‏1 أَوَارْنِي ؤُيَا ثُوغَا يشُّو إِمّڒْ إِخفْ نّسْ عَاوذْ إِ إِمحْضَارنْ غَارْ ڒبْحَارْ ن ثِيبِيرِييَاسْ، إِضْهَارْ-د أَمُّو. ‏2 ثُوغَا ذِينْ جْمِيعْ شِيمْعُونْ بُوطْرُوسْ ذ ثُومَا، ونِّي ؤُمِي قَّارنْ أَشْنِيوْ، ذ نَاثَانَايِيلْ، ونِّي ثُوغَا زِي قَانَا ذِي ثمُّورْثْ ن لْجَالِيلْ، ذ ثَارْوَا ن زَابْذِي، ؤُڒَا ذ ثْنَاينْ نّغْنِي زڭْ إِمحْضَارنْ نّسْ. ^▪  

‏3 إِنَّا أَسنْ شِيمْعُونْ بُوطْرُوسْ: ”نشّْ أَذْ رَاحغْ أَذْ ڭْمَارغْ إِسڒْمَانْ.“ نَّانْ أَسْ: ”أَذْ كِيكْ نْرَاحْ ؤُڒَا ذ نشِّينْ.“ فّْغنْ-د ؤُشَا نْيِينْ ذغْيَا ذِي ثْغَارَّاپُوثْ. ذِي دْجِيڒثْ نِّي وَارْ طِّيفنْ وَالُو. ‏4 غَارْ ضّْبحْ زِيشْ، إِبدّْ-د يشُّو خْ ثْمَا ن ڒبْحَارْ، مَاشَا إِمحْضَارنْ وَارْ سِّيننْ شَا أَقَا ذ يشُّو. ‏5 إِنَّا أَسنْ يشُّو: ”أَ إِبْڒِيغنْ، مَا أَذْ ثَاغْ غَارْومْ شَا ن مَاشَّا؟“ أَرِّينْ-د خَاسْ ”لَّ!“ ‏6 إِنَّا أَسنْ: ”نْضَارمْ ثْرَاشَّا نْومْ أَكْ-ذ ؤُغزْذِيسْ أَفُوسِي ن ثْغَارَّاپُوثْ، أَذْ ثَافمْ.“ خنِّي نْضَارنْ ثْرَاشَّا ؤُشَا وَارْ زمَّارنْ أَذْ ت-إِ-د-جبْذنْ زِي سِّيبّثْ ن ؤُبَارُّو ن إِسڒْمَانْ إِ ذَايسْ إِتّْوَاطّْفنْ. ^▪  

‏7 إِنَّا ؤُمحْضَارْ ونِّي ثُوغَا إِتّخْسْ يشُّو إِ بُوطْرُوسْ: ”أَقَا نتَّا ذ سِيذِيثْنغْ.“ ڒَامِي إِسْڒَا شِيمْعُونْ أَقَا نتَّا ذ سِيذِي، إِطّفْ ثْشَامِيرْ نّسْ مِينْزِي ثُوغَا ذ أَعَارْيَانْ، إِنْضَارْ إِخفْ نّسْ ذِي ڒبْحَارْ أَڒَامِي إِ غَا د-إِقَارّبْ غَارْ يشُّو. ^▪   ‏8 مَاشَا إِمحْضَارنْ إِنّغْنِي ؤُسِينْ-د س ثْغَارَّاپُوثْ مِينْزِي وَارْ إِڭّْوِيجنْ شَا خْ ڒْبَارّْ مْغِيرْ مِيثَاينْ ن إِغَادْجنْ، ؤُشَا جبْذنْ-د ثْرَاشَّا أَكْ-ذ إِسڒْمَانْ. ^▫  

‏9 ڒَامِي د-فّْغنْ غَارْ ڒْبَارّْ، ژْرِينْ ذِيهَا أَقَا إِتّْوَاسّوْجذْ إِجّْ ن ؤُفنِّيشْ ن ڒفْحمْ مَانِي مَّارْسنْ إِسڒْمَانْ ذ وغْرُومْ.

