أَقْبَاڒْ ن وَايَاوْيَا
14
1 وِي إِضعْفنْ ذِي لْ-إِيمَانْ، وْشمْ أَسْ أَفُوسْ، وَارْ تّمْسبْضَامْ ذڭْ إِخَارِّيصنْ نْومْ جَارْ أَومْ. 2 أَقَا ذِينْ حذْ يُومنْ إِزمَّارْ أَذْ إِشّْ كُوڒْشِي، مَاشَا ونِّي إِضعْفنْ أَذْ إِشّْ ثِيبِّي وَاهَا. ▪ 3 ونِّي إِتّتّنْ، وَارْ إِسّحْقَارِي ونِّي وَارْ إِتّتّنْ، ذ ونِّي وَارْ إِتّتّنْ، وَارْ إِحكّمْ خْ ونِّي إِتّتّنْ، مِينْزِي أَربِّي إِقْبڒْ إِ-ث. 4 مِينْ ثعْنِيذْ شكْ ونِّي إِحكّْمنْ خْ ؤُمْسخَّارْ ن ونّغْنِي؟ مَا إِبدّْ نِيغْ إِوْضَا، ذ مَانْ أَيَا إِ بَابْ نّسْ. مَاشَا أَذْ إِبدّْ، مِينْزِي أَربِّي إِزمَّارْ أَذْ ث إِسّْبدّْ ذ أَبذِّي. ▪ 5 أَقَا ذِينْ حذْ إِتّْغِيڒْ أَسْ أَقَا ذِينْ أَسّْ سنّجْ إِ وَاسّْ نّغْنِي، ؤُ ونّغْنِي إِتّْغِيڒْ أَسْ أَقَا كُوڒْ أَسّْ كِيفْكِيفْ. أجّْ كُوڒْ إِجّنْ أَذْ إِقْنعْ ذِي ڒْبَاڒْ نّسْ نِيشَانْ. ▪ 6 ونِّي إِوقَّارنْ إِجّْ ن وَاسّْ، إِ سِيذسْ إِ ث غَا إِوقَّارْ. ونِّي وَارْ إِوقَّارنْ أَسّْ، إِ سِيذسْ إِ وَارْ ث إِوقَّارْ. ونِّي إِشّنْ، أَذْ إِشّْ إِ سِيذسْ، مِينْزِي أَذْ إِشكَّارْ أَربِّي. ونِّي وَارْ إِشِّينْ شَا، إِ سِيذسْ وَارْ إِشِّي شَا ؤُشَا نتَّا أَذْ إِشكَّارْ أَربِّي عَاوذْ. ▪ 7 مِينْزِي ؤُڒَا ذ إِجّْ زَّايْنغْ أَقَا إِدَّارْ إِ يِيخفْ نّسْ، ؤُشَا ؤُڒَا ذ إِجّنْ إِمُّوثْ إِ يِيخفْ نّسْ. ▪ 8 مِينْزِي مَاڒَا ندَّارْ، أَذْ ندَّارْ إِ سِيذِيثْنغْ، نِيغْ مَاڒَا نمُّوثْ أَذْ نمّثْ إِ سِيذِيثْنغْ. س ؤُينِّي مَا ندَّارْ نِيغْ نمُّوثْ، أَقَا نشِّينْ إِ سِيذِيثْنغْ. 9 مِينْزِي إِ ؤُيَا إِ إِمُّوثْ لْمَاسِيحْ، خنِّي إِكَّارْ-د ؤُشَا إِذْوڒْ إِدَّارْ عَاوذْ، حِيمَا أَذْ يِيڒِي ذ سِيذِي إِ ينِّي إِمُّوثنْ ؤُڒَا إِ ينِّي إِدَّارنْ.
