2
1 ”أَمُّو إِ إِنَّا سِيذِي: خْ ثْڒَاثَا نِيغْ أَربْعَا ن إِخطَّانْ إِ إِڭَّا مُوآبَ، وَارْ ث سّْبطَّاڒغْ، مِينْزِي نِيثْنِي سّْشمْضنْ إِيْسَانْ ن ؤُجدْجِيذْ ن إِذُومْ أَڒَامِي ذوْڒنْ ذ جِّيرْ. 2 نشّْ أَذْ سّكّغْ ثِيمسِّي ذِي مُوآبَ، أَذْ ثشّْ ڒقْصُورْ ن قَارْيُوثْ. مُوآبَ أَذْ إِمّثْ س دّْرِيزْ أَمقّْرَانْ، س وسْرُودّحْ ن ڒْغَايْطَاثْ، ؤُ س ڒْحسّْ نْ ؤُصُوضِي ذڭْ ؤُيِيشّْ ن إِشَارِّي. 3 نشّْ أَذْ ثحِّيغْ ڒْقَاضِي زِي ڒْوسْثْ نّسْ ؤُ أَذْ نْغغْ مَارَّا ڒْحُوكَّامْ نّسْ أَكِيذسْ، إِقَّارْ سِيذِي.“ 4 ”أَمُّو إِ إِنَّا سِيذِي: خْ ثْڒَاثَا نِيغْ أَربْعَا ن إِخطَّانْ إِ إِڭَّا يَاهُوذَا، وَارْ ث سّْبطَّاڒغْ، مِينْزِي نِيثْنِي وَارْ قْبِيڒنْ شَّارِيعَا ن سِيذِي ؤُ وَارْ طِّيفنْ ذِي ثْوصَّا إِنُو ؤُ مِينْزِي إِربِّيثنْ نْسنْ ن إِخَارِّيقنْ، إِنِّي ضْفَارنْ إِبَابَاثنْ نْسنْ، أَرِّينْ ثنْ ودَّارنْ. 5 نشّْ أَذْ سّكّغْ ثِيمسِّي ذِي يَاهُوذَا، أَذْ ثشّْ ڒقْصُورْ ن ؤُرْشَالِيمْ.“
6 ”أَمُّو إِ إِنَّا سِيذِي: خْ ثْڒَاثَا نِيغْ أَربْعَا ن إِخطَّانْ إِ إِڭَّا إِسْرَايِيلْ، وَارْ ث سّْبطَّاڒغْ، مِينْزِي نِيثْنِي زّنْزنْ أَمْسڭّذْ س ثْمنْيَاثْ ن نُّوقَارْثْ ؤُ أَمزْڒُوضْ إِ ثْيُويَا ن سَانْذَالِييَاثْ. 7 نِيثْنِي ثشْضِيضِيحنْ غَارْ ثْعجَّاجْثْ خْ ؤُزدْجِيفْ ن إِمُوقْڒِيڒنْ ؤُ نِيثْنِي تّْبلَّاعنْ أَبْرِيذْ ن إِمْوَاضْعنْ بْڒَا سِّيبّثْ. أَرْيَازْ ذ بَابَا أَسْ رُوحنْ غَارْ ثحْرَامْثْ ذ إِشْثْ حِيمَا أَذْ فضْحنْ إِسمْ إِنُو إِقدّْسنْ. 8 نِيثْنِي سّْوَاژَّاضنْ إِخفْ نْسنْ زَّاثْ مْكُوڒْ أَعَالْطَارْ خْ وَارُّوضْ إِ د-إِتّْوَارهْننْ ؤُ ذِي ثَادَّارْثْ ن أَربِّي نْسنْ سسّنْ بِينُو سَّاغنْ ث س ثْمنْيَاثْ ن يِينِّي خْ إِتّْوَاڭّْ مُولْثَا. 9 ذ نشّْ إِ ثُوغَا ذِينْ ثحِّيغْ إِمُورِييّنْ زَّاثْ إِ ؤُغمْپُوبْ نْسنْ، إِنِّي ثُوغَا يُوعْڒَانْ أَمْ ثْنڭْلِينْ يُوعْڒَانْ ؤُ جهّْذنْ أَمْ ثْشجِّيرَا ن ڒْبدْجُوضْ. نشّْ ثحِّيغْ ڒْغِيدْجثْ نّسْ سنّجْ ؤُ إِژوْرَانْ نّسْ سْوَادَّايْ. ▪
10 ذ نشّْ إِ ثُوغَا كنِّيوْ إِ د-إِسّْڭعّْذنْ زِي مِيصْرَا ؤُ أَرِّيغْ كنِّيوْ ثُويُورمْ أَربْعِينْ ن إِسڭّْوُوسَا ذِي ڒخْڒَا، مَاحنْذْ أَذْ ثطّْفمْ ثَامُّورْثْ ن إِمُورِييّنْ ذ ڒْوَارْثْ. ▪
11 زڭْ إِحنْجِيرنْ نْومْ أَرِّيغْ زَّايْسنْ إِنَابِييّنْ ؤُ زڭْ إِحُوذْرِييّنْ نْومْ أَرِّيغْ زَّايْسنْ إِنِّي إِعزّْڒنْ إِخفْ نْسنْ س إِشْثْ ن ثمْرِيسْثْ. مَا وَارْ إِدْجِي أَمنِّي، أَ أَيْثْ ن إِسْرَائِيل؟!، أَمُّو إِ إِقَّارْ سِيذِي.
12 كنِّيوْ مَاشَا ثَارِّيمْ إِنِّي إِعزّْڒَانْ إِخفْ نْسنْ س إِشْثْ ن ثمْرِيسْثْ ن ؤُشوَّافْ أَذْ سْونْ بِينُو ؤُ كنِّيوْ ثْوصَّامْ إِنَابِييّنْ، ثنَّامْ: ’كنِّيوْ وَارْ غَارْومْ بُو تّسْرِيحْ حِيمَا أَذْ ثْنبَّامْ!‘ ▪
13 خْزَارْ، نشّْ أَذْ أَومْ عبّْزغْ سْوَادَّايْ أَمْ إِشْثْ ن ثْكَارُّوثْ ثشُّورْ س ثْقبِّيضِينْ ن إِمنْذِي ثْعبّزْ ثِيجَارَّارِينْ نّسْ ذِي ثمُّورْثْ سْوَادَّايْ.
14 أَقَا صَافِي ثَاروْڒَا إِ ونِّي إِفْسُوسنْ، ؤُ ونِّي إِجهْذنْ وَارْ إِزمَّارْ أَذْ إِحْضَا جّهْذْ نّسْ ؤُ بُو-ثغْڒُوضْثْ وَارْ إِزمَّارْ أَذْ إِسّنْجمْ ثُوذَارْثْ نّسْ.
15 ونِّي إِطّْفنْ ذِي ڒْقوْسْ، وَارْ إِتّْغِيمِي إِبدّْ، ؤُ ونِّي إِتَّازّْڒنْ، وَارْ إِنجّمْ، ؤُ ونِّي إِندّْهنْ أَيِيسْ، وَارْ إِزمَّارْ أَذْ إِسّنْجمْ ڒعْمَارْ نّسْ.
16 ونِّي إِزعّْمنْ قَاعْ جَارْ أَيْثْ ن بُو-ثغْرُوضْثْ أَذْ يَارْوڒْ ذ أَعَارْيَانْ ذڭْ وَاسّْ نِّي، أَمُّو إِ إِقَّارْ سِيذِي.“