‏1 ذڭْ ؤُسڭّْوَاسْ وِيسّْ ستَّا، ذڭْ ؤُيُورْ وِيسّْ ستَّا، ذڭْ وَاسّْ وِيسّْ خمْسَا ن ؤُيُورْ، ؤُمِي ثُوغَا قِّيمغْ ذِي ثُوذَارْثْ إِنُو ؤُشَا إِمْغَارنْ ن يَاهُوذَا ثُوغَا قِّيمنْ زَّاثْ إِ وُوذمْ إِنُو، خنِّي إِمْسَارْ أَقَا إِوْضَا-د خَافِي ذِينْ ؤُفُوسْ ن سِيذِي إِنُو، سِيذِي. ‏2 نشّْ ژْرِيغْ، ؤُشَا خْزَارْ، ثُوغَا ذِينْ مِينْ يَارْوسنْ ذڭْ وُوذمْ ن ثْمسِّي: زِي ثجْعِينَّاثِينْ نّسْ غَارْ وَادَّايْ أَقَا إِبَانْ-د أَمْ ثْمسِّي ؤُ زِي ثجْعِينَّاثِينْ نّسْ أَڒْ سنّجْ ثُوغَا أَخْمِي ثژْرِيذْ ثِيسِّيقْثْ، ثْبَانْ-د أَمْ وُوزَّاڒْ إِتّْوسّْڭنْ. ‏3 إِسّْوِيژّضْ-د مِينْ يَارْوسنْ ذڭْ إِجّْ ن ؤُفُوسْ ؤُشَا نتَّا إِطّفْ أَيِي-د غَارْ إِشْثْ ن ثْزَارزْثْ ن ؤُزدْجِيفْ إِنُو ؤُشَا أَرُّوحْ إِسّْڭعّذْ أَيِي جَارْ ؤُجنَّا ذ ثمُّورْثْ، إِنْذهْ أَيِي ذِي ثْمژْرِيوِينْ ن أَربِّي غَارْ ؤُرْشَالِيمْ، غَارْ وَاذَافْ ن ثوَّارْثْ ن ڒمْرَاحْ ن ذَاخڒْ نِّي إِخزَّارنْ غَارْ شَّامَالْ، مَانِي إِدْجْ ڒْكُورْسِي ن ڒخْيَاڒْ ن صَّانَامْ ن ثُوسْمِي، إِنِّي إِسّكَّارنْ ثُوسْمِي. ^▪   ‏4 ؤُ خْزَارْ، ذِينْ إِ إِدْجْ ؤُعُودْجِي ن أَربِّي ن إِسْرَائِيل، إِتّْبَانْ-د أَمشْنَاوْ مَامّشْ ث ژْرِيغْ ذِي ڒوْضَا ن ثغْزُورْثْ. ^▪   ‏5 نتَّا إِنَّا أَيِي: ”أَ مِّيسْ ن بْنَاذمْ، سْڭعّذْ ڒخُّو ثَامُوغْڒِي نّكْ غَارْ شَّامَالْ!“ ؤُشَا سّْڭعّْذغْ ثَامُوغْڒِي إِنُو غَارْ شَّامَالْ، ؤُ خْزَارْ، إِبدّْ ذِينْ ڒخْيَاڒْ ن صَّانَامْ ن ثُوسْمِي غَارْ شَّامَالْ ن ثوَّارْثْ ن ؤُعَالْطَارْ، ذڭْ وَاذَافْ. ‏6 خَاسْ ؤُشَا إِنَّا أَيِي: ”أَ مِّيسْ ن بْنَاذمْ، مَا ثتّْوَاڒِيذْ مِينْ تّڭّنْ نِيثْنِي، جّْعَايفْ ثِيمقّْرَانِينْ نِّي ثتّڭّْ ثَادَّارْثْ ن إِسْرَائِيل ذَانِيثَا، أَڒَامِي إِتّْخصَّا أَذْ أَڭّْوجغْ خْ زَّاوشْثْ إِنُو إِقدّْسنْ. أَذْ ثْژَارذْ عَاذْ جّْعَايفْ ثِيمقّْرَانِينْ خْ ثِينَا.“

‏7 نتَّا يِيوْيِي أَيِي غَارْ وَاذَافْ نْ ڒمْرَاحْ. ؤُمِي ژْرِيغْ، خْزَارْ، أَقَا ذِينْ إِجّْ ن وحْفُورْ ذِي ڒْحِيضْ. ‏8 نتَّا إِنَّا أَيِي: ”أَ مِّيسْ ن بْنَاذمْ، غَازْ خنِّي ڒْحِيضْ.“ نشّْ غْزِيغْ ڒْحِيضْ ؤُشَا خْزَارْ، أَقَا ذِينْ إِجّْ ن وَاذَافْ. ‏9 خنِّي إِنَّا أَيِي: ”أَذفْ، ؤُشَا خْزَارْ جّْعَايفْ ثِيمقّْرَانِينْ نِّي تّڭّنْ ذَانِيثَا.“

‏10 ؤُذْفغْ ؤُشَا ژْرِيغْ، خْزَارْ، أَقَا ذِينْ عْڒَامْ كُوڒْ  إِنقَّاشنْ ن إِمُودَّارْ إِتّْپُوعنْ، ن ڒْمَاڒْ أَمنْڭُوسْ ؤُ ن مَارَّا إِميْضَا ن لْ-أَصْنَامْ ن ثَادَّارْثْ ن إِسْرَائِيل تّْوَانقْشنْ ذِي ڒْحِيذْ ذڭْ ونّضْ.

‏11 أَقَا سبْعِينْ ن يرْيَازنْ زڭْ إِمْغَارنْ ن ثَادَّارْثْ ن إِسْرَائِيل، أَكْ-ذ يَازَانْيَا، مِّيسْ ن شَافَانْ، ذِي ڒْوسْثْ نْسنْ، بدّنْ زَّاثْسنْ ؤُ كُوڒْ إِجّْ س ڒْمجْمَارْ نّسْ ن جَّاوِي ذڭْ ؤُفُوسْ نّسْ ؤُشَا ثُوڒِي ثجْنوْثْ ثشُّورْ س أَرِّيحثْ ن ڒبْخُورْ.

‏12 خنِّي إِنَّا أَيِي: ”أَ مِّيسْ ن بْنَاذمْ، مَا ثژْرِيذْ مِينْ تّڭّنْ إِمْغَارنْ ن إِسْرَائِيل ذِي ثَادْجسْثْ، كُوڒْ إِجّْ ذڭْ إِخَّامنْ ن ڒخْيَاڒَاثْ نّسْ إِنقْشنْ، مَاغَارْ قَّارنْ: سِيذِي وَارْ ذ أَنغْ إِژْرِي، سِيذِي يجَّا ثَامُّورْثْ.“ ^▪  

‏13 نتَّا إِنَّا أَيِي: ”أَذْ ثْژَارذْ عَاذْ جّْعَايفْ ثِيمقّْرَانِينْ خْ ثِينَا نِّي تّڭّنْ نِيثْنِي.“

‏14 خنِّي إِنْذهْ أَيِي غَارْ وَاذَافْ ن ثوَّارْثْ ن ثَادَّارْثْ ن سِيذِي، ونِّي إِدْجَانْ غَارْ شَّامَالْ، ؤُ خْزَارْ، قِّيمنْثْ ذِينْ ثمْغَارِينْ تّْرُونْثْ ذِي ثَامُّوزْ.

‏15 نتَّا إِنَّا أَيِي: ”أَ مِّيسْ ن بْنَاذمْ، مَا ثژْرِيذْ أَيَا! أَذْ ثْژَارذْ عَاذْ جّْعَايفْ مْغَارنْثْ خْ ثِينَا.“

‏16 ؤُشَا يِيوْيِي أَيِي غَارْ ڒمْرَاحْ ن ذَاخڒْ ن ثَادَّارْثْ ن سِيذِي، ؤُشَا خْزَارْ، غَارْ ثوَّارْثْ ن زَّاوشْثْ ن سِيذِي، جَارْ وسْقِيفْ ذ ؤُعَالْطَارْ، أَقَا ذِينْ عْڒَاحَاڒْ خمْسَا ؤُ-عِيشْرِينْ ن يرْيَازنْ. إِعُورَارْ نْسنْ ذوْڒنْ غَارْ زَّاوشْثْ ن سِيذِي ؤُ ؤُذْمَاونْ نْسنْ غَارْ شَّارْقْ، ؤُشَا نِيثْنِي أَرِّينْ أَزدْجِيفْ غَارْ شَّارْقْ، إِ ثْفُوشْثْ.

‏17 خنِّي إِنَّا أَيِي: ”أَ مِّيسْ ن بْنَاذمْ، مَا ثژْرِيذْ أَيَا؟ مَا أَقَا ذْرُوسْثْ إِ ثَادَّارْثْ ن يَاهُوذَا مَاحنْذْ أَذْ ڭّنْ جّْعَايفْ-أَ ثِيمقّْرَانِينْ نِّي تّڭّنْ ذَانِيثَا؟ مَاغَارْ نِيثْنِي شُّورنْ ثَامُّورْثْ س لْعُونْفْ ؤُشَا قِّيمنْ ذوْڒنْ-د غَارِي حِيمَا أَذْ أَيِي سْعَارنْ. خْزَارْ، تّڭّنْ عَاذْ ثَاسطَّا إِتّْوَاقضْعنْ غَارْ ونْزَارنْ نْسنْ!

‏18 خنِّي ؤُڒَا ذ نشّْ أَذْ ڭّغْ س وسْعَارْ. وَارْ ذَايِي إِزِّيدْجِيزْ حذْ ؤُ وَارْ أَرحّْمغْ. وَاخَّا نِيثْنِي سْغُويُّونْ س ثْمِيجَّا إِجهْذنْ ذڭْ إِمزُّوغنْ إِنُو، نشّْ وَارْ د غَارْسنْ تّسْڒِيغْ.“ ^▪