‏1 ”مَاڒَا نشّْ ڭُّورْ أَذْ شَارّْعغْ أَكِيذكْ، أَ سِيذِي، شكْ أَذْ ثْبَانذْ ذ أَمْسڭّذْ. قَاعْ أَمنِّي تّخْسغْ نشّْ أَذْ سِيوْڒغْ أَكِيذكْ خْ ڒحْكَامَاثْ نّكْ: مَايمِّي أَبْرِيذْ ن إِعفَّاننْ إِسڭّمْ، ؤُ مَايمِّي إِغدَّارنْ ڒبْذَا ذِي أَرَّاحثْ؟ ^▪   ‏2 شكْ ثژُّوذْ ثنْ ؤُ نِيثْنِي وْثِينْ إِژوْرَانْ، نِيثْنِي غمْينْ-د ؤُ إِوْينْ-د ڒْغِيدْجثْ. شكْ أَقَا ثُوذْسذْ أَقمُّومْ نْسنْ، مَاشَا ثِيڭّْوجذْ خْ ثِيژَّاڒْ نْسنْ. ^▫  ▪  

‏3 شكْ، أَ سِيذِي، ثسّْنذْ أَيِي، ثتّْوَارِيذْ أَيِي ؤُ ثْقدْجْبذْ ؤُڒْ إِنُو، مَا أَقَا-ث أَكِيذكْ. جْبذْ إِ-ثنْ أَمْ وُودْجِي إِ ثْغَارْصْثْ ؤُ سْقدّسْ إِ-ثنْ إِ وَاسّْ ن ڒْموْثْ. ^▫  ▪   ‏4 مشْحَاڒْ عَاذْ إِ غَا ثكّْ ثمُّورْثْ ثشْضنْ ؤُ أَفْسُو أَزِيزَا أَذْ يَاژغْ ذڭْ إِيَّارْ مَارَّا؟ س ثُوعفّْنَا ن يِينِّي ذِينْ إِزدّْغنْ، ضيّْعنْ ڒْمَاڒْ ذ يجْضَاضْ، مَاغَارْ نِيثْنِي قَّارنْ: ’نتَّا وَارْ إِتّْوِيڒِي أَنڭَّارْ نّغْ.“ ^▪  

‏5 ”مَاڒَا ثُوزّْڒذْ أَكْ-ذ إِنِّي إِتَّازّْڒنْ خْ إِضَارنْ، نِيثْنِي سَّاحَارنْ شكْ، مَامّشْ ثخْسذْ أَذْ ثڭّذْ خنِّي حَامَاثْ أَكْ-ذ إِيْسَانْ؟ مَاڒَا ثتَّاشِيذْ أَقَا شكْ ذِي ڒَامَانْ مْغِيرْ ذِي ثمُّورْثْ ن ڒهْنَا، مَامّشْ إِ غَا ثڭّذْ خنِّي ذِي شْبَارْقْ إِقّْننْ ن يغْزَارْ ن لْ'ؤُرْذُونْ؟ ‏6 مَاغَارْ ؤُڒَا ذ أَيْثْمَاشْ ذ ثَادَّارْثْ ن بَابَاشْ، ؤُڒَا ذ نِيثْنِي غدَّارنْ شكْ، ؤُڒَا ذ نِيثْنِي سْغُويُّونْ س جّْهذْ أَوَارْنِي أَشْ. وَارْ ثنْ تِّيقِّيمْ، وَاخَّا سَّاوَاڒنْ أَكِيذكْ مْلِيحْ.“ ^▪  

‏7 ”نشّْ سمْحغْ ذِي ثَادَّارْثْ إِنُو، نشّْ نْضَارغْ ثَاسْغَارْثْ إِنُو. ثنِّي إِسّْعِيزّْ ڒعْمَارْ إِنُو سلّْمغْ ت ذڭْ ؤُفُوسْ ن ڒْعذْيَانْ نّسْ. ‏8 ثَاسْغَارْثْ إِنُو ثذْوڒْ-د أَكِيذِي أَمْ إِجّْ ن وَايْرَاذْ ذڭْ وزْغَارْ. ثسّْڭعّذْ-د أَكِيذِي ثْمِيجَّا نّسْ، خْ ؤُينِّي نشّْ ذوْڒغْ شَارّْهغْ ت. ^▫   ‏9 ثَاسْغَارْثْ إِنُو إِ نشّْ أَمْ ؤُجْضِيضْ إِبقّْضنْ إِتّْكشَّاضنْ، تّنّْضنْ أَسْ إِجْضَاضْ إِكشّْضنْ. كَّارمْ، مُونمْ-د، مَارَّا ڒْمَاڒْ ن ييَّارْ، أجّْ إِ-ثنْ أَذْ د-أَسنْ حِيمَا أَذْ شّنْ! ^▪  

