‏1 خنِّي إِجَّا بِيلَاطُوسْ أَذْ هتّْكنْ يشُّو س ؤُركُّوضْ. ^▪   ‏2 أَوَارْنِي ڒَامِي مُوذنْ إِعسْكَارِييّنْ إِجّْ ن تَّاجْ س إِسنَّاننْ، سَّارْسنْ أَسْ ت خْ ؤُزدْجِيفْ نّسْ ؤُشَا يَارْضنْ أَسْ إِجّْ ن ؤُسڒْهَامْ ذ أَرْجُووَانِي، ‏3 نَّانْ: ”سْڒَامْ خَاكْ، أَ أَجدْجِيذْ ن وُوذَاينْ!“، ؤُشَا وْثِينْ ث خْ إِڭمِّيزنْ نّسْ.

‏4 إِفّغْ-د عَاوذْ بِيلَاطُوسْ، إِنَّا أَسنْ: ”أَذْ أَومْ ث-إِ-د-سُّوفّْغغْ، حِيمَا أَذْ ثسّْنمْ بلِّي نشّْ وَارْ ذَايسْ ؤُفِيغْ سِّيبّثْ إِ ؤُشثْشِي، ؤُڒَا ذ إِشْثْ.“ ‏5 خنِّي إِفّغْ-د يشُّو س تَّاجْ ن إِسنَّاننْ ذ ؤُجدْجَابْ أَجُورْوَانِي. إِنَّا أَسنْ بِيلَاطُوسْ: ”خْزَارمْ، بْنَاذمْ!“

‏6 ڒَامِي ث ژْرِينْ إِمقّْرَاننْ ن إِكهَّاننْ ذ إِعسَّاسنْ، سْغُويّنْ، نَّانْ: ”صلّْبْ إِ-ث، صلّْبْ إِ-ث“ إِنَّا أَسنْ بِيلَاطُوسْ: ”أَوْيمْ ث-إِ-د كنِّيوْ، صلّْبمْ ث، مِينْزِي نشّْ وَارْ ذَايسْ ؤُفِيغْ ؤُڒَا ذ إِجّْ ن ڒْعِيبْ.“ ‏7 أَرِّينْ-د خَاسْ وُوذَاينْ: ”غَارْنغْ شَّارِيعَا، ؤُ عْلَاحْسَابْ شَّارِيعَا نّغْ إِتّْخصَّا أَذْ إِمّثْ، مِينْزِي نتَّا إِتَّارَّا إِخفْ نّسْ ذ مِّيسْ ن أَربِّي.“ ^▪  

‏8 ڒَامِي إِسْڒَا بِيلَاطُوسْ أَوَاڒْ-أَ، يَارْنِي ذِي ثِيڭّْوُوذِي. ‏9 يُوذفْ عَاوذْ غَارْ ثَادَّارْثْ ن شّْرعْ، إِنَّا إِ يشُّو: ”مَانِيسْ شكْ؟“ مَاشَا يشُّو وَارْ خَاسْ د-يَارِّي شَا.

‏10 إِنَّا أَسْ بِيلَاطُوسْ: ”مَا وَارْ ثخْسذْ أَذْ كِيذِي ثسِّيوِيڒذْ؟ مَا وَارْ ثسِّينذْ شَا أَقَا غَارِي صُّولْطَا حِيمَا أَذْ أَشْ سَّارّْحغْ ؤُ غَارِي صُّولْطَا حِيمَا أَذْ شكْ صلّْبغْ؟“

‏11 يَارَّا-د خَاسْ يشُّو: ”وَارْ غَاركْ ثتِّيڒِي بُو صُّولْطَا خَافِي، مَاڒَا وَارْ ذ أَشْ د-ثمّوْشْ زِي سنّجْ. س ؤُيَا، ونِّي ذ أَيِي غَا إِسلّْمنْ، أَقَا خَاسْ دّنْبْ إِمْغَارْ زڭْ ونِّي إِ إِدْجَانْ خَاكْ.“

