‏1 يُوسَا-د غَارِي وَاوَاڒْ ن سِيذِي، إِنَّا:

‏2 ”أَ مِّيسْ ن بْنَاذمْ، نَابّْ ؤُشَا إِنِي: أَمُّو إِ إِقَّارْ سِيذِي إِنُو، سِيذِي:

رُومْ! أَيّهَّاثْ خْ وَاسّْ نِّي!

‏3 مِينْزِي يُوذسْ إِ يدْجْ وَاسّْ نِّي، يُوذسْ إِ يدْجْ وَاسّْ ن سِيذِي،

أَسّْ ن إِسيْنُوثنْ.

أَذْ يِيڒِي ذ ڒْوقْثْ ن ڒڭْنُوسْ.

‏4 أَذْ د-يَاسْ سِّيفْ ذِي مِيصْرَا

ؤُشَا أَذْ يِيڒِي وَارْجفْ أَمقّْرَانْ ذِي ثمُّورْثْ ن كُوشْ

خْمِي إِ غَا وْضَانْ إِنِّي إِتّْوَاسْنُوقّْبنْ ذِي مِيصْرَا،

مِينْزِي أَذْ أَوْينْ أَفيّضْ ن وَاڭْڒَا نّسْ،

أَذْ أَردّْدْجنْ ذْسُوسَا نّسْ.

‏5 كُوشْ ذ فُوطْ ذ لُوذْ ذ عْڒَامْ كُوڒْ  إِبَارَّانِييّنْ،

ذ كُوبْ، ذ أَيْثْ ن ثمُّورْثْ ن ڒْعَاهْذْ

أَذْ كِيسنْ وْضَانْ س سِّيفْ.“

‏6 ”أَمُّو إِ إِقَّارْ سِيذِي:

إِنِّي إِتّْشَاڒنْ خْ مِيصْرَا أَذْ وْضَانْ،

ؤُ نّْفَاخثْ ن صُّولْطَا نّسْ أَذْ ثْغَارْقْ.

زِي مَاجْذَالْ أَڒْ أَسْوَانْ أَذْ وْضَانْ نِيثْنِي س سِّيفْ ذِي ثمُّورْثْ!،

أَمُّو إِ إِقَّارْ سِيذِي إِنُو، سِيذِي. ^▫  

‏7 أَذْ ذِينْ ثِيڒِي ذ ڒْخِيرْبثْ ذِي ڒْوسْثْ ن ثمُّورَا إِتّْوَارذْدْجنْثْ،

ؤُ ثِيندَّامْ نّسْ أَذْ إِڒِينْثْ ذِي ڒْوسْثْ ن ثْندَّامْ نّغْنِي إِتّْوَاخَارّْبنْ.

‏8 خنِّي أَذْ سّْننْ بلِّي نشّْ ذ سِيذِي،

خْمِي إِ غَا سَّارْغغْ ثِيمسِّي ذِي مِيصْرَا

ؤُشَا مَارَّا إِنِّي ت إِتّْعَاوَاننْ أَذْ تّْوَارْژنْ.

‏9 ذڭْ وَاسّْ نِّي أَذْ فّْغنْ إِرقَّاسنْ س ثْغَارُّوبَا زِي زَّاثْ ن وُوذمْ إِنُو

مَاحنْذْ أَذْ سِّيڭّْوذنْ كُوشْ ونِّي ؤُمِي إِتّْغِيڒْ أَقَا نتَّا ذِي ڒَامَانْ.

أَذْ ذَايْسنْ يِيڒِي وَارْجفْ أَمقّْرَانْ،

أَمشْنَاوْ ذڭْ وَاسّْ نِّي ن مِيصْرَا،

مَاغَارْ خْزَارْ، أَذْ د-يَاسْ!“

‏10 ”أَمُّو إِ إِقَّارْ سِيذِي إِنُو، سِيذِي:

نشّْ أَذْ سّْبدّغْ ڒْغَاشِي إِنْهوْڒنْ ن مِيصْرَا

س ؤُفُوسْ ن نَاپُوخَاذْرَاصَّارْ، أَجدْجِيذْ ن بَابِيلْ.

‏11 نتَّا ذ ڒْڭنْسْ نّسْ أَكِيذسْ،

إِمْسَاڭّْوَاذنْ قَاعْ ن ڒڭْنُوسْ

أَذْ د-أَسنْ حِيمَا أَذْ ثحَّانْ ثَامُّورْثْ.

نِيثْنِي أَذْ سُّوفّْغنْ ڒسْيُوفْ نْسنْ ضِيدّْ إِ مِيصْرَا

ؤُشَا أَذْ شُّورنْ ثَامُّورْثْ س ينِّي إِتّْوَاسْنُوقّْبنْ. ^▪  

‏12 نشّْ أَذْ سِّيژْغغْ إِغزْرَانْ ؤُشَا أَذْ زّنْزغْ ثَامُّورْثْ إِ إِعفَّاننْ

ؤُ نشّْ أَذْ أَردّْدْجغْ ثَامُّورْثْ ذ مَارَّا مِينْ ذَايسْ

س ؤُفُوسْ ن إِبَارَّانِييّنْ.

نشّْ، سِيذِي، ونِّي إِنَّانْ أَيَا.“ ^▫  

‏13 ”أَمُّو إِ إِقَّارْ سِيذِي إِنُو، سِيذِي:

نشّْ أَذْ أَردّْدْجغْ إِميْضَا ن صَّانَامْ

ؤُشَا أَذْ قْضِيغْ خْ لْ-أَصْنَامْ زِي نُوفْ.

وَارْ إِتّْغِيمِي عَاذْ ؤُڒَا ذ إِجّْ ن ڒْحَاكمْ زِي مِيصْرَا.

