إِزْڒِي وِيسّْ ثْڒَاثَا - أَودّبْ ذ ؤُفوّجْ ن ؤُنَابِي
3
1 أَلِيفْ. نشّْ ذ أَرْيَازْ نِّي إِژْرِينْ ڒغْبنْ س وعْمُوذْ ن ؤُذُوقّزْ ن وغْضَابْ نّسْ.
2 أَلِيفْ. نتَّا إِنْذهْ أَيِي ؤُشَا إِجَّا أَيِي أَذْ ؤُيُورغْ ذِي ثَادْجسْثْ،
وَارْ إِدْجِي ذِي ثْفَاوْثْ.
3 أَلِيفْ. س ثِيذتّْ، نتَّا يَارَّا ڒبْذَا أَفُوسْ نّسْ ضِيدّْ إِنُو،
أَسّْ إِكْمڒْ.
4 بِيثْ. نتَّا إِضيّعْ أَيْسُومْ إِنُو ذ ثڒْمشْثْ إِنُو،
يَارْژَا إِخْسَانْ إِنُو.
5 بِيثْ. إِبْنَا ؤُ إِقُووَّارْ أَيِي،
س أَرّْهَاجْ ذ ثَامَارَا.
6 بِيثْ. ذِي طّْڒَامْ إِجَّا أَيِي زدّْغغْ،
أَمْ إِمتَّانْ ن وَاطَّاسْ زڭْ وَامِي.
7 ڭِيملْ. نتَّا إِبلّعْ أَيِي جَارْ ڒحْيُوضْ،
وَارْ زمَّارغْ أَذْ نجْمغْ.
إِسّذْقڒْ خَافِي سّْنَاسڒْ إِنُو ن نّْحَاسْ.
8 ڭِيملْ. عَاذْ مڒْمِي تّْڒَاغِيغْ ؤُ سْغُويُّوغْ،
نتَّا إِقِّيمْ إِبْكمْ غَارْ ثْژَادْجِيثْ إِنُو.
9 ڭِيملْ. س ثْصُوضَارْ إِنْجَارنْ إِبلّعْ خَافِي أَبْرِيذْ،
إِسّْفَارْغْ إِمسْرَاقْ إِنُو.
10 ذَالِيثْ. ثُوغَا نتَّا إِ نشّْ أَمْ دُّوبْ إِتّْحَامَانْ،
أَمْ وَايْرَاذْ ذڭْ إِمُوشَانْ إِنُّوفَارنْ.
11 ذَالِيثْ. نتَّا يُوژّڒْ خَافِي زڭْ وبْرِيذْ، إِمزّقْ أَيِي،
وَارْ ذ أَيِي إِجِّي شَا.
12 ذَالِيثْ. نتَّا إِسّمْحضْ ڒْقوْسْ نّسْ
ؤُشَا إِجَّا أَيِي أَذْ إِڒِيغْ ذ أَوَاضْ إِ فْڒِيثْشَا نّسْ.
13 هِي. فْڒِيثْشَاثْ زڭْ وقْرَابْ نّسْ
إِجَّا إِ-ثنْثْ أَذْ أَذْفنْثْ ذِي ثِيژَّاڒْ إِنُو.
14 هِي. ذوْڒغْ ذ ثَاسضْهَاشْثْ إِ مَارَّا ڒْڭنْسْ إِنُو،
ذ إِزْڒِي نْسنْ ن ؤُزَاوَارْ أَسّْ إِمُونْ.
15 هِي. نتَّا إِسّْجِّيونْ أَيِي س ثَارْزُوڭِي،
إِسّسُّو أَيِي س شِّيحْ.
16 وَاوْ. ثِيغْمَاسْ إِنُو إِجَّا إِ-ثنْثْ زعّْفنْثْ ذڭْ ؤُقَايَاسْ أَڒَامِي أَرْژِينْثْ،
إِسّغْضسْ أَيِي ذڭْ يِيغّذْ.
