‏1 عْقڒْ، أَ سِيذِي، خْ مِينْ إِ ذ أَنغْ إِمْسَارنْ،

خْزَارْ-د ؤُ وَاڒَا ڒْحڭْرَا نّغْ.

‏2 ثوْضَا ثسْغَارْثْ ن ڒْوَارْثْ نّغْ إِ إِبَارَّانِييّنْ،

ؤُڒَا ذ ثُوذْرِينْ نّغْ رُوحنْثْ ت غَارْ مِيدّنْ.

‏3 نشِّينْ نذْوڒْ ذ إِيُوجِيڒنْ بْڒَا بَابَاثْنغْ،

ثِييمَّاثِينْ نّغْ ذوْڒنْثْ أَمْ ثِيجَّاڒْ.

‏4 أَمَانْ نّغْ نْسسّْ إِ-ثنْ س تّْمنْيَاثْ،

أَكشُّوضْ نّغْ نتّْخدْجَاصْ خَاسْ.

‏5 ضفَّارنْ أَنغْ خْ يِيرِي نّغْ،

نشِّينْ نمُّوثْ س ڒْوحْڒَانْ،

مَاشَا وَارْ ذ أَنغْ جِّينْ أَرَّاحثْ.

‏6 أَقَا نْسَارّحْ أَفُوسْ غَارْ مِيصْرَا، ؤُڒَا غَارْ أَشُّورْ،

مَاحنْذْ أَذْ نجِّيونْ أَغْرُومْ.

‏7 إِبَابَاثنْ نّغْ خْضَانْ،

وَارْ دْجِينْ عَاذْ.

ؤُ نشِّينْ نَاربُّو ڒْمُوعْصِييّثْ نْسنْ.

‏8 إِمْسخَّارنْ دّبَّارَانْ خَانغْ،

ؤُڒَا ذ إِجّْ وَارْ ذ أَنغْ إِسّنْفكِّي زڭْ إِفَاسّنْ نْسنْ.

‏9 نشِّينْ نْسبّڒْ ثُوذَارْثْ نّغْ مَاحنْذْ أَذْ د-نَاوِي أَغْرُومْ نّغْ،

زِي سِّيبّثْ ن سِّيفْ ذِي ڒخْڒَا.

‏10 ثِيڒْمشْثْ نّغْ ثتّحْذُوذُوقْ أَمْ ثفْقُونْثْ،

زِي ڒْحَاذُوقْ ن ثْمسِّي ن ڒَاژْ.

‏11 سّْخَارْڭنْ ثِيمْغَارِينْ ذِي صِيهْيُونْ،

ؤُڒَا ذ ثِيعْزَارِييِّينْ ذِي ثْندَّامْ ن يَاهُوذَا.

‏12 ڒْحُوكَّامْ تّْوَايُويْڒنْ س إِفَاسّنْ نْسنْ،

ؤُذْمَاونْ ن إِوسُّورَا إِتّْوَاكّسْ أَسنْ ڒْعزّْ.

‏13 إِحُوذْرِييّنْ أَربُّونْ إِژْرَا ن ثْسِيرْثْ،

ؤُ إِحْرَامنْ تّْنقْرَاضنْ سَاذُو ڒحْمڒْ ن ؤُكشُّوضْ.

‏14 إِمْغَارنْ سّْبدّنْ أَغِيمِي ذِي ثوُّورَا ن ثنْذِينْثْ،

إِحُوذْرِييّنْ سّْبدّنْ زڭْ ؤُزنْزُونْ نْسنْ خْ إِفِيڒَانْ.

‏15 ثْودَّارْ ڒفْرَاحثْ ن وُوڒْ نّغْ،

شّْضِيحْ نّغْ س نُّوبْثَاثْ إِذْوڒْ ذ أَشْضَانْ.

‏16 ثوْضَا أَنغْ ثَاجّْ خْ ؤُزدْجِيفْ نّغْ.

ؤُشْثْ خَانغْ، مَاغَارْ نشِّينْ نخْضَا.

‏17 س ؤُينِّي يُوهڒْ وُوڒْ نّغْ،

س ؤُينِّي بَّارشْننْثْ ثِيطَّاوِينْ نّغْ،

‏18 زِي سِّيبّثْ ن وذْرَارْ ن صِيهْيُونْ نِّي إِتّْوَاخَارّْبنْ،

مَانِي تَّاوْينْ تَّارَّانْ إِشعْبَاونْ.

‏19 شكْ، أَ سِيذِي، أَذْ ثقِّيمذْ إِ ڒبْذَا،

ڒْكُورْسِي إِڭلّْذنْ نّكْ أَقَا-ث زِي جِّيڒْ أَڒْ جِّيڒْ.

‏20 مَايمِّي ثخْسذْ شكْ أَذْ أَنغْ ثتُّوذْ إِ ڒبْذَا؟

مَايمِّي إِ ذَايْنغْ ثْسمْحذْ قَاعْ أَنشْثْ ؤُيَا ن وُوسَّانْ؟

‏21 أَ سِيذِي، أَرّْ أَنغْ-د غَاركْ، حِيمَا أَذْ غَاركْ د-نذْوڒْ.

أَرّْ أَنغْ-د ؤُسَّانْ نّغْ ن جْذِيذْ أَمْ زِيشْ.

‏22 مَاغَارْ مَا س ثِيذتّْ ثنْضَارذْ أَنغْ كُوڒْشِي؟

مَا ثفُّوڭْمذْ خَانغْ أَمُّو قَاعْ؟