڒَا إِتّْوَاسَّارْڭبْ شَا إِ حذْ إِ ذِينْ إِقِّيمنْ ، أجّْ خنِّي ونِّي ذ أَمزْوَارْ أَذْ إِسُّوسمْ. ‏31 مِينْزِي ثْزمَّارمْ أَذْ ثْنبَّامْ مَارَّا إِجّنْ أَوَارْنِي ونّغْنِي، حِيمَا مَارَّا أَذْ ڒمْذنْ ؤُشَا أَذْ ذَايْسنْ إِتّْوَاڭّْ وُوڒْ مَارَّا. ‏32 ؤُشَا أَرُّوحْ ن إِنَابِييّنْ، أَقَا-ث إِمَّارْسْ سَاذُو إِنَابِييّنْ، ‏33 مِينْزِي أَربِّي وَارْ إِدْجِي ذ أَربِّي ن ؤُخَارْوضْ مَاشَا ن ڒهْنَا، أَمشْنَاوْ ذِي مَارَّا ثِيمسْمُونِينْ ن إِمْقدَّاسنْ.

‏34 ثُوسَا-د خْ ثمْغَارِينْ نْومْ أَذْ سُّوسْمنْثْ ذِي ثْمسْمُونِينْ، مِينْزِي وَارْ ذ أَسنْثْ إِسْمِيحْ أَذْ سِّيوْڒنْثْ، مَاشَا إِشُووَّارْ أَسنْثْ أَذْ إِڒِينْثْ تّْوَاضْعنْثْ أَمْ مَامّشْ ثقَّارْ عَاوذْ شَّارِيعَا. ^▪   ‏35 ؤُشَا مَاڒَا خْسنْثْ أَذْ ڒمْذنْثْ شَا، أَذْ سّقْسَانْثْ إِرْيَازنْ نْسنْثْ ذِي ثَادَّارْثْ نْسنْ، مِينْزِي أَقَا-ت ذ ڒفْضِيحثْ إِ ثمْغَارِينْ أَذْ سِّيوْڒنْثْ ذِي ثْمسْمُونْثْ. ‏36 مَا زعْمَا إِفّغْ-د زَّايْكنْثْ أَوَاڒْ ن أَربِّي؟ نِيغْ يِيوضْ-د غَارْومْ وَاهَا؟ ‏37 مَاڒَا حذْ إِتّْغِيڒْ أَسْ ذ أَنَابِي نِيغْ ذ بْنَاذمْ أَرُّوحَانِي، أجّْ إِ-ث أَذْ إِعْقڒْ مْلِيحْ بلِّي مِينْ ذ أَومْ تَّارِيغْ، أَقَا أَثنْثْ ذ ثِيوصَّا ن سِيذِيثْنغْ. ‏38 مَاشَا مَاڒَا حذْ إِخْسْ أَذْ إِقِّيمْ إِجْهڒْ، أجّْ إِ-ث أَذْ إِجْهڒْ.

‏39 أَمُّو خنِّي، أَ أَيْثْمَا إِنُو، نْجبْذمْ حِيمَا أَذْ ثْنبَّامْ، وَارْ منّْعمْ شَا أَوَاڒْ س إِڒْسَاونْ. ‏40 أَذْ إِمْسَارْ مَارَّا س لَاذَابْ ؤُ س ؤُستّفْ.