17 وَاوْ. شكْ ثسِّيڭّْوجذْ ڒعْمَارْ إِنُو خْ ڒهْنَا،
نشّْ تُّوغْ ثْشُونِي.
18 وَاوْ. نشّْ نِّيغْ: ”جّهْذْ إِنُو إِقْضَا،
ؤُڒَا ذ أَسِيثمْ إِنُو ذِي سِيذِي.“
19 زَايِينْ. عْقڒْ خْ ڒغْبنْ إِنُو ذ ثْمحْبَاسْثْ إِنُو،
خْ شِّيحْ ذ أَرّْهَاجْ.
20 زَايِينْ. ڒعْمَارْ إِنُو إِتّْخَارّصْ نِيشَانْ ذِي مَانْ أَيَا،
أَقَا إِشْضنْ ذَايِي.
21 زَايِينْ. أَيَا خْسغْ أَذْ ث أَرّغْ غَارْ وُوڒْ،
س ؤُينِّي سِّيثِيمغْ عَاذْ.
22 خِيثْ. س ثْمڭَّا ن ثْمخْسِيوْثْ إِشوَّارنْ ن سِيذِي،
أَقَا وَارْ نتّْوَاهلّكْ شَا،
مِينْزِي أَرّحْمثْ نّسْ عمَّارْصْ وَارْ ثْبدّْ.▪
23 خِيثْ. أَقَا-ت ذ جْذِيذْ كُوڒْ ضّْبحْ،
ڒَامَانْ نّكْ ذ أَمقّْرَانْ. ▪
24 خِيثْ. ثَاسْغَارْثْ إِنُو ذ سِيذِي، أَمُّو إِ إِقَّارْ ڒعْمَارْ إِنُو،
س ؤُينِّي تّْغِيمِيغْ سِّيثِيمغْ ذَايسْ. ▪
25 ثِيث. إِصْبحْ سِيذِي إِ ينِّي ذَايسْ إِسِّيثِيمنْ،
إِ ڒعْمَارْ نِّي خَاسْ يَارزُّونْ.
26 ثِيث. أَقَا مْلِيحْ أَرَاجِي س ؤُسِيثمْ غَارْ زَّاثْ،
ذِي ڒْهُوذْنثْ غَارْ ؤُسنْجمْ زِي سِيذِي.
27 ثِيث. مْلِيحْ إِ ورْيَازْ أَذْ يَارْپُو أَزَايْڒُو ذِي ثمْژِي نّسْ.
28 يُوذْ. أجّْ إِ-ث أَذْ إِقِّيمْ حَافِي، أَذْ إِسّغْذْ،
مَاغَارْ سِيذِي إِڭَّا إِ-ت خَاسْ.
29 يُوذْ. أجّْ إِ-ث أَذْ إِڭّْ أَقمُّومْ نّسْ ذِي ثْعجَّاجْثْ،
أَذْ يِينِي: ”أَذْ ثَاغْ إِدْجْ ڒَايَاسْ!“ ▪
30 يُوذْ. أجّْ إِ-ث أَذْ إِوْشْ أَمڭِّيزْ إِ ونِّي ث إِشَّاثنْ،
أجّْ إِ-ث أَذْ إِتّْوَاسْجِّيونْ س ؤُسحْقَارْ.
31 كَافْ. مِينْزِي سِيذِي إِنُو وَارْ إِنطَّارْ حذْ إِ ڒبْذَا،
32 كَافْ. مَاشَا مَاڒَا نتَّا إِسّشْضنْ حذْ،
أَذْ خَاسْ إِحِينّْ عَاوذْ،
عْلَاحْسَابْ ڒمْغَارثْ ن ثْمخْسِيوْثْ نّسْ إِشُووَّارنْ،
33 كَافْ. مَاغَارْ نتَّا وَارْ إِحصَّارْ نِيغْ إِسّشْضِينْ ثَارْوَا ن بْنَاذمْ س وُوڒْ.
