أَنڭَّارُو أَذْ د-يَاسْ!
7
1 يُوسَا-د غَارِي وَاوَاڒْ ن سِيذِي، إِنَّا: 2 ”شكْ، أَ مِّيسْ ن بْنَاذمْ، أَمُّو إِ إِقَّارْ سِيذِي إِنُو، سِيذِي، إِ ثمُّورْثْ ن إِسْرَائِيل:
أَنڭَّارْ،
يُوسَا-د ؤُنڭَّارْ
خْ أَربْعَا ن إِغزْذِيسنْ ن ثمُّورْثْ.
3 ڒخُّو يُوسَا-د خَامْ ؤُنڭَّارْ نّمْ،
مِينْزِي أَذْ غَارمْ د-سكّغْ أَغْضَابْ إِنُو
ؤُ أَذْ خَامْ حكْمغْ أَمْ إِبْرِيذنْ نّمْ
ؤُشَا أَذْ خَامْ ڭّغْ مَارَّا جّْعَايفْ نّمْ.
4 وَارْ ذ أَمْ زِّيدْجِيزنْثْ ثِيطَّاوِينْ إِنُو ؤُ وَارْ أَرحّْمغْ،
مِينْزِي أَذْ أَرّغْ إِبْرِيذنْ نّمْ خْ ؤُزدْجِيفْ نّمْ،
ؤُ جّْعَايفْ نّمْ أَذْ شمْ ڒقْفنْثْ ذِي ڒْوسْثْ نّمْ.
أَمُّو إِ غَا ثسّْنمْ بلِّي نشّْ ذ سِيذِي.“ ▪
5 ”أَمُّو إِ إِقَّارْ سِيذِي إِنُو، سِيذِي:
إِجّْ ن ڒْغَارْ، إِجّْ ن ڒْغَارْ إِفَارْزنْ،
أَقَا أَذْ د-يَاسْ.
6 يُوسَا-د ؤُنڭَّارْ،
أَنڭَّارْ يُوسَا-د،
إِفَاقْ-د ضِيدّْ نّمْ،
أَقَا أَذْ د-يَاسْ!
7 ثُوسَا-د غَاركْ ثْقدُّوحْثْ،
أَ أَمزْذُوغْ ن ثمُّورْثْ،
ثَاسَاعّثْ ثُوسَا-د،
أَسّْ ن ؤُخَارْوضْ إِقَارّبْ-د
ؤُ وَارْ ذِينْ أَسْڒِيوْڒوْ زڭْ إِذُورَارْ. ▫
8 ڒخُّو ذغْيَا أَذْ خَامْ زدْجْعغْ أَسْعَارْ إِنُو
ؤُشَا أَذْ ذَايمْ كمّْڒغْ أَغْضَابْ إِنُو.
أَذْ خَامْ حكْمغْ أَنشْثْ ن إِبْرِيذنْ نّمْ
ؤُشَا أَذْ خَامْ سِّيوْضغْ مَارَّا جّْعَايفْ نّمْ.
9 وَارْ زِّيدْجِيزغْ ؤُ وَارْ أَرحّْمغْ.
أَذْ غَارمْ د-أَرّغْ مِينْ ثسّْذَاهدْجذْ،
ؤُ جّْعَايفْ نّمْ أَذْ إِڒِينْثْ ذِي ڒْوسْثْ نّمْ
ؤُ كنِّيوْ أَذْ ثسّْنمْ بلِّي أَقَا نشّْ ذ سِيذِي
ونِّي كنِّيوْ إِشَّاثنْ.“
10 ”خْزَارْ، أَسّْ، خْزَارْ، أَقَا ذَا يِيوضْ-د،
ثقْضَا ثْقدُّوحْثْ،
ثنوَّارْ ثَاغَّارْشْثْ،
ثسّنْذِي نّْفَاخثْ.
11 إِڭعّذْ لْعُونْفْ أَمْ إِشْثْ ن ثغَّارْشْثْ ن ڒْغَارْ.
وَارْ زَّايْسنْ إِقِّيمْ ؤُڒَا ذ إِجّْ،
وَالُو ن ڒْغَاشِي نْسنْ إِنْهوْڒنْ، وَالُو ن دّْرِيزْ نْسنْ،
ؤُ وَالُو ن ؤُسمْغَارْ أَذْ غَارْسنْ إِقِّيمْ عَاذْ.
12 ثُوسَا-د ثْسَاعّثْ، إِخشّذْ وَاسّْ.
أجّْ ونِّي إِسْغِينْ وَارْ إِفَارّحْ
ؤُ أجّْ ونِّي إِزّْنُوزَانْ وَارْ إِتّشْضِينْ،
مِينْزِي ڒْحَاذُوقْ ن وغْضَابْ أَقَا-ث خْ مَارَّا ڒْغَاشِي نّسْ إِنْهوْڒنْ.
13 مِينْزِي ونِّي إِزْنُوزَانْ وَارْ د-إِذِّيكّْوِيڒْ غَارْ مِينْ إِمّنْزنْ،
وَاخَّا نِيثْنِي قِّيمنْ دَّارنْ،
مِينْزِي ثَامژْرِيوْثْ خْ مَارَّا ڒْغَاشِي إِنْهوْڒنْ ن ثمُّورْثْ وَارْ ثْبطِّيڒْ،
ؤُشَا ؤُڒَا ذ إِجّْ وَارْ إِزمَّارْ س ڒْمُوعْصِييّثْ نّسْ أَذْ إِسُورَارْ ثُوذَارْثْ نّسْ.
14 نِيثْنِي صُوضنْ ذِي ڒْپُوقْ ؤُشَا سّْوجْذنْ مَارَّا ڒحْوَايجْ،
مَاشَا ؤُڒَا ذ إِجّْ وَارْ إِتّفّغْ غَارْ ؤُمنْغِي،
مِينْزِي ڒْحَاذُوقْ ن وغْضَابْ إِنُو أَقَا-ث خْ مَارَّا ڒْغَاشِي إِنْهوْڒنْ ن ثمُّورْثْ.“
15 ”زِي بَارَّا سِّيفْ
ؤُ زِي ذَاخڒْ طَّاعُونْ ذ ڒَاژْ.
وِي إِدْجَانْ ذڭْ إِيَّارْ، أَذْ إِمّثْ س سِّيفْ،
وِي إِدْجَانْ ذِي ثنْذِينْثْ أَذْ ث يشّْ ڒَاژْ ذ طَّاعُونْ.
16 وِي زَّايْسنْ يَاروْڒنْ، أَذْ نجْمنْ،
ؤُشَا أَذْ إِڒِينْ خْ إِذُورَارْ أَمشْنَاوْ إِذْبِيرنْ زِي ثغْزُورِينْ،
أَذْ نّزْبَارنْ مَارَّا،
كُوڒْ إِجّْ خْ ڒْمُوعْصِييّثْ نّسْ.
17 مَارَّا إِفَاسّنْ أَذْ هيّْفنْ،
ؤُ مَارَّا إِفَادّنْ أَذْ ذوْڒنْ ذ أَمَانْ.“ ▪
18 ”أَذْ بيْسنْ س ثْخُونْشَا ن وشْضَانْ،
أَرْجفْ أَذْ ثنْ إِسّْذُوڒِي
ؤُ خْ مَارَّا ؤُذْمَاونْ أَذْ يِيڒِي ڒحْيَا
ؤُ خْ مَارَّا إِزدْجِيفنْ نْسنْ ثُوقشَّارْثْ. ▪
19 أَذْ نْضَارنْ نُّوقَارْثْ نْسنْ ذڭْ إِبْرِيذنْ،
ؤُ ؤُرغْ نْسنْ أَذْ يِيڒِي أَمْ شَا ن ڒْحَاجّثْ ثخْمجْ.
نُّوقَارْثْ نْسنْ ذ وُورغْ نْسنْ وَارْ زمَّارنْ أَذْ ثنْ فكّنْ
ذڭْ وَاسّْ ن ؤُذُوقّزْ ن وغْضَابْ ن سِيذِي.
وَارْ زمَّارنْ أَذْ زَّايْسنْ سّْجِيوْننْ ڒعْمَارْ نْسنْ
نِيغْ أَذْ زَّايْسنْ شُّورنْ ثَاكْرِيشْثْ نْسنْ،
مِينْزِي أَيَا ثُوغَا ذ سِّيبّثْ ن ؤُنقْرَاضْ إِ د-يِيوْينْ ڒْمُوعْصِييّثْ نْسنْ. ▪
20 أَژْرِي ن ثلْوِيزْثْ إِڭَّا إِ-ث ذ لْعَاضَامَا يُوعْڒَانْ،
مَاشَا نِيثْنِي ڭِّينْ ذَايسْ ڒخْيَاڒَاثْ ن نّْعَاوَاثْ نْسنْ ن صَّانَامْ
ؤُ ڒخْيَاڒَاثْ ن جّْعَايفْ نْسنْ.
س ؤُيَا أَرِّيغْ ثَالْوِيزْثْ ذ ثَاخْمُوجِي إِ نِيثْنِي.
21 نشّْ أَذْ ت وْشغْ أَمْ ثُوشّفّْرَا ذڭْ ؤُفُوسْ ن إِبَارَّانِييّنْ
ؤُشَا أَذْ ت وْشغْ ذ ثَاكشَّاضْثْ إِ إِعفَّاننْ ن ثمُّورْثْ،
ؤُشَا نِيثْنِي أَذْ ت سّْعِيدْجْثنْ.
22 نشّْ أَذْ خَاسْ سّنْقڒْبغْ ؤُذمْ إِنُو
ؤُ نِيثْنِي أَذْ سّْعِيدْجْثنْ أَمْشَانْ إِنُو إِنُّوفَارنْ،
مَاغَارْ إِشفَّارنْ أَذْ ذَايسْ أَذْفنْ
ؤُشَا أَذْ ث سّْعِيدْجْثنْ.“
23 ”سوْجذْ سّْنسْڒثْ،
مِينْزِي ثَامُّورْثْ ثشُّورْ س ؤُسِيزّڒْ ن إِذَامّنْ
ؤُ ثَانْذِينْثْ ثشُّورْ س لْعُونْفْ.
24 نشّْ أَذْ أَوْيغْ ڒڭْنُوسْ إِعفَّاننْ قَاعْ،
ؤُ نِيثْنِي أَذْ طّْفنْ ثُوذْرِينْ نْسنْ،
ؤُ أَذْ سّْبدّنْ نّْفَاخثْ ن أَيْثْ ن جّهْذْ،
ؤُشَا أَذْ تّْوَاسْعِيدْجْثنْثْ ثْزَاوِييِّينْ نْسنْ إِقدّْسنْ.
25 أَذْ د-يَاسْ ؤُنخْڒِيعْ ذ أَمقّْرَانْ،
ؤُ نِيثْنِي أَذْ أَرْزُونْ ڒهْنَا،
مَاشَا وَارْ إِتِّيڒِي.
26 أَقَا أَذْ د-يَاسْ ؤُشڒْوَاوْ أَوَارْنِي إِ ؤُشڒْوَاوْ،
أَذْ يِيڒِي ڒْهَارْذْ أَوَارْنِي إِ ڒْهَارْذْ.
نِيثْنِي أَذْ أَرْزُونْ ثَامژْرِيوْثْ ن ؤُنَابِي،
مَاشَا شَّارِيعَا ن ؤُكهَّانْ ذ شّْوَارْ ن إِمْغَارنْ
أَذْ قْضَانْ.
27 أَجدْجِيذْ أَذْ إِشْضنْ
ؤُ ڒْحَاكمْ أَذْ يَارْضْ أَنخْڒِيعْ
ؤُ إِفَاسّنْ ن ڒْڭنْسْ أَذْ قَارّْمنْ س ثِيڭّْوُوذِي.
نشّْ أَذْ زَّايْسنْ ڭّغْ أَمْ وبْرِيذْ نْسنْ،
ؤُ نشّْ أَذْ خَاسنْ حكْمغْ أَمْ لْفَارَايِيضْ نْسنْ،
ؤُ نِيثْنِي أَذْ سّْننْ بلِّي نشّْ ذ سِيذِي.“