‏1 مَاشَا نشِّينْ إِنِّي إِجهْذنْ، إِتّْخصَّا أَنغْ أَذْ نَارْپُو ثُوضْعفْثْ ن يِينِّي إِضعْفنْ، وَارْ نتِّيوِي شَا أَرْضَا إِ يِيخفْ نّغْ. ^▪   ‏2 كُوڒْ إِجّنْ أَذْ إِسَّارْضَا أَمْقَارّبْ نّسْ إِ ثْشُونِي ذ ڒبْنِي. ‏3 مِينْزِي لْمَاسِيحْ عَاوذْ وَارْ إِسَّارْضِي شَا إِخفْ نّسْ، مَاشَا أَمْ مَامّشْ ثُورَا:

”ثِيكّْوُورَا ن يِينِّي إِ شكْ إِكّْوَارنْ،

وْضَانْثْ-إِ-د خَافِي.“ ^▪  

‏4 مِينْزِي مَارَّا مِينْ ثُورَا زِيشْ، ثُورَا إِ ؤُسڒْمذْ نّغْ، حِيمَا س ضّْبَارْ ذ ؤُشجّعْ س مِينْ إِدْجَانْ ذِي ثِيرَا إِقدّْسنْ أَذْ غَارْنغْ يِيڒِي ؤُسِيثمْ. ^▪   ‏5 أَربِّي ن ضّْبَارْ ذ ؤُفوّجْ أَذْ أَومْ إِوْشْ مَاحنْذْ أَذْ ثْحسْبمْ إِجّْ ونّغْنِي غَارسْ ڒْقِيمثْ ذ إِشْثْ ذِي يشُّو لْمَاسِيحْ، ^▪   ‏6 حِيمَا س يِيجّْ ن أَرَّايْ ذ إِشْثْ ن ثْمِيجَّا أَذْ ثسّْعُودْجَامْ أَربِّي، بَابَاسْ ن سِيذِيثْنغْ يشُّو لْمَاسِيحْ.

‏7 س ؤُينِّي قبْڒمْ إِجّنْ ونّغْنِي، أَمْ مَامّشْ ذ أَنغْ إِقْبڒْ لْمَاسِيحْ عَاوذْ إِ ؤُعُودْجِي ن أَربِّي. ‏8 أَذْ إِنِيغْ، أَقَا يشُّو لْمَاسِيحْ إِذْوڒْ ذ أَمْسخَّارْ ن وخْثَانْ ذِي طّْوعْ ن ثِيذتّْ ن أَربِّي، حِيمَا أَذْ إِضْمنْ لْوُوعُوذْ إِ إِوَاعْذْ إِ ڒجْذُوذْ، ‏9 ؤُ حِيمَا ڒڭْنُوسْ أَذْ سّمْغَارنْ ذِي أَربِّي خْ سِّيبّثْ ن أَرّحْمثْ إِ خَاسنْ د-ثُوسَا أَمْ مَامّشْ ثُورَا:

”س ؤُينِّي أَذْ شهْذغْ خَاكْ جَارْ ڒڭْنُوسْ،

ؤُشَا أَذْ صبّْحغْ إِسمْ نّكْ.“ ^▪  

‏10 ؤُشَا إِقَّارْ عَاوذْ:

”فَارْحمْ، أَ كنِّيوْ ڒڭْنُوسْ، جْمِيعْ أَكْ-ذ ڒْڭنْسْ نّسْ.“ ^▪  

‏11 ؤُشَا إِنَّا عَاوذْ:

”حمْذمْ سِيذِي، أَ مَارَّا ڒڭْنُوسْ،

سبّْحمْ ث، أَ مَارَّا شُّوعُوبْ!“ ^▪  

‏12 عَاوذْ إِشَاعْيَا إِقَّارْ:

”أَذْ يِيڒِي وژْوَارْ ن يَاسَّا،

ؤُ ونِّي د-إِكَّارنْ أَذْ إِحْكمْ خْ ڒڭْنُوسْ،

أَذْ ذَايسْ يِيڒِي ؤُسِيثمْ ن ڒڭْنُوسْ.“ ^▪  

‏13 أَربِّي ن ؤُسِيثمْ أَذْ كنِّيوْ إِشُّورْ س ڒفْرَاحثْ ذ ڒهْنَا ذِي لْ-إِيمَانْ حِيمَا أَذْ ثْفيّْضمْ س ؤُسِيثمْ نّسْ زِي جّهْذْ ن أَرُّوحْ إِقدّْسنْ.

