‏1 خنِّي يُويُورْ يشُّو، إِفّغْ زِي زَّاوشْثْ ثَامقّْرَانْثْ. ؤُسِينْ-د غَارسْ إِمحْضَارنْ نّسْ حِيمَا أَذْ أَسْ سّشْننْ ڒبْنِييَّاثْ ن زَّاوشْثْ ثَامقّْرَانْثْ. ^▪  

‏3 ؤُمِي ثُوغَا إِقِّيمْ خْ وذْرَارْ ن زِّيثُونْ، ؤُسِينْ-د غَارسْ إِمحْضَارنْ نّسْ، أَمْ ثُوغَا تّمْسَاوَاڒَانْ، نَّانْ: ”إِنِي أَنغْ، مڒْمِي إِ غَا إِمْسَارْ مَانْ أَيَا ؤُ مَانْ ڒعْڒَامثْ ن ثْوَاسِيثْ نّكْ ؤُ ن قطُّو ن دُّونشْثْ؟“ ^▪   ‏4 يشُّو يَارَّا-د، إِنَّا أَسنْ: ”حْضَامْ إِخفْ نْومْ، وَارْ كنِّيوْ إِغكّْوِي حذْ. ^▪   ‏5 مِينْزِي أَطَّاسْ أَذْ د-أَسنْ س يِيسمْ إِنُو، أَذْ إِنِينْ: ’أَقَا ذ نشّْ، لْمَاسِيحْ!‘، ؤُشَا أَذْ غْوَانْ أَطَّاسْ. ^▪   ‏6 ؤُشَا أَذْ ثسْڒمْ خْ ڒْبَارُوضْ ؤُ خْ ڒخْپُورَاثْ ن ڭَارَّاثْ. غَارْومْ أَقَا أَذْ ثڭّْوذمْ، مِينْزِي س ؤُغِيڒْ أَذْ يِيڒِي مَانْ أَيَا، مَاشَا وَارْ إِتِّيڒِي عَاذْ ذ أَنڭَّارْ. ‏7 مِينْزِي ڒْڭنْسْ أَذْ إِمْنغْ أَكْ-ذ ڒْڭنْسْ نّغْنِي ؤُ ثَاڭلْذِيثْ أَكْ-ذ ثْڭلْذِيثْ نّغْنِي، أَذْ يِيڒِي ڒَاژْ ذ ڒهْڒَاشَاثْ يوْعَارنْ ذ إِنْهزَّانْ ن ثمُّورْثْ ذَا ذ ذِيهَا. ^▪   ‏8 مَاشَا مَارَّا مَانْ أَيَا ذ بدُّو ن ڒوْجعْ ن ثَارُوثْ وَاهَا. ‏9 خنِّي أَذْ كنِّيوْ د-أَوْينْ غَارْ ڒحْصَارثْ ؤُشَا أَذْ كنِّيوْ نْغنْ، ؤُ مَارَّا ڒڭْنُوسْ أَذْ كنِّيوْ شَارْهنْ زِي سِّيبّثْ ن يِيسمْ إِنُو. ^▪  

‏10 ڒخْذنِّي أَذْ وْضَانْ أَطَّاسْ، أَذْ سلّْمنْ إِجّنْ ونّغْنِي ؤُشَا أَذْ شَارْهنْ إِجّنْ ونّغْنِي.

‏11 أَذْ كَّارنْ وَاطَّاسْ ن إِنَابِييّنْ إِسّْخَارِّيقنْ ؤُشَا أَذْ سّغْوَانْ أَطَّاسْ. ^▪  

‏12 س وَاطَّاسْ ن ڒْمُوعْصِييّثْ أَذْ ثُوذْرُوسْ ثَايْرِي ن وَاطَّاسْ ن إِوْذَانْ، ^▫  ▪  

‏13 مَاشَا وِي إِ غَا إِصْبَارنْ غَارْ ؤُنڭَّارْ، أَقَا نتَّا أَذْ إِدَّارْ. ^▪  

‏14 ڒخْبَارْ-أَ أَصبْحَانْ ن ثْڭلْذِيثْ أَذْ زَّايسْ بَارّْحنْ ذِي دُّونشْثْ مَارَّا ذ شّْهَاذثْ إِ مَارَّا ڒڭْنُوسْ ؤُشَا ڒخْذنِّي أَذْ د-يَاسْ ؤُنڭَّارْ.“

