‏1 ڒخْذنِّي إِسِّيوڒْ يشُّو أَكْ-ذ ڒْغَاشِي ذ إِمحْضَارنْ نّسْ، ‏2 إِنَّا: ”إِمْسڒْمَاذنْ ن إِذْلِيسنْ ذ إِفَارِيسِييّنْ سّْغِيمنْ سِيمَانْثْ نْسنْ خْ ڒْكُورْسِي ن مُوسَا. ^▪   ‏3 س ؤُينِّي مَارَّا مِينْ ذ أَومْ قَّارنْ مَاحنْذْ أَذْ ذَايسْ ثْشبَّارمْ، ڭّمْ ث، مَاشَا وَارْ تّڭّمْ عْلَاحْسَابْ ڒخْذَايمْ نْسنْ، مِينْزِي نِيثْنِي وَاخَّا قَّارنْ ث، وَارْ ث تّڭّنْ مَاشَا. ^▪   ‏4 تّْشدَّانْ ڒحْمڒْ إِضقْڒنْ، سّْرُوسَانْ ثنْ خْ ثْغَارْذِينْ ن إِوْذَانْ، مَاشَا نِيثْنِي س يِيخفْ نْسنْ وَارْ خْسنْ أَذْ ثنْ سّنْهزّنْ ؤُڒَا س يِيجّْ ن ؤُضَاضْ. ^▪   ‏5 مَارَّا ڒخْذَايمْ نْسنْ إِ إِتّڭّنْ، تّڭّنْ ثنْثْ حِيمَا أَذْ ثنْ ژَترنْ إِوْذَانْ مِينْزِي نِيثْنِي تّڭّنْ ثِيحزَّانِينْ نْسنْ ن ثْژَادْجِيثْ ذ إِمِيرِيونْ ؤُشَا ثِيشْرُورِينْ إِ إِدْجَانْ غَارْ ؤُبحْڒُوڒْ ن ڒْكَاشْنِي ن ثْژَادْجِيثْ نْسنْ، ڭِّينْ ثنْثْ ذ ثِيمقّْرَانِينْ. ^▪   ‏6 نِيثْنِي تّخْسنْ إِمُوشَانْ إِمزْوُورَا غَارْ ڒفْثُوحْ ؤُ ڒكْرَاسِي غَارْ زَّاثْ ذِي ثمْزِيذَاوِينْ، ^▪   ‏7 ؤُڒَا ذ سّْڒَامْ ذِي ڒسْوَاقْ، ؤُشَا إِعْجبْ أَسنْ أَذْ أَسنْ ڒَاغَانْ إِوْذَانْ ’أَ أَمْسڒْمَاذْ إِنُو!‘ ^▪   ‏8 مَاشَا كنِّيوْ وَارْ ثجِّيمْ أَذْ أَومْ ڒَاغَانْ ’أَمْسڒْمَاذْ!‘، مِينْزِي أَمْسڒْمَاذْ نْومْ ذ إِجّنْ، ؤُ كنِّيوْ مَارَّا ذ أَوْمَاثنْ. ‏9 وَارْ إِعدّڒْ أَذْ ثْڒَاغَامْ إِخفْ نْومْ ’ثَابَابَاثْ!‘ ذِي ثمُّورْثْ، مِينْزِي بَابَاثْومْ إِ إِدْجَانْ ذڭْ إِجنْوَانْ ذ إِجّنْ. ^▪  

‏10 وَارْ ثجِّيمْ أَذْ أَومْ ڒَاغَانْ ’إِمْڭوَّاذنْ‘ مِينْزِي إِجّنْ ذ ونِّي ذ أَمْڭوَّاذْ نْومْ، أَقَا-ث ذ لْمَاسِيحْ.

