‏1 إِسّوْجذْ سِيذِي إِجّْ ن وسْڒمْ أَمقّْرَانْ حِيمَا أَذْ إِسّغْرِي يُونُوسْ ؤُشَا يُونُوسْ إِكَّا ثْڒَاثَا ن وُوسَّانْ ذ ثْڒَاثَا نْ دْجِييَاڒِي ذڭْ ؤُعذِّيسْ ن وسْڒمْ. ^▪   ‏2 ؤُشَا إِژُّودْجْ يُونُوسْ إِ سِيذِي، أَربِّي نّسْ، زڭْ ؤُعذِّيسْ ن وسْڒمْ. ‏3 إِنَّا:

“زِي ڒحْصَارثْ إِنُو ڒَاغِيغْ إِ سِيذِي

ؤُ نتَّا يَارَّا-د خَافِي.

زڭْ وحْوِيشْ ن ڒَاخَارْثْ ڒَاغِيغْ ؤُشَا شكْ ثسْڒِيذْ إِ ثْمِيجَّا إِنُو. ^▪  

‏4 ثُوغَا ثنْضَارذْ أَيِي ذِي ڒَادْجَاغْ،

ذڭْ وُوڒْ ن ڒبْحُورْ،

ثنّْضنْ أَيِي-د ڒمْوَاجْ.

مَارَّا زّْهِيرْ نّكْ ذ ڒمْوَاجْ نّكْ كِّينْ-د خَافِي سنّجْ. ^▪  

‏5 نِّيغْ: ’نشّْ تّْوَاسُوفّْغغْ زِي زَّاثْ إِ وُوذمْ نّكْ،

إِڒِي أَذْ ثْوَاڒِيغْ عَاوذْ زَّاوشْثْ نّكْ ثَامقّْرَانْثْ إِقدّْسنْ.‘

‏6 طّْفنْ أَيِي وَامَانْ أَڒْ مَانِي إِوْضنْ غَارْ ڒعْمَارْ إِنُو،

أَمَانْ ن ڒَادْجَاغْ نّْضنْ أَيِي-د، إِڒْصقْ-د أَرّْبِيعْ ن ڒبْحَارْ ذڭْ ؤُزدْجِيفْ إِنُو.

‏7 هْوِيغْ غَارْ إِزُورَانْ ن إِذُورَارْ،

تّْوَابلّْعنْ زّكْرُونَاثْ ن ثمُّورْثْ خَافِي سنّجْ إِ ڒبْذَا،

مَاشَا شكْ ثسّْڭعّْذذْ ثُوذَارْثْ إِنُو زڭْ وحْفُورْ،

أَ سِيذِي، أَربِّي إِنُو!

‏8 ؤُمِي إِذوّخْ ڒعْمَارْ إِنُو ذَايِي، فكَّارغْ ذِي سِيذِي،

ؤُ ثَاژَادْجِيثْ إِنُو ثْڭعّذْ غَاركْ، ذِي زَّاوشْثْ نّكْ ثَامقّْرَانْثْ إِقدّْسنْ. ^▫  

‏9 إِنِّي إِطّْفنْ ذڭْ إِخَارِّيقنْ إِخْوَانْ،

سمْحنْ ذِي ثْمخْسِيوْثْ نْسنْ إِشوَّارنْ.

‏10 مَاشَا نشّْ أَذْ شكْ حمْذغْ س يِيشْثْ ن ثْمِيجَّا ثشُّورْ س ؤُقَاذِي.

مِينْ شكْ وَاعْذغْ، أَذْ ث قفْڒغْ.

أَسنْجمْ زِي سِيذِي.“ ^▪  

‏11 إِسِّيوڒْ سِيذِي أَكْ-ذ وسْڒمْ ؤُشَا إِعُوقّْ-د يُونُوسْ ذِي ڒْبَارْ.