34 لَامِيذْ. خْمِي إِ غَا ڒبْزنْ
مَارَّا إِمحْبَاسْ ن ثمُّورْثْ سَاذُو إِضَارنْ،
35 لَامِيذْ. خْمِي إِ غَا حَارّْفنْ ثَاسْغَارْثْ ن ورْيَازْ
زَّاثْ إِ وُوذمْ ن ؤُمْعُودْجِي خْ كُوڒْشِي،
36 لَامِيذْ. خْمِي إِ غَا قڒْبنْ دّعْوثْ ن بْنَاذمْ،
مَا زعْمَا سِيذِي إِنُو وَارْ إِتّْوِيڒِي مَانْ أَيَا؟
37 مِيمْ. مَانْ ونْ إِ إِقَّارنْ شَا ن ڒْحَاجّثْ ؤُشَا خنِّي ثمْسَارْ،
مَاڒَا وَارْ ت يُومُورْ سِيذِي إِنُو؟▪
38 مِيمْ. مَا وَارْ د-إِتِّيسْ زڭْ ؤُقمُّومْ ن ؤُمْعُودْجِي خْ كُوڒْشِي
مَارَّا مِينْ وَارْ إِحْڒِينْ ؤُڒَا ذ مَارَّا مِينْ إِصبْحنْ؟ ▪
39 مِيمْ. مَامّشْ إِتّْشثْشَا خنِّي بْنَاذمْ إِدَّارنْ عَاذْ؟
أجّْ مَاشَا أَرْيَازْ أَذْ إِشثْشَا زِي سِّيبّثْ ن دّْنُوبْ نّسْ.
40 نُونْ. أجّْ أَنغْ أَذْ نخْزَارْ إِبْرِيذنْ نّغْ، أَذْ ذَايْسنْ نَارْزُو،
ؤُ أجّْ أَنغْ أَذْ د-نذْوڒْ غَارْ سِيذِي.
41 نُونْ. أجّْ أَنغْ أَذْ نسّْڭعّذْ أَكْ-ذ إِفَاسّنْ نّغْ ؤُڒَا ذ وُوڒَاونْ نّغْ،
غَارْ أَربِّي ذڭْ ؤُجنَّا.
42 نُونْ. نشِّينْ نْعدَّا ؤُ نْغوّغْ،
شكْ وَارْ ثغْفَارذْ شَا إِ ؤُيَا.
43 سَامِيخْ. شكْ ثْڒحّْفذْ أَنغْ ذڭْ وغْضَابْ ؤُ ثضْفَارضْ أَنغْ،
ثنْغِيذْ، وَارْ خَانغْ ثْحِيوْڒذْ شَا.
44 سَامِيخْ. ثْڒحّْفذْ إِخفْ نّكْ ذڭْ ؤُسيْنُو،
مَاحنْذْ أَذْ ثَافْ ثَاژَادْجِيثْ وَارْ ثْزمَّارْ أَذْ ثعْذُو.
45 سَامِيخْ. شكْ ثَارِّيذْ-د أَنغْ ذ ثَاخْمُوجِي ذ وفْرَاضْ
ذِي ڒْوسْثْ ن ڒڭْنُوسْ.
46 بِي. مَارَّا ڒْعذْيَانْ نّغْ
أَرْزْمنْ-د غَارْنغْ أَقمُّومْ نْسنْ.
47 بِي. ثِيڭّْوُوذَا ذ ثخْشفْثْ ذوْڒنْثْ ذ أَزْينْ زَّايْنغْ،
أَخَارّبْ ذ أَرْژِييّثْ.
48 بِي. زِي ثِيطَّاوِينْ إِنُو تَّازّْڒنْثْ إِمطَّاونْ،
خْ ثَارژِّيثْ ن يدْجِيسْ ن ڒْڭنْسْ إِنُو.
49 عَايِينْ. ثِيطّْ إِنُو ثقِّيمْ ثتَّازّڒْ س إِمطَّاونْ،
وَارْ ثتَّاريِّيحْ، وَارْ ثسّْبذِّي،
50 عَايِينْ. أَڒْ ذ إِ غَا إِسِّيجّْ سِيذِي زڭْ ؤُجنَّا، ؤُشَا أَذْ إِتّْوَاڒَا أَيَا.
