عُوبَاذْيَا
أَوَاڒْ خْ إِذُومْ
1
1 ثَامژْرَا ن عُوبَاذْيَا. ”أَمُّو إِ إِقَّارْ سِيذِي إِنُو، سِيذِي، خْ إِذُومْ:
’نشِّينْ نسْڒَا إِجّْ ن ڒخْبَارْ زِي سِيذِي،
ؤُ إِجّْ ن ؤُمْسكِّي إِتّْوَاسّكّْ غَارْ ڒڭْنُوسْ:
كَّارْ، جّمْ أَنغْ أَذْ خَاسْ نْغوّغْ، أَذْ نمْنغْ أَكِيذسْ!‘
2 خْزَارْ، نشّْ ڭِّيغْ شكْ ذ أَمژْيَانْ جَارْ ڒڭْنُوسْ،
شكْ ثتّْوَاسحْقَارذْ أَطَّاسْ.
3 نّْفَاخثْ ن وُوڒْ نّكْ ثشْمثْ إِ شكْ،
شكْ ذ ونِّي ذِينْ إِزدّْغنْ ذڭْ إِمُوشَانْ ن ؤُذُورِّي جَارْ ثْصُوضَارْ،
ذِي ثْزذِّيغْثْ نّكْ يُوعْڒَانْ،
شكْ ذ ونِّي إِقَّارنْ ذڭْ وُوڒْ نّكْ:
’مَانْ ونْ ذ أَيِي غَا إِغضْڒنْ غَارْ ثمُّورْثْ؟‘
4 مَاڒَا ثسّْڭعّْذذْ إِخفْ نّكْ أَمْ ؤُڭِيذرْ،
نِيغْ ثڭِّيذْ ڒْعُوشّْ نّكْ جَارْ إِثْرَانْ،
نشّْ أَذْ شكْ د سّنِّي سّهْوِيغْ،
أَمُّو إِ إِقَّارْ سِيذِي.“ ▪
5 ”مَاڒَا ؤُذْفنْ-د غَاركْ إِشفَّارنْ،
نِيغْ إِخوَّاننْ س دْجِيڒثْ،
مِينْ إِمْسَارنْ أَڒَامِي شكْ سّْبكَّامنْ!
مَا وَارْ تَّاشَارنْ أَڒْ غَارْسنْ إِ غَا يِيڒِي مِينْ إِكْفَانْ؟
مَاڒَا ؤُسِينْ-د غَاركْ إِنِّي إِ غَا إِڒقْضنْ أَضِيڒْ،
مَا أَذْ جّنْ شَا مِينْ إِتّْوَاڒقْضنْ أَوَارْنِي أَسنْ؟ ▪
6 مَامّشْ إِ غَا أَرْزُونْ ذِي عِيسُو،
مَامّشْ إِ غَا بقّْشنْ ڒكْنُوزْ نّسْ إِنُّوفَارنْ!
7 مَارَّا إِرْيَازنْ نِّي إِڭِّينْ إِجّْ ن ڒْعَاهْذْ أَكِيذكْ،
عَارْننْ شكْ غَارْ ويْمِيرْ،
إِرْيَازنْ نِّي ثُوغَا أَكِيذكْ إِدَّارنْ ذِي ڒهْنَا، شمْثنْ شكْ،
نِيثْنِي زمَّارنْ خَاكْ،
إِرْيَازنْ نِّي إِشِّينْ أَغْرُومْ أَكِيذكْ،
أَقَا نِيثْنِي ڭِّينْ إِجّْ ن ؤُيزِّيمْ سْوَادَّايْ نّكْ.
’أَقَا نتَّا وَارْ ذَايسْ بُو ڒفْهَامثْ.‘ ▫
8 مَا وَارْ إِتِّيڒِي ذڭْ وَاسّْ نِّي، إِنَّا سِيذِي،
أَقَا نشّْ أَذْ أَردّْدْجغْ إِمِيغِيسنْ زِي إِذُومْ،
ؤُ ڒفْهَامثْ زڭْ إِذُورَارْ ن عِيسُو؟ ▪
9 ؤُڒَا ذ أَيْثْ ن بُو-ثغْرُوضْثْ نّكْ أَذْ تّْوَاحْصَارنْ زِي ثِيڭّْوُوذِي، أَ ثَايْمَانْ،
حِيمَا كُوڒْ إِجّنْ زڭْ إِذُورَارْ ن عِيسُو
أَذْ إِتّْوَاقْضعْ س ونْغَايْ.“ ▪
10 ”زِي سِّيبّثْ ن لْعُونْفْ خْ ؤُمَاشْ يَاعْقُوبْ،
أَذْ شكْ ثْذڒْ ڒفْضِيحثْ،
ؤُ أَذْ ثتّْوَاكّْسذْ إِ ڒبْذَا. ▪
11 ذڭْ وَاسّْ إِ ذِي ثُوغَا خَاسْ ثْبدّذْ،
ذڭْ وَاسّْ إِ ذِي إِبَارَّانِييّنْ إِوْينْ-د ڒْعسْكَارْ نّسْ غَارْ ثْمحْبَاسْثْ
ؤُ ؤُذْفنْ ڒْبَارَّانِي غَارْ ثوُّورَا نّسْ،
ؤُ نْضَارنْ ثَاقدُّوحْثْ خْ ؤُرْشَالِيمْ،
ثُوغَا شكْ أَمْ يِيجّنْ زَّايْسنْ. ▪
12 وَارْ ذ أَشْ إِعدّڒْ أَذْ ثقِّيمذْ ثْخزَّارذْ ذڭْ وَاسّْ ن ؤُمَاشْ،