‏14 نشّْ سِيمَانْثْ إِنُو تّْوَاسْقنْعغْ زِي جِّيهثْ نْومْ، أَ أَيْثْمَا، أَقَا كنِّيوْ ثْعمَّارمْ س ثْشُونِي، ثشُّورمْ س مَارَّا ثُوسّْنَا، حِيمَا أَذْ ثسّْڒمْذمْ عَاوذْ إِنّغْنِي.

‏15 مَاشَا زڭْ ؤُغزْذِيسْ أَقَا ؤُرِيغْ أَومْ س ثرْيَاسْثْ، أَ أَيْثْمَا، مَاحنْذْ أَذْ كنِّيوْ سّْعقْڒغْ، س أَرْضَا إِ ذ أَيِي إِمّوْشنْ زِي أَربِّي،

‏16 حِيمَا أَذْ إِڒِيغْ ذ أَمْسخَّارْ ن يشُّو لْمَاسِيحْ إِ ڒڭْنُوسْ، ؤُمِي تّْسخَّارغْ إِ ڒخْبَارْ أَصبْحَانْ ن أَربِّي، حِيمَا أَذْ ثِيڒِي ثَاغَارْصْثْ ن ڒڭْنُوسْ ذ ثَامقْپُوتْشْ، ثتّْوَاقدّسْ س أَرُّوحْ إِقدّْسنْ.

‏17 س ؤُينِّي سّمْغَارغْ ذِي يشُّو لْمَاسِيحْ زَّاثْ إِ أَربِّي.

‏18 مِينْزِي وَارْ زعْمغْ أَذْ سِّيوْڒغْ ذڭْ إِمزُّوغنْ ن ڒڭْنُوسْ خْ شَا وَارْ زَّايِي ث إِڭِّي لْمَاسِيحْ س وَاوَاڒْ ذ ڒْخذْمثْ.

‏19 س جّهْذْ ن ڒعْڒَامَاثْ ذ ڒعْجَايبْ ؤُشَا س جّهْذْ ن أَرُّوحْ ن أَربِّي، أَقَا ثُوغَا ڭُّورغْ تّنْضغْ زِي ؤُرْشَالِيمْ أَڒْ إِلِّيرِيكُونْ ؤُشَا كمّْڒغْ أَبَارّحْ ن ڒخْبَارْ أَصبْحَانْ ن لْمَاسِيحْ. ‏20 أَمُّو ثُوغَا أَرزُّوغْ أَذْ بَارّْحغْ، وَارْ إِدْجِي مَانِي إِتّْوَاسمَّا لْمَاسِيحْ قْبڒْ حِيمَا وَارْ بنِّيغْ خْ ذْسَاسْ ن ونّغْنِي، ‏21 مَاشَا أَمْ مَامّشْ ثُورَا:

”إِنِّي وَارْ زَّايسْ إِتّْوَابَارّْحنْ أَذْ ث ژَترنْ،

ؤُ ينِّي وَارْ خَاسْ إِسْڒِينْ، أَذْ أَمْننْ.“ ^▪  

‏22 س ؤُينِّي ثُوغَا وَارْ إِوِيضغْ أَطَّاسْ ن إِمُورنْ مَاحنْذْ أَذْ غَارْومْ د-أَسغْ. ^▪  

