‏1 يُوسَا-د غَارِي وَاوَاڒْ ن سِيذِي ذڭْ ؤُسڭّْوَاسْ وِيسّْ عشْرَا، ذڭْ ؤُيُورْ وِيسّْ عشْرَا، خْ وَاسّْ وِيسّْ ثنْعَاشْ ن ؤُيُورْ، إِنَّا:

‏2 ”أَ مِّيسْ ن بْنَاذمْ، أَرّْ ؤُذمْ نّكْ غَارْ فِيرْعُونْ، أَجدْجِيذْ ن مِيصْرَا ؤُشَا نَابّْ خَاسْ ؤُ خْ مَارَّا ثَامُّورْثْ ن مِيصْرَا. ‏3 سِيوڒْ، إِنِي: ’أَمُّو إِ إِقَّارْ سِيذِي إِنُو، سِيذِي:

خْزَارْ، نشّْ ضِيدّْ نّكْ، أَ فِيرْعُونْ، أَجدْجِيذْ ن مِيصْرَا،

شكْ ذ ڒْهَايْشثْ نِّي إِزّْڒنْ ذِي ڒْوسْثْ ن إِغزْرَانْ نّسْ،

ثنِّي إِقَّارنْ: إِغْزَارْ إِنُو،

نشّْ ڭِّيغْ ث إِ يِيخفْ إِنُو! ^▪  

‏4 نشّْ أَذْ ڭّغْ ثِيسنَّارِينْ ذڭْ ؤُغسْمَارْ نّكْ،

أَذْ سّْڒسْقغْ إِسڒْمَانْ ن إِغزْرَانْ نّكْ غَارْ ثقْشُورِينْ نّكْ.

أَذْ شكْ د-جبْذغْ زِي ڒْوسْثْ ن إِغزْرَانْ نّكْ،

ؤُشَا مَارَّا إِسڒْمَانْ ن إِغزْرَانْ نّكْ أَذْ ڒسْقنْ غَارْ ثقْشُورِينْ نّكْ.

‏5 نشّْ أَذْ شكْ نْضَارغْ بَارَّا ذِي ڒخْڒَا،

شكْ ذ مَارَّا إِسڒْمَانْ ن إِغزْرَانْ نّكْ.

خْ وُوذمْ ن ييَّارْ أَذْ ثوْضِيذْ.

وَارْ ذِينْ ونِّي شكْ إِ غَا يَاوْينْ نِيغْ شكْ إِ غَا إِطّْفنْ.

نشّْ أَذْ شكْ وْشغْ أَمشْنَاوْ مَاشَّا إِ ڒوْحُوشْ ن ثمُّورْثْ

ؤُ إِ إِجْضَاضْ ن ؤُجنَّا.

‏6 مَارَّا إِمزْذَاغْ ن مِيصْرَا أَذْ سّْننْ

بلِّي نشّْ ذ سِيذِي،

مَاغَارْ نِيثْنِي ثُوغَا أَثنْ ذ أَزدْجَاضْ ن ؤُغَانِيمْ إِ

خْ ثُوغَا ثْسنّذْ ثَادَّارْثْ ن إِسْرَائِيل. ^▪  

‏7 مَاڒَا نِيثْنِي كْسِينْ شكْ س ؤُفُوسْ نّكْ،

ثْفدْجْقذْ ؤُشَا ثسّْنُوقّْبذْ غَارْسنْ ثِيغَارْضِينْ نْسنْ مَارَّا،

ؤُ مَاڒَا خَاكْ سّنْذنْ،

ثَارْژِيذْ ؤُشَا ثسَّارْجِيجذْ ثِيجْعِينَّاثِينْ نْسنْ مَارَّا.‘ “

‏8 ”س ؤُيَا، أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ خَاكْ سّعْذُوغْ سِّيفْ ؤُشَا أَذْ قسّغْ زَّايكْ بْنَاذمْ ذ ڒْمَاڒْ. ‏9 ثَامُّورْثْ ن مِيصْرَا أَذْ ثذْوڒْ إِ ؤُردّدْجْ ؤُ إِ ڒْخَارْبثْ ؤُشَا نِيثْنِي أَذْ سّْننْ بلِّي نشّْ ذ سِيذِي، مِينْزِي نتَّا إِنَّا: ’إِغْزَارْ إِنُو ؤُ نشّْ ڭِّيغْ ث!‘ “

‏10 ”س ؤُيَا، خْزَارْ، نشّْ خَاكْ ؤُ خْ إِغزْرَانْ نّكْ ؤُ نشّْ أَذْ ڭّغْ ثَامُّورْثْ ن مِيصْرَا ذ ڒخْرَابِي، وَاهْ إِشْثْ نْ ڒْخِيرْبثْ ن وَاردّدْجْ، زِي مَاجْذَالْ أَڒْ أَسْوَانْ، أَڒْ أَيْمِيرْ ن ثمُّورْثْ ن كُوشْ.

‏11 ؤُڒَا ذ إِجّْ ن بْنَاذمْ وَارْ زَّايسْ إِژكّْوِي خْ ؤُضَارْ، ؤُ ؤُڒَا ذ إِجّْ ن ؤُضَارْ ن ڒْمَاڒْ أَذْ خَاسْ إِژْوَا. وَارْ ذَايكْ تِّيڒِينْ إِمزْضَاغْ إِ يِيجّْ ن ڒْمِيجَارْ ن أَربْعِينْ ن إِسڭّْوُوسَا.

