‏1 يُوسَا-د غَارِي وَاوَاڒْ ن سِيذِي، إِنَّا:

‏2 ”أَ مِّيسْ ن بْنَاذمْ، إِنِي إِ ڒْحَاكمْ ن صُورْ: ’أَمُّو إِ إِقَّارْ سِيذِي إِنُو، سِيذِي: مِينْزِي ثسّْڭعّْذذْ ؤُڒْ نّكْ، ثنِّيذْ: نشّْ ذ أَربِّي، نشّْ تّْغِيمِيغْ خْ ڒْكُورْسِي ن أَربِّي ذِي ڒْوسْثْ ن ڒبْحُورْ!، وَاخَّا شكْ ذ بْنَاذمْ، وَارْ ثدْجِيذْ ذ أَربِّي، أَقَا ثڭِّيذْ ؤُڒْ نّكْ خنِّي أَمشْنَاوْ ؤُڒْ ن إِجّْ ن أَربِّي. ^▪   ‏3 خْزَارْ، شكْ ذ أَمِيغِيسْ خْ ذَانِييِيلْ، وَارْ ذِينْ إِدْجِي شَا ؤُڒَا ذ إِجّْ ن سِّيرّْ خَاكْ إِنُّوفَّارنْ. ‏4 س ثِيغِيثْ نّكْ ذ ڒفْهَامثْ نّكْ أَقَا ثسّْمُونذْ إِ يِيخفْ نّكْ إِڭڒْوَانْ مْغَارنْ ؤُ ثڭِّيذْ ؤُرغْ ذ نُّوقَارْثْ ذڭْ إِخَّامنْ نّكْ ن ثْخُوبَايْ. ‏5 س ثِيغِيثْ نّكْ إِمْغَارنْ غَارْ ثْسبَّابْثْ نّكْ، ثَارْنِيذْ ذڭْ إِڭڒْوَانْ نّكْ ؤُشَا ذِي سِّيبّثْ ن إِڭڒْوَانْ نّكْ مْغَارنْ، إِسّْڭعّذْ وُوڒْ نّكْ إِخفْ نّسْ. ‏6 س ؤُيَا، أَمُّو إِ إِقَّارْ سِيذِي إِنُو، سِيذِي: ؤُمِي ثڭِّيذْ ؤُڒْ نّكْ أَمشْنَاوْ ؤُڒْ ن إِجّْ ن أَربِّي، ‏7 خْ ؤُيَا، خْزَارْ، نشّْ أَذْ خَاكْ د-أَوْيغْ إِبَارَّانِييّنْ، ڒڭْنُوسْ إِقسْحنْ أَطَّاسْ. نِيثْنِي أَذْ د-جبْذنْ ڒسْيُوفْ نْسنْ ضِيدّْ إِ وژْرِي ن ثِيغِيثْ نّكْ ؤُشَا أَذْ سّْفسْذنْ ثِيسِّيقْثْ نّكْ. ^▪   ‏8 نِيثْنِي أَذْ شكْ سّهْوَانْ ذڭْ وحْفُورْ ن ونْضڒْ ؤُشَا أَذْ ثمّْثذْ ڒْموْثْ ن يِينِّي إِتّْوَاسْنُوقّْبنْ ذڭْ وُوڒْ ن ڒبْحُورْ. ‏9 مَا ثْزعْمذْ س ثِيذتّْ أَذْ ثِينِيذْ زَّاثْ إِ وُوذمْ ن يِينِّي شكْ إِ غَا إِنْغنْ: ’نشّْ ذ إِجّْ ن أَربِّي!‘. أَقَا شكْ ذ بْنَاذمْ، وَارْ إِدْجِي ذ أَربِّي ذڭْ ؤُفُوسْ ن يِينِّي إِ شكْ إِ غَا إِذدْجنْ.

‏10 أَذْ ثمّْثذْ س ؤُفُوسْ ن إِبَارَّانِييّنْ أَمْ ينِّي وَارْ إِتّْوَاخثْننْ، مَاغَارْ نشّْ نِّيغْ ث!، أَمُّو إِ إِقَّارْ سِيذِي إِنُو، سِيذِي.‘ “

‏11 يُوسَا-د غَارِي وَاوَاڒْ ن سِيذِي، إِنَّا:

‏12 ”أَ مِّيسْ ن بْنَاذمْ، سْڭعّذْ إِجّْ ن يزْڒِي ن وشْضَانْ، خْ ؤُجدْجِيذْ ن صُورْ ؤُشَا إِنِي أَسْ: ’أَمُّو إِ إِقَّارْ سِيذِي إِنُو، سِيذِي:

أَ شكْ، ذ ونِّي ذ ڒْخَاثمْ ن ڒبْنِي إِفَارْزنْ،

ثشُّورذْ س ثِيغِيثْ ؤُ ثْكمّْڒذْ ذڭْ وژْرِي! ^▪  

‏13 ثُوغَا شكْ ذِي عَاذْنْ، ذِي جّنّثْ ن أَربِّي.

ثُوغَا ذْڒِينْ شكْ س عْڒَامْ كُوڒْ إِژْرَا إِغْڒَانْ،

س ڒعْقَاقْ، ثْيَاقُوثْ ذ ذْيَامَانْثِي،

س ثْكْرِيسُولِيثْ، بِيرِيلْ ذ يَاسْبِيسْ،

س صَافِّيرْ أَزِيزَا، كَارْپُونْكلْ، سْمَارَاخْثْ ذ وُورغْ.

ڒْخذْمثْ ن إِبنْذِيرنْ نّكْ ذ ؤُبَارُّو ن ثمْغَارِينْ نّكْ ثُوغَا-ت ذَايكْ،

ذڭْ وَاسّْ نِّي ذِي د-ثتّْوَاخڒْقذْ ثُوغَا وجْذنْثْ.

‏14 ثُوغَا شكْ ذ إِجّْ ن ؤُكِيرُوبْ ذ أَمذْهُونْ إِسّْذُوڒُوينْ،

أَمُّو إِ ڭِّيغْ شكْ ذِينْ.

ثُوغَا شكْ خْ وذْرَارْ إِقدّْسنْ ن أَربِّي،

ثڭُّورذْ ذِي ڒْوسْثْ ن إِژْرَا إِتّحْذُوذُوقنْ. ^▫  

‏15 ثُوغَا شكْ ثْكمّْڒذْ ذڭْ إِبْرِيذنْ نّكْ،

زڭْ وَاسّْ نِّي ذِي د-ثتّْوَاخڒْقذْ،

أَڒْ ذَايكْ ثتّْوَافْ ڒْمُوعْصِييّثْ.

‏16 س ڒمْغَارثْ ن ثْسبَّابْثْ نّكْ،

إِشُّورْ ذَاخڒْ نّكْ س ڒخْشُونشْثْ ؤُشَا خنِّي ثخْضِيضْ.

س ؤُيَا أَذْ شكْ سِّيڭّْوجغْ خْ وذْرَارْ ن أَربِّي،

أَذْ شكْ مْحِيغْ زِي ڒْوسْثْ ن إِژْرَا إِتّحْذُوذُوقنْ،

أَ شكْ أَكِيرُوبْ إِسّْذُوڒُوينْ!

‏17 ؤُڒْ نّكْ إِسّْڭعّذْ إِخفْ نّسْ س وَاژْرِي نّكْ،

أَقَا ثسّْعِيدْجْثذْ ثِيغِيثْ نّكْ س ثِيسِّيقْثْ نّكْ إِعفَّارنْ.

نشّْ نْضَارغْ شكْ خْ ثمُّورْثْ،

ؤُشَا أَرِّيغْ شكْ زَّاثْ إِ وُوذمْ ن إِجدْجِيذنْ،

أَڒَامِي زمَّارنْ أَذْ غَاركْ د-خْزَارنْ س ڒْحڭْرَا.

‏18 زِي سِّيبّثْ ن وَاطَّاسْ ن ڒْمُوعْصِييّثْ نّكْ

ذ ڒْغشّْ ن ثْسبَّابْثْ نّكْ،

أَقَا ثْغسْبذْ ثِيزَاوِييِّينْ نّكْ إِقدّْسنْ.

س ؤُينِّي أَرِّيغْ ثِيمسِّي ثفّغْ-د زِي ڒْوسْثْ نّكْ،

ثنِّي شكْ إِشِّينْ،

ؤُشَا أَرِّيغْ شكْ ذ إِغّضْ خْ ثمُّورْثْ

زَّاثْ إِ ثِيطَّاوِينْ ن مَارَّا إِنِّي شكْ إِتّْوَاڒَانْ.

‏19 مَارَّا إِنِّي شكْ إِسّْننْ جَارْ ڒڭْنُوسْ،

أَرجْفنْ زَّايكْ.

ثْذوْڒذْ ذ إِجّْ ن ؤُمذْيَا ن وَارْجفْ

ؤُ وَارْ ثتِّيڒِيذْ عَاذْ إِ ڒبْذَا.‘ “

‏20 يُوسَا-د غَارِي وَاوَاڒْ ن سِيذِي، إِنَّا:

‏21 ”أَ مِّيسْ ن بْنَاذمْ، أَرّْ ؤُذمْ نّكْ غَارْ صِيذُونْ ؤُشَا نَابّْ ضِيدّْ نّسْ، ‏22 ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَقَا أَيِي ضِيدّْ نّمْ، أَ ثَانْذِينْثْ ن صِيذُونْ! نشّْ أَذْ تّْوَاسْعُودْجغْ ذِي ڒْوسْثْ نّكْ ؤُشَا نِيثْنِي أَذْ سّْننْ بلِّي نشّْ ذ سِيذِي خْمِي ذَايسْ إِ غَا ڭّغْ ڒحْكَامَاثْ ؤُشَا أَذْ زَّايسْ تّْوَاقدّْسغْ. ‏23 أَذْ سّكّغْ طَّاعُونْ ذِي ڒْوسْثْ نّسْ ؤُڒَا ذ إِذَامّنْ ذڭْ إِبْرِيذنْ نّسْ ؤُ ونِّي إِتّْوَانْغنْ أَذْ إِوْضَا ذِي ڒْوسْثْ نّسْ س سِّيفْ نِّي خَاسْ إِ غَا يِيڒِينْ زڭْ ونّضْ نّسْ. خنِّي أَذْ سّْننْ، بلِّي نشّْ ذ سِيذِي، ‏24 ؤُشَا عمَّارْصْ عَاذْ أَذْ يِيڒِي إِ ثَادَّارْثْ ن إِسْرَائِيل أَسنَّانْ إِقبْشنْ نِيغْ ثَازڭّْوَارْثْ إِتّقّْسنْ زڭْ إِنِّي ذ أَسنْ د-إِنّْضنْ، إِنِّي ثنْ إِسّحْقَارَّانْ. نِيثْنِي أَذْ سّْننْ بلِّي نشّْ ذ سِيذِي، ذ سِيذِي إِ دْجِيغْ.‘ “

‏25 ”أَمُّو إِ إِقَّارْ سِيذِي إِنُو، سِيذِي: خْمِي إِ غَا سّْمُونغْ ثَادَّارْثْ ن إِسْرَائِيل زِي ڒڭْنُوسْ نِّي مَانِي تّْوَابزّْعنْ نِيثْنِي، ؤُشَا نشّْ سّشْنغْ-د إِخفْ إِنُو ذ أَمْقدّسْ ذَايْسنْ زَّاثْ إِ ثِيطَّاوِينْ ن ڒڭْنُوسْ، خنِّي أَذْ زذْغنْ ذِي ثمُّورْثْ نِّي وْشِيغْ إِ ؤُمْسخَّارْ إِنُو يَاعْقُوبْ. ‏26 نِيثْنِي أَذْ زذْغنْ ذِي ڒَامَانْ ؤُشَا أَذْ بْنَانْ ثُوذْرِينْ، أَذْ ڭّنْ إِمَارْجَاعنْ ن ؤُضِيڒْ ؤُ أَذْ ذَايْسنْ ژُّونْ ثِيزَايَارِينْ، وَاهْ نِيثْنِي أَذْ ذِينْ زذْغنْ ذِي ڒَامَانْ أَوَارْنِي ڒَامِي ڭِّيغْ ڒحْكَامَاثْ خْ مَارَّا إِنِّي ثنْ إِكشّْضنْ زِي ثمُّورَا إِ ذ أَسنْ د-إِنّْضنْ. خنِّي أَذْ سّْننْ بلِّي نشّْ ذ سِيذِي، أَربِّي نْسنْ.“ ^▪