‏1 ”أَمُّو إِ ذ أَيِي إِنَّا سِيذِي: ’ؤُيُورْ، سغْ إِ يِيخفْ نّكْ إِجّْ ن وبْيَاسْ ن ڒقْطنْ ؤُشَا بيْسْ إِ-ث خْ ثجْعِينَّاثِينْ نّكْ، مَاشَا وَارْ ث ثجِّي أَذْ يَاذفْ ذڭْ وَامَانْ!‘ ‏2 نشّْ سْغِيغْ إِجّْ ن وبْيَاسْ عْلَاحْسَابْ أَوَاڒْ ن سِيذِي ؤُشَا بيْسغْ ث خْ ثجْعِينَّاثِينْ إِنُو. ‏3 خنِّي يُوسَا-د غَارِي وَاوَاڒْ ن سِيذِي إِ ثْوَاڒَا وِيسّْ ثْنَاينْ، إِنَّا: ‏4 ”كْسِي أَبْيَاسْ إِ ثسْغِيذْ، ونِّي ثْبيْسذْ خْ ثجْعِينَّاثِينْ نّكْ ؤُشَا كَّارْ، ؤُيُورْ غَارْ يغْژَارْ ن لْفُورَاطْ ؤُشَا فَّارْ إِ-ث ذِينِّي ذِي ثَازّشْثْ ن جَّارْفْ.“ ‏5 نشّْ ؤُيُورغْ ؤُشَا فَّارغْ ث غَارْ لْفُورَاطْ، أَمْ مَامّشْ ثُوغَا ذ أَيِي يُومُورْ سِيذِي.

‏6 أَوَارْنِي إِ وَاطَّاسْ ن وُوسَّانْ إِنَّا أَيِي سِيذِي: ”كَّارْ، ؤُيُورْ غَارْ لْفُورَاطْ ؤُشَا كْسِي سّنِّي أَبْيَاسْ نِّي ذ أَشْ ؤُمُورغْ مَاحنْذْ أَذْ ث ثفَّارذْ ذِينِّي.“ ‏7 خنِّي ؤُيُورغْ غَارْ لْفُورَاطْ ؤُشَا غْزِيغْ ؤُ كّْسغْ-د أَبْيَاسْ زڭْ ومْشَانْ مَانِي ث ثُوغَا فَّارغْ. خْزَارْ، أَبْيَاسْ إِضيّعْ، وَارْ إِدْجِي مِينْ ؤُمِي غَا إِنْفِيعْ عَاذْ.

‏8 خنِّي يُوسَا-د غَارِي وَاوَاڒْ ن سِيذِي، إِنَّا: ‏9 ”أَمُّو إِ إِقَّارْ سِيذِي: ’أَمُّو إِ غَا سّْضيّْعغْ نّْفَاخثْ ن يَاهُوذَا ؤُڒَا ذ نّْفَاخثْ ثَامقّْرَانْثْ ن ؤُرْشَالِيمْ.

‏10 ڒْڭنْسْ-أَ أَعفَّانْ ونِّي يُوڭِينْ أَذْ إِسڒْ غَارْ وَاوَاڒنْ إِنُو، ونِّي إِضفَّارنْ ڒقْسَاحثْ ن وُوڒْ نّسْ ؤُشَا يَاردّفْ إِربِّيثنْ نّغْنِي مَاحنْذْ أَذْ ثنْ إِسخَّارْ ؤُ أَذْ أَسنْ يَاضَارْ، ڒْڭنْسْ-أَ أَذْ إِذْوڒْ أَمشْنَاوْ أَبْيَاسْ-أَ إِ وَارْ إِنفّْعنْ إِ وَالُو عَاذْ.