ذڭْ وَاسّْ ن وشْثَابْ نّسْ أَبَارْشَانْ،
وَارْ ثزْمِيرذْ أَقَا ثْفَارْحذْ خْ إِحنْجِيرنْ ن يَاهُوذَا،
ذڭْ وَاسّْ ن وَاردّدْجْ نْسنْ
ؤُ وَارْ ثزْمِيرذْ أَذْ ثَارزْمذْ أَقمُّومْ نّكْ أَطَّاسْ
ذڭْ وَاسّْ ن ڒحْصَارثْ،
13 وَارْ ثزْمِيرذْ أَذْ ثَاذْفذْ غَارْ ثوَّارْثْ نْ ڒْڭنْسْ إِنُو
ذڭْ وَاسّْ ن ؤُهلّكْ نْسنْ
وَارْ ذ أَشْ إِعدّڒْ أَذْ ثقِّيمذْ ثْخزَّارذْ عَاوذْ
ذڭْ وَاسّْ ن ؤُضيّعْ نْسنْ
ؤُ وَارْ ثزْمِيرذْ أَذْ ثسّْوِيژّْضذْ إِفَاسّنْ نّكْ غَارْ وَاڭْڒَا نّسْ
ذڭْ وَاسّْ ن ؤُضيّعْ نّسْ،
14 وَارْ ثزْمِيرذْ أَذْ ثْبدّذْ غَارْ مَانِي تّْمڒْقَانْ إِبْرِيذنْ،
مَاحنْذْ أَذْ ثتّحِّيذْ إِنِّي يَاروْڒنْ
ؤُ وَارْ ثزْمِيرذْ أَذْ ثْسلّْمذْ إِنِّي ثُوغَا إِقِّيمنْ دَّارنْ
ذڭْ وَاسّْ ن ڒحْصَارثْ.“
15 ”مَاغَارْ يُوذسْ-د أَسّْ ن سِيذِي خْ مَارَّا ڒڭْنُوسْ!
أَمْ ثڭِّيذْ شكْ، أَذْ زَّايكْ إِتّْوَاڭّْ،
أَخدْجصْ نّكْ أَذْ د-إِذْوڒْ خْ ؤُزدْجِيفْ نّكْ. ▪
16 مَاغَارْ أَمْ مَامّشْ ثسْوِيمْ كنِّيوْ خْ وذْرَارْ إِنُو إِقدّْسنْ،
أَمُّو أَذْ سْونْ مَارَّا ڒڭْنُوسْ ڒبْذَا،
وَاهْ، أَذْ سْونْ أَذْ سكّْفنْ،
أَذْ ذوْڒنْ أَخْمِي عمَّارْصْ وَارْ ثُوغَا دْجَانْ.
17 مَاشَا خْ وذْرَارْ ن صِيهْيُونْ أَذْ يِيڒِي مِينْ إِنّجْمنْ،
ؤُ وَانِيثَا أَذْ يِيڒِي ذ أَمْقدّسْ،
ؤُ إِنِّي ن ثَادَّارْثْ ن يَاعْقُوبْ أَذْ طّْفنْ ثِيسقَّاڒْ نْ ڒْوَارْثْ نْسنْ.
18 ثَادَّارْثْ ن يَاعْقُوبْ أَذْ ثِيڒِي ذ ثِيمسِّي،
ؤُ ثَادَّارْثْ ن يُوسُوفْ ذ أَشعَّاڒْ،
ؤُشَا ثَادَّارْثْ ن عِيسُو أَذْ ثِيڒِي أَمْ إِغدْجْ
ؤُ نِيثْنِي أَذْ أَسنْ سّْشمْضنْ ؤُ أَذْ ثنْ شّنْ،
أَڒَامِي وَارْ إِقِّيمْ ؤُڒَا ذ إِجّْ إِدَّارْ ذِي ثَادَّارْثْ ن عِيسُو،
مَاغَارْ سِيذِي أَقَا إِسِّيوڒْ.“
19 ”إِنِّي ن ثمُّورْثْ ن لْجَانُوبْ أَذْ طّْفنْ إِذُورَارْ نْ عِيسُو ذ ثَاسْغَارْثْ،
ؤُ ينِّي ن ثمُّورْثْ إِوَاطَانْ أَذْ طّْفنْ ثَامُّورْثْ ن إِفِيلِيسْطِينِييّنْ ذ ڒْوَارْثْ
وَاهْ، نِيثْنِي أَذْ طّْفنْ إِيَّارْ ن إِفْرَايِيمْ ذ ييَّارْ ن سَامَارْيَا ذ ڒْوَارْثْ،
ؤُ بِينْيَامِينْ أَذْ إِطّفْ جِيلْعَاذْ ذ ڒْوَارْثْ،
20 ؤُ إِمنْفِييّنْ زِي ڒْعسْكَارْ-أَ ن أَيْثْ ن إِسْرَائِيل
أَذْ طّْفنْ ثَامُّورْثْ ن إِكنْعَانِييّنْ ذ ڒْوَارْثْ أَڒْ صَارْفَاثْ،
ؤُ إِمنْفِييّنْ زِي ؤُرْشَالِيمْ نِّي إِدْجَانْ ذِي صَافَارَاذْ،
أَذْ طّْفنْ ثِيندَّامْ ن ثمُّورْثْ ن لْجَانُوبْ ذ ڒْوَارْثْ. ▫
21 إِمْسنْجَامنْ أَذْ ڭعّْذنْ أَذْرَارْ ن صِيهْيُونْ،
حِيمَا أَذْ حَاكْمنْ أَذْرَارْ ن عِيسُو،
ؤُشَا ثَاڭلْذَا أَذْ ثِيڒِي ن سِيذِي.“