نشّْ أَذْ سِّيذْفغْ ڒْعُورّثْ ذِي ثمُّورْثْ ن مِيصْرَا.

‏14 نشّْ أَذْ أَردّْدْجغْ فَاثْرُوسْ

ؤُ أَذْ سَّارْغغْ صُوعَانْ

ؤُ أَذْ أَوْيغْ ڒحْكَامَاثْ إِنُو ذِي نُو.

‏15 نشّْ أَذْ سّْفَارْغغْ أَسْعَارْ إِنُو خْ سِينْ،

لْپُورْجْ ن مِيصْرَا،

أَذْ قضْعغْ ڒْغَاشِي إِنْهوْڒنْ ن نُو.

‏16 نشّْ أَذْ سِّيذْفغْ ثِيمسِّي غَارْ مِيصْرَا،

سِينْ أَذْ ثفْسِي س ڒحْرِيقْ،

ثَامُّورْثْ ن نُو أَذْ ثتّْوَافدْجقْ

ؤُ نُوفْ أَذْ ثِيڒِي ذِي ڒحْصَارثْ كُوڒْ أَسّْ.

‏17 إِحُوذْرِييّنْ زِي أَوَانْ ذ فِيبِيسْثَا أَذْ وْضَانْ س سِّيفْ،

ؤُ ثِيمْغَارِينْ أَذْ ؤُيُورنْثْ ذِي ثْمحْبَاسْثْ.

‏18 أَسّْ أَذْ إِتّْبَارْشنْ ذِي ثَاحْفَاحِيسْ

خْمِي إِ غَا يْأَرْژغْ نشّْ أَزَايْڒُو ن مِيصْرَا،

ؤُ أَذْ أَسْ سّْبدّغْ نّْفَاخثْ ن جّهْذْ نّسْ ذِينِّي.

إِجّْ ن ؤُسيْنُو أَذْ ت إِسْذُورِّي

ؤُشَا يسِّيسْ أَذْ ؤُيُورنْثْ ذِي ثْمحْبَاسْثْ.

‏19 نشّْ أَذْ سِّيوْضغْ ڒحْكَامَاثْ خْ مِيسْڒَا

ؤُ نِيثْنِي أَذْ سّْننْ بلِّي نشّْ ذ سِيذِي.“

‏20 ذڭْ ؤُسڭّْوَاسْ وِيسّْ حِيطَاشْ، ذڭْ ؤُيُورْ أَمزْوَارُو، ذڭْ وَاسّْ وِيسّْ سبْعَا ن ؤُيُورْ، إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:

‏21 ”أَ مِّيسْ ن بْنَاذمْ، نشّْ أَرْژِيغْ أَغِيڒْ ن فِيرْعُونْ، أَجدْجِيذْ ن مِيصْرَا.

خْزَارْ، وَارْ ث إِجبَّارْ ؤُڒَا ذ إِجّنْ مَاحنْذْ أَذْ إِتّْوَاسْڭنْفَا،

ؤُمِي ث غَا نّْضنْ س بِينْذَاثْ أَڒَامِي زَّايْسنْثْ ث غَا سّْجهْذنْ

حِيمَا أَذْ إِطّفْ سِّيفْ!“

‏22 ”س ؤُيَا، أَمُّو إِ إِقَّارْ سِيذِي إِنُو، سِيذِي:

خْزَارْ، نشّْ خْ فِيرْعُونْ، أَجدْجِيذْ ن مِيصْڒَا،

ؤُ نشّْ أَذْ أَرْژغْ إِغَادْجنْ نّسْ،

أَمْ ؤُغِيڒْ إِجهْذنْ عَاذْ ؤُڒَا ذ ونِّي إِتّْوَارْژِينْ.

نشّْ أَذْ أَرّغْ سِّيفْ نّسْ أَذْ إِوْضَا زڭْ ؤُفُوسْ نّسْ.

‏23 نشّْ أَذْ زُوزَّارغْ إِمِيصْرِييّنْ جَارْ ڒڭْنُوسْ

ؤُ أَذْ ثنْ بزّْعغْ خْ ثمُّورَا.

‏24 نشّْ أَذْ سّْجهْذغْ إِغَادْجنْ ن ؤُجدْجِيذْ ن بَابِيلْ

ؤُشَا أَذْ وْشغْ سِّيفْ إِنُو ذڭْ ؤُفُوسْ نّسْ،

مَاشَا إِغَادْجنْ ن فِيرْعُونْ أَذْ ثنْ أَرْژغْ،

أَڒَامِي إِ غَا إِسْغُويّْ

أَمْ إِسْغُويّْ ونِّي إِسّْنُوقْبنْ.

‏25 وَاهْ نشّْ أَذْ سّْجهْذغْ إِغَادْجنْ ن ؤُجدْجِيذْ ن بَابِيلْ،

مَاشَا إِغَادْجنْ ن فِيرْعُونْ أَذْ وْضَانْ.

خنِّي أَذْ سّْننْ بلِّي نشّْ ذ سِيذِي،

خْمِي إِ غَا ڭّغْ سِّيفْ إِنُو ذڭْ ؤُفُوسْ ن ؤُجدْجِيذْ ن بَابِيلْ

ؤُ نتَّا أَذْ ث إِسّْوِيژّضْ خْ ثمُّورْثْ ن مِيصْرَا.

‏26 نشّْ أَذْ زُوزَّارغْ إِمِيصْرِييّنْ جَارْ ڒڭْنُوسْ،

أَذْ ثنْ بزّْعغْ خْ ثمُّورَا.

أَمُّو إِ غَا سّْننْ بلِّي نشّْ ذ سِيذِي.“