‏12 مِينْزِي نشّْ أَذْ ڭّغْ ثَامُّورْثْ ن مِيصْڒَا ذ أَردّدْجْ ذِي ڒْوسْثْ ن ثمُّورَا تّْوَارذْدْجنْثْ ؤُشَا ثِيندَّامْ أَذْ إِڒِينْثْ ذ أَردّدْجْ ذِي ڒْوسْثْ ن ثْندَّامْ نّغْنِي نِّي إِذوْڒنْ ذ ڒْخِيرْبَاثْ، ڒْمِيجَارْ ن أَربْعِينْ ن إِسڭّْوُوسَا، ؤُ نشّْ أَذْ سُّويْسغْ إِمِيصْرِييّنْ جَارْ ڒڭْنُوسْ ؤُشَا أَذْ ثنْ بزّْعغْ خْ ثمُّورَا.“

‏13 ”مَاشَا أَمُّو إِ إِقَّارْ سِيذِي إِنُو، سِيذِي: أَوَارْنِي ڒَامِي إِ غَا عْذُونْ أَربْعِينْ ن إِسڭّْوُوسَا نشّْ أَذْ سّْمُونغْ إِمِيصْرِييّنْ زِي ڒڭْنُوسْ نِّي مَانِي ثُوغَا تّْوَابزّْعنْ.

‏14 نشّْ أَذْ بدّْڒغْ ثَامحْبَاسْثْ ن إِمِيصْرِييّنْ ؤُشَا أَذْ ثنْ سّْعقْبغْ ذِي ثمُّورْثْ ن فَاثْرُوسْ، ذِي ثمُّورْثْ إِ زَّايسْ د-إِفّْغنْ، ؤُشَا ذِينِّي أَذْ إِڒِينْ ذ إِشْثْ ن ثْڭلْذِيثْ ثَامعْنَانُوشْثْ.

‏15 أَذْ ثِيڒِي ذ ثَامعْنَانُوشْثْ زِي ثْڭلْذَاثِينْ نّغْنِي ؤُ وَارْ ثسّْڭعَّاذْ إِخفْ نّسْ عَاذْ خْ ڒڭْنُوسْ، مِينْزِي نشّْ أَذْ ثنْ سّْمژْيغْ أَڒَامِي وَارْ تّْصلّْطنْ عَاذْ خْ ڒڭْنُوسْ.

‏16 وَارْ ثتِّيڒِي عَاذْ إِ ثَادَّارْثْ ن إِسْرَائِيل ذ أَثشْڒِي نِّي ثنْ إِ غَا إِسِّيذَارْ ڒْمُوعْصِييّثْ، ڒَامِي ذوْڒنْ غَارْسنْ، ضفَّارنْ ثنْ. نِيثْنِي أَذْ سّْننْ بلِّي نشّْ ذ سِيذِي، ذ سِيذِي إِ دْجِيغْ.“ ^▪  

‏17 إِمْسَارْ ذڭْ ؤُسڭّْوَاسْ وِيسّْ سبْعَا ؤُ-عِيشْرِينْ، ذڭْ ؤُيُورْ وِيسّْ أَمزْوَارُو، ذڭْ وَاسّْ أَمزْوَارُو ن ؤُيُورْ، أَقَا يُوسَا-د غَارِي وَاوَاڒْ ن سِيذِي، إِنَّا:

‏18 ”أَ مِّيسْ ن بْنَاذمْ، نَاپُوخَاذْرَاصَّارْ، أَجدْجِيذْ ن بَابِيلْ، يَارَّا ڒْعسْكَارْ نّسْ أَذْ يڭّْ إِشْثْ ن ڒْخذْمثْ ثَامقّْرَانْثْ ضِيدّْ إِ صُورْ. مَارَّا أَزدْجِيفْ إِقِّيمْ ذ أَقشَّارْ ؤُ مَارَّا ثَاغْڒُوضْثْ ثَارْكشْ، وَاخَّا أَمنِّي وَارْ غَارسْ ثُوغِي ڒخْڒَاصْ زِي ثنْذِينْثْ ن صُورْ، إِ نتَّا ؤُ إِ ڒْعسْكَارْ نّسْ خْ ڒْخذْمثْ إِ يڭَّا ضِيدّْ نّسْ.

‏19 س ؤُيَا، أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ وْشغْ ثَامُّورْثْ ن مِيصْرَا إِ نَاپُوخَاذْرَاصَّارْ، أَجدْجِيذْ ن بَابِيلْ. نتَّا أَذْ زَّايسْ د-يَاوِي أَفيّضْ ن وَاڭْڒَا نّسْ ؤُشَا أَذْ إِكشّضْ ثَاكشَّاضْثْ نّسْ ؤُشَا أَذْ إِكّسْ ثُوكَّارْضَا. أَيَا أَذْ يِيڒِي ذ ڒخْڒَاصْ نّسْ إِ ڒْعسْكَارْ نّسْ. ‏20 خْ ڒْخذْمثْ نِّي يڭَّا ضِيدّْ نّسْ، وْشِيغْ أَسْ ثَامُّورْثْ ن مِيصْرَا ذ ڒخْڒَاصْ، مِينْزِي نِيثْنِي ڭِّينْ ت ذِي طّْوعْ إِنُو، أَمُّو إِ إِقَّارْ سِيذِي إِنُو، سِيذِي. ‏21 ذڭْ وَاسّْ نِّي أَذْ أَرّغْ إِشّْ ن إِسْرَائِيل أَذْ د-إِفّغْ ؤُشَا أَذْ أَرْزْمغْ أَقمُّومْ نّكْ ذِي ڒْوسْثْ نْسنْ. خنِّي أَذْ سّْننْ بلِّي نشّْ ذ سِيذِي.“