‏12 زِي ڒخْذنِّي ثُوغَا بِيلَاطُوسْ يَارزُّو أَذْ أَسْ إِسَارّحْ، مَاشَا ؤُذَاينْ سْغُويّنْ، نَّانْ: ”مَاڒَا ثْسَارّْحذْ إِ ورْيَازْ-أَ، وَارْ ثدْجِيذْ شَا ذ أَمدُّوكّڒْ ن قَايْصَارْ. كُوڒْ إِجّنْ ونِّي إِتَّارَّانْ إِخفْ نّسْ ذ أَجدْجِيذْ، إِتّْعكَّاسْ قَايْصَارْ.“ ^▪  

‏13 ڒَامِي إِسْڒَا بِيلَاطُوسْ إِ وَاوَاڒْ-أَ، إِسُّوفّغْ يشُّو، إِقِّيمْ خْ ڒْكُورْسِي ن شّْرعْ ذڭْ ومْشَانْ ؤُمِي قَّارنْ ’أَزَّايْ ن لُوصَا‘، مَاشَا قَّارنْ أَسْ س ثْعِيبْرَانِيثْ ’ڭْبِيبْثَا‘. ^▫  

‏14 ثُوغَا ذ أَسّْ ن ؤُسوْجذْ إِ ثْغَارْصْثْ ن ؤُسعْذُو. ثُوغَا عْڒَاحَاڒْ ذ ثْسَاعّثْ وِيسّْ ستَّا، إِنَّا إِ وُوذَاينْ: ”خْزَارمْ، أَجدْجِيذْ نْومْ!“

‏15 مَاشَا نِيثْنِي سْغُويّنْ: ”كْسِي ث، كْسِي ث، صلّْبْ إِ-ث!“ إِنَّا أَسنْ بِيلَاطُوسْ: ”مَا أَذْ صلّْبغْ خنِّي أَجدْجِيذْ نْومْ؟“ أَرِّينْ-د خَاسْ إِمقّْرَاننْ ن إِكهَّاننْ: ”وَارْ غَارْنغْ بُو ؤُجدْجِيذْ مْغِيرْ قَايْصَارْ!“ ^▪  

‏16 خنِّي إِسلّمْ أَسنْ ث حِيمَا أَذْ ث صلّْبنْ. ؤُشَا نِيثْنِي كْسِينْ يشُّو، إِوْينْ ث سّنِّي. ^▪  

‏17 يَارْپُو سِيمَانْثْ نّسْ صَّالِيبْ غَارْ ومْشَانْ ؤُمِي قَّارنْ ’ثَاشقُّوفْثْ‘، مَاشَا س ثْعِيبْرَانِيثْ قَّارنْ أَسْ ’جُولْجُوثَا‘. ^▫  ▪  

‏18 صلّْبنْ ث ذِينِّي، ؤُشَا صلّْبنْ أَكِيذسْ ثْنَاينْ نّغْنِي، إِجّنْ غَارْ إِجّْ ن ؤُغزْذِيسْ ؤُ ونّغْنِي غَارْ ؤُغزْذِيسْ نّغْنِي، ؤُ يشُّو ذِي ڒْوسْثْ.

‏19 يُورَا بِيلَاطُوسْ عَاوذْ ذڭْ إِشْثْ ثڒْوِيحْثْ، إِسَّارْسْ إِ-ت خْ صَّالِيبْ. أَمُّو إِ إِتّْوَارِي ذَايسْ: ’وَانِيثَا ذ يشُّو نَّاصِيرِي، أَجدْجِيذْ ن وُوذَاينْ‘. ^▪   ‏20 ثِيرَا أَيَا غْرِينْ ثنْثْ أَطَّاسْ ن وُوذَاينْ، مِينْزِي أَمْشَانْ مَانِي ثُوغَا صلّْبنْ يشُّو يُوذسْ-د إِ ثنْذِينْثْ. ثِيرَا أَيَا تّْوَارِينْثْ س لْحُورُوفْ ن ثْعِيبْرَانِيثْ ذ ثْلَاثِينِيثْ ذ ثْيُونَانِيثْ. ‏21 نَّانْ إِمقّْرَاننْ ن إِكهَّاننْ إِ بِيلَاطُوسْ: ”وَارْ تَّارِي شَا: ’أَجدْجِيذْ ن وُوذَاينْ‘، مَاشَا أَقَا إِنَّا: ’نشّْ ذ أَجدْجِيذْ ن وُوذَاينْ!‘ “ ‏22 يَارَّا-د بِيلَاطُوسْ: ”مِينْ ؤُرِيغْ، أَقَا ؤُرِيغْ ث.“

