‏1 ذڭْ وَاسّْ أَمزْوَارُو ن سِيمَانَا ثُوسَا-د مَارْيَامْ ن مَاجْذَالَا ذِي ضّْبحْ زِيشْ غَارْ ونْضڒْ، ثُوغَا عَاذْ ذ ثَادْجسْثْ. ثژْرَا ثَاصْضَارْثْ أَقَا ثمّكْسِي خْ ونْضڒْ. ^▪   ‏2 ثُوزّڒْ-د، ثُوسَا-د غَارْ شِيمْعُونْ بُوطْرُوسْ ؤُ غَارْ ؤُمحْضَارْ نّغْنِي ونِّي ثُوغَا إِتّخْسْ يشُّو، ثنَّا أَسنْ: ”كْسِينْ سِيذِيثْنغْ زڭْ ونْضڒْ، وَارْ سِّينغْ مَانِي ث ڭِّينْ.“ ^▪  

‏3 إِفّغْ-د شِيمْعُونْ ذ ؤُمحْضَارْ نّغْنِي ؤُشَا ؤُسِينْ-د غَارْ ونْضڒْ. ^▪   ‏4 نِيثْنِي ؤُزّْڒنْ س ثْنَاينْ إِذْسنْ، مَاشَا أَمحْضَارْ نّغْنِي إِزْوَارْ إِ شِيمْعُونْ ؤُشَا يِيوضْ ذ أَمزْوَارُو غَارْ ونْضڒْ. ‏5 إِخْزَارْ، إِژْرَا ڒشْفُونْ نْ ڒقْطنْ مَّارْسنْ ذِينْ، مَاشَا وَارْ يُوذِيفْ شَا. ^▪   ‏6 إِضْفَارْ إِ-ث شِيمْعُونْ، يُوذفْ غَارْ ونْضڒْ، إِژْرَا عَاوذْ ڒشْفُونْ مَّارْسنْ ذِينْ. ‏7 أَمنْذِيڒْ ونِّي ثُوغَا خْ ؤُزدْجِيفْ نّسْ، وَارْ إِمَّارْسْ شَا أَكْ-ذ ڒشْفُونْ ن ڒقْطنْ، مَاشَا ثُوغَا إِضْفصْ. إِتّْوَاڭّْ ذڭْ ومْشَانْ وحّْذسْ. ^▪   ‏8 ڒخْذنِّي يُوذفْ-د ؤُڒَا ذ أَمحْضَارْ نّغْنِي، ونِّي د-يُوسِينْ ذ أَمزْوَارُو غَارْ ونْضڒْ، إِژْرَا ؤُشَا يُومنْ. ‏9 مِينْزِي نِيثْنِي ثُوغَا عَاذْ وَارْ سِّيننْ ثِيرَا إِقدّْسنْ، بلِّي إِتّْخصَّا أَسْ أَذْ إِكَّارْ جَارْ ن إِمتِّيننْ. ^▪  

‏10 خنِّي ذوْڒنْ إِمحْضَارنْ نِّي غَارْ ثَادَّارْثْ نْسنْ.

‏11 مَارْيَامْ ثقِّيمْ ثْبدّْ غَارْ ونْضڒْ بَارَّا، ثتّْرُو. ڒَامِي ثُوغَا ثتّْرُو، ثسْوضْ ذڭْ ونْضڒْ، ^▪  

‏12 ثژْرَا ثْنَاينْ ن لْمَالَاكَاثْ س وَارُّوضْ ذ أَشمْڒَاڒْ، قِّيمنْ مَانِي ثُوغَا ثمَّارْسْ ڒْخشْبثْ ن يشُّو، إِجّنْ غَارْ ثْسُومّْثِينْ نّسْ ن ؤُزدْجِيفْ، إِجّنْ غَارْ إِضَارنْ نّسْ.

‏13 نَّانْ أَسْ: ”أَ ثَامْغَارْثْ، مَايمِّي ثتّْرُوذْ؟“ ثنَّا أَسنْ: ”مَاغَارْ كّْسنْ سِيذِي إِنُو، وَارْ سِّينغْ مَانِي ث سَّارْسنْ.“

‏14 ؤُمِي ثنَّا أَيَا، ثنّقْڒبْ غَارْ ضفَّارْ، ثژْرَا يشُّو إِبدّْ، مَاشَا وَارْ ثسِّينْ شَا أَقَا-ث ذ يشُّو. ^▪  

‏15 يشُّو إِنَّا أَسْ: ”أَ ثَامْغَارْثْ، مَايمِّي ثتّْرُوذْ؟ مِينْ خفْ ثَارزُّوذْ؟“ ثتّْغِيڒْ أَسْ نتَّا ذ بَابْ ن ثحْوِيشْثْ، ثنَّا أَسْ: ”أَ سِيذِي مَاڒَا شكْ إِ-ث إِكْسِينْ، إِنِي أَيِي مَانِي ث ثسَّارْسذْ، خنِّي أَذْ ث كْسِيغْ.“

‏16 يشُّو إِنَّا أَسْ: ”أَ مَارْيَامْ!“ نتَّاثْ ثنّقْڒبْ، ثنَّا أَسْ س ثْعِيبْرَانِيثْ: ”أَ رَابُّولِي!“، إِخْسْ أَذْ يِينِي: ’أَ أَمْسغَّارْ‘.

