‏1 ”سْڒمْ أَوَاڒْ-أَ إِ كِيذْومْ إِسَّاوَاڒْ سِيذِي، أَ أَيْثْ ن إِسْرَائِيل، أَكْ-ذ كُوڒْ ڒَادْجْ نِّي سّْڭعّْذغْ نشّْ زِي ثمُّورْثْ ن مِيصْرَا أَمْ قَّارغْ: ‏2 زِي مَارَّا ثِيقبَّاڒْ ن دُّونشْثْ سّْنغْ مْغِيرْ كنِّيوْ. س ؤُيَا أَذْ كنِّيوْ عَاقْبغْ خْ مَارَّا ڒْمُوعْصِييَّاثْ نْومْ!

‏3 مَا أَذْ ؤُيُورنْ ثْنَاينْ أَكْ-ذ وَايَاوْيَا، بْڒَا مَا تَّافْقنْ؟

‏4 مَا أَذْ إِزهَّارْ وَايْرَاذْ ذڭْ وزْغَارْ ڒَامِي وَارْ غَارسْ بُو زَّارْذثْ؟

مَا أَيْرَاذْ ذ أَمژْيَانْ أَذْ يجّْ ثْمِيجَّا نّسْ أَذْ ثتّْوَاسڒْ زڭْ يفْرِي، أَمْ وَارْ إِمْنِيعْ وَالُو؟ ^▫  

‏5 مَا أَذْ إِنْضَارْ وجْضِيضْ ذِي ڒْفخْ خْ وُوذمْ ن ثمُّورْثْ، مَاڒَا وَارْ ذِينْ ڒْفخْ إِ نتَّا؟

مَا أَذْ إِنُّورْفعْ ڒْفخْ زِي ثمُّورْثْ مَاڒَا ثخْوَا؟

‏6 مَاڒَا حذْ إِصُوضْ ذڭْ ؤُيِيشّْ ن إِشَارِّي ذِي ثنْذِينْثْ، مَا وَارْ إِتَّارْجِيجِي ڒْڭنْسْ؟

مَاڒَا ثمْسَارْ ثُوعفّْنَا ذِي ثنْذِينْثْ، مَا وَارْ ت إِڭِّي سِيذِي؟ ^▪  

‏7 مَاغَارْ سِيذِي إِنُو، سِيذِي، وَارْ إِتّڭّْ ؤُڒَا ذ إِشْثْ نْ ڒْحَاجثْ بْڒَا مَا أَذْ إِسَّارْڭبْ شّْوَارْ نّسْ إِنُّوفَّارنْ إِ إِمْسخَّارنْ نّسْ، إِنَابِييّنْ.

‏8 أَيْرَاذْ إِزهَّارْ، مَانْ ونْ وَارْ إِتّڭّْوْذنْ؟

سِيذِي إِنُو، سِيذِي، أَقَا إِسِّيوڒْ، مَانْ ونْ وَارْ إِتّْنبَّا؟“

‏9 ”جّمْ أَذْ إِتّْوَاسڒْ أَيَا ذِي ڒقْصُورْ ذِي أَشْذُوذْ ؤُ ذِي ڒقْصُورْ ن ثمُّورْثْ ن مِيصْرَا، إِنِي: ’مُونمْ خْ إِذُورَارْ ن سَامَارْيَا ؤُ خْزَارمْ أَنهْوڒْ أَمقّْرَانْ ذِي ڒْوسْثْ نّسْ ؤُ إِنِّي ذَايسْ إِتّْوَاحْصَارنْ!‘

‏10 نِيثْنِي وَارْ سِّيننْ مَامّشْ إِ غَا ڭّنْ مِينْ إِسڭّْذنْ، إِقَّارْ سِيذِي، نِيثْنِي إِنِّي إِيَارّْونْ لْعُونْفْ ذ ثْكشَّاضْثْ ذِي ڒقْصُورْ نْسنْ.

‏11 س ؤُيَا، أَمُّو إِ إِقَّارْ سِيذِي إِنُو، سِيذِي: إِجّْ ن ڒعْذُو! نتَّا إِتّنّضْ إِ ثمُّورْثْ مَارَّا ! أَذْ إِسّهْوَا جّهْذْ نّمْ ؤُ ڒقْصُورْ نّمْ أَذْ تّْوَاكشّْضنْ.

‏12 أَمُّو إِ إِقَّارْ سِيذِي: أَمْ إِفكّْ إِجّْ ن ؤُمكْسَاوْ ثْنَاينْ ن إِضَارنْ نِيغْ إِجّْ ن يِيخفْ ن ؤُمزُّوغْ زڭْ ؤُقمُّومْ ن وَايْرَاذْ، أَمُّو إِ غَا تّْوَاسْنجْمنْ أَيْثْ ن إِسْرَائِيل، إِنِّي إِ ذِينْ إِتّْغِيمَانْ ذِي سَامَارْيَا خْ ثغْمَارْثْ ن قَامَا ؤُ خْ يِيشْثْ ن ثْزرْبِييّثْ زِي ذِيمَاشْقْ ڭِّينْ ت خْ يِيشْثْ ن ڒمْطَارْبثْ.“

‏13 ”سْڒمْ ؤُ شهْذمْ ذِي ثَادَّارْثْ ن يَاعْقُوبْ، أَمُّو إِ إِقَّارْ سِيذِي إِنُو سِيذِي، أَربِّي ن ڒْعسْكَارَاثْ.

‏14 مِينْزِي ذڭْ وَاسّْ نِّي ذِي غَا خڒْفغْ إِخطَّانْ ن إِسْرَائِيل، أَذْ سِّيوْضغْ عَاوذْ أَخدْجصْ خْ إِعَالْطَارنْ ن بَايْثْ-إِلْ ؤُ أَذْ تّْوَاقضْعنْ وَاشَّاونْ ن ؤُعَالْطَارْ، أَذْ وْضَانْ غَارْ ثمُّورْثْ.

‏15 نشّْ أَذْ هذْمغْ ثَازذِّيغْثْ ن ثْڭَارْسْثْ ذ ثْزذِّيغْثْ ن ؤُنبْذُو ؤُ ثُوذْرِينْ ن ڒْعَاجْ أَذْ تّْوَاقْضَانْثْ، ؤُ أَطَّاسْ ن ثُوذْرِينْ أَذْ تّْوَارذْدْجنْثْ، أَمُّو إِ إِقَّارْ سِيذِي.“ ^▫