‏15 ”خْمِي إِ غَا ثْژَارمْ نّْعِي ن وَاريّبْ، مِينْ خفْ إِسِّيوڒْ ؤُنَابِي ذَانِييَالْ، ذڭْ ومْشَانْ إِقدّْسنْ - أجّْ ونِّي ث إِ غَا إِغَارنْ أَذْ إِفْثنْ - ،^▪  

‏16 ڒخْذنِّي جّمْ إِنِّي إِدْجَانْ ذِي يَاهُوذِييَّا أَذْ أَروْڒنْ غَارْ إِذُورَارْ.

‏17 ونِّي إِدْجَانْ خْ ثْزقَّا وَارْ د-إِهكّْوِي شَا حِيمَا أَذْ إِكْسِي شَا زِي ثَادَّارْثْ نّسْ،

‏18 ؤُ ونِّي إِدْجَانْ ذڭْ إِيَّارْ، وَارْ د-إِذِّيكّْوِيڒْ شَا حِيمَا أَذْ د-يَاوِي أَرُّوضْ نّسْ.

‏19 ؤُشْثْ خْ ثِينِّي إِدْجَانْ س دّيْسثْ ذ ثِينِّي إِسُّوطُّوضنْ ذڭْ وُوسَّانْ نِّي! ‏20 ژَتدْجمْ حِيمَا وَارْ ثتِّيڒِي ثَاروْڒَا نْومْ ذِي ڒْمشْثَا نِيغْ ذِي سّبْثْ، ^▪   ‏21 مِينْزِي ڒخْذنِّي أَذْ ثِيڒِي ڒْمحْنثْ ثَامقّْرَانْثْ إِ وَارْ إِمْسَارنْ عمَّارْصْ زڭْ وَامِي ثدْجْ دُّونشْثْ أَڒْ إِ ڒخُّو ؤُ عمَّارْصْ وَارْ ثتِّيڒِي عَاذْ. ^▪   ‏22 مْڒِي ؤُسَّانْ نِّي وَارْ تّْوَاسْمژْينْ، خنِّي وَارْ إِتّْوَاسّنْجمْ ؤُڒَا ذ إِجّْ ن بْنَاذمْ، مَاشَا ؤُسَّانْ نِّي أَذْ تّْوَاسْمژْينْ ذِي طّْوعْ ن يِينِّي إِتّْوَافَارْزنْ. ‏23 مَاڒَا إِنَّا أَومْ حذْ: ’خْزَارمْ، أَقَا ذَا لْمَاسِيحْ!‘ نِيغْ: ’أَقَا-ث ذِيهَا!‘ وَارْ ث تِّيمْنمْ. ^▪   ‏24 مِينْزِي أَذْ إِڒِينْ إِمَاسِيحنْ إِسّْخَارِّيقنْ ذ إِنَابِييّنْ إِسّْخَارِّيقنْ، أَذْ ڭّنْ ڒعْڒَامَاثْ ذ لْمُوعْجِيزَاثْ حِيمَا، مْڒِي زمَّارنْ، أَذْ غْوَانْ عَاوذْ إِنِّي إِتّْوَافَارْزنْ. ^▪   ‏25 خْزَارمْ، أَقَا نِّيغْ أَومْ ث قْبڒْ. ‏26 مَاڒَا نَّانْ أَومْ: ’خْزَارمْ-د، نتَّا أَقَا-ث ذِي ڒخْڒَا!‘، وَارْ تّْرِيحمْ شَا ذِينْ، نِيغْ: ’خْزَارمْ-د، نتَّا أَقَا-ث ذَاخڒْ إِ وخَّامْ!‘، وَارْ ث تِّيمْنمْ. ^▪   ‏27 مِينْزِي أَمشْنَاوْ أَجَّاجْ إِ د-إِتّفّْغنْ زِي شَّارْقْ ؤُشَا إِتّڭّْ ثَافَاوْثْ أَڒْ ڒْغَارْبْ، أَمُّو إِ غَا ثِيڒِي ثْوَاسِيثْ ن مِّيسْ ن بْنَاذمْ. ‏28 مَانِي إِ غَا ثِيڒِي ڒْخشْبثْ، ذِيهَا أَذْ مُوننْ إِنضِّيونْ.“ ^▪  

‏29 ”ڒخْذنِّي أَوَارْنِي ڒْمحْنثْ ن وُوسَّانْ نِّي، أَذْ ثْبَارْشنْ ثْفُوشْثْ ؤُ ثَازِيرِي وَارْ ثتِّيشْ عَاذْ طّْيَا نّسْ ؤُ إِثْرَانْ أَذْ د-وْضَانْ زڭْ ؤُجنَّا ؤُ صُّولَاطَاثْ ن إِجنْوَانْ أَذْ تّْوَانْهزّنْثْ. ^▪   ‏30 خنِّي أَذْ د-ثضْهَارْ ڒعْڒَامثْ ن مِّيسْ ن بْنَاذمْ ذڭْ ؤُجنَّا ؤُ مَارَّا ثِيقبَّاڒْ ن ثمُّورْثْ أَذْ وْثنْثْ أَڭجْذُورْ ؤُشَا أَذْ ژَترنْ مِّيسْ ن بْنَاذمْ يُوسَا-د خْ ؤُسيْنُو س جّهْذْ ؤُ س إِزْڒَانْ ن ؤُصبّحْ. ^▪   ‏31 نتَّا أَذْ إِسّكّْ لْمَالَاكَاثْ نّسْ س ڒْحسّْ إِجهْذنْ ن ؤُصُوضِي ذڭْ ؤُيِيشّْ ن إِشَارِّي، ؤُشَا أَذْ د-سّْمُوننْثْ إِنِّي إِتّْوَافَارْزنْ زِي أَربْعَا ن إِغزْذِيسنْ ن ؤُسمِّيضْ، زِي طَّارْفْ أَنڭَّارُو ن إِجنْوَانْ أَڒْ ونّغْنِي.“ ^▪  

‏32 ”ڒمْذمْ زڭْ وَارْثُو أَمذْيَا أَيَا: خْمِي إِ غَا ذوْڒنْ ڒفْرُوعْ نّسْ ذ إِڒقَّاغنْ، أَذْ د-سُّوفّْغنْ ثِيفْرَايْ، أَذْ ثسّْنمْ أَقَا أَنبْذُو يُوذسْ-د. ^▪   ‏33 أَمُّو عَاوذْ كنِّيوْ، خْمِي إِ غَا ثْژَارمْ مَارَّا مَانْ أَيَا، أَذْ ثسّْنمْ أَقَا يُوذسْ-د، غَارْ ثوَّارْثْ.“

‏34 ”س ثِيذتّْ، نشّْ أَذْ أَومْ إِنِيغْ: جِّيڒْ-أَ وَارْ إِعدُّو أَڒْ غَا إِمْسَارْ مَانْ أَيَا مَارَّا. ‏35 أَجنَّا ذ ثمُّورْثْ أَذْ عْذُونْ مَاشَا أَوَاڒنْ إِنُو وَارْ عدُّونْ عمَّارْصْ. ^▪  

‏36 مَاشَا خْ وَاسّْ نِّي نِيغْ خْ ثَاسَاعّثْ نِّي وَارْ خَاسْ إِسِّينْ ؤُڒَا ذ إِجّْ، ؤُڒَا ذ لْمَالَاكَاثْ ن إِجنْوَانْ، مْغِيرْ ثْبَابَاثْ وحّْذسْ. ^▪   ‏37 أَمْ مَامّشْ ثُوغَا إِدْجْ ذڭْ وُوسَّانْ ن نُوحْ أَمُّو إِ غَا ثِيڒِي غَارْ ثْوَاسِيثْ ن مِّيسْ ن بْنَاذمْ. ^▪   ‏38 مِينْزِي أَمْ مَامّشْ ثنْ ثُوغَا ذڭْ وُوسَّانْ قْبڒْ طُّوفَانْ، تّتّنْ، سسّنْ، مدْجْشنْ ؤُ سّْمدْجَاشنْ أَڒْ أَسّْ إِ ذِي يُوذفْ نُوحْ ذڭْ ؤُغَارَّاپُو، ^▫  ▪   ‏39 ؤُشَا وَارْ ؤُشِينْ وَالُو أَڒَامِي د-يُوسَا طُّوفَانْ، إِمْحَا إِ-ثنْ مَارَّا، أَمُّو إِ غَا ثِيڒِي غَارْ ثْوَاسِيثْ ن مِّيسْ ن بْنَاذمْ. ‏40 ذِي ڒْوقْثْ نِّي أَذْ إِڒِينْ ثْنَاينْ ذڭْ إِيَّارْ، إِجّنْ أَذْ ث كْسِينْ ؤُ ونّغْنِي أَذْ ث جّنْ. ^▪   ‏41 ثْنَاينْ ن ثمْغَارِينْ أَذْ حَارْينْثْ س ثْسِيرْثْ، إِشْثنْ أَذْ ت كْسِينْ ؤُ ثنّغْنِي أَذْ ت جّنْ. ‏42 خنِّي حْضَامْ، مِينْزِي وَارْ ثسِّينمْ شَا ذِي مَانْ ثَاسَاعّثْ إِ د غَا يَاسْ سِيذِيثْومْ. ^▪  

‏43 مَاشَا سّْنمْ أَيَا: مَاڒَا بَابْ ن ثَادَّارْثْ إِسّنْ ثَاسَاعّثْ ن حطُّو ن دْجِيڒثْ نِّي ذِي د غَا يَاسْ ؤُشفَّارْ، إِڒِي إِقِّيمْ إِحطَّا، وَارْ ث إِتّجِّي أَذْ يَاذفْ غَارْ ثَادَّارْثْ نّسْ. ^▪   ‏44 س ؤُينِّي، إِڒِيمْ ثْوجْذمْ ؤُڒَا ذ كنِّيوْ، مِينْزِي مِّيسْ ن بْنَاذمْ أَذْ د-يَاسْ ذڭْ إِشْثْ ن ثْسَاعّثْ وَارْ ت ثتّْرِيجِيمْ.“

‏45 ”وِي إِدْجَانْ خنِّي ذ أَمْسخَّارْ أَمْثِيقِّي ذ أَمِيغِيسْ إِ إِڭَّا بَابْ نّسْ حِيمَا أَذْ إِبْضَا خْ إِمْسخَّارنْ مِينْ غَا شّنْ ذِي ڒْوقْثْ نّسْ؟ ^▪   ‏46 سّعْذْ ن ؤُمْسخَّارْ ونِّي إِ غَا يَافنْ سِيذِيسْ إِڒْهَا أَمُّو خْمِي د غَا يَاسْ. ‏47 س ثِيذتّْ، نشّْ أَذْ أَومْ إِنِيغْ، أَذْ ث إِڭّْ خْ مَارَّا أَڭْڒَا نّسْ. ‏48 مَاشَا مَاڒَا أَمْسخَّارْ أَعفَّانْ نِّي أَذْ يِينِي ذڭْ وُوڒْ نّسْ: ’سِيذِي إِنُو إِعطَّاڒْ!‘، ‏49 ؤُشَا إِبْذَا إِشَّاثْ إِمْسخَّارنْ إِنِّي أَكِيذسْ إِدْجَانْ، أَذْ إِشّْ أَذْ إِسُو أَكْ-ذ إِمسْكَارنْ، ‏50 خنِّي أَذْ د-يَاسْ سِيذِيسْ ن ؤُمْسخَّارْ نِّي ذڭْ وَاسّْ إِ ذِي وَارْ ث إِتّْرِيجِي ؤُ ذِي ثْسَاعّثْ وَارْ ت إِسِّينْ، ‏51 أَذْ ث إِقسّْ ذ إِوثْوِيثنْ ؤُشَا أَذْ ثِيڒِي ثسْغَارْثْ نّسْ أَكْ-ذ إِمْنَافْقنْ. ذِينْ إِ غَا يِيڒِينْ إِمطَّاونْ ذ ؤُغزِّي ن ثغْمَاسْ.“ ^▪