‏1 يُوسَا-د غَارِي وَاوَاڒْ ن سِيذِي، إِنَّا:

‏2 ”أَ مِّيسْ ن بْنَاذمْ، أَرّْ ؤُذمْ نّكْ غَارْ إِذُورَارْ ن إِسْرَائِيل ؤُشَا نَابّْ خَاسنْ ^▪   ‏3 ؤُشَا إِنِي: ’أَ إِذُورَارْ ن إِسْرَائِيل، سْڒمْ إِ وَاوَاڒْ ن سِيذِي إِنُو، سِيذِي! أَمُّو إِ إِقَّارْ سِيذِي إِنُو، سِيذِي، إِ إِذُورَارْ ؤُ إِ ثوْرِيرِينْ، إِ ثْغزْرَاثِينْ ؤُ إِ ثغْزُورْثِينْ: خْزَارْ، نشّْ أَذْ خَاومْ سّكّغْ سِّيفْ ؤُشَا ڒڭْعُوذِي نْومْ مَانِي ثتّْوهَّابمْ دّْبَايحْ نْونْ أَذْ ثنْثْ أَردّْدْجغْ. ‏4 أَذْ تّْوَارذْدْجنْ إِعَالْطَارنْ نْومْ ؤُ إِبِيلَارنْ ن أَربِّي ن ثْفُوشْثْ نْومْ أَذْ تّْوَارْژنْ ؤُ نشّْ أَذْ نْضَارغْ إِنِّي إِتّْوَاسْنُوقْبنْ زَّاثْ إِ وُوذمْ ن إِميْضَا ن لَاصْنَامْ نْومْ. ‏5 أَذْ ڭّغْ ڒْخشْبَاثْ ن أَيْثْ ن إِسْرَائِيل زَّاثْ إِ إِميْضَا ن لَاصْنَامْ نْسنْ ؤُشَا أَذْ زُوزَّارغْ إِخْسَانْ نْومْ غَارْ مِينْ د-إِنّْضنْ إِ إِعَالْطَارنْ نْومْ. ‏6 ذِي مَارَّا إِمُوشَانْ مَانِي ثْزدّْغمْ أَذْ تّْوَاردّْدْجنْثْ ثْندَّامْ، ؤُشَا ڒڭْعُوذِي أَذْ ثنْثْ جّنْ، أَڒَامِي إِعَالْطَارنْ نْومْ أَذْ إِڒِينْ ذ ڒْخَارْبثْ ذ تّْوَاجّنْ، ؤُشَا إِميْضَا ن لَاصْنَامْ نْومْ أَذْ تّْوَارْژنْ ؤُ إِبِيلَارنْ نْومْ ن أَربِّي ن ثْفُوشْثْ أَذْ تّْوَاقسّنْ ؤُ ثِيمڭَّا نْومْ أَذْ تّْوَامْحَانْثْ. ‏7 إِنِّي إِتّْوَانْغنْ أَذْ ذِينْ إِڒِينْ ذِي ڒْوسْثْ نْومْ حِيمَا أَذْ ثسّْنمْ بلِّي نشّْ ذ سِيذِي.‘ “

‏8 ”أَذْ جّغْ إِشْثْ ن ثسْغَارْثْ أَذْ ثقِّيمْ ثدَّارْ، مِينْزِي أَذْ ذِينْ إِڒِينْ إِنِّي إِتّْوَاسْنجْمنْ زِي سِّيفْ خْمِي كنِّيوْ غَا ثتّْوَازُوزَّارمْ خْ ثمُّورَا. ‏9 إِنِّي إِتّْوَانجْمنْ أَذْ خَافِي عقْڒنْ جَارْ رڭْنُوسْ مَانِي تّْوَاندّْهنْ ذ إِمحْبَاسْ، مِينْزِي نشّْ أَرْژِيغْ ؤُڒْ نْسنْ نِّي خَافِي إِتَّاڭّْوجنْ إِشُّورنْ س فَارْقْ-شّْغڒْ، ؤُشَا ؤُڒَا ذ ثِيطَّاوِينْ نْسنْ نِّي إِضْفَارنْ أَوَارْنِي إِ إِميْضَا ن لَاصْنَامْ نْسنْ شُّورنْثْ س فَارْقْ-شّْغڒْ. نِيثْنِي أَذْ عِيفّنْ إِخفْ نْسنْ زِي سِّيبّثْ ن ثْمڭَّا إِعفّْننْ نِّي ڭِّينْ س مَارَّا جَّاعَايفْ نْسنْ.

‏10 نِيثْنِي أَذْ سّْننْ بلِّي نشّْ ذ سِيذِي. نشّْ وَارْ نِّيغْ أَمنِّي وَاهَا أَقَا نشّْ أَذْ ذَايْسنْ ڭّغْ ڒْغَارْ-أَ.“

‏11 ”أَمُّو إِ إِقَّارْ سِيذِي إِنُو، سِيذِي: وّثْ س ؤُفُوسْ نّكْ ؤُشَا ذَارّشْ س ؤُضَارْ نّكْ، ؤُشَا إِنِي: ’أَيْ!‘ خْ مَارَّا نّْعَاوَاثْ ثِيعفَّانِينْ ن ثَادَّارْثْ ن إِسْرَائِيل، مَاغَارْ نِيثْنِي أَذْ وْضَانْ س سِّيفْ، س ڒَاژْ ؤُ س طَّاعُونْ! ^▪  

‏12 وِي إِدْجَانْ يِيڭّْوجْ أَذْ إِمّثْ س طَّاعُونْ، ؤُ وِي إِدْجَانْ يُوذسْ أَذْ إِوْضَا س سِّيفْ، ؤُ وِي إِقِّيمنْ ؤُ أَقَا إِتّْوَاحْصَارْ، أَذْ إِمّثْ س ڒَاژْ، أَمُّو أَذْ ذَايْسنْ كمّْڒغْ أَسْعَارْ إِنُو.

‏13 إِتّْخصَّا أَذْ ثسّْنمْ بلِّي نشّْ ذ سِيذِي، خْمِي إِنِّي زَّايْسنْ إِتّْوَانْغنْ أَذْ ذِينْ إِڒِينْ جَارْ إِميْضَا ن لَاصْنَامْ نْسنْ ذڭْ ونّضْ ن إِعَالْطَارنْ نْسنْ، خْ كُوڒْ ثَاوْرِيرْثْ ثُوعْڒَا، خْ مَارَّا ثِيقِّيشَاثِينْ ن إِذُورَارْ، سَاذُو كُوڒْ ثَاشجَّارْثْ ثَازِيزَاوْثْ ؤُ سَاذُو كُوڒْ ثَاشجَّارْثْ ن يِيڭّْ س وَاطَّاسْ ن ثفْرَايْ، أَمْشَانْ مَانِي نُّومنْ سّوْجَاذنْ إِشْثْ ن ڒفْوَاحثْ إِتّْفُوحنْ إِ مَارَّا إِميْضَا ن لَاصْنَامْ نْسنْ. ^▫  

‏14 أَذْ سّْوِيژّْضغْ أَفُوسْ إِنُو ضِيدّْ نْسنْ ؤُشَا أَذْ ڭّغْ ثَامُّورْثْ ذ ڒْخَارْبثْ، إِشْثْ نْ ڒْخَارْبثْ مَاهُو ڒخْڒَا ن ذَابْلَا، ذِي مَارَّا إِمُوشَانْ مَانِي زدّْغنْ ؤُشَا أَذْ سّْننْ بلِّي نشّْ ذ سِيذِي.“