‏17 يشُّو إِنَّا أَسْ: ”وَارْ د-ثْقَارّبْ شَا، أَقَا نشّْ عَاذْ وَارْ ڭعّْذغْ شَا غَارْ بَابَا، مَاشَا رُوحْ غَارْ أَيْثْمَا، إِنِي أَسنْ: ’نشّْ أَقَا أَذْ ڭعّْذغْ غَارْ بَابَا ذ بَابَاثْومْ، غَارْ أَربِّي إِنُو ذ أَربِّي نْومْ.‘ “ ^▪  

‏18 ثعْقبْ-د مَارْيَامْ ن مَاجْذَالَا ثْخبَّارْ إِمحْضَارنْ بلِّي نتَّاثْ ثژْرَا سِيذِيثْنغْ ؤُ بلِّي نتَّا إِنَّا أَسْ مَانْ أَيَا. ^▪  

‏19 غَارْ ثْمذِّيثْ ن وَاسّْ نِّي، نتَّا ذ أَمزْوَارُو ن سِيمَانَا، ثُوغَا ثِيوُّورَا قّْننْثْ مَانِي ثُوغَا مُوننْ إِمحْضَارنْ س ثِيڭّْوُوذِي زڭْ وُوذَاينْ، يُوذفْ-د يشُّو، إِبدّْ ذِي ڒْوسْثْ نْسنْ، إِنَّا أَسنْ: ”سْڒَامْ خَاومْ.“ ^▪   ‏20 أَوَارْنِي ڒَامِي إِنَّا أَيَا، إِمّڒْ أَسنْ إِفَاسّنْ نّسْ ذ ؤُغزْذِيسْ نّسْ. فَارْحنْ إِمحْضَارنْ ڒَامِي ژْرِينْ سِيذِيثْنغْ. ^▪   ‏21 إِنَّا أَسنْ عَاوذْ يشُّو: ”سْڒَامْ خَاومْ، أَمْ مَامّشْ ذ أَيِي د-إِسّكّْ بَابَا، ؤُڒَا ذ نشّْ أَذْ كنِّيوْ د-سّكّغْ.“ ^▪   ‏22 أَوَارْنِي ڒَامِي إِنَّا مَانْ أَيَا، إِصُوضْ ذَايْسنْ، إِنَّا أَسنْ: ”قبْڒمْ أَرُّوحْ إِقدّْسنْ.“ ‏23 ونِّي ؤُمِي غَا ثغْفَارمْ دّْنُوبْ، أَذْ أَسْ تّْوَاغْفَارنْ دّْنُوبْ نّسْ. ونِّي ؤُمِي ذ أَسْ إِ غَا ثطّْفمْ ذِي دّْنُوبْ نّسْ، أَذْ أَسْ تّْوَاطّْفنْ دّْنُوبْ نّسْ.“ ^▪  

‏24 مَاشَا ثُومَا، إِجّنْ زِي ثنْعَاشْ، ونِّي ؤُمِي قَّارنْ ’أَشْنِيوْ‘، وَارْ ثُوغِي شَا أَكِيذْسنْ ڒَامِي د-يُوسَا يشُّو. ‏25 نَّانْ أَسْ إِمحْضَارنْ: ”أَقَا نژْرَا سِيذِيثْنغْ!“ مَاشَا نتَّا إِنَّا أَسنْ: ”مَاڒَا وَارْ ژْرِيغْ ڒِيمَاڒْثْ ن إِمسْمِيرنْ ذڭْ إِفَاسّنْ نّسْ، أَذْ سَّارْسغْ أَضَاضْ إِنُو ذڭْ ومْشَانْ ن إِمسْمِيرنْ ؤُشَا أَذْ سَّارْسغْ أَفُوسْ إِنُو ذڭْ ؤُغزْذِيسْ نّسْ، وَارْ تِّيمْنغْ.“

‏26 أَوَارْنِي ثْمنْيَا ن وُوسَّانْ ثُوغَا إِمحْضَارنْ نّسْ عَاوذْ غَارْ ذَاخڒْ ؤُ ثُومَا ثُوغَا أَكِيذْسنْ. يُوذفْ-د يشُّو، وَاخَّا ثِيوُّورَا ثُوغَا قّْننْثْ، ؤُشَا إِبدّْ-د ذِي ڒْوسْثْ نْسنْ، إِنَّا: ”سْڒَامْ خَاومْ!“ ‏27 إِنَّا إِ ثُومَا: ”أَوِي-د أَضَاضْ نّكْ ؤُشَا خْزَارْ ذڭْ إِفَاسّنْ إِنُو، سَارْسْ أَفُوسْ نّكْ ذَانِيثَا ؤُ سِيذفْ إِ-ث ذڭْ ؤُغزْذِيسْ إِنُو، وَارْ تِّيڒِي ذ أَكَافْرِيوْ، مَاشَا ذ ڒْمُومنْ.“ ^▪   ‏28 يَارَّا-د ثُومَا، إِنَّا أَسْ: ”أَ سِيذِي إِنُو ذ أَربِّي إِنُو!“ ‏29 إِنَّا أَسْ يشُّو: ”ؤُمِي ثژْرِيذْ أَيِي ڒخُّو، أَقَا ثُومْنذْ، أَ ثُومَا! سّعْذْ ن يِينِّي يُومْننْ، وَاخَّا نِيثْنِي وَارْ ذ أَيِي ژْرِينْ.“ ^▪  

‏30 يشُّو إِڭَّا أَطَّاسْ ن ڒعْڒَامَاثْ نّغْنِي قِيبَاتْشْ إِ إِمحْضَارنْ نّسْ، ثِينِّي وَارْ يُورِينْثْ شَا ذڭْ وذْلِيسْ-أَ، ^▪   ‏31 مَاشَا ثِينَا ؤُرَانْثْ حِيمَا أَذْ ثَامْنمْ بلِّي يشُّو نتَّا ذ لْمَاسِيحْ، مِّيسْ ن أَربِّي، ؤُشَا خْمِي إِ غَا ثَامْنمْ، أَذْ غَارْومْ ثِيڒِي ثُوذَارْثْ س يِيسمْ نّسْ.