‏23 مَاشَا ڒخُّو وَارْ غَارِي بُو تَّاسِيعْ حِيمَا أَذْ بشَّارغْ عَاذْ ذِي جّْوَايهْ-أَ ؤُ ثُوغَا عَاوذْ خْسغْ أَذْ غَارْومْ د-أَسغْ أَطَّاسْ ن إِسڭّْوُوسَا زڭْ وَامِي. ^▪   ‏24 خْمِي إِ غَا رَاحغْ غَارْ سبَّانْيَا، أَذْ غَارْومْ د-أَسغْ، أَذْ كنِّيوْ ژَترغْ، ؤُ أَذْ تّْوَاسّْقبّْضغْ غَارْ ذِينِّي زِي شَا زَّايْومْ، أَوَارْنِي ڒَامِي إِ غَا أَرّغْ مژْرِي ذ أَمزْوَارْ ؤُمِي غَا ژْرِيغْ كنِّيوْ.

‏25 مَاشَا ڒخُّو أَقَا رُوحغْ غَارْ ؤُرْشَالِيمْ حِيمَا أَذْ سخَّارغْ إِ إِمْقدَّاسنْ. ^▪   ‏26 مِينْزِي ثُوغَا يَارْضَا إِ إِنِّي إِدْجَانْ ذِي مَاكِيذُونِييَا ذ أَخَايَا أَذْ ڭّنْ شَا ن ثْوِيزَا إِ إِمْقدَّاسنْ إِمزْڒَاضْ إِنِّي إِدْجَانْ ذِي ؤُرْشَالِيمْ. ‏27 ثُوغَا أَرْضَانْ خْ مَانْ أَيَا، مَاشَا ثُوغَا ث عَاوذْ ذَايْسنْ ذ أَمَارْوَاسْ. مِينْزِي مَاڒَا ثُوغَا ڒڭْنُوسْ شَارْشنْ ذِي مِينْ غَارْسنْ ذ أَڭْڒَا خْ ڒحْسَابْ ن أَرُّوحْ، أَقَا-ث عَاوذْ ذ أَمَارْوَاسْ ذِي ڒڭْنُوسْ مَاحنْذْ أَذْ ثنْ سخَّارنْ عَاوذْ س مِينْ غَارْسنْ ذ أَڭْڒَا خْ ڒحْسَابْ ن دَّاثْ. ‏28 خْمِي إِ غَا كمّْڒغْ مَانْ أَيَا ؤُشَا أَذْ أَسنْ سِّيوْضغْ ڒْغِيدْجثْ ن ثْوِيزَا أَيَا س ڒَامَانْ، أَذْ د خَاومْ كّغْ ذ أَبْرِيذْ خْمِي إِ غَا رَاحغْ غَارْ سبَّانْيَا. ‏29 مَاشَا سّْنغْ بلِّي مَاڒَا ؤُسِيغْ-د غَارْومْ، أَذْ د-أَسغْ س ڒْمُوذْ إِشُّورنْ س لْبَارَاكَا ن ڒخْبَارْ أَصبْحَانْ ن لْمَاسِيحْ. ^▪  

‏30 تَّارغْ زَّايْومْ، أَ أَيْثْمَا، س سِيذِيثْنغْ يشُّو لْمَاسِيحْ ؤُشَا س ثَايْرِي ن أَرُّوحْ، أَذْ ثْبدّمْ نِيشَانْ أَكِيذِي ذِي ثْژَادْجِيثْ غَارْ أَربِّي خْ سِّيبّثْ إِنُو، ^▪   ‏31 حِيمَا أَذْ سَّارغْ إِخفْ إِنُو زڭْ إِنِّي وَارْ يُومِيننْ شَا ذِي يَاهُوذِييَّا، حِيمَا أَذْ ثِيڒِي ثْسخَّارْثْ إِنُو إِ إِمْقدَّاسنْ ذِي ؤُرْشَالِيمْ ذ ثَامقْپُوتْشْ، ^▪   ‏32 حِيمَا أَذْ غَارْومْ د-أَسغْ شُّورغْ س ڒفْرَاحثْ س أَرَّايْ ن أَربِّي ؤُشَا أَذْ أَريّْحغْ أَكِيذْومْ. ^▪   ‏33 أَربِّي ن ڒهْنَا أَذْ كِيومْ يِيڒِي مَارَّا إِذْومْ. أَمِينْ.