‏10 إِنَّا أَسنْ يشُّو: ”أَوْيمْ-د زڭْ إِسڒْمَانْ إِ ثڭْمَارمْ ڒخُّو.“ ^▪  

‏11 شِيمْعُونْ بُوطْرُوسْ يُويُورْ، إِجْبذْ ثْرَاشَّا ثشُّورْ س إِسڒْمَانْ إِمقّْرَاننْ غَارْ ڒْبَارّْ، أَقَا-ت ذَايسْ مْيَا ؤُ-ثْڒَاثَا ؤُ-خمْسِينْ. وَاخَّا ذَايسْ س وَانشْثْ ؤُيَا أَطَّاسْ، وَارْ ثْشَارّڭْ شَا ثْرَاشَّا.

‏12 إِنَّا أَسنْ يشُّو: ”أَرَاحمْ-د ذَا، أَذْ ثَارِييّْقمْ!“ ؤُڒَا ذ إِجّْ زڭْ إِمحْضَارنْ وَارْ إِزْعِيمْ أَذْ ث إِسّقْسَا، مِينْ ثعْنِيذْ شكْ، مِينْزِي سّْننْ أَقَا-ث ذ سِيذِيثْنغْ.

‏13 ڒخْذنِّي يُوسَا-د يشُّو، إِكْسِي أَغْرُومْ ذ إِسڒْمَانْ، إِوْشَا أَسنْ.

‏14 وَانِيثَا ذ ثْوَاڒَا وِيسّْ ثْڒَاثَا إِ د-إِضْهَارْ يشُّو إِ إِمحْضَارنْ نّسْ أَوَارْنِي ڒَامِي د-إِتّْوَاسّْنكَّارْ زِي ثَادَّارْثْ ن إِمتِّيننْ.

‏15 أَوَارْنِي ڒَامِي أَرِييّْقنْ، إِنَّا يشُّو إِ شِيمْعُونْ بُوطْرُوسْ: ”أَ شِيمْعُونْ، مِّيسْ ن يُونَا، مَا ثتّخْسذْ أَيِي كْثَارْ زڭْ يِينَا؟“ إِنَّا أَسْ: ”وَاهْ، أَ سِيذِي، شكْ ثسّْنذْ أَقَا نشّْ تّخْسغْ شكْ.“ إِنَّا أَسْ: ”أَرْوسْ إِزْمَارنْ إِنُو!“

‏16 إِنَّا أَسْ عَاوذْ، إِ ثْوَاڒَا وِيسّْ ثْنَاينْ: ”أَ شِيمْعُونْ، مِّيسْ ن يُونَا، مَا ثتّخْسذْ أَيِي؟“ إِنَّا أَسْ: ”وَاهْ أَ سِيذِي، شكْ ثسّْنذْ أَقَا نشّْ تّخْسغْ شكْ.“ إِنَّا أَسْ: ”أَرْوسْ إِشَارِّييّنْ إِنُو!“

‏17 إِنَّا أَسْ وِيسّْ ثْڒَاثَا: ”أَ شِيمْعُونْ، مِّيسْ ن يُونَا، مَا ثتّخْسذْ أَيِي؟“ إِشْضنْ بُوطْرُوسْ مِينْزِي إِنَّا أَسْ ث وِيسّْ ثْڒَاثَا: ’مَا ثتّخْسذْ أَيِي؟‘، ؤُشَا إِنَّا أَسْ: ”أَ سِيذِي، شكْ ثسّْنذْ كُوڒْشِي، ثسّْنذْ أَقَا نشّْ تّخْسغْ شكْ.“ إِنَّا أَسْ يشُّو: ”أَرْوسْ ثِيخْسِيوِينْ إِنُو! ^▪  