‏11 مَاغَارْ مَامّشْ إِقّنْ وبْيَاسْ إِ ثجْعِينَّاثِينْ ن ورْيَازْ، أَمُّو إِ أَرِّيغْ مَارَّا ثَادَّارْثْ ن إِسْرَائِيل ذ مَارَّا ثَادَّارْثْ ن يَاهُوذَا أَذْ غَارِي قّْننْثْ، أَمُّو إِ إِقَّارْ سِيذِي، مَاحنْذْ أَذْ إِڒِينْثْ ذ ڒْڭنْسْ إِنُو ذ يِيسمْ إِنُو ذ شَّانْ إِنُو ذ ؤُعُودْجِي إِنُو، مَاشَا نِيثْنِي وَارْ سْڒِينْ شَا.“

‏12 ”شكْ أَذْ أَسنْ ثِينِيذْ أَوَاڒْ-أَ: ’أَمُّو إِ إِقَّارْ سِيذِي، أَربِّي ن إِسْرَائِيل: قَاعْ أَغَارَّافْ أَذْ إِتّْوَاشُّورْ س بِينُو. خنِّي أَذْ أَشْ إِنِينْ نِيثْنِي ’مَا زعْمَا نشِّينْ وَارْ نسِّينْ سِيمَانْثْ نّغْ نِيشَانْ، أَقَا قَاعْ أَغَارَّافْ أَذْ إِتّْوَاشُّورْ س بِينُو؟‘

‏13 خنِّي أَذْ ذ أَسنْ ثِينِيذْ: ’أَمُّو إِ إِقَّارْ سِيذِي: خْزَارْ، نشّْ أَذْ أَرّغْ أَذْ سْشَارنْ مَارَّا إِمزْذَاغْ ن ثمُّورْثْ-أَ، ؤُڒَا ذ إِجدْجِيذنْ نِّي إِقِّيمنْ خْ ڒْعَارْشْ ن ذَاوُوذْ، ؤُڒَا ذ إِكهَّاننْ ذ إِنَابِييّنْ ذ مَارَّا إِمزْذَاغْ ن ؤُرْشَالِيمْ.

‏14 نشّْ أَذْ ثنْ وْثغْ ذِي إِوثْوِيثنْ، إِجّْ أَكْ-ذ ونّغْنِي، إِبَابَاثنْ مُوننْ أَكْ-ذ إِحنْجِيرنْ، أَمُّو إِ إِقَّارْ سِيذِي. نشّْ وَارْ تّْحِينِّيغْ، وَارْ سّْعِيزِّيغْ ؤُ وَارْ أَرحّْمغْ مَاحنْذْ وَارْ ثنْ تّْضيِّيعغْ.‘ “

‏15 ”سْڒمْ ؤُ وْشمْ أَمزُّوغْ، وَارْ تّْنفْخمْ، مَاغَارْ سِيذِي إِسِّيوڒْ.

‏16 وْشمْ شَّانْ إِ سِيذِي، أَربِّي نْومْ، قْبڒْ إِ د غَا ثَاسْ ثَادْجسْثْ ؤُ قْبڒْ إِ غَا نْقَارْضنْ إِضَارنْ نْومْ خْ إِذُورَارْ إِبُّوبْسنْ، أَمْ ثتّْرَاجَامْ ثَافَاوْثْ، وَاخَّا نتَّا أَذْ ت يَارّْ ذ ثِيڒِي ن ؤُنُورِي ؤُڒَا ذ أَسيْنُو إِبُّومْبسْ. ^▪  

‏17 مَاشَا مَاڒَا كنِّيوْ وَارْ ثسْڒِيمْ عَاذْ، خنِّي أَذْ إِرُو ڒعْمَارْ إِنُو ذِي ثْنُوفّْرَا خْ نّْفَاخثْ نْومْ، أَذْ إِكْسِي ذڭْ إِمطَّاونْ، ؤُشَا أَذْ د-سّهْوَانْ إِمطَّاونْ زِي ثِيطَّاوِينْ إِنُو، مَاغَارْ ثَاحِيمَارْثْ ن سِيذِي أَقَا ثتّْوَانْذهْ ذِي ثْمحْبَاسْثْ.“ ^▪  

‏18 ”إِنِي إِ ؤُجدْجِيذْ ذ يمَّاسْ ن ؤُجدْجِيذْ: ’سْوَاضْعمْ إِخفْ نْومْ، قِّيممْ ذڭْ ومْشَانْ إِهْوَا، مَاغَارْ تَّاجْ نْومْ إِشُووَّارنْ ثوْضَا أَومْ-د خْ ؤُزدْجِيفْ.‘