‏23 ڒَامِي صلّْبنْ إِعسْكَارِييّنْ يشُّو، كْسِينْ أَرُّوضْ نّسْ، بْضَانْ ث خْ أَربْعَا ن ثْسقَّارْ، إِ كُوڒْ أَعسْكَارِي إِشْثْ ن ثسْغَارْثْ. مَاشَا ثْشَامِيرْ نّسْ ثُوغَا بْڒَا ثَاخيَّاضْثْ، ثتّْوَاخيّضْ قَاعْ زِي سنّجْ. ^▪   ‏24 نَّانْ إِ وَايَاوْيَا: ”وَارْ ث نتّْشَارِّيڭْ شَا، أَذْ خَاسْ نڭّْ أَكشُّوضْ، أَذْ نْژَارْ وِي ث غَا يَاوْينْ، حِيمَا أَذْ إِتّْوَاكمّڒْ أَوَاڒْ ن ثِيرَا إِقدّْسنْ إِ إِقَّارنْ: ”بْضَانْ أَرُّوضْ إِنُو جَارْ أَسنْ ؤُ خْ وَارُّوضْ إِنُو ڭِّينْ أَكشُّوضْ.“ مَانْ أَيَا إِ إِڭِّينْ إِعسْكَارِييّنْ. ^▪  

‏25 غَارْ صَّالِيبْ ن يشُّو ثْبدّْ يمَّاسْ ذ ؤُتْشْمَاسْ ن يمَّاسْ ذ مَارْيَامْ ثَامْغَارْثْ ن كْلِييُوبَاسْ ذ مَارْيَامْ ن مَاجْذَالَا. ^▪   ‏26 ڒَامِي إِژْرَا يشُّو يمَّاسْ ذ ؤُمحْضَارْ ونِّي ثُوغَا إِتّخْسْ، إِبدّْ ذِينْ، إِنَّا إِ يمَّاسْ: ”أَ ثَامْغَارْثْ، خْزَارْ، مِّيمْ!“ ‏27 ڒخْذنِّي إِنَّا إِ ؤُمحْضَارْ نِّي:”أَقَا-شْ يمَّاشْ!“ زِي ثْسَاعّثْ نِّي إِكْسِي ت ؤُمحْضَارْ غَارْ ثَادَّارْثْ نّسْ.

‏28 أَوَارْنِي مَانْ أَيَا إِسّنْ يشُّو أَقَا كُوڒْشِي إِتّْوَاكمّڒْ، ڒخْذنِّي إِنَّا، حِيمَا أَذْ يِيڒِي مِينْ يُورَانْ ذڭْ وذْلِيسْ: ”نشّْ فُّوذغْ!“ ^▪   ‏29 إِتّْوَامَارْسْ ذِينْ إِجّْ ن ؤُغَارَّافْ إِشُّورْ س ڒْخدْجْ. سّْغضْصنْ إِشْثْ ن سْپُونْخَا ن هِيسُوبْ س ڒْخدْجْ ؤُشَا ڭِّينْ ت خْ ؤُغَانِيمْ ن ثْعلْدْجثْ، سِّيوْضنْ أَسْ ت غَارْ ؤُقمُّومْ نّسْ. ‏30 ڒَامِي إِقَّاسْ يشُّو ڒْخدْجْ، إِنَّا: ”أَقَا إِتّْوَاكمّڒْ!“ ؤُشَا إِسَّاضَارْ أَزدْجِيفْ نّسْ، إِسلّمْ أَرُّوحْ نّسْ.