‏18 س ثِيذتّْ، س ثِيذتّْ، نشّْ أَذْ أَشْ إِنِيغْ: ڒَامِي شكْ ثُوغَا ذ أَمژْيَانْ، ثْبيْسذْ إِ يِيخفْ نّكْ، ثْرُوحذْ مَانِي ثخْسذْ، مَاشَا خْ مِينِّي إِ غَا ثوْسَارذْ، أَذْ ثسّْوِيژّْضذْ إِفَاسّنْ نّكْ ؤُشَا ونّغْنِي أَذْ شكْ إِبْيسْ ؤُشَا أَذْ شكْ يَاوِي غَارْ مَانِي وَارْ ثتّخْسذْ.“ ^▪  

‏19 إِنَّا أَمُّو حِيمَا أَذْ إِسّْشنْ إِ مَانْ ڒْموْثْ إِ زِي غَا إِسّْعُودْجْ أَربِّي. أَوَارِي ڒَامِي ذ أَسْ إِنَّا أَمُّو، إِنَّا أَسْ: ”ضْفَارْ أَيِي-د!“ ^▪  

‏20 إِنّقْڒبْ شِيمْعُونْ بُوطْرُوسْ، إِژْرَا أَمحْضَارْ ونِّي ثُوغَا إِتّخْسْ يشُّو، إِضْفَارْ إِ-ث، نتَّا ذ ونِّي ثُوغَا إِسنّْذنْ خْ إِذْمَارنْ ن يشُّو غَارْ ؤُمنْسِي، ونِّي إِنَّانْ: ”أَ سِيذِي إِنُو، وِي شكْ إِ غَا إِغْذَارنْ؟“ ^▪   ‏21 ڒَامِي إِژْرَا بُوطْرُوسْ وَا، إِنَّا إِ يشُّو: ”أَ سِيذِي، إِ وَا، مِينْ ذ أَسْ غَا إِمْسَارنْ؟“ ‏22 إِنَّا أَسْ يشُّو: ”مَاڒَا خْسغْ أَذْ إِقِّيمْ أَڒْ د غَا عقْبغْ، مِينْ ذ أَشْ إِرُوحنْ؟ شكْ ضْفَارْ أَيِي-د!“ ‏23 ؤُشَا إِفّغْ-د وَاوَاڒْ-أَ جَارْ وَاوْمَاثنْ بلِّي أَمحْضَارْ نِّي وَارْ إِتّْمتِّي شَا، مَاشَا يشُّو وَارْ ذ أَسْ إِنِّي شَا بلِّي نتَّا وَارْ إِتّْمتِّي شَا، مَاشَا: ”مَاڒَا خْسغْ أَذْ إِقِّيمْ أَڒْ د غَا عقْبغْ، مِينْ ذ أَشْ إِرُوحنْ؟“

‏24 ذ وَا ذ أَمحْضَارْ ونِّي إِشهّْذنْ س مَانْ أَيَا ؤُشَا نتَّا يُورَا مَانْ أَيَا، ؤُ نشِّينْ نسّنْ أَقَا شّْهَاذثْ نّسْ ذ ثِيذتّْ. ^▪   ‏25 أَقَا ذِينْ عَاذْ أَطَّاسْ ن ثْمسْڒَايِينْ نّغْنِي إِ إِڭَّا يشُّو. مَاڒَا تّْوَارِينْثْ إِشْثْ أَوَارْنِي ثنّغْنِيثْ، إِتّْغِيڒْ أَيِي، أَذْ ثِيڒِي دُّونشْثْ سِيمَانْثْ نّسْ وَارْ ذَايسْ شَا تَّاسِيعْ حِيمَا أَذْ ثكْسِي إِذْلِيسنْ إِ غَا إِتّْوَارِينْ. أَمِينْ!

أَنڭَّارْ ن ڒخْبَارْ أَصبْحَانْ إِقدّْسنْ أَمْ مَامّشْ ث إِبَارّحْ يُوحَانَّا.

أَنڭَّارْ ن ثِيرَا ن ڒشْثَابْ ن أَربْعَا ن ڒخْبَارَاثْ إِصبْحنْ.

أَعُودْجِي إِ ثْبَابَاثْ، إِ مِّيسْ ؤُ إِ أَرُّوحْ إِقدّْسنْ، ڒخُّو ؤُ ڒبْذَا ؤُ إِ ڒبْذَا ن ڒبْذَاثْ. ^▪