‏10 إِمكْسَاونْ أَطَّاسْ خَارّْبنْ أَمَارْجُوعْ إِنُو ن ؤُضِيڒْ، عفْسنْ خْ ييَّارْ إِنُو، أَقَا أَرِّينْ إِيَّارْ إِعِيزّنْ إِنُو ذ إِجّْ ن ڒخْڒَا إِخْوَا. ^▫  ▪  

‏11 أَرِّينْ إِيَّارْ ذ ڒْخِيرْبثْ، أَقَا إِتّْوَاخَارّبْ، إِزّڒْ زَّاثِي إِشْضنْ. مَارَّا ثَامُّورْثْ ثْخَارّبْ مِينْزِي ؤُڒَا ذ إِجّْ وَارْ ذ أَسْ يشْقِي.

‏12 خْ مَارَّا ثِيوْرِيرِينْ إِقشَّارنْ ذِي ڒخْڒَا ؤُسِينْ-د إِمْثحَّايّنْ، مَاغَارْ سِّيفْ إِصَارْضْ زِي طَّارْفْ ن ثمُّورْثْ أَڒْ طَّارْفْ نّغْنِي ن ثمُّورْثْ. وَارْ ذِينْ بُو ڒهْنَا إِ مَارَّا دَّاثْ.

‏13 نِيثْنِي زَارْعنْ إِرْذنْ، مَاشَا مْجَارنْ إِسنَّاننْ، نِيثْنِي ؤُحْڒنْ، مَاشَا بْڒَا إِنَاذَانْ. نِيثْنِي أَذْ سّضْحَانْ خْ صَّابثْ نْومْ زِي سِّيبّثْ ن ڒْحَاذُوقْ ن وغْضَابْ ن سِيذِي.“ ^▪  

‏14 ”أَمُّو إِ إِقَّارْ سِيذِي: ’مَارَّا أَجَّارنْ إِنُو إِعفَّاننْ نِّي إِ غَا إِحَاذَانْ ثَاسْغَارْثْ إِنُو إِ وْشِيغْ إِ ڒْڭنْسْ إِنُو إِسْرَائِيل ذ ثَاسْغَارْثْ، خْزَارْ، نشّْ أَذْ ثنْ قڒْعغْ زِي ثمُّورْثْ، مَاشَا ثَادَّارْثْ ن يَاهُوذَا أَذْ ت قڒْعغْ زِي ڒْوسْثْ نْسنْ. ^▪  

‏15 أَوَارْنِي ڒَامِي ثنْ قڒْعغْ، أَذْ د-ذوْڒغْ ؤُ أَذْ خَاسنْ حِينّغْ ؤُشَا نشّْ أَذْ ثنْ أَرّغْ أَذْ عقْبنْ، كُوڒْ إِجّْ غَارْ ثسْغَارْثْ نّسْ ؤُ كُوڒْ إِجّْ غَارْ ثمُّورْثْ نّسْ.

‏16 خْمِي إِ غَا ڒمْذنْ س ثِيذتّْ إِبْرِيذنْ ن ڒْڭنْسْ إِنُو مَاحنْذْ أَذْ جَّادْجنْ غَارْ يِيسمْ إِنُو: ’س ثِيذتّْ أَمْ إِدَّارْ سِيذِي!‘، أَمشْنَاوْ مَامّشْ نِيثْنِي سّْڒمْذنْ ڒْڭنْسْ إِنُو مَاحنْذْ أَذْ جَّادْجنْ غَارْ بَاعْلْ، خنِّي أَذْ تّْوَاسْبدّنْ نِيثْنِي ذِي ڒْوسْثْ نْ ڒْڭنْسْ إِنُو.

‏17 مَاشَا مَاڒَا نِيثْنِي وَارْ تّخْسنْ أَذْ سْڒنْ، خنِّي نشّْ أَذْ قڒْعغْ ڒْڭنْسْ نِّي ؤُشَا أَذْ ثنْ أَردّْدْجغْ، أَمُّو إِ إِقَّارْ سِيذِي.“ ^▪