‏31 ؤُمِي ثُوغَا أَسّْ ن ؤُسوْجذْ ن بَاسْخَا، نَّانْ وُوذَاينْ: ”وَارْ إِعدّڒْ أَذْ قِّيمنْثْ أَرِّيمَاثْ نْسنْ خْ صَّالِيبْ ذِي سّبْثْ، مِينْزِي أَسّْ ن سّبْثْ يُوذسْ-د!“، مِينْزِي أَسّْ نِّي ن سّبْثْ ثُوغَا ذ أَمقّْرَانْ أَطَّاسْ. س ؤُيَا تَّارنْ وُوذَاينْ زِي بِيلَاطُوسْ حِيمَا أَذْ أَرْژنْ إِضَارنْ ن يِينِّي إِتّْوَاصلّْبنْ، أَذْ ثنْ سِّيڭّْوجنْ سّنِّي. ‏32 خنِّي ؤُسِينْ-د إِعسْكَارِييّنْ، أَرْژِينْ إِضَارنْ ن ؤُمزْوَارُو ؤُ ن ونّغْنِي إِ ثُوغَا إِتّْوَاصلّبْ أَكِيذسْ، ‏33 مَاشَا ڒَامِي د-ؤُسِينْ غَارْ يشُّو، وَارْ أَرْژِينْ شَا إِضَارنْ نّسْ ؤُمِي ژْرِينْ أَقَا إِمُّوثْ. ‏34 مَاشَا إِجّنْ زڭْ إِعسْكَارِييّنْ إِسّْنُوقّبْ إِ-ث س إِشْثْ ن لَانْسَا ذڭْ ؤُغزْذِيسْ نّسْ ؤُشَا فّْغنْ-د إِذَامّنْ ذ وَامَانْ ذغْيَا. ‏35 ونِّي إِژْرِينْ مَانْ أَيَا، ثُوغَا إِشْهذْ ؤُ شّْهَاذثْ نّسْ ذ ثِيذتّْ. نتَّا إِسّنْ، أَقَا إِنَّا ثِيذتّْ، حِيمَا أَذْ ثَامْنمْ ؤُڒَا ذ كنِّيوْ. ‏36 ثِيمسْڒَايِينْ-أَ مْسَارنْثْ، حِيمَا أَذْ إِتّْوَاكمّڒْ وذْلِيسْ إِ إِقَّارنْ: ”وَارْ زَّايسْ إِتَّارژِّي يِيغسْ.“ ^▪   ‏37 ؤُشَا إِجّْ ن وَاوَاڒْ نّغْنِي زڭْ وذْلِيسْ إِقَّارْ: ”نِيثْنِي أَذْ خْزَارنْ ونِّي ث إِسّْنُوقّْبنْ.“ ^▪  

‏38 أَوَارْنِي مَانْ أَيَا يُوسُوفْ زِي أَرِيمَاثِييَا، ونِّي ثُوغَا ذ إِجّْ ن ؤُمحْضَارْ ن يشُّو مَاشَا س ثْنُوفّْرَا زِي ثِيڭّْوُوذِي زڭْ وُوذَاينْ، إِتَّارْ أَسْ إِ بِيلَاطُوسْ تّسْرِيحْ حِيمَا أَذْ إِكْسِي ڒْخشْبثْ ن يشُّو ؤُشَا بِيلَاطُوسْ إِسَارّحْ أَسْ. خنِّي يُوسَا-د، إِكْسِي ڒْخشْبثْ ن يشُّو. ^▪   ‏39 يُوسَا-د عَاوذْ نِيكُوذِيمُوسْ ونِّي ثُوغَا د-يُوسِينْ قْبڒْ غَارْ يشُّو س دْجِيڒثْ، يِيوِي-د أَكِيذسْ أَخدْجضْ ن ڒفْوَاحثْ ن مِيرُّو ذ وشْفِيرْ عْڒَاحَاڒْ مْيَا ن أَرْضڒَاثْ. ^▫  ▪   ‏40 خنِّي كْسِينْ ڒْخشْبثْ ن يشُّو، ڒحّْفنْ ت ذِي ڒشْفُونْ أَكْ-ذ ڒعْطُورْ، أَمْ مَامّشْ نُّومنْ تّڭّنْ ت وُوذَاينْ إِ ونْضڒْ. ‏41 ثُوغَا ذِينْ إِجّْ ن وحْوِيشْ ذڭْ ومْشَانْ مَانِي صلّْبنْ يشُّو، ؤُشَا ذڭْ وحْوِيشْ إِجّْ ن ونْضڒْ ن جْذِيذْ، عمَّارْصْ وَارْ ذَايسْ سَّارْسنْ ؤُڒَا ذ إِجّْ. ‏42 سَّارْسنْ يشُّو ذِينْ، مِينْزِي ثُوغَا يِيوضْ-د وَاسّْ ن سّبْثْ، ؤُ مِينْزِي أَنْضڒْ نِّي ثُوغَا يُوذسْ.