‏19 تّْوَابلّْعنْثْ ثْندَّامْ ن ثمُّورْثْ ن لْجَانُوبْ، ؤُشَا ؤُڒَا ذ إِجّْ وَارْ ثنْثْ يَارزّمْ. أَقَا إِتّْوَانْذهْ مَارَّا يَاهُوذَا، إِتّْوَانْذهْ إِمُونْ. ‏20 سْڭعّْذمْ ثِيطَّاوِينْ نْومْ، ؤُ خْزَارمْ، مَانْ ونْ إِ د-يُوسِينْ زِي شَّامَالْ! مَانِي ثدْجْ ثْحِيمَارْثْ إِ ذ أَمْ إِمّوْشنْ، ؤُدْجِي نّمْ إِشوَّارنْ؟ ^▫   ‏21 مِينْ إِ غَا ثِينِيذْ مَاڒَا نتَّا إِتّڭّْ إِنِّي إِ ثسّْڒمْذذْ مَاحنْذْ أَذْ إِڒِينْ ذ إِمدُّوكَّاڒْ نّمْ إِعِيزّنْ ذ أَزدْجِيفْ خَامْ؟ مَا وَارْ شمْ د-منّْعنْ ڒوْجعْ أَمْ إِشْثْ ن ثمْغَارْثْ إِتَّارْونْ؟‘ “

‏22 ”خْمِي إِ غَا ثِينِيذْ ذڭْ وُوڒْ نّمْ: ’مَايمِّي إِ ذ أَيِي إِڒْقفْ مَارَّا أَيَا؟‘، سّنْ أَقَا: ’خْ ؤُبَارُّو ن ڒْمُوعْصِييّثْ نّمْ تّْوَاسْڭعّْذنْثْ خَامْ ثِيمَّاوِينْ ن وَارُّوضْ، تّْوَاذدْجنْ إِنِيرْزنْ نّمْ‘. ^▪   ‏23 مَا إِزمَّارْ إِجّْ ن ورْيَازْ زِي ثمُّورْثْ ن كُوشْ أَذْ إِبدّڒْ سْمخْ ن ثڒْمشْثْ نّسْ؟ نِيغْ أَغِيڒَاسْ أَرقِّيعنْ نّسْ؟ مَا ثْزمَّارمْ ؤُڒَا ذ كنِّيوْ خنِّي أَذْ ثْعذْڒمْ، كنِّيوْ إِنِّي إِنُّومنْ ثُوعفّْنَا. ‏24 س ؤُينِّي نشّْ أَذْ ثنْ زُوزَّارغْ أَمْ ؤُڒُومْ نِّي إِطَّاونْ س ؤُصُوضِي ن ؤُسمِّيضْ ن ڒخْڒَا. ^▫   ‏25 وَا ڭُّورْ أَذْ يِيڒِي ذ زّْهَارْ نّمْ إِ ذ أَمْ د-إِكَّارنْ زَّايِي، أَمُّو إِ إِقَّارْ سِيذِي، مِينْزِي شمْ ثتُّوذْ أَيِي ؤُ ثتّشْڒذْ خْ إِخَارِّيقنْ. ‏26 خنِّي ؤُڒَا ذ نشّْ أَذْ سّْڭعّْذغْ إِبحْرُورنْ ن وَارُّوضْ نّمْ غَارسْ أَڒْ ثِيوَا أَغمْپُوبْ نّمْ ؤُشَا أَذْ ژَترنْ ڒفْضِيحثْ نّمْ: ‏27 زِّينَا نّمْ ذ ؤُسْنحْنحْ إِنزْرنْ نّمْ، فَارْقْ-شّْغڒْ نّمْ إِنْفضْحنْ. خْ ثوْرِيرِينْ ؤُ ذڭْ إِيَّارْ ژْرِيغْ نّْعَاوَاثْ نّمْ ن صَّانَامْ. ؤُشْثْ خَامْ، أَ ؤُرْشَالِيمْ، وَارْ ثتّْوَاسِيزْذِيڭذْ شَا! أَڒْ مڒْمِي عَاذْ أَوَارْنِي مَانْ أَيَا؟“