51 عَايِينْ. ثِيطّْ إِنُو ثتّڭّْ أَيِي ڒحْرِيقْ ذِي ڒعْمَارْ إِنُو،
زِي سِّيبّثْ ن مَارَّا يسِّيسْ ن ثنْذِينْثْ إِنُو.
52 ثْسَاذِي. أَردّْفنْ أَيِي-د ڒْعذْيَانْ إِنُو س مِينْ غَارْسنْ،
أَمْ إِجّْ ن وجْضِيضْ، بْڒَا سِّيبّثْ.
53 ثْسَاذِي. نِيثْنِي سّْبكْمنْ ثُوذَارْثْ إِنُو ذڭْ وَانُو،
ؤُشَا نْضَارنْ أَژْرُو خَافِي.
54 ثْسَاذِي. أَمَانْ حمْڒنْ-د خْ ؤُزدْجِيفْ إِنُو،
نِّيغْ: ”أَقَا وَارْ قِّيمغْ دْجِيغْ!“
55 قُوفْ. أَ سِيذِي، نشّْ ڒَاغِيغْ خْ يِيسمْ نّكْ،
زِي ڒَادْجَاغْ ن وَانُو.
56 قُوفْ. شكْ ثسْڒِيذْ إِ ثْمِيجَّا إِنُو،
وَارْ تّقّنْ أَمزُّوغْ نّكْ زَّاثْ إِ ؤُزهَّارْ إِنُو،
زَّاثْ إِ إِغُويَّانْ إِنُو!
57 قُوفْ. شكْ ثُوسِيذْ-د غَارِي ذڭْ وَاسّْ إِ ذ أَشْ د-ڒَاغِيغْ،
ثنِّيذْ: ”وَارْ تّڭّْوذْ شَا!“
58 رِيخْ. شكْ، أَ سِيذِي، ثَارفْعذْ دّْعَاوِي خْ ڒعْمَارْ إِنُو،
شكْ ثْفكّذْ ثُوذَارْثْ إِنُو.
59 رِيخْ. أَ سِيذِي، ثژْرِيذْ دّدْجْ إِ ذَايِي إِڭِّينْ،
أَغْ أَيِي ثَاسْغَارْثْ إِنُو.
60 رِيخْ. شكْ ثژْرِيذْ مَارَّا أَخْڒَافْ نْسنْ،
مَارَّا مِينْ نْوَانْ ضِيدّْ إِنُو.
61 شِينْ. شكْ ثسْڒِيذْ ڒْحڭْرَا نْسنْ، أَ سِيذِي،
مَارَّا مِينْ نْوَانْ ضِيدّْ إِنُو،
62 شِينْ. أَوَاڒنْ نِّي د-إِتّفّْغنْ زِي جَارْ إِينْشِيشنْ ن يِينِّي خَافِي إِغوّْغنْ،
ؤُڒَا ذ ڒمْوَايَاڒْ نْسنْ ن ؤُخَارّصْ خَافِي أَسّْ إِمُونْ.
63 شِينْ. خْزَارْ غَارْ ؤُغِيمِي ذ ؤُبذِّي نْسنْ،
نشّْ ذ إِزْڒِي نْسنْ ن ؤُسْثهْزِي.
64 ثَاوْ. أَ سِيذِي، خدْجصْ إِ-ثنْ،
عْلَاحْسَابْ ثِيمڭَّا ن إِفَاسّنْ نْسنْ.
65 ثَاوْ. سْذَاغْرڒْ ؤُڒَاونْ نْسنْ،
أجّْ نّعْڒثْ نّكْ أَذْ د-خَاسنْ ثوْضَا.
66 ثَاوْ. ضْفَارْ إِ-ثنْ ذڭْ وغْضَابْ نّكْ،
قْضَا خَاسنْ زِي سَاذُو ؤُجنَّا ن سِيذِي.