10 مَاشَا شكْ، مَايمِّي إِ غَا ثْحكْمذْ خْ ؤُمَاشْ؟ نِيغْ مَايمِّي عَاوذْ ثسّحْقَارَاذْ ؤُمَاشْ؟ مِينْزِي نشِّينْ مَارَّا أَذْ نْبدّْ قِيبَاتْشْ إِ ڒْكُورْسِي ن شّْرعْ ن لْمَاسِيحْ. ▪
11 أَمْ مَامّشْ ثُورَا:
”س ثِيذتّْ، أَمْ دَّارغْ نشّْ، إِقَّارْ سِيذِي،
أَذْ أَيِي أَضَارنْ مَارَّا إِفَادّنْ،
ؤُ كُوڒْ إِڒسْ أَذْ خَافِي إِشْهذْ.“ ▪
12 خنِّي أجّْ كُوڒْ إِجّنْ زَّايْنغْ أَذْ إِڭّْ ڒحْسَابْ خْ يِيخفْ نّسْ قِيبَاتْشْ إِ أَربِّي. ▪
نْبْڒَا أَسبِّي
13 زِي ڒخُّو ذ ثْسَاونْثْ وَارْ حكّْممْ إِجّنْ خْ ونّغْنِي، مَاشَا حْسنْ أَذْ ثكْسذْ أَوَاڒْ مَاحنْذْ وَارْ ثسَّارْسذْ شَا إِجّْ ن وژْرُو مَاحنْذْ أَذْ ذَايسْ إِنْقَاڒْضْ ؤُمَاشْ. ▪
14 مِينْزِي نشّْ سّْنغْ، أَقَا تّْوَاسْقنْعغْ ذِي سِيذِي يشُّو، بلِّي ؤُڒَا ذ إِشْثْ ن ڒْحَاجّثْ ثخْمجْ إِ نتَّا، مْغِيرْ إِ ونِّي ت إِحسْبنْ ذ ڒخْمجْ، أَقَا إِ نتَّا وَاهَا ؤُمِي ثخْمجْ. ▪
15 مَاڒَا إِخيّقْ ؤُمَاشْ خْ سِّيبّثْ ن مَاشَّا، أَقَا شكْ وَارْ ثُويُورذْ ذِي ثَايْرِي. وَارْ تّحِّي شَا س مَاشَّا نّكْ ونِّي إِ خفْ إِمُّوثْ لْمَاسِيحْ. ▪
16 مِينْ إِدْجَانْ ذ ڒْخَارْ إِ نشِّينْ، وَارْ ثجِّي حذْ أَذْ خَاسْ إِسِّيوڒْ س ڒْغَارْ.
17 مِينْزِي ثَاڭلْذِيثْ ن أَربِّي وَارْ ثدْجِي ذِي مَاشَّا ذ ثِيسِّيثْ، مَاشَا ذِي ثْسڭْذَا ذ ڒهْنَا ذ ڒفْرَاحثْ س أَرُّوحْ إِقدّْسنْ. ▪
18 مِينْزِي ونِّي إِسخَّارنْ إِ لْمَاسِيحْ ذِي مَانْ أَيَا، أَقَا يَارْضَا أَربِّي ؤُشَا نتَّا ذ أَمقْپُوڒْ غَارْ إِوْذَانْ.
19 أَذْ نضْفَارْ خنِّي مِينْ إِدْجَانْ إِ ڒهْنَا ذ ڒبْنِي ن إِجّنْ إِ ونّغْنِي. 20 وَارْ تَّاردّدْجْ شَا ڒْخذْمثْ ن أَربِّي خْ سِّيبّثْ ن مَاشَّا. مَارَّا ثِيمسْڒَايِينْ أَقَا أَثنْثْ ذ ثِيمزْذَاڭْ، مَاشَا ؤُشْثْ خْ بْنَاذمْ ونِّي إِ غَا إِڭّْ أَژْرُو ن ؤُنقْرَاضْ س مَاشَّا نّسْ. ▪ 21 مْلِيحْ ؤُمِي وَارْ ثتّتّذْ شَا أَيْسُومْ ؤُ وَارْ ثْسسّذْ شَا بِينُو نِيغْ وَارْ ثتّڭّذْ ؤُڒَا ذ إِشْثْ ن ڒْحَاجّثْ إِ ذِي إِ غَا إِنْقَارْضْ ؤُمَاشْ. ▪ 22 مَا ثتّْوَاسّْقنْعذْ إِ يِيخفْ نّكْ؟ أَذْ أَشْ يِيڒِي مَانْ أَيَا إِ يِيخفْ نّكْ زَّاثْ إِ أَربِّي. سّعْذْ ن ونِّي وَارْ إِتِّيكّْوِيضْ شّْرعْ خْ يِيخفْ نّسْ ذِي مِينْ ذ أَسْ إِتّْغِيڒْ مْلِيحْ. 23 مَاشَا ونِّي إِتّْشكَّانْ خْمِي إِتّتّْ، إِتّْوَاحَاسبْ، مِينْزِي مَانْ أَيَا وَارْ إِدْجِي زِي لْ-إِيمَانْ. قَاعْ مِينْ وَارْ إِدْجِينْ زِي لْ-إِيمَانْ، أَقَا-ث ذ دّنْبْ. ▪