إِزْڒِي وِيسّْ أَربْعَا - ڒْمُوعْصِييّثْ ن يدْجِيسْ ن ؤُرْشَالِيمْ
4
1 أَلِيفْ. مَامّشْ إِڭَّا إِبَّارْشنْ وُورغْ أَمُّو، مَامّشْ إِبدّڒْ وُورغْ إِغْڒَانْ قَاعْ أَمُّو!
مَامّشْ تّْوَابزّْعنْ إِژْرَا ن زَّاوشْثْ إِقدّْسنْ
خْ ثْغمُّورَا ن إِبْرِيذنْ!
2 بِيثْ. إِحنْجِيرنْ إِغْڒَانْ ن صِيهْيُونْ تّْوَاحسْبنْ أَمْ وُورغْ إِقُّورنْ.
مَامّشْ ذ أَسنْ تّڭّنْ أَمْ إِغَارَّافنْ ن ثْڒَاخْثْ،
أَمْ ڒْخذْمثْ ن بُو-ثْڒَاخْثْ!
3 ڭِيملْ. عَاذْ ثُوشَّانِينْ ن ڒخْڒَا إِ د-إِسُّوفّْغنْ ثِيبِّيشِينْ،
سُّوطُّوضنْثْ إِمژْيَاننْ نْسنْثْ،
مَاشَا يدْجِيسْ ن ڒْڭنْسْ إِنُو ثذْوڒْ ثوْعَارْ،
أَمْ نّْعَامَاثْ ذِي ڒخْڒَا.
4 ذَالِيثْ. إِڒسْ ن وحْضِيضْ إِڒْصقْ غَارْ وَانغْ نّسْ س ؤُفَاذِي،
إِحنْجِيرنْ إِمژْيَاننْ ثتَّارنْ أَغْرُومْ،
مَاشَا ؤُڒَا ذ إِجّنْ وَارْ ذ أَسنْ ث يبْضِي.
5 هِي. إِنِّي ثُوغَا إِتّتّنْ زِيشْ مَاشَّا إِڒدّنْ،
غَاشَانْ ذڭْ إِبْرِيذنْ،
إِنِّي إِتّْوَاسيْمنْ زِيشْ خْ ؤُزڭّْوَاغْ يُوژْغنْ،
حنّْضنْ ڒخُّو ذِي ڒغْبَارْ.
6 وَاوْ. ڒْمُوعْصِييّثْ ن يدْجِيسْ ن ڒْڭنْسْ إِنُو ذ ثَامقّْرَانْثْ
خْ دّْنُوبْ ن ثنْذِينْثْ ن سَاذُومْ،
ثنِّي إِنْقڒْبنْ ذڭْ إِجّْ ن ؤُمُورْ،
بْڒَا تّْسَاخُورْ ن إِفَاسّنْ.
7 زَايِينْ. إِنغْرَافْ نّسْ إِتّْوَاحُوزنْ ثُوغَا صْفَانْ خْ وذْفڒْ،
ذ إِشمْڒَاڒنْ خْ ؤُغِي،
أَرِّيمَاثْ نْسنْ زوْغنْ خْ ڒْمَارْجَانْ،
أَدُّوذْ نْسنْ يَارقّْ أَمْ صَافِّيرْ أَزِيزَا.
8 خِيثْ. ڒخُّو إِبدّڒْ وَادُّوذْ نْسنْ، إِذْوڒْ ذ أَبَارْشَانْ خْ ثَادْجسْثْ،
وَارْ تّْوَاعْقِيڒنْ ذڭْ إِبْرِيذنْ.
ثِيڒْمشْثْ نْسنْ ثڒْصقْ خْ يخْسَانْ نْسنْ،
ثُوژغْ، ثذْوڒْ أَمْ ؤُكشُّوضْ.
9 ثِيث. إِحْڒَا إِنِّي إِتّْوَانْغنْ س سِّيفْ،
خْ ينِّي إِتّْوَانْغنْ س ڒَاژْ،
مَاغَارْ نِيثْنِي أَذْ فسْينْ أَمْ ينِّي إِتّْوَاسْنُوقّْبنْ،
س ونْقَاسْ ن صَّابثْ ن ييَّارْ.
10 يُوذْ. إِفَاسّنْ ن ثمْغَارِينْ نِّي ثُوغَا إِتّْحِينَّانْ قْبڒْ،
سّْننَّانْ إِ إِحنْجِيرنْ نْسنْ.
نِيثْنِي ذوْڒنْ أَسنْثْ ذ مَاشَّا،
زِي سِّيبّثْ ن ثْرژِّيثْ ن يدْجِيسْ ن ڒْڭنْسْ إِنُو.
11 كَافْ. سِيذِي يَارْخُو إِ وسْعَارْ نّسْ،
إِسّْفَارّغْ ڒْحَاذُوقْ ن وغْضَابْ نّسْ.
نتَّا إِسَّارْغْ ثِيمسِّي ذِي صِيهْيُونْ،
ثِيمسِّي ثنِّي إِشِّينْ ذْسُوسَا نّسْ.