‏11 مَاشَا أَمقّْرَانْ نْومْ أَذْ يِيڒِي ذ أَمْسخَّارْ نْومْ. ^▪  

‏12 ونِّي إِ غَا إِسُّوعْڒَانْ إِخفْ نّسْ، أَذْ إِتّْوَاسّمْژِي ؤُ ونِّي إِ غَا إِسّْمژْينْ إِخفْ نّسْ، أَذْ إِتّْوَاسُّوعْڒَا.“ ^▪  

‏13 ”ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، كنِّيوْ ثتّتّمْ ثُوذْرِينْ ن ثِيجَّاڒْ س ضّْذَاقِي إِ ذِي ثْمژّْڒمْ ذِي طّْوعْ ن ثْژَادْجَاثِينْ نْومْ ثِيزِيرَارِينْ. س ؤُينِّي أَذْ ثكْسِيمْ ڒْحُوكْمْ ذ أَمقّْرَانْ. ^▪  

‏14 ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، كنِّيوْ ثتّْبلّْعمْ ثَاڭلْذِيثْ ن ؤُجنَّا إِ إِوْذَانْ، مِينْزِي كنِّيوْ سِيمَانْثْ نْومْ وَارْ ت ثتِّيذْفمْ، ؤُشَا إِنِّي يَارزُّونْ أَذْ د-أَذْفنْ، وَارْ ثنْ ثتّجِّيمْ أَذْ د-أَذْفنْ. ^▪  

‏15 ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، كنِّيوْ ثكّمْ خْ ڒْبَارّْ ؤُ خْ ڒبْحَارْ، حِيمَا أَذْ د-ثَارّمْ إِجّنْ غَارْ وبْرِيذْ نْومْ ؤُ خْمِي إِ كِيذْومْ غَا يِيڒِي، كنِّيوْ ثتَّارَّامْ ث ذ مِّيسْ ن جهنَّامَا ذ أَعفَّانْ مَاهُو كنِّيوْ ثْنَاينْ ن ثْسقَّارْ.

‏16 ؤُشْثْ خَاومْ، أَ كنِّيوْ إِمْڭوَّاذنْ إِذَارْغَاڒنْ، إِنِّي إِقَّارنْ: ’ونِّي إِجِّيدْجنْ غَارْ زَّاوشْثْ ثَامقّْرَانْثْ، أَقَا ثَاجَادْجِيثْ نّسْ وَارْ ثسّكّْوِي وَالُو، مَاشَا ونِّي إِ غَا إِجِّيدْجنْ س وُورغْ ن زَّاوشْثْ ثَامقّْرَانْثْ، أَقَا نتَّا إِقّنْ غَارْ إِڒسْ نّسْ.‘

‏17 أَ إِفْغَاڒْ، أَ إِذَارْغَاڒنْ، مِينْ إِسكّْوَانْ كْثَارْ، ؤُرغْ نِيغْ زَّاوشْثْ ثَامقّْرَانْثْ ثنِّي ثسّْقدّسْ ؤُرغْ.

‏18 ؤُشَا ثقَّارمْ عَاوذْ: ’ونِّي إِجِّيدْجنْ غَارْ ؤُعَالْطَارْ، أَقَا ثَاجَادْجِيثْ نّسْ وَارْ ثْسكّْوِي وَالُو، مَاشَا ونِّي إِ غَا إِجِّيدْجنْ س ثْموْشِي إِ خَاسْ إِمَّارْسنْ، أَقَا نتَّا إِقّنْ غَارْ إِڒسْ نّسْ.‘

‏19 أَ إِفْغَاڒْ، أَ إِذَارْغَاڒنْ، مِينْ إِسكّْوَانْ كْثَارْ، ثَاموْشِي نِيغْ أَعَالْطَارْ ونِّي إِسّْقدّسْ ثَاموْشِي؟ ‏20 وِي إِ غَا إِجَّادْجنْ خنِّي غَارْ ؤُعَالْطَارْ، أَقَا إِجِّيدْجْ غَارْ ؤُعَالْطَارْ ؤُ غَارْ مَارَّا مِينْ خَاسْ إِدْجَانْ. ‏21 ؤُ وِي إِ غَا إِجَّادْجنْ غَارْ زَّاوشْثْ ثَامقّْرَانْثْ، إِجِّيدْجْ غَارسْ ؤُ غَارْ ونِّي ذَايسْ إِزدّْغنْ. ^▪   ‏22 ؤُ وِي إِ غَا إِجَّادْجنْ غَارْ ؤُجنَّا، أَقَا إِجِّيدْجْ غَارْ ڒْعَارْشْ ن أَربِّي ذ ونِّي خَاسْ إِقِّيمنْ. ^▪  

‏23 ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، مِينْزِي كنِّيوْ ثتِّيشمْ ثَاعْشَارْثْ ن نّعْنَاعْ ذ سَّانُودْجْ ذ ڒْشمُّومْ، مَاشَا وَارْ ذ أَومْ إِشْقِي مِينْ إِدْجَانْ ذ أَمقّْرَانْ ذِي شَّارِيعَا، أَقَا ڒْحُوكْمْ ذ أَرّحْمثْ ذ لْ-إِيمَانْ. ثِينَا إِ إِتّْخصَّا أَذْ ثڭّمْ نْهْڒَا مَا أَذْ ثجّمْ ثِينّغْنِي. ^▪   ‏24 أَ إِمْڭوَّاذنْ إِذَارْغَاڒنْ إِنِّي إِفَارّْننْ ثِيزِيثْ، مَاشَا ثسّْغدْجَايمْ أَڒْغمْ.

‏25 ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، مِينْزِي ثسِّيزْذَاڭمْ بَارَّا ن ؤُغَارَّافْ ذ طّبْصِي مَاشَا غَارْ ذَاخڒْ ثشُّورمْ س ثُوشّفّْرَا ذ مِينْ وَارْ إِسڭّْذنْ. ^▪   ‏26 أَ أَفَارِيسِي أَذَارْغَاڒْ، سِيزْذڭْ أَمزْوَارْ ذَاخڒْ ن ؤُغَارَّافْ ذ طّبْصِي، مَاحنْذْ أَذْ يِيڒِي إِزْذِيڭْ ؤُڒَا مِينْ إِدْجَانْ غَارْ بَارَّا نْسنْ. ^▪  

‏27 ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، مِينْزِي ثڭِّيمْ أَمْ إِمضْڒَانْ إِنِّي إِتّْوَاجِييَّارنْ، تّْبَاننْ ذ إِصبْحَاننْ غَارْ بَارَّا، مَاشَا غَارْ ذَاخڒْ أَقَا شُّورنْ س إِخْسَانْ ن ڒْخشْبَاثْ ؤُ س مَارَّا ڒخْمجْ. ^▪   ‏28 أَمنِّي كنِّيوْ عَاوذْ، أَقَا ثضْهَارمْ ذ إِمْسڭَّاذنْ قِيبَاتْشْ إِ إِوْذَانْ، مَاشَا غَارْ ذَاخڒْ أَقَا ثشُّورمْ س ڒْمُوعْصِييّثْ ؤُ س نِّيفَاقْ.

‏29 ؤُشْثْ خَاومْ، أَ كنِّيوْ إِمْسڒْمَاذنْ ن إِذْلِيسنْ ذ إِفَارِيسِييّنْ، كنِّيوْ، أَ إِمْنَافْقنْ، مِينْزِي ثْبنَّامْ إِمضْڒَانْ ن إِنَابِييّنْ ؤُ ثْزوّْقمْ ڒْقُوبَّاثْ ن إِمضْڒَانْ ن إِمْسڭَّاذنْ، ^▪   ‏30 ثقَّارمْ: ’مْڒِي ثُوغَا ندْجْ ذڭْ وُوسَّانْ ن ڒجْذُوذْ نّغْ، أَذْ يِيڒِي وَارْ نْشَارّشْ ذڭْ ؤُسِيزّڒْ ن إِذَامّنْ ن إِنَابِييّنْ.‘ ‏31 س ؤُيَا ثْشهّْذمْ خْ يِيخفْ نْومْ بلِّي كنِّيوْ ذ أَيْثْ ن يِينِّي إِنْغِينْ إِنَابِييّنْ. ^▪   ‏32 إِوَا كمّْڒمْ كنِّيوْ خنِّي ؤُڒَا ڒقْيَاسْ ن مِينْ ڭِّينْ ڒجْذُوذْ نْومْ! ‏33 أَ إِڒفْسَاونْ، ثَارْوَا ن إِفِيغْرَانْ، مَامّشْ إِ غَا ثڭّمْ أَذْ تّْوَاسْنجْممْ زِي ڒْحُوكْمْ ن ثْمسِّي ن جهنَّامَا؟ ^▪   ‏34 س ؤُينِّي خْزَارمْ، نشّْ أَذْ غَارْومْ-د سّكّغْ إِنَابِييّنْ ذ إِمِيغِيسنْ ذ إِمْسڒْمَاذنْ ن إِذْلِيسنْ. شَا زَّايْسنْ أَذْ ثنْ ثنْغمْ، شَا زَّايْسنْ أَذْ ثنْ ثْصلّْبمْ ؤُ شَا زَّايْسنْ أَذْ ثنْ ثْهتّْكمْ س ؤُركُّوضْ ذِي ثمْزِيذَاوِينْ نْومْ ؤُشَا أَذْ خَاسنْ ثَاژّْڒمْ زِي ثنْذِينْثْ غَارْ ثنْذِينْثْ نّغْنِي، ^▪   ‏35 حِيمَا أَذْ خَاومْ إِڒِينْ مَارَّا إِذَامّنْ إِسڭّْذنْ إِ إِسِّيزّْڒنْ خْ ثمُّورْثْ، زڭْ إِذَامّنْ ن هَابِيلْ أَمْسڭَّاذْ أَڒْ إِذَامّنْ ن زَاكَارِييَّا، مِّيسْ ن بِيرِيخْيَا إِ ثنْغِيمْ جَارْ زَّاوشْثْ ثَامقّْرَانْثْ ذ ؤُعَالْطَارْ. ^▪   ‏36 س ثِيذتّْ، نشّْ أَذْ أَومْ إِنِيغْ: مَارَّا ثِيمسْڒَايِينْ-أَ أَذْ د-أَسنْثْ خْ جِّيڒْ-أَ.“

‏37 ”أَ ؤُرْشَالِيمْ، أَ ؤُرْشَالِيمْ، شمْ إِ إِنْغِينْ إِنَابِييّنْ ؤُ إِ إِيَارْجْمنْ إِنِّي ذ أَومْ د-إِتّْوَاسّكّنْ، مشْحَاڒْ ثُوغَا خْسغْ أَذْ سّْمُونغْ ثَارْوَا نّمْ أَمشْنَاوْ إِشْثْ ن ثْيَاژِيضْثْ ثڭَّا إِفِيدْجُوسنْ نّسْ سَاذُو أَفْرِيونْ نّسْ، مَاشَا كنِّيوْ ثُوغَا وَارْ ثتّخْسمْ. ^▪   ‏38 خْزَارْ، ثَادَّارْثْ نْومْ أَذْ ثتّْوَاجّْ إِ شمْ ذ ڒْخَارْبثْ، ^▪   ‏39 مِينْزِي نشّْ أَذْ أَومْ إِنِيغْ: كنِّيوْ وَارْ ذ أَيِي ثْژَارّمْ أَڒْ غَا ثِينِيمْ: ’ذ أَمِيمُونْ ونِّي إِ د-يُوسِينْ س يِيسمْ ن سِيذِي.‘ “ ^▪