12 لَامِيذْ. عمَّارْصْ وَارْ ثتّْغِيڒْ إِ إِجدْجِيذنْ ن ثمُّورْثْ ذ إِمزْذَاغْ ن دُّونشْثْ،
أَقَا أَغْرِيمْ ذ ڒعْذُو أَذْ د-أَذْفنْ غَارْ ثوُّورَا ن ؤُرْشَالِيمْ.
13 مِيمْ. ذ مَانْ أَيَا ذِي سِّيبّثْ ن دّْنُوبْ ن إِنَابِييّنْ نّسْ،
ؤُ ذِي سِّيبّثْ ن ڒْمُوعْصِييّثْ ن إِكهَّاننْ نّسْ،
إِنِّي إِسِّيزّْڒنْ إِذَامّنْ ن إِمْسڭَّاذنْ ذِي ڒْوسْثْ نّسْ.
14 نُونْ. ثتّْلِيعنْ أَمْ إِذَارْغَاڒنْ ذڭْ إِبْرِيذنْ،
مسْڒنْ س إِذَامّنْ،
أَڒَامِي وَارْ إِزمَّارْ ؤُڒَا ذ إِجّنْ أَذْ إِحَاذَا أَرُّوضْ نْسنْ.
15 سَامِيخْ. ”أَڭّْوجمْ، أَقَا-ث إِخْمجْ!“،
تّْڒَاغَانْ خَاسنْ:
”أَڭّْوجمْ، أَڭّْوجمْ، وَارْ ث تّْحَاذَامْ!“
ؤُشَا خنِّي أَروْڒنْ، قِّيمنْ ودَّارنْ.
إِتّْوَانَّا جَارْ ڒڭْنُوسْ:
”نِيثْنِي وَارْ زمَّارنْ أَذْ قِّيمنْ ذِينْ عَاذْ كْثَارْ!“
16 بِي. أَغمْپُوبْ ن سِيذِي يَاريّشْ إِ-ثنْ،
وَارْ إِقِّيمْ أَذْ ذَايْسنْ إِخْزَارْ عَاذْ.
ثُوغَا وَارْ غَارْسنْ أَوقَّارْ إِ إِكهَّاننْ،
إِوسُّورَا وَارْ ذ أَسنْ سّشْننْ أَحِينِّي.
17 عَايِينْ. ڒبْذَا تّفْشِيڒنْثْ ثِيطَّاوِينْ نّغْ، ؤُمِي خْزَارنْثْ غَارْ ثْوِيزَا.
ثُوغَا-ث بَاطڒْ!
غَارْ مَارَّا ؤُرَاجِي نّغْ نتّْرَاجَا إِجّْ ن ڒْڭنْسْ
إِ وَارْ إِزمَّارنْ أَذْ إِسّنْجمْ. ▪
18 ثْسَاذِي. نِيثْنِي حْصَارنْ أَنغْ،
أَڒَامِي وَارْ نقِّيمْ نْزمَّارْ أَذْ نُويُورْ خْ وَازَّاينْ نّغْ.
قطُّو نّغْ ثُوغَا يِيوضْ-د،
ؤُسَّانْ نّغْ قْضَانْ،
وَاهْ، قطُّو نّغْ يُوسَا-د.
19 قُوفْ. إِنِّي ذ أَنغْ إِضفَّارنْ
ثُوغَا فْسُوسنْ خْ إِڭِيذَارنْ ذڭْ ؤُجنَّا.
نِيثْنِي ؤُژّْڒنْ خَانغْ خْ إِذُورَارْ،
ڭِّينْ أَنغْ ثَاخْشفْثْ ذِي ڒخْڒَا.
20 رِيخْ. نّفْسْ ن ونْزَارنْ نّغْ، لْمَاسِيحْ ن سِيذِي،
إِتّْوَاحبّسْ ذِي ثْخشْفِينْ نْسنْ،
ونِّي خْ ننَّا:
”أَذْ ندَّارْ جَارْ ڒڭْنُوسْ ذِي ثِيڒِي نّسْ!“
21 شِينْ. سْڒِيوْڒوْ ؤُ فَارْحْ، أَ ثَايدْجِيثْ ن إِذُومْ،
ثنِّي إِزدّْغنْ ذِي ثمُّورْثْ ن عُوصْ!
مَاشَا ؤُڒَا ذ شمْ أَذْ غَارمْ د-يَاسْ ڒْكَاسْ،
شمْ أَذْ زَّايسْ ثسّْشَارذْ،
ؤُ أَذْ ثتّْوَاعَارِّيذْ.
22 ثَاوْ. غَارْ ڒْمُوعْصِييّثْ نّمْ أَذْ يِيڒِي ؤُنڭَّارْ، أَ ثَايدْجِيثْ صِيهْيُونْ!
نتَّا وَارْ إِ شمْ إِتّْحوِّيسْ عَاذْ.
مَاشَا نتَّا أَذْ زَّايمْ إِخدْجصْ ڒْمُوعْصِييّثْ نّمْ، أَ ثَايدْجِيثْ إِذُومْ!
نتَّا أَذْ إِعَارَّا خْ